Napateg a responsabilidad dagiti adulto nga annak a siguraduen a maasikaso dagiti nataenganen a nagannakda. Sigun iti Biblia, dagiti adulto nga annak masapul a “sursuroenda nga umuna dagiti pagrebbenganda iti familia tapno makasubadda kadagiti nagannak kadakuada . . . , agsipud ta daytoy ti pakaragsakan ti Dios.” (1 Timoteo 5:4, Ti Baro a Naimbag a Damag Biblia) No siguraduen dagiti adulto nga annak a maasikaso dagiti nataenganen a nagannakda, tungtungpalenda met ti bilin ti Biblia a dayawenda dagiti nagannakda.—Efeso 6:2, 3.

 Awan ti espesipiko nga instruksion iti Biblia no kasano nga aywanan dagiti nataenganen a nagannak. Ngem adda dagiti nadakamat a matalek a lallaki ken babbai a nangaramid iti dayta. Mangted met kadagiti praktikal a balakad a makatulong kadagiti agaywan kadakuada.

•  Idi panawen ti Biblia, kasano nga inasikaso ti dadduma a miembro ti pamilia dagiti nataenganen a nagannakda?

•  Ania a praktikal a balakad ti ipaay ti Biblia kadagiti agaywan?

•  Ibaga kadi ti Biblia a masapul nga asikasuen dagiti nataenganen a nagannak iti pagtaengan?

 Agduduma, depende iti kasasaad.

•   Adayo ti pagnanaedan ni Jose iti ayan ti lakayen nga amana a ni Jacob. Idi naaddaan ni Jose iti gundaway, inyurnosna nga umakar ni Jacob iti lugar nga asideg iti pagnanaedanna. Kalpasanna, impaayanna ti amana iti pagyanan ken taraon, ken prinotektaranna.—Genesis 45:9-11; 47:11, 12.

•   Simmurot ni Ruth iti pagilian ti katuganganna a babai ken nagtrabaho a sipipinget tapno maipaayna ti kasapulanna.—Ruth 1:16; 2:2, 17, 18, 23.

•   Sakbay a natay ni Jesus, nangpili iti mangaywan iti inana a ni Maria, a nalabit balo idin.—Juan 19:26, 27. a

 Iti Biblia, adda dagiti prinsipio a makatulong kadagiti agaywan a mangdaer iti pisikal ken emosional a pannakabannog iti panangaywan kadagiti nataenganen a nagannak.

•   Dayawem dagiti nagannakmo.

   Ti kuna ti Biblia: “Dayawem da tatang ken nanangmo.”—Exodo 20:12.

   Kasano a mayaplikar daytoy a prinsipio? Ipakitayo a raraemenyo dagiti nagannakyo no palubosanyo ida a mangaramid iti kayatda no la ket ta kabaelanda. Agingga a mabalin, bay-anyo nga isuda ti agdesision iti pamay-an a pannakaasikasoda. Maysa pay, ipakitayo ti panagraem babaen ti panangaramidyo iti kabaelanyo a tumulong kadakuada.

•   Agbalin a mannakaawat ken manangpakawan.

   Ti kuna ti Biblia: “Ti pannakatarus ti tao ti mangpabannayat iti pungtotna, ken kinapintas kenkuana ti panangpakawan iti basol.”—Proverbio 19:11.

   Kasano a mayaplikar daytoy a prinsipio? No adda nasakit a naibaga dagiti nataenganen a nagannakmo wenno kasla saanda a maapresiar ti panangasikasom kadakuada, isaludsodmo iti bagim, ‘Ania ngata ti mariknak no siak ti adda iti kasasaadda?’ No ikagumaam ti agbalin a mannakaawat ken manangpakawan, maliklikam a kumaro ti situasion.

•   Agpabalakad.

   Ti kuna ti Biblia: “Mapaay dagiti plano no awan ti panagsasarita, ngem adda maitungpal no adu ti mamalbalakad.”—Proverbio 15:22.

   Kasano a mayaplikar daytoy a prinsipio? Ag-research-kayo no kasano a maasikaso ti problema ti salun-at dagiti nagannakyo. Ammuenyo no ania dagiti maitulong ti komunidad iti pannakaaywanda. Kasaritayo dagiti nakapadasen a nagaywan kadagiti nagannakda. No adda kakabsatyo, mabalin a pagsasaritaanyo dagiti kasapulan dagiti nagannakyo, no kasano ti pannakaaywanda, ken no kasanoyo a pagtitinnulongan.

•   Ammuem ti limitasionmo.

   Ti kuna ti Biblia: “Ti sirib adda kadagidiay naemma.”—Proverbio 11:2.

   Kasano a mayaplikar daytoy a prinsipio? Bigbigem nga adda dagiti limitasionmo. Kas pagarigan, limitado ti tiempo ken pigsa ti tunggal maysa. Dagita ti mangapektar iti kabaelanyo nga aramiden para kadagiti nagannakyo. No mariknayo a marigatankayo a mangasikaso kadagiti nataenganen a nagannakyo, agpatulongkayo iti dadduma a kapamiliayo wenno kadagiti espesialista.

•   Asikasuem ti bagim.

   Ti kuna ti Biblia: “Awan pay a pulos ti tao a nanggura iti bukodna a bagi, no di ket pakanen ken dungdungnguenna dayta.”—Efeso 5:29.

   Kasano a mayaplikar daytoy a prinsipio? Nupay responsabilidadmo nga aywanan dagiti nagannakmo, masapul met nga asikasuem ti bagim ken ti pamiliam, no naasawaankan. Masapul a manganka iti nasustansia. Masapul nga aginana ken maturogka a naimbag. (Eclesiastes 4:6) Ken masapul nga agrelakska no posible. No aramidem dagitoy, ad-adda a nakasaganaka iti emosional, mental, ken pisikal a mangasikaso kadagiti nagannakmo.

 Awan ti espesipiko a bilin ti Biblia no iti pagtaengan ti pakaaywanan dagiti nagannak. Adda dagiti pamilia a kaykayatda nga aywanan dagiti nataenganen a nagannakda iti pagtaengan agingga a posible. Ngem adda gundaway a mabalin a mapanunotda a nasaysayaat a maaywanan dagiti nagannakda iti nursing-home. Mabalin nga agsasarita dagiti miembro ti pamilia tapno makapagdesisionda iti pagsayaatan ti amin.—Galacia 6:4, 5.