Dandanika kadin mapaksuyan? No wen, matulongannaka daytoy nga artikulo!

•  No apay a mapasamak

•  No apay a napateg

•  Ti mabalinmo nga aramiden

•  Ti kuna dagiti padam nga agtutubo

•   Pressure. “Iti amin nga aspeto ti biag,” kuna ti agtutubo a ni Julie, “ibagbagada a masapul a saysayaatenmi a kanayon ti trabahomi, pasayaatenmi pay ti personalidadmi, ken itultuloymi ti manggaw-at kadagiti nangatngato a kalat. Nagrigat ti kanayon a maipaspasango iti kastoy a pressure!”

•   Teknolohia. Gapu kadagiti smartphone, tablet, ken dadduma pay a gadyet, dandani 24/7 a makakontaktayo ken makontakdatayo dagiti tattao​—maysa a rason a ma-stress-tayo, ket inton agangay, mapaksuyantayo.

•   Kurang a turog. “Gapu iti panageskuela, trabaho, ken panagrelaks, adu nga agtutubo ti nasapa nga agriing ken naladaw a maturog ket saan a nasayaat ti epekto dayta kadakuada ngem kasla saanda a maliklikan,” kuna ti balasang a ni Miranda. No kanayon a kasta, masansan a mapaksuyanda.

 Padayawan ti Biblia dagiti nagaget. (Proverbio 6:6-8; Roma 12:11) Ngem saanna nga iparegta ti panagtrabaho agingga a maisakripisiomon ti amin, agraman ti salun-atmo.

 “Naminsan, nalipatak gayam ti nangan iti nagmalem ta nakapokusak unay iti adu a responsabilidad nga inawatko. Nasursurok a saan a nasayaat ti awat nga awat kadagiti responsabilidad nga uray la maisakripisiokon ti salun-atko.”​—Ashley.

 Isu a kuna ti Biblia: “Ti sibibiag nga aso nasaysayaat ngem iti natay a leon.” (Eclesiastes 9:4) No pilitem nga aramiden ti saanmo a kabaelan, mabalin nga ipagarupmo a kaslaka kapigsa ti leon. Ngem di agbayag, nakaro ti epekto iti salun-atmo no ibusem ti pigsam.

•   Sursuruem ti agsaan. Kuna ti Biblia: “Ti sirib adda kadagidiay naemma.” (Proverbio 11:2) Ammo dagiti naemma ti limitasionda ken dida awaten ti saanda a kabaelan.

   “Ti kangrunaan a mapaksuyan ket daydiay dina ammo ti agsaan, daydiay umawat iti amin a trabaho a maited kenkuana. Saan a kinaemma dayta. Ket inton agangay, mapaksuyanen.”​—Jordan.

•   Kompletuem ti turogmo. Kuna ti Biblia: “Nasaysayaat ti sangarakem nga inana ngem iti dua a rakem a napinget a panagtrabaho ken panangkamkamat iti angin.” (Eclesiastes 4:6) Adda dagiti mangibagbaga a makagunggona ti turog iti utek, ngem kaaduan nga agtutubo ti saan a matmaturog iti 8 agingga iti 10 nga oras kada rabii uray kasapulanda.

   “No napnapno ti eskediulko, kaaduanna a kurang ti turogko. Ngem no dadduma, kasapulak laeng a kompletuen ti turogko tapno ad-adu ti maaramidak ken naragragsakak iti sumaruno nga aldaw.”​—Brooklyn.

•   Agbalinka nga organisado. Kuna ti Biblia: “Dagiti gakat [wenno, plano] daydiay nasaet sigurado a mangipaay iti pagsayaatan.” (Proverbio 21:5) No ammom a balansien ti oras ken kinaadu ti aktibidadmo, addaanka iti abilidad a makatulong iti intero a panagbiagmo.

   “Maliklikam ti stress no adda eskediulmo. No adda makitkitam nga eskediul, nalaklakam a maammuan no ania dagiti mabalinmo a balbaliwan tapno saanka a mapaksuyan.”​—Vanessa.