Jeremía 40:1–16
40 Orðið sem kom til Jeremía frá Jehóva eftir að Nebúsaradan+ varðforingi hafði látið hann lausan í Rama.+ Hann hafði flutt hann þangað í handjárnum og þar var hann ásamt öllum útlögunum frá Jerúsalem og Júda sem átti að flytja til Babýlonar.
2 Varðforinginn tók Jeremía afsíðis og sagði við hann: „Jehóva Guð þinn boðaði að þessar hörmungar kæmu yfir þennan stað
3 og Jehóva hefur látið það sem hann sagði rætast af því að þið syndguðuð gegn Jehóva og hlýdduð honum ekki. Þess vegna hafa þessar hörmungar komið yfir ykkur.+
4 Nú leysi ég af þér handjárnin. Þér er velkomið að koma með mér til Babýlonar ef þú vilt. Ég skal sjá um þig. En ef þú vilt ekki koma með mér til Babýlonar skaltu ekki koma. Allt landið stendur þér til boða. Þú getur farið hvert sem þú vilt.“+
5 Þar sem Jeremía hikaði við að snúa til baka sagði Nebúsaradan: „Farðu aftur til Gedalja,+ sonar Ahíkams+ Safanssonar,+ sem konungur Babýlonar hefur sett yfir borgirnar í Júda. Þú getur búið hjá honum meðal fólksins eða farið hvert sem þú vilt.“
Varðforinginn gaf honum síðan nesti og gjöf og sendi hann burt.
6 Jeremía fór þá til Gedalja Ahíkamssonar í Mispa+ og bjó hjá honum meðal fólksins sem var eftir í landinu.
7 Allir herforingjarnir sem voru dreifðir um landið ásamt mönnum sínum fréttu nú að konungur Babýlonar hefði skipað Gedalja Ahíkamsson landstjóra og sett hann yfir fátæka fólkið í landinu sem hafði ekki verið flutt til Babýlonar, karla, konur og börn.+
8 Þeir fóru því til Gedalja í Mispa.+ Þetta voru þeir Ísmael+ Netanjason, Jóhanan+ og Jónatan Kareasynir, Seraja Tanhúmetsson, synir Efaí frá Netófa og Jesanja+ sonur Maakatíta og menn þeirra.
9 Gedalja, sonur Ahíkams Safanssonar, vann þeim og mönnum þeirra eið og sagði: „Verið óhræddir að þjóna Kaldeum. Verið um kyrrt í landinu og þjónið konungi Babýlonar. Þá mun ykkur ganga allt í haginn.+
10 Sjálfur ætla ég að búa áfram í Mispa til að vera fulltrúi ykkar gagnvart* þeim Kaldeum sem koma til okkar. En þið skuluð birgja ykkur upp af víni, sumarávöxtum og olíu og geyma það í kerum ykkar og setjast að í borgunum sem þið hafið lagt undir ykkur.“+
11 Allir Gyðingarnir sem voru í Móab, Ammón og Edóm og einnig þeir sem voru í öllum hinum löndunum fréttu líka að konungur Babýlonar hefði leyft nokkrum að vera eftir í Júda og sett yfir þá Gedalja, son Ahíkams Safanssonar.
12 Þessir Gyðingar sneru þá aftur frá öllum þeim stöðum sem þeir höfðu dreifst um og komu til Júda, til Gedalja í Mispa. Þeir söfnuðu mjög miklum birgðum af víni og sumarávöxtum.
13 Jóhanan Kareason og allir herforingjarnir sem voru dreifðir um landið komu til Gedalja í Mispa
14 og sögðu við hann: „Veistu ekki að Baalis konungur Ammóníta+ hefur sent Ísmael Netanjason til að drepa þig?“+ En Gedalja Ahíkamsson trúði þeim ekki.
15 Þá sagði Jóhanan Kareason við Gedalja í Mispa án þess að nokkur heyrði til: „Leyfðu mér að fara og drepa Ísmael Netanjason. Enginn mun komast að því. Hvers vegna ætti hann að drepa þig og hvers vegna ættu allir Júdamennirnir sem hafa safnast til þín að tvístrast og þeir sem eftir eru af Júdamönnum að líða undir lok?“
16 En Gedalja+ Ahíkamsson sagði við Jóhanan Kareason: „Þú skalt ekki gera þetta því að það sem þú segir um Ísmael er lygi.“
Neðanmáls
^ Orðrétt „til að standa frammi fyrir“.
