Saan nga agballigi ti panagasawa no agsuspetsa ken saan nga agtalek ti agassawa iti maysa ken maysa. Kasano ngarud a maliklikanyo ti di maitutop a panagimon?

Iti daytoy nga artikulo

•  Ania ti panagimon?

•  Ania dagiti makagapu iti di maitutop a panagimon?

•  Kasano a makontrolmo ti panagimonmo?

•  No agim-imon ti asawam

•  Salsaludsod a pagsaritaan

 Ania ti panagimon?

 Ti sao nga “imon” ket nagduduma ti kaipapananna. Iti daytoy nga artikulo, tumukoy dayta iti emosion a mariknatayo no panagkunatayo ket adda sabali a tao a mangipakpakita iti di umiso nga interes iti asawatayo, wenno ti asawatayo ket mangipakpakita iti di umiso nga interes iti sabali. Mabalin a mariknatayo nga agpegpeggad ti panagasawatayo. No talaga a kasta ti situasion, normal ken umiso laeng ti panagimon. Ngamin, ti panagasawa ti kasingedan a relasion ti dua a tao. Ket masapul nga aramiden ti agassawa ti amin a kabaelanda a mangprotektar iti dayta.

 Prinsipio ti Biblia: “Saandan a dua, no di ket maymaysadan a lasag. . . . Ti pinagtipon ti Dios, saan koma a pagsinaen ti tao.”—Mateo 19:6.

 “No agpegpeggad ti panagasawayo, ti panagimon ket kas iti smoke detector a mangalarma kenka iti peggad ken mangtignay kenka nga agbirok iti solusion.”—Benjamin.

 Ngem ti di maitutop a panagimon ket maigapu iti panagsuspetsa ken panagbuteng nga awan ti nakaibatayanna. Protektarannatayo ti pudno nga ayat manipud iti kasta a makapasakit a panagimon. (1 Corinto 13:4, 7) Insurat ni Dr. Robert L. Leahy: “No agimonka [nga awan ti nakaibatayanna], masansan a makaaramidka kadagiti banag a mangperdi iti mismo a relasion a kayatmo a protektaran.” a

 Ania dagiti makagapu iti di maitutop a panagimon?

 Mabalin a dakdakkel ti posibilidadna a makariknaka iti di maitutop a panagimon no saan a nagmatalek kenka ti dati nga asawam. Wenno mabalin a nadadael ti panagasawa dagiti nagannakmo gapu ta saan a nagmatalek ti maysa kadakuada, ket madanaganka a baka kasta met ti mapasamak iti panagasawayo.

 “Liniputan ni tatangko ni nanangko idi ubingak, isu a marigatanak nga agtalek iti sabali. Nangibati dayta iti piglat iti pusok, isu a no dadduma, marigatanak nga agtalek ken lakayko.”—Melissa.

 Sabali pay a rason: No nababa ti panagkitam iti bagim, baka alisto laeng nga ibilangmo ti dadduma a mabalin a mangperdi iti panagasawayo. Baka kombinsirem pay ketdi ti bagim a no adda tsansa ti asawam, isukatnaka iti sabali.

 “Naawis ni lakayko nga agbalin nga abay iti kasar ti gayyemna. Kayatna a sawen, mai-partner iti abay a babai. Saanko a kayat dayta. Isu a pinilitko nga agsaan.”—Naomi.

 Agduduma dagiti kaugalian iti kasar, isu a masapul nga agpaidalan dagiti Kristiano kadagiti prinsipio ti Biblia. Husto ngata ti inaramid ni Naomi iti dayta a situasion? No lagipenna dayta itan, nakitana nga awan met gayam ti rasonna nga agimon. “Nababa idi ti panagkitak iti bagik,” imbagana. “Impagarupko nga ikomkomparanak ni lakayko iti sabali a babbai, ngem siak laeng gayam ti mangpampanunot iti dayta.”

 Aniaman ti rason, no di maitutop ti panagimonmo, mabalin a pagsuspetsaam ti asawam ken akusaram pay ketdi a saan a matalek kenka. Agresulta dagita kadagiti problema a mangperdi iti panagasawayo ken uray pay iti salun-atmo.

 Prinsipio ti Biblia: “Ti imon [ket] mayarig iti kanser.”—Proverbio 14:30, Ti Baro a Naimbag a Damag Biblia.

 Kasano a makontrolmo ti panagimonmo?

 Patibkerem ti panagtalekmo. Imbes a mangbirokka kadagiti seniales a saan a matalek ti asawam, panunotem ketdi dagiti rason a nagtalekka kenkuana.

 “Pampanunotek dagiti nasayaat a kualidad ni lakayko. No ik-ikkanna iti atension ti sabali, kaipapanan laeng dayta a maseknan kenkuana, saan ket a gapu ta adda di umiso a motibona. Masapul nga ipalagipko iti bagik a ti panagasawami ken lakayko ket naiduma iti panagasawa dagiti nagannakko.”—Melissa.

 Dimo ipapan a husto ti suspetsam. Insurat ni Dr. Leahy a nadakamat itay: “Masansan nga ibilangtayo nga agpayso dagiti pampanunotentayo. Gapu ta mariknatayo a hustotayo, daytan ti agbalin nga ebidensiatayo. Ngem uray no patientayo nga umiso ti maysa a banag, dina kayat a sawen nga agpayson dayta, ken ti riknatayo ket saan a kanayon a mapagtalkan nga ebidensia.” b

 “No ikkantayo iti kaipapanan dagiti situasion ken agipapantayo, mangpatpataudtayo laeng iti problema iti panagasawatayo.”—Nadine.

 Ibagam ti marikriknam. Aniaman ti rason ti panagimonmo, ibagam iti asawam ti marikriknam tapno maikeddengyo a dua dagiti nasayaat nga aramidenyo ken dagiti liklikanyo.

 “No pagsaritaanyo dagita, panunotem a saannaka a kayat a saktan ti asawam ken ikagkagumaanna met ti agaramid iti umiso. Agpada a panunotenyo a nasayaat ti intensionyo. Baka arsagidka met unay ken sobra ti eks-ekspektarem. Wenno baka saan nga ammo ti asawam a dina mait-ited ti atension a kasapulam.”—Ciara.

 Prinsipio ti Biblia: “Itultuloy koma ti tunggal maysa a sapulen ti pagimbagan ti sabali, saan a ti bukodna a pagimbagan.”—1 Corinto 10:24.