Maysa a maresrespeto nga organisasion iti panagibangon ti nangapresiar kadagiti Saksi ni Jehova gapu iti panangsanayda kadagiti babbai kas opereytor ti heavy equipment iti pangibangbangonanda iti baro a sanga nga opisinada iti asideg ti Chelmsford, Essex. Imbilang ti Considerate Constructors Scheme * (CCS) a “kabaruan” ti pamay-an dagiti Saksi a mangsanay kadagiti babbai iti panagibangon ket inikkanda ida iti kangatuan nga iskor a 10. Apay a kasta kangato ti iskor nga intedda?

Iti Britain, awan pay 13 a porsiento ti bilang dagiti babbai nga agtrabtrabaho iti konstruksion. Sigun iti maysa a surbey ti maysa nga organisasion iti Britain, manmano laeng ti agkabannuag a babbai a mayat nga agtrabaho iti konstruksion. Ngem babbai ti agarup 40 a porsiento kadagiti agtrabtrabaho iti pagibangonan iti Chelmsford. Babbai met ti nasurok nga 60 a porsiento kadagiti opereytor ti heavy equipment.

Kasano a maar-aramidan dayta dagiti babbai a Saksi? Dakkel a tulong ti maaw-awatda a pannakasanay ken suporta​—a karaman iti pagannurotan ti CCS. Iparparegta ti pagannurotan kadagiti constructor nga ipakitada nga ipatpategda dagiti trabahadorda babaen ti “panangsiguradoda a maresrespeto, patas ti pannakatrato, maparparegta, ken masupsuportaran ti amin,” kasta met nga “iparegtada ti panangsanay.”

Maysa ni Jade kadagiti babbai a nasuruan nga agiggem iti excavator ken dump truck iti site. Kunana: “Nagmayat! Diak idi napanunot a kabaelak dayta. Narigat ti trabaho no dadduma ngem agtultuloy a masansanayak ken kanayon nga adda baro a masursurok.” Kas ken Jade, opereytor metten ti heavy equipment ni Lucy. Inyestoriana: “Idi damok iti site, nariknak nga awan pulos ti skill-ko a mabalinko nga itulong. Ngem iti umuna nga aldaw pay laeng, sinuruandakon. Manipud idin, nagtrabahoak iti lima a team isu a nakaad-adun ti nasursurok!”

Saan laeng a panangiggem iti heavy equipment ti paglaingan dagiti babbai. Imbaga ti lider ti maysa a team a ni Eric: “Nasaysayaat ti panangaywan dagiti babbai kadagiti equipment ngem kadagiti lallaki, ken alistoda a madlaw no adda perdi ti makina nga iggemda ken ireportda dayta.”

Ni Carl, a mangidadaulo iti sumagmamano a team nga agig-iggem kadagiti heavy equipment, imbagana: “Bilibak ta alisto a makasursuro dagiti babbai nga agmaneho kadagiti equipment. No dadduma, kaykayatko nga isuda ti agmaneho ngem kadagiti lallaki a nabayagen nga agmanmaneho.”

No ap-apresiaren dagiti lider ti team dagiti katrabahuanda, tultulonganda dagitoy a maaddaan iti kompiansa iti bagida. Kasta ti kapadasan ni Therese. Kas eksperto nga opereytor ti heavy equipment, ammona a nakapatpateg ti panagbalin a responsable ken panangsigurado iti kinatalged no agus-usar iti equipment. Inlawlawag ni Therese: “No ammok a supsuportarannak ti lider ti team-mi, ad-adu ti maaramidak ngem iti ekspektarek a malpasko gapu ta ammok a pagtaltalkandak. Sulit amin a panagbannogmo no ammom nga ap-apresiaren ti sabsabali ti maar-aramidam ken magustuanda dayta!”

Ni Abigail a maysa met nga opereytor ti excavator ken dump truck ket agyamyaman iti suporta ken tulong a maaw-awatna. Kunana: “Saandak nga ibilang dagiti lallaki a katrabahuak kas nababbaba. Nakasaganada a tumulong, ngem saandak a suktan. Palubosandak a mangitultuloy iti trabaho.”

Malaksid iti panagopereyt iti nagduduma a heavy equipment, nasanay met dagiti babbai iti Chelmsford kadagiti trabaho a kas iti panagrukod iti daga, panangiplano iti pakausaran ti daga ken dagiti adda iti dayta, panagtarimaan kadagiti makina, ken panangasembol iti pagbatayan (scaffolding). Ni Robert, a nakipagtrabaho kadagiti babbai iti nagduduma a proyekto, imbagana a “nakapokusda, nagagetda, ken nasiputda kadagiti detalye.” Innayon ni Tom, nga agtrabtrabaho iti panagrukod iti daga: “Nalaing ken naannad dagiti babbai iti team-ko. No mabalbalin ket saanda a kayat ti agkamali.”

Saan ngarud a nakaskasdaaw a maragsakan ti lider ti team a ni Fergus a nangibaga: “Talaga nga adda lugar dagiti babbai iti panagibangon!”