Awan ti mabasa iti Biblia a Halloween, ti selebrasion nga ar-aramiden ti adu tunggal Oktubre 31. Ngem maikontra iti sursuro ti Biblia ti nangrugian ti tradision a Halloween.

Iti daytoy nga artikulo

•  Ti nangrugian ken dagiti tradision ti Halloween

•  Adda kadi pagdaksanna no pagano ti nangrugian ti Halloween?

•  Apay a naawagan iti Halloween?

•   Samhain: Nangrugi ti Halloween iti “nagkauna a pagano a piesta a selselebraran dagiti Celtic 2,000 a tawenen ti napalabas,” kuna ti The World Book Encyclopedia. “Patien dagiti Celt a dagiti natay makalangenda dagiti sibibiag. Bayat ti Samhain, dagiti sibibiag sarungkaranda dagiti natay.”—Kitaen ti “ Apay a naawagan iti Halloween?”

•   Dagiti kostium, kendi, ken trick or treat iti Halloween: Sigun iti maysa a reperensia, dadduma kadagiti Celtic ti agbado iti nakabutbuteng tapno pagkamalian ida dagiti agpasiapasiar nga espiritu “a kas maysa kadakuada” ket saanda ida nga an-annuen. Adda dagiti mangted iti kendi tapno maay-ayo dagiti espiritu. a

   Iti nagkauna a Europa, dagiti Katoliko a padi inakseptarda ti pagano a kostumbre ket pinalubosanda dagiti miembroda a mapan agbalay-balay a nakakostium ken agdawat kadagiti babassit a regalo.

•   Dagiti al-allia, bampira, lobo, manggagamud, ken zombie: Nabayagen a maikonkonektar dagita kadagiti dakes nga espiritu. Dakamaten dagitoy ti libro a Halloween Trivia kas “supernatural monsters” ken ibagana pay a dagitoy a parsua ket “konektado iti ipapatay, kadagiti natay, wenno iti panagbuteng iti ipapatay.”

•   Ti Halloween pumpkin, wenno jack-o’-lantern: Iti nagkauna a Britain, dagiti tattao ket mapan “agbalay-balay a dumawat iti makan a kasukat iti panangikararagda kadagiti natay,” ken nakaiggemda iti “nakungkongan wenno nakarus ti nagyanna a singkamas, a naikkan iti kandela iti unegna a mangirepresentar kadagiti kararua a napupok iti purgatorio.” (Halloween—From Pagan Ritual to Party Night) Kuna ti dadduma a historiador a dagita a singkamas nga adda silawna ket nausar a pangabug kadagiti dakes nga espiritu. Idi 1800’s idiay North America, nasukatan dagiti singkamas iti karabasa gapu ta ad-adu dagita ken nalaklaka a kungkongan ken ukitan.

 Wen. Nupay ibilang ti dadduma a ti Halloween ket awan dakesna a pagraragsakan, dagiti ar-aramidenda a mainaig iti dayta ket maikontra kadagiti sursuro ti Biblia. Ti Halloween ket naibasar kadagiti ulbod a pammati maipapan kadagiti natay ken kadagiti di makita nga espiritu, wenno demonio.

 Basaem dagiti sumaruno a bersikulo a mangipakita iti panangmatmat ti Dios kadagiti pammati a konektado iti Halloween:

•   “Awan koma kadakayo ti . . . makiuman iti espiritista wenno mammadles wenno makisarita iti natay.”—Deuteronomio 18:10-12.

   Kaipapananna: Kagura ti Dios ti pannakikomunikar kadagiti natay, wenno uray ti panagpammarang a kaya ti maysa ti makikomunikar kadagiti natay.

•   “Awan a pulos ti ammo dagiti natay.”—Eclesiastes 9:5.

   Kaipapananna: Gapu ta awan ammo dagiti natay, saanda a kabaelan ti makikomunikar kadagiti sibibiag.

•   “Diak kayat a makikaduakayo kadagiti demonio. Diyo mabalin nga inuman ti kopa ti Dios sayo met inuman ti kopa dagiti demonio.”—1 Corinto 10:20, 21, Naimbag a Damag Biblia.

   Kaipapananna: Dagidiay kayatda ti makigayyem iti Dios masapul a liklikanda ti aniaman a konektado kadagiti demonio.

•   ‘Agtakderkayo a sititibker maibusor kadagiti nasikap nga aramid ti Diablo; ta makilablabantayo maibusor kadagiti dakes nga espiritu a puersa.’—Efeso 6:11, 12.

   Kaipapananna: Rumbeng a busoren dagiti Kristiano dagiti dakes nga espiritu, ken saanda nga agtignay a kasla makiselselebrarda kadakuada.