Masansan a tumukoy ti termino a “sao ti Dios” iti mensahe manipud iti Dios wenno koleksion dagita a mensahe. (Lucas 11:28) Iti sumagmamano a paset ti Biblia, nausar kas titulo ti termino a “Ti Sao ti Dios” wenno “ti Sao.”​—Apocalipsis 19:13; Juan 1:​14.

 Mensahe manipud iti Dios. Masansan a tukoyen dagiti propeta a dagiti mensahe nga ibagada ket Sao ti Dios. Kas pagarigan, inrugi ni Jeremias ti mensahena a naglaon kadagiti padto babaen iti sasao a “ti sao ni Jehova nangrugi a dumteng kaniak.” (Jeremias 1:​4, 11, 13; 2:1) Sakbay nga imbaga ni propeta Samuel ken Saul nga isu ti pinili ti Dios nga agbalin nga ari, kinunana: “Agintekka ita tapno maipangngegko kenka ti sao ti Dios.”​—1 Samuel 9:​27.

 Titulo. Agparang met iti Biblia ti termino a “ti Sao” kas titulo a tumukoy ken Jesu-Kristo, kas espiritu idiay langit, ken kas tao ditoy daga. Kitaentayo no apay:

•   Nagbiag ti Sao sakbay pay ti dadduma a parsua. “Idi punganay adda ti Sao . . . Daytoy ket adda idi punganay a kadua ti Dios.” (Juan 1:​1, 2) Ni Jesus ti “inauna iti isuamin a parsua . . . isu addan kasakbayan ti amin a sabsabali pay a bambanag.”​—Colosas 1:​13-​15, 17.

•   Immay ti Sao ditoy daga kas maysa a tao. “Ti Sao nagbalin a lasag ken nakipagnaed kadatayo.” (Juan 1:​14) Pinanawan ni Kristo Jesus ti dati a saadna ket “innalana ti langa ti maysa nga adipen ket nagbalin a kaas-asping ti tattao.”​—Filipos 2:​5-7.

•   Ti Sao ket isu ti Anak ti Dios. Kalpasan nga imbaga ni apostol Juan a “ti Sao nagbalin a lasag,” kas nadakamat iti ngato, intuloyna: “Naimatangantayo ti dayagna, maysa a dayag a kas iti kukua ti maysa a bugbugtong nga anak manipud iti maysa nga ama.” (Juan 1:​14) Insurat pay ni Juan: “Ni Jesu-Kristo isu ti Anak ti Dios.”​—1 Juan 4:​15.

•   Addaan ti Sao kadagiti kualidad nga adda iti Dios. “Ti Sao maysa a dios.” (Juan 1:1) Ni Jesus “ti silnag ti dayag [ti Dios] ken ti apag-isu a ladawan ti mismo a kina-isuna.”​—Hebreo 1:​2, 3.

•   Agturay ti Sao kas maysa nga ari. Sigun iti Biblia, ti ulo ti Sao ti Dios ket maaddaanto iti adu a “balangat,” wenno korona. (Apocalipsis 19:12, 13) Naawagan met ti Sao kas “Ari ti ar-ari ken Apo ti ap-appo.” (Apocalipsis 19:16) Maawagan ni Jesus kas “ti Ari dagidiay agturay kas ar-ari ken Apo dagidiay agturay kas ap-appo.”​—1 Timoteo 6:​14, 15.

•   Agserbi ti Sao kas pannakangiwat ti Dios. Nalawag a daydiay maawagan iti titulo a “ti Sao” ket daydiay us-usaren ti Dios a mangidanon iti impormasion ken instruksion. Imbaga ni Jesus nga intungpalna dayta nga akem: “Ti met laeng Ama a nangibaon kaniak inikkannak iti bilin maipapan iti ibagak ken iti sawek. . . . Gapuna ti bambanag a sawek, kas iti Ama imbagana ida kaniak, kasta met a sawek ida.”​—Juan 12:49, 50.