Ania ti Kuna ti Biblia Maipapan iti Wayawaya nga Agpili? Konkontrolen Kadi ti Dios ti Gasatmo?

I-PLAY

Sungbat ti Biblia

Padpadayawannatayo ti Dios babaen ti panangtedna kadatayo iti wayawaya nga agpili, isu a nawayatayo nga agdesision imbes a ti Dios wenno ti gasat ti mangikeddeng iti aramidentayo. Kitaem no ania ti isursuro ti Biblia.

Ti Dios pinarsuana ti tao iti ladawanna. (Genesis 1:26) Gapu iti dayta, addaantayo iti abilidad a mangiparangarang iti ayat ken hustisia, saan a kas kadagiti animal nga iturturong ti nainkasigudan a panunotda. Ken kas iti Namarsua kadatayo, addaantayo iti wayawaya nga agpili.
Posible a maammuantayo ti masakbayantayo. Iparparegta ti Biblia a ‘pilientayo ti biag babaen ti panagimdeng iti [timek ti Dios],’ kayatna a sawen, babaen ti panagtulnog kadagiti bilinna. (Deuteronomio 30:19, 20) Awan serserbi daytoy a tukon, ken naulpit pay ketdi ti Dios, no awanantayo iti wayawaya nga agpili. Imbes a pilitennatayo nga agtulnog, siaayat a kinuna ti Dios: “O no koma laeng pudno nga ipangagmo dagiti bilinko! Iti kasta ti talnam agbalin a kas iti maysa a karayan.”—Isaias 48:18.
Ti panagballigi wenno pannakapaaytayo ket saan nga inkeddeng ti gasat. No kayattayo ti agballigi iti ar-aramidentayo, masapul nga ipakattayo ti amin a kabaelantayo. “Isuamin a masarakan ta imam nga aramiden,” kuna ti Biblia, “aramidem buyogen ti mismo a bilegmo.” (Eclesiastes 9:10) Kunana pay: “Dagiti gakat daydiay nasaet sigurado a mangipaay iti pagsayaatan.”—Proverbio 21:5.

Ti wayawaya nga agpili ket napateg a sagut ti Dios, ta daytoy ti mangtignay kadatayo a mangayat kenkuana iti ‘intero a pusotayo’—gapu ta dayta ti kayattayo.—Mateo 22:37.

Saan kadi a konkontrolen ti Dios ti amin a banag?

Pudno nga isursuro ti Biblia a ti Dios ket Mannakabalin-amin ken ti pannakabalinna ket saan a kabaelan a lapdan ti siasinoman. (Job 37:23; Isaias 40:26) Nupay kasta, saanna nga us-usaren ti pannakabalinna a mangkontrol iti amin a banag. Kas pagarigan, kuna ti Biblia a ti Dios ‘winatwatna ti panagteppel’ iti nagkauna a Babilonia, a kabusor ti ilina. (Isaias 42:14) Kasta met laeng ita, inkeddengna nga an-anusan dagidiay mangus-usar iti wayawayada nga agpili a mangdangran kadagiti sabsabali. Ngem saan nga agnanayon a kasta ti aramiden ti Dios.—Salmo 37:10, 11.