Idi nadamag ti kongregasion iti Roma nga umay ni Pablo, adda grupo dagiti kakabsat a nagdaliasat iti agarup 64 a kilometro (40 milia) tapno sabtenda. Ania ti epekto ken Pablo ti managsakripisio nga ayatda? “Idi makita ida ni Pablo, nagyaman iti Dios ket bimmileg ti pakinakemna.” (Ara 28:15) Nupay pagaammo a manangpabileg ni Pablo kadagiti kongregasion a binisitana, iti daytoy a gundaway kas maysa a balud, isu ti immawat iti pammaregta.​—2Co 13:10.

Bisbisitaen ita dagiti manangaywan iti sirkito dagiti kongregasion tapno pabilgenda dagiti kakabsat. Kas iti amin nga adipen ti Dios, adda met dagiti tiempo a mabannog, madanagan, ken maupayda. Inton bumisita ti manangaywan iti sirkito ken ti asawana iti kongregasionyo, ania ti mabalinmo nga aramiden tapno mapabilegmo ti pakinakemda, ket ‘makapagpipinnaregtakayo’?​—Ro 1:11, 12.

• Suportaram ti taripnong sakbay ti panangasaba. Maparegta ti manangaywan iti sirkito no agsakripisio dagiti kakabsat tapno magunggonaanda a naan-anay kadagiti aktibidad iti dayta nga espesial a lawas. (1Te 1:2, 3; 2:20) Mabalinmo ti ag-auxiliary pioneer kabayatan ti bulan ti bisita. Mabalinmo kadi ti makikadua kenkuana ken iti asawana iti panangasaba wenno ikuyogmo ti maysa kadakuada iti panangyadalmo iti Biblia? Maragsakanda a makikadua iti nadumaduma a kakabsat, agraman kadagiti kabbaro wenno kadagidiay panagriknada ket saanda a nalaing a mangasaba.

• Agbalinka a managpadagus. Mabalinmo kadi nga awisen ida nga agdagus iti balaymo wenno iti maysa a pannangan? Ipakita dayta nga ipatpategmo ti manangaywan iti sirkito ken ti asawana. Saanda a mangnamnama iti adu unay a banag.​—Lu 10:38-42.

• Imdengam ken iyaplikarmo dagiti instruksion ken balakadna. Siaayat a tultulongannatayo ti manangaywan iti sirkito a mangkita no kasano a maparang-aytayo ti panagserbitayo ken Jehova. No dadduma, mabalin a mangipaay iti nadagsen a balakad. (1Co 5:1-5) Maragsakan isuna no agtulnog ken agpasakuptayo.​—Heb 13:17.

• Iyebkasmo ti apresasionmo. Ibagam iti manangaywan iti sirkito ken iti asawana a nagunggonaanka iti panagreggetda. Mabalinmo nga ibaga dayta iti personal wenno babaen iti surat wenno kard.​—Col 3:15.