Adda dagiti saan a dagus a makasursuro kadagiti nasaem a kapadasanda. Kastaak idi. Nayanak ken dimmakkelak iti Barcelona, ti maikadua a kadakkelan a siudad iti Spain. Nagyan ti pamiliami iti Somorrostro, a mangsaklaw iti dakkel a paset ti siudad iti igid ti baybay. Pagaammo ti Somorrostro gapu iti krimen ken droga.

 Siamkami nga agkakabsat ket siak ti inauna. Gapu ta marigrigatkami unay, pinagtrabahonak ni Tatang kas parapidut iti bola iti maysa a tennis club iti lugarmi. Sangapulo ti tawenko idi ken 10 nga oras nga agtrabahoak iti inaldaw isu a saanak a nakapageskuela a kas kadagiti katawenak. Idi katorseakon, nagtrabahoak kas opereytor ti makina iti maysa a metal shop.

 Idi 1975, naayabanak nga agsoldado, nga inkapilitan idi iti Spain. Kayatko idi a padasen dagiti makapagagar ken delikado a banag, isu a nakimiembroak iti Spanish Foreign Legion idiay Melilla, a teritoria ti Spain iti North Africa. Kabayatan dayta, nagbalinak a mangnginum ken adikto iti droga.

 Idi nagikkatak iti Legion, nagsubliak iti Barcelona ket nangbukelak iti maysa a gang. Taktakawenmi ti aniaman a makitami sa ilakomi tapno adda igatangmi iti droga. Nangrugiak nga agusar iti LSD ken amphetamine, ket naisentron ti biagko iti seks, arak, ken panagsugal. Gapu iti saan a nasayaat a panagbiagko, nagbalinak a narangranggas. Kanayon nga adda tugotko a kutsilio, wasay, wenno buneng, ken diak mabuteng a mangusar kadagita no mariknak a kasapulan.

 Naminsan, kaduak ti gang a nagtakaw iti kotse ket kinamatdakami dagiti polis. Kasla eksena dayta iti pelikula. Nakaadayokamin iti agarup 30 a kilometro idi pinaltopaltogandakami dagiti polis. Isu nga indungpar ti draybermi ti lugan sa nagtataraykami. Siempre, idi naammuan dayta ni Tatang, pinagtalawnak.

 Iti simmaruno a lima a tawen, kalsada ti naggigianak. Naturogak kadagiti ruangan, trak, tugaw iti parke, ken sementerio. Napadasak pay ti nagyan iti kueba. Awan ti direksion ti biagko, ken saanen a napateg kaniak no sibibiagak wenno saan. Linaslasko pay idi ti pungupunguan ken takiagko bayat a nakadrogaak. Adda pay la ita dagiti piglatko.

 Idi agtawenakon iti 28, binirbiroknak ni Nanang ken kiniddawna nga agawidakon. Immanamongak ken inkarik nga agbalbaliwakon ngem saanko a dagus natungpal dayta.

 Maysa a malem, adda dua a Saksi ni Jehova nga immay iti balaymi. Bayat a dengdenggek ida, impukkaw ni Tatang nga iserraak ida iti ridaw. Diak kayat ti maibabaon isu a diak inkaskaso. Inawatko ti tallo a babassit a libro nga inyopreserda. Dinamagko no sadino ti paggigimonganda, ket kalpasan ti sumagmamano nga aldaw, napanak iti Kingdom Hall.

 Dagus a nadlawko a naurnos ti panagbadbado ti amin idinto ta atiddog ti buokko, nagulo ti barbasko, ken daan ken rutayrutay ti badok. Saanak a maibagay kadakuada isu a diak immuneg. Ngem nakigtotak ta nakitak sadiay ti dati a barkadak ken kaduak iti gang a ni Juan a nakaamerikana. Naammuak kalpasanna a makatawenen a Saksi ni Jehova. Pimmigsa ti pakinakemko iti kaaddana isu nga immunegak ket nakigimongak. Dita a nangrugi ti panagbalbaliwko.

 Nakipagadalak iti Biblia ket naamirisko a dagus a tapno anamongannak ti Dios, masapul a balbaliwak ti kinaagresibok ken ti immoral a panagbiagko. Saan a nalaka dayta. Naammuak a tapno maparagsakko ni Jehova a Dios, masapul nga ‘agbalbaliwak babaen ti panangpabarok iti panunotko.’ (Roma 12:2) Natukay ti riknak iti asi ti Dios. Iti laksid ti amin a kamalik, nariknak nga ik-ikkannak iti gundaway nga agbalbaliw. Dimmanon iti pusok dagiti naadalko maipapan ken Jehova a Dios. Naawatak nga adda Namarsua a maseknan kaniak.​—1 Pedro 5:6, 7.

 Daytoy ti nangtignay kaniak nga agbalbaliw. Kas pagarigan, idi nadakamat ti maipapan iti tabako bayat ti panagadalmi iti Biblia, napanunotko, ‘No kayat ni Jehova a Dios nga agtalinaedak a nadalus ken naan-anay a saan a natulawan, masapul nga isardengkon ti agsigarilio!’ (2 Corinto 7:1) Isu nga imbellengko dagita!

 Masapul met nga isardengkon ti agusar ken aglako iti droga. Narigrigat ken nabaybayag nga aramiden dayta. Tapno agballigiak, masapul a pugsatekon ti aniaman a koneksionko kadagiti dati a barkadak. Awan ti maitulongda iti panagrang-ayko iti naespirituan. Ngem idi agangay, ad-adda a nagpannurayak iti Dios ken iti tulong dagiti baro a gagayyemko iti kongregasion. Nariknak ti ayat ken personal nga interesda kaniak a saanko pay a napadasan idi. Kalpasan ti mano a bulan, nakalapsutak met laengen iti droga ket ‘naikaweskon ti baro a personalidad,’ a tumulong kaniak a manggun-od iti anamong ti Dios. (Efeso 4:24) Nabautisaranak kas Saksi ni Jehova idi Agosto 1985.

 Simmayaat ti biagko gapu iti Biblia. Nawayawayaanak manipud iti saan a nasayaat a panagbiag a mangdaddadael iti bagik ken iti dignidadko. Kinapudnona, nasurok a 30 kadagiti dati a barkadak ti nasapa a natay gapu iti AIDS wenno dadduma pay a sakit a resulta ti panagdroga. Agyamyamanak unay ta naliklikak dagita gapu iti panangyaplikarko kadagiti prinsipio ti Biblia.

 Dagiti kutsilio ken wasay a tugottugotko idi kas naranggas nga agtutubo ket paset laengen ti napalabas. Diak pulos impagarup idi nga addanto tiempo a Biblia ti tugottugotkon a tumulong kadagiti tattao. Ita, agserserbikami ken baketko, a maysa met a Saksi ni Jehova, kas full-time a manangaskasaba.

 Saan a nagbalin a Saksi ni Jehova dagiti nagannakko, ngem naragsakanda ta nagsayaat ti epekto kaniak ti panagadalko iti Biblia. Kinapudnona, indepensa pay idi ni Tatang dagiti Saksi kadagiti katrabahuanna. Nakitana a nagdakkel ti simmayaatan ti biagko gapu iti baro a pammatik. Sangkaibaga ni Nanang nga idi pay koma a nagadalak iti Biblia. Umanamongak unay kenkuana!

 Nasursurok kadagiti kapadasak nga awan ti nasayaat a maited ti droga ken dadduma pay a bisio. Marikriknak itan ti pudno a ragsak gapu iti panangiranudko kadagiti pannursuro manipud iti Sao ti Dios—pannursuro a nangsalbar iti biagko.