A siobọno abọ ọsosuọ Efafa Akpọ Ọkpokpọ na evaọ ukpe 1950. Anwọ oke yena ze, ahwo jọ a nọ enọ jẹ ta ẹme kpahe Efafa Akpọ Ọkpokpọ a na no, keme evaọ eria jọ o wo ohẹriẹ no efafa Ebaibol efa. Ohẹriẹ nana o sae jọ usu eware nọ e rrọ obotọ na.

•   Obe nọ a re fievahọ. Iko-ebe anwae nọ egba-eriariẹ a kiẹ riwi ziezi nọ e rrọ gbagba a fa Ebaibol Efafa Akpọ Ọkpokpọ na no ze. Wo ohẹriẹ, a fa Ebaibol King James Version ọrọ ukpe 1611 na no iko-ebe nọ e nwane gba tere he ze. Yọ iko-ebe na i kri te enọ a rọ fa Ebaibol Efafa Akpọ Ọkpokpọ na ha.

•   Ẹgbagba. A fa Ebaibol Efafa Akpọ Ọkpokpọ na lele eme ọsosuọ nọ a kaki ro kere Ebaibol na, enọ a rọ ẹkwoma ẹzi Ọghẹnẹ kere. (2 Timoti 3:16) Fiki iwuhrẹ ahwo-akpọ, a jọ efafa Ebaibol buobu nwene ovuẹ Ẹme Ọghẹnẹ. Wọhọ oriruo, a rehọ edẹ-ova wọhọ Ọghẹnẹ hayo Olori nwene odẹ oma Ọghẹnẹ, Jihova.

•   A fa riẹ epanọ ọ ginẹ rrọ dẹẹ. Evaọ efafa Ebaibol jọ, a rẹ fa eme na evaọ oghẹrẹ ọfa nọ u wo ohẹriẹ no epanọ a ro kere ai. Rekọ evaọ Efafa Akpọ Ọkpokpọ na, a fa eme na lele epanọ e ginẹ rrọ dẹẹ evaọ eria nọ i je kiehọ hayo nọ i gbe ro nwene eme ẹvẹrẹ ọsosuọ nọ a ro kere Ebaibol na ha. Evaọ efafa Ebaibol nọ a jọ fa eme na evaọ oghẹrẹ nọ u wo ohẹriẹ no epanọ a ro kere ai, a sai fi eme obọrai họ iẹe hayo si eware jọ nọ i wuzou noi.

 Ebe nọ e rrọ eva riẹ hẹ. Evaọ Ebaibol ahwo ichọche Kathọlik gbe ichọche Eastern Orthodox, a ku ebe efa jọ kugbe Ebaibol na nọ ahwo jọ a re se Apocrypha. Rekọ ebe nana e jọ usu ebe nọ ahwo Ju a jẹrehọ họ, yọ Ebaibol na ọ ta kpahe ahwo Ju inọ “a mu evuẹ ọrẹri nọ i no obọ Ọghẹnẹ ze họ ae obọ.” (Ahwo Rom 3:1, 2) Fikiere, Efafa Akpọ Ọkpokpọ na avọ efafa Ebaibol ọgbọna efa a si ebe Apocrypha na no efafa rai.

 Eria ikere nọ e rrọ eva riẹ hẹ. Evaọ efafa Ebaibol jọ, a fi eria ikere gbe eme efa jọ ba ae, yọ eria nana e rrọ iko-ebe nọ e mai kri no ho. Fikiere, a fi rai họ Efafa Akpọ Ọkpokpọ na ha. Efefafa Ebaibol buobu evaọ oke mai na a bi fi eria ikere gbe eme efa yena fihọ efafa rai hi. Yọ otẹrọnọ a fi rai họ iẹe, a rẹ jọ obọ emuhọ Ebaibol rai ta nọ eme yena e rrọ iko-ebe anwae nọ e mai kri no ho. b

 Eme nọ i wo ohẹriẹ. Evaọ ẹsejọ, eme nọ a rẹ fa unọjọ utọjọ i re vẹ tere he yọ e sae lẹliẹ ahwo roro thọ. Wọhọ oriruo, enẹ a fa eme Jesu nọ e rrọ Matiu 5:3 na evaọ efafa Ebaibol buobu: “Oghale u te enọ i yogbe evaọ ẹzi.” (English Standard Version; King James Version; New International Version) Ahwo buobu a re wo otoriẹ eme na ha fikinọ a fa riẹ inọ “yogbe evaọ ẹzi,” yọ amọfa a re roro nọ Jesu ọ be ta nọ u wuzou gaga re a wo omaurokpotọ hayo jọ iyogbe. Rekọ ẹme nọ Jesu ọ be ta na họ, ma re wo evawere nọ ma tẹ riẹ nọ u fo re Ọghẹnẹ ọ kpọ omai. Ebaibol Efafa Akpọ Ọkpokpọ na ọ fa ẹme Jesu na gbagba enẹ, “enọ e riẹ nọ u fo re a riẹ Ọghẹnẹ.”​—Matiu 5:3. c

•   Evaọ ileta nọ ọgba-eriariẹ Ebaibol jọ nọ ọ rrọ ọfefafa nọ a re se Edgar J. Goodspeed o kere evaọ Akpegbivẹ 8, 1950, ọ ta kpahe Efafa Akpọ Ọkpokpọ ọrọ Ikereakere Griki Ileleikristi Na inọ: “Iruo nọ wha bi ru, epanọ iruo na e kẹre te, gbe epanọ wha bi ro ru iruo efafa rai lọlọhọ evaọ oghẹrẹ nọ ahwo a sai ro wo otoriẹ rai vevẹ, e were omẹ gaga. Me muẹrohọ nọ wha se iruo rai gboja gaga.”

•   Profẹsọ jọ nọ a re se Allen Wikgren nọ ọ rrọ University of Chicago o dhesẹ Efafa Akpọ Ọkpokpọ na fihọ Ebaibol nọ a rọ eme nọ ahwo a be ta nẹnẹ fa. Ọ ta nọ orọnikọ a fa eme riẹ no Ebaibol efa jọ ze he, ukpoye “a fa riẹ no iko-ebe ọsosuọ ze.”​—The Interpreter’s Bible, Uko I, ẹwẹ-obe avọ 99.

•   Ohwo Britain jọ nọ a re se Alexander Thomson nọ ọ rẹ kiẹ je kere kpahe efafa Ebaibol sa-sa, ọ ta kpahe Ebaibol Efafa Akpọ Ọkpokpọ ọrọ Ikereakere Griki Ileleikristi Na inọ: “Oghẹrẹ nọ a fa efafa na u dhesẹ nọ egba-uwuhrẹ Ebaibol nọ i wo onaa ziezi ae a fa riẹ. A daoma rehọ eme kpobi nọ Oyibo ọ sae rọ fa ẹme fa otofa ogbagba eme Griki na vevẹ.”​—The Differentiator, Ane 1952, ẹwẹ-obe avọ 52.

•   Okere-obe jọ nọ a re se Charles Francis Potter o muẹrohọ eware jọ nọ o roro nọ a fa oghẹrẹsa, rekọ ọ ta nọ: “Ahwo nọ a fodẹ edẹ rai hi nọ a fa Ebaibol yena, a daoma fa eme riẹ rọwokugbe iko-ebe nọ e mae rrọ gbagba, te erọ Griki gbe erọ Hibru wọhọ epanọ egba-eriariẹ i re ru.”​—The Faiths Men Live By, ẹwẹ-obe avọ 300.

•   Nọ Robert M. McCoy ọ kiẹ Efafa Akpọ Ọkpokpọ na riwi, ọ ta nọ o muẹrohọ eware jọ nọ o roro nọ e rrọ oghẹrẹ jọ gbe eware nọ o roro nọ e ginẹ rrọ ziezi. Ọ ta kpahe ọkiẹriwo na inọ: “Dede nọ ohwo ọ rẹ nya ku ebẹbẹ buobu evaọ efafa Ebaibol, oghẹrẹ nọ a fa Ọvọ Ọkpokpọ na u dhesẹ nọ a [Isẹri Jihova] gine wo eriariẹ je te ahwo nọ a rẹ sae fa Ebaibol.”​—Andover Newton Quarterly, Ọvo 1963, ẹwẹ-obe avọ 31.

•   Profẹsọ jọ nọ a re se S. MacLean Gilmour, ọ nwane rọwokugbe oghẹrẹ nọ a fa eme jọ họ evaọ Efafa Akpọ Ọkpokpọ na; ghele na ọ ta nọ ahwo nọ a fa riẹ “a riẹ epanọ a rẹ fa eme Griki gaga.”​—Andover Newton Quarterly, Azie 1966, ẹwẹ-obe avọ 26.

•   Nọ Thomas N. Winter nọ ọ joma te profẹsọ no ọ kiẹ Efafa Akpọ Ọkpokpọ na riwi no, onọ o rrọ abọjọ Kingdom Interlinear Translation of the Greek Scriptures, o te kere nọ: “Ogbẹgwae na o rehọ eme ọgbọna fa efafa na yọ eme na kpobi e rrọ gbagba.”​—The Classical Journal, Ane-Asoi 1974, ẹwẹ-obe avọ 376.

•   Profẹsọ Benjamin Kedar-Kopfstein nọ ọ rrọ ọgba-eriariẹ Hibru evaọ Israel, ọ ta evaọ ukpe 1989 nọ: “Nọ me te bi ru ekiakiẹ kpahe Ebaibol Hibru gbe efafa sa-sa, ẹsibuobu me re rri efafa Oyibo ọrọ Ebaibol nọ a se Efafa Akpọ Ọkpokpọ na. Oke kpobi me re muẹrohọ nọ a daoma fa Ebaibol nana vevẹ evaọ oghẹrẹ nọ ohwo ọ sai ro wo otoriẹ riẹ gbagba.”

•   Nọ Jason David BeDuhn nọ ọ rrọ profẹsọ nọ o re wuhrẹ eware egagọ ọ kiẹ efafa Ebaibol izii riwi no, o kere nọ: “Ebaibol NW [Efafa Akpọ Ọkpokpọ] na họ efafa nọ a mae fa gbagba evaọ usu Ebaibol nọ mẹ kiẹ riwi na.” Dede nọ ahwo gbe egba-eriariẹ Ebaibol buobu a roro nọ ohẹriẹ o rrọ Efafa Akpọ Ọkpokpọ na avọ efafa efa fikinọ ahwo nọ a fa riẹ na a wo iwuhrẹ obọrai, BeDuhn ọ ta nọ: “Ohẹriẹ nana o rrọ ere fikinọ a fa NW na gbagba wọhọ epanọ o ginẹ rrọ iko-ebe ọsosuọ nọ a ro kere Ọvọ Ọkpokpọ na.”​—Truth in Translation, ẹwẹ-obe avọ 163, 165.