Kayat ti agsolsolo nga ina a ni Desicar ti agregular payunir tapno mapalawana ti ministeriona. Aggigian iti Venezuela, maysa a pagilian nga adu ti problemana iti ekonomia. Ngem determinado latta nga agpayunir, isu a kasta ti inaramidna. Maragragsakan iti panagpayunirna, ngem idi kuan, nangrugin ti COVID-19 pandemic.

 Idi rugrugi ti COVID-19 pandemic, marigatan ni Desicar a mangasaba gapu iti panagbalbaliw ti kasasaad. Marigatan nga agaramid iti surat. Saanna met a mausar ti videoconferencing iti ministeriona ta nakanginngina ti Internet iti lugarda. “Naupayak,” kunana. “Bigla a nagbaliw ti situasion ket saanakon a makapangasaba kas iti dati. Panagriknak, saanak nga epektibo kas regular payunir .”

 Ngem idi Enero 2021, inaprobaran ti sanga nga opisina dagiti Saksi ni Jehova iti Venezuela ti maysa nga espesial a kampania ti panangasaba. Nayurnos a maibrodkas dagiti napili a naibatay-Biblia a palawag publiko iti agarup 60 nga estasion ti radio ken 7 a channel ti TV bayat ti lima a ngudo ti lawas iti dayta a bulan. Naiparegta kadagiti kakabsat nga agawisda kadagiti interesado a mangbuya ken mangdengngeg kadagita. Nangted met ti sangay kadagiti saludsod ken teksto maipapan iti tunggal palawag a mabalin nga usaren dagiti kakabsat para iti letter writing ken phone witnessing. Kanayonanna, imparegta ti sangay ti panagusar iti text message iti ministerio—maysa a baro a pamay-an ti panangasaba para iti kaaduan a Saksi iti Venezuela.

 Eksayted ni Desicar a makiraman iti kampania. Uray no saanna pay nga inusar ti text message iti panangasabana, pinadasna dayta. Ngem kasapulanna ti tulong. “Saanak a nalaing nga agusar iti gadyet,” kuna ni Desicar. Nagpaisuro iti balasangna, ket di nagbayag, nakasaganan ni Desicar a makiraman iti kampania.

 Tineksan ni Desicar ti adu kadagiti am-ammona tapno awisenna ida a dumngeg kadagiti nairekord a palawag. Nasdaaw kadagiti resultana! Adu kadagiti inawisna ti dimngeg kadagiti palawag ken nagsaludsod kenkuana. Dadduma ti saan a nakangngeg ngem nagdamagda ken Desicar maipapan kadagiti palawag. “Inusarko dagiti nainotarko tapno mairanudko kadakuada dagiti palawag,” imbaga ni Desicar. “Saanak pay idi a nakapagreport iti nasursurok ngem 5 a panagsarungkar iti maysa a bulan, ngem idi nalpasen ti kampania, 112 ti naireportko!” a

 Inawis met ni Desicar ti saan a Saksi a kabsatna a kaarrubana a dumngeg kadagiti palawag iti radio. “Nasdaawak ta immanamong ti kabsatko,” kuna ni Desicar. “Kada Domingo iti alas 8:00 ti bigat, mapanak iti apartmentna ket agkaduakami a dumngeg. Adu ti saludsodna bayat ken kalpasan ti programa.” Immatender met ti kabsat ni Desicar iti Memorial ti ipapatay ni Jesus babaen ti videoconferencing, ken impausarna ken Desicar ti Internet-na tapno makapangasaba.

 “Agyamyamanak unay ken Jehova,” kuna ni Desicar. “Agyamyamanak met kadagiti panglakayen iti kongregasionmi ta kanayon a parparegtaendak. Tinulongandak tapno mapasublik ti ragsakko iti ministerio.” (Jeremias 15:16) Payunir latta ni Desicar ken agtultuloy a sursuruanna dagiti interesado a tattao a nabirokanna babaen ti text message.