Asidegen nga agpatingga ti panagan-anus ni Jehova iti daytoy a lubong. Madadaelto ti ulbod a relihion, rautento ti aliansa dagiti nasion ti ili ti Dios, ken dadaelento ni Jehova dagiti dakes a tattao inton Armagedon. Padpadaanan dagiti Kristiano dagitoy a napateg ken makapagagar a pasamak.

Siempre, saantayo nga ammo ti amin a detalye maipapan iti dakkel a rigat. Kas pagarigan, saantayo nga ammo ti eksakto a panangrugina. Saantayo nga ammo no kasano nga irasonan dagiti gobierno ti panangrautda iti relihion. Saantayo nga ammo no kasano kapaut ti panangraut dagiti nasion iti ili ti Dios wenno ania ti ramanen dayta. Saantayo met nga ammo no ania ti eksakto nga usaren ni Jehova a mangdadael kadagiti dakes a tattao inton Armagedon.

Ngem ipaay ti Kasuratan ti amin nga impormasion a kasapulantayo tapno maaddaantayo iti kompiansa ken tured a mangsango iti masanguanan. Kas pagarigan, ammotayo nga agbibiagtayon iti ngudo ti “maudi nga al-aldaw.” (2Ti 3:1) Ammotayo a ‘mapaababanto’ ti pannakaraut ti relihion tapno saan a madadael ti pudno a relihion. (Mt 24:22) Ammotayo nga isalakanto ni Jehova ti ilina. (2Pe 2:9) Ken ammotayo a nalinteg ken mannakabalin Daydiay pinili ni Jehova a mangdadael kadagiti dakes a tattao ken mangprotektar iti dakkel a bunggoy inton Armagedon.​—Apo 19:11, 15, 16.

Sigurado a “matalimudawto dagiti tattao gapu iti buteng” kadagiti mapasamak iti masanguanan. Ngem no basaen ken utobentayo dagiti panangisalakan ni Jehova iti napalabas ken ti impakaammona a mapasamak iti masanguanan, kabaelantayo ti ‘tumakder a nalinteg ken tumangad’ ta agtalektayo nga asidegen ti pannakaisalakantayo.​—Lu 21:26, 28.