Ti pannakairuar ti Episode 1 Ti Naimbag a Damag Sigun ken Jesus ti maysa kadagiti pinadpadaanan dagiti Saksi ni Jehova ita a tawen. Minilionen ti nakabuya iti dayta. Ngem umuna laeng dayta iti 18 nga episode. Ania dagiti sakripisio a ditay makitkita tapno maaramid dagita, ken ania ti naitulongmo?

 Ti sangay iti Australasia ti kaaduan a pag-shooting-an iti video a Naimbag a Damag. a Kada shooting, 50 agingga iti 80 a tattao ti adda iti set. Maisagsagana ti pangngaldaw, pangrabii, ken meriendada, ken maiplamplano a naimbag dagita. Imbaga ni Esther nga agtrabtrabaho iti Food Service Department: “Agduduma a suplayer ti paggatgatanganmi kadagiti maisagana a makan tapno masiguradomi a mayat dagiti rekado ken nalaka pay. I-adjust-mi no kua ti kaadu ti maisagana a makan depende iti kaadu ti tao tapno awan ti masayang.” Kada aldaw, aguppat a U.S. a doliar ti magasgastos para iti kanen ti maysa a tao.

 Saan la a makan ti kasapulan dagiti aktor ken dagiti tumultulong kadakuada. Kasapulanda met ti proteksion manipud iti nakaro a pudot ti init. Kanayon ngamin nga aginit ken nabara iti Australia. Tapno saanda a kanayon a mainitan ken mabannog, nangasembol dagiti kakabsat kadagiti tent ken paglinongan. Nangisaganada met kadagiti sunblock, payong, ken danum. Imbaga ni Kevin nga agtrabtrabaho iti Audio/Video Services: “Commuter Bethelite ti kaaduan a mangar-aramid kadagita ken iti adu pay a trabaho. Nakapakpakumbaba ken nakaragragsakda. No awanda, saanmi a maaramid daytoy a proyekto.”

 Adda dagiti eksena a kasla saan nga agpaypayso no ma-shooting iti studio iti sanga nga opisina wenno iti lote iti likudna. Isu a maala dagita iti sabali a lokasion. Kas pagarigan, no ma-shooting dagiti eksena iti Biblia a kasapulan nga awan dagiti linia ti koriente, sementado a kalsada, ken moderno a balbalay, masapul nga agbiahe dagiti aktor ken dagiti tumultulong kadakuada kadagiti adayo a lugar. Adda dagiti mangyempake, mangibiahe, ken mangidulin kadagiti kostium, props, ken equipment iti set. Sakbay ti shooting, siguraduen ti koordineytor dagiti kakabsat a tumultulong nga adda generator, nadalus a mainum a danum, ken banio. Maturog dagiti aktor ken dagiti tumultulong kadakuada kadagiti balay dagiti managpadagus a Saksi, balay a lugan, wenno hotel.

 Ti panag-shooting iti sabali a lugar ket nagastos, nabayag, ken makabannog. Isu nga idi 2023, inaprobaran ti Bagi a Manarawidwid a magatang ti 2.5 a milion a U.S. a doliar a video wall a mausar a background dagiti aktor. Makita iti iskrin ti video wall dagiti nakalawlawag a piktiur ken video, ken adda dagiti makontrol a silaw tapno bumagay ti lawag iti maipakpakita iti iskrin ket agbalin a realistiko ti aglawlaw. Gapu iti dayta, saantayon a gumastos iti dakkel a mapan ag-shooting iti ruar. Imbaga ni Darren a miembro ti Australasia Branch Committee: “Gapu iti video wall, saan unayen a mabannog dagiti aktor ken mabalin nga ulit-uliten nga alaen ti maysa nga eksena. Kas pagarigan, no ag-shooting-kami iti ruar, mano la a minuto ti tsansami a mangala iti lumlumnek nga init. Ngem gapu iti video wall, mabalinmi ti mangala iti adu nga anggulo ti maiparparang a lumlumnek nga init agingga a maalami ti kasayaatan.”

 Ginasut nga aktor ken adu a tumultulong a kakabsat ti kasapulan iti tunggal episode ti Naimbag a Damag. Ania ti maibagada iti amin nga ar-aramiden dagiti kakabsat para kadakuada?

 Nagbiahe ni Amber a taga-Melbourne iti nasurok a 700 a kilometro (435 a milia) tapno makiraman iti proyekto. Insuratna: “Apagsangpetko pay laeng iti airport, inasikasodakon a naimbag dagiti Bethelite. Adu kadakuada ti nangawis kaniak a mangan wenno agtsaa. No ag-shooting-kami, komportableak a makikadua iti amin ta mariknak nga ipatpategdak. Gapu iti pannakitinnulongko iti daytoy a proyekto, nakaad-adu ti naawatko a bendision, ket kasla awan met ti sakripisio nga inaramidko!”

 Makipagtrabtrabaho ni Derek iti production team. Imbagana: “Iti rugi pay laeng, adun a departamento ti tumultulong kadakami. Agyamyamanak kadagiti kakabsat a mangisaksakripisio iti oras, sanikua, ken pigsada para iti daytoy a proyekto. Kanayon a nakasaganada a tumulong ken nakaim-imbagda. Talaga a bembendisionan ida ni Jehova ken uray dakami. Kombinsidoak a saan la nga interesado ni Jehova iti resulta ti proyekto no di ket iti pay pamay-an a maar-aramid dayta.”

 Agyamyamankami kadagiti donasionyo, a pakairamanan dagiti naited babaen ti donate.jw.org, tapno masuportaran ti pannakaaramid daytoy a video.