Hvað óttast margir?

„Fólk þarf ekki að vera trúað til að halda að það stefni í stórhamfarir hjá mannkyninu.“ — STEPHEN O’LEARY, DÓSENT VIÐ HÁSKÓLANN Í SUÐUR-KALIFORNÍU. *

ERTU sammála orðunum hér að ofan? Í þessari greinasyrpu er fjallað um nokkrar ástæður þess að margir horfa með ugg og ótta til framtíðarinnar. En líka er bent á hvers vegna við megum treysta að lífið á jörðinni líði ekki undir lok. Það er ærin ástæða til að vera bjartsýnn þrátt fyrir ýmsar uggvænlegar staðreyndir sem þú átt eftir að lesa um.

Hættan á kjarnorkustyrjöld er veruleg. Árið 2007 stóð eftirfarandi í tímaritinu Bulletin of the Atomic Scientists: „Mannkynið hefur ekki staðið frammi fyrir svona ískyggilegum valkostum síðan fyrstu kjarnasprengjunum var varpað á Hírósíma og Nagasaki.“ Hvað bjó að baki þessum válegu orðum? Í tímaritinu kom fram að árið 2007 væru enn til um 27.000 kjarnavopn, þar af 2.000 sem „hægt væri að skjóta á loft með nokkurra mínútna fyrirvara“. Afleiðingarnar yrðu hrikalegar þótt ekki væru sprengdar nema örfáar af þessum sprengjum.

Hefur dregið úr hættunni á kjarnorkustyrjöld síðan 2007? Fimm helstu kjarnorkuveldin — Bandaríkin, Bretland, Frakkland, Kína og Rússland — hafa „annaðhvort sett upp ný kjarnavopnakerfi eða hafa tilkynnt að það sé á döfinni“. Þetta kemur fram í árbók Alþjóðlegu friðarrannsóknarstofnunarinnar í Stokkhólmi fyrir árið 2009. * Í árbókinni er því hins vegar haldið fram að þessi ríki séu ekki þau einu sem eigi kjarnavopn. Talið er að Indverjar, Pakistanar og Ísraelar eigi hverjir um sig á bilinu 60 til 80 kjarnasprengjur. Einnig er talið að á heimsvísu séu til taks alls 8.392 kjarnasprengjur sem bíði þess að þeim sé skotið á loft.

Loftslagsbreytingar geta valdið miklum hamförum. Í áðurnefndu tímariti, Bulletin of the Atomic Scientists, segir enn fremur:  „Hætturnar af völdum loftslagsbreytinga eru næstum jafn skelfilegar og af völdum kjarnavopna.“ Virtir vísindamenn taka undir þessar alvarlegu viðvaranir, þeirra á meðal Stephen Hawking, prófessor við Cambridge-háskóla, og sir Martin Rees, rektor Trinity College við Cambridge-háskóla. Þeir telja að óábyrg beiting tækninnar og áhrif manna á umhverfið geti valdið óafturkræfum breytingum á lífríki jarðar og jafnvel valdið því að siðmenningin líði undir lok.

Milljónir manna hafa áhyggjur af heimsendaspám. Ef slegin eru inn orðin „end of the world“ (heimsendir) og ártalið „2012“ í leitarvél á Netinu koma upp hundruð síðna með tilgátum þess efnis að heimsendir verði það ár. Ástæðan er sú að fornt dagatal Maya-indíána, sem kallað er „langa talningin“, tekur enda árið 2012. Margir virðast óttast að þetta sé einhvers konar vísbending um að siðmenningin í núverandi mynd líði undir lok það ár.

Margt trúarlega sinnað fólk telur að því sé spáð í Biblíunni að jörðin eigi eftir að farast í bókstaflegri merkingu. Þeir telja að allir hinir trúuðu fari þá til himna en aðrir menn verði látnir þjást í einhverri allsherjarringulreið á jörð eða þeim verði kastað í helvíti.

Er því virkilega haldið fram í Biblíunni að jörðin eigi eftir að eyðileggjast eða farast? Jóhannes postuli skrifaði: „Trúið ekki öllum sem segjast hafa andann, reynið þá heldur og komist að því hvort andinn sé frá Guði.“ (1. Jóhannesarbréf 4:1) Væri ekki ráð að draga fram Biblíuna, í stað þess að trúa bara því sem aðrir segja, og sjá með eigin augum hvað hún segir um endi veraldar? Niðurstaðan gæti komið þér á óvart.

[Neðanmáls]

[Rétthafi myndar á bls. 4]

Sveppaský: U.S. National Archives photo; fellibylur: WHO/​League of Red Cross og U.S. National Archives photo