Saan nga ibaga ti Biblia no kaano a rinugian ti Dios a pinarsua ti uniberso wenno no kasano kapaut dayta. Ti laeng ibagana: “Idi un-unana, pinarsua ti Dios ti langit ken ti daga.” (Genesis 1:1) Saan nga espesipiko nga ibaga ti Biblia no kaano ti “un-unana.” Ngem ti agsasaruno a pasamak a naisalaysay iti Genesis ipakitana a napasamak dayta sakbay ti innem a panawen, wenno “aldaw,” ti panamarsua.

•  Literal kadi a 24 nga oras ti innem nga aldaw ti panamarsua?

•  Ania ti napasamak iti uneg ti innem nga aldaw ti panamarsua?

•  Agpada kadi ti salaysay ti Genesis iti ibaga ti siensia?

•  Kaano a naparsua ti init, bulan, ken dagiti bituen?

•  Kasano kabayagen nga adda ti daga sigun iti Biblia?

 Saan. Iti Biblia, ti sao nga “aldaw” ket tumukoy iti agduduma a kapaut ti tiempo, depende iti konteksto. Kas pagarigan, iti maysa a paset ti salaysay, ibagana a ti intero a panamarsua ket napasamak iti maysa nga aldaw.—Genesis 2:4.

 “Saan a naurnos ken awan pay idi ti nagyan ti daga,” ngem pinagbalin dayta ti Dios a pagyanan a planeta. (Genesis 1:2) Kalpasanna, inaramidna dagiti parsua nga adda iti daga. Isalaysay ti Biblia dagiti agkakadua a napasamak iti kada aldaw bayat ti innem nga aldaw, wenno tiempo, ti panamarsua:

•  Umuna nga aldaw: Inaramid ti Dios ti lawag a dumanon iti daga, isu a naadda ti aldaw ken rabii.—Genesis 1:3-5.

•  Maikadua nga aldaw: Inaramid ti Dios ti tangatang, wenno ti nagbaetan dagiti danum iti rabaw ti daga ken dagiti danum iti ngato ti tangatang.—Genesis 1:6-8.

•  Maikatlo nga aldaw: Inaramid ti Dios ti namaga a daga. Inaramidna met dagiti mula.—Genesis 1:9-13.

•  Maikapat nga aldaw: Inaramid ti Dios a makitan manipud iti daga ti lawag ti init, bulan, ken dagiti bituen.—Genesis 1:14-19.

•  Maikalima nga aldaw: Inaramid ti Dios dagiti parsua iti danum ken dagiti agtaytayab a parsua.—Genesis 1:20-23.

•  Maikanem nga aldaw: Inaramid ti Dios dagiti animal iti rabaw ti daga ken ti tao.—Genesis 1:24-31.

 Kalpasan ti maikanem nga aldaw, naginana ti Dios a nagtrabaho wenno nagsardeng a nagparsua.—Genesis 2:1, 2.

 Ti salaysay ti Biblia iti pannakaparsua ti lubong ket saan a kas iti detalyado a panagadal ti siensia. Imbes ketdi, isalaysayna dagiti agsasaruno a pasamak ti panamarsua a nalaka a maawatan dagiti agbasa uray idi tiempo ti Biblia. Ti salaysay ti panamarsua saanna a kontraen dagiti nadiskobre ti siensia. Insurat ti astrophysicist a ni Robert Jastrow: “Agduma dagiti detalyeda, ngem pareho dagiti kangrunaan a paset ti salaysay ti astronomia ken ti salaysay ti Biblia iti Genesis a ti panagsasaruno ti pasamak agingga a naparsua ti tao ket bigla a nangrugi iti maysa nga espesipiko a tiempo.”

 Ti init, bulan, ken dagiti bituen ket karaman iti “langit” a naparsua idi “un-unana.” (Genesis 1:1) Ngem saan a nakadanon ti lawag iti daga gapu ta napuskol ti atmospera. (Genesis 1:2) Isu nga uray no addan ti lawag iti umuna nga aldaw, saan pay a makita ti paggapgapuan ti lawag. Iti maikapat nga aldaw, naurnosen ti atmospera. Ibaga ti Biblia a mangrugin a “mangsilnag iti daga” ti init, bulan, ken dagiti bituen. Kasta ti eksakto a makita ti maysa a tao manipud iti daga.—Genesis 1:17.

 Saan nga ibaga ti Biblia no kasano kabayagen ti daga. Ti laeng ibaga ti Genesis 1:1 ket adda nangrugian ti uniberso agraman ti daga. Saan a maikontra dayta kadagiti prinsipio ti siensia ken ti tantia dagiti sientista nga edad ti daga.