“Saan a pulos a matulad dagiti magatang a gatas ti gatas ti ina,” kuna ti maysa a libro para kadagiti midwife. Apay a kasayaatan ti gatas ti ina? Gapu ta agbalbaliw dayta depende iti kasapulan ti anakna.

 Panunotem: Agbalbaliw ti gatas ti ina manipud iti rugi agingga iti ngudo ti panagpasusona. Iti damo, ti rummuar a gatas ket nabaknang iti protina, bitamina, mineral, ken danum. No dandani metten malpas nga agpasuso, ti rummuar a gatas ket nabaknang iti taba tapno mabsog ti ubing. Agbalbaliw pay ketdi dayta depende iti edad ti ubing ken ti paniempo.

 Agbaliwbaliw met ti kaadu ti dadduma a hormone iti gatas ti ina. Kas pagarigan, ti melatonin ket umadu iti rabii. Ti dadduma met a hormone ket umadu bayat ti aldaw. Depende iti oras, agbaliwbaliw ti kaadu dagiti hormone tapno maturog wenno agriing ti ubing. Makatulong dayta tapno masursurona no orasen ti panagriing wenno pannaturog.

 Sumagmamano nga aldaw kalpasan a mayanak ti ubing, mangpataud ti ina iti dumuyaw wenno nakusnaw a yellow a gatas a maawagan iti colostrum. Nalaka a marunaw dayta ken adu ti sustansiana. Isu nga uray bassit laeng a colostrum ti adda iti tian ti ubing, makatulong unayen dayta kenkuana. Adu met ti antibodies iti colostrum tapno saan a nalaka a maimpeksion ti ubing. Maysa pay, makatulong dayta tapno tumakki ken madalusan ti tianna.

 Saan a masapul a madanagan ti ina a baka agkurang ti gatasna, uray no singin pay ti annakna. Ngamin, kaya ti bagina ti mangpataud iti gatas depende iti kasapulanda.

 Panagkunam? Ti kadi naidumduma a pakabuklan ti gatas ti ina ket resulta ti ebolusion? Wenno adda nangdisenio iti dayta?