SUHETO ITI AKKUB
Siasino Dagiti Saksi ni Jehova?
“Nabayagen nga am-ammok ni Mike a maysa a Saksi ni Jehova. Ngem adu ti diak maawatan iti relihionna. Asino ni Jehova? Apay a saan a selselebraran dagiti Saksi dagiti holiday? Maysa ngata a kulto ti nastrek ni Mike?”—Becky, California, U.S.A.
“Idi nakipagadal iti Biblia dagiti kaarrubami kadagiti Saksi ni Jehova, napanunotko: ‘Ania ti kayat a sawen ti nagan a Saksi ni Jehova? Karkarna a nagan ti relihion!’”—Zenon, Ontario, Canada.
“Impapanmi idi ken baketko a bumisbisita laeng dagiti Saksi ni Jehova tapno gundawayanda ti pannakakonsiensiami a dikami aktibo iti relihion. Ken napanunotmi a no awan iti nabayagen a dadakkel a relihion ti sapsapulenmi, lallalon nga awan dayta iti karkarna a sekta a kas kadagiti Saksi ni Jehova.”—Kent, Washington, U.S.A.
“Ti agpayso, diak idi am-ammo ida ken no ania ti patpatienda.”—Cecilie, Esbjerg, Denmark.
Siguro nakitkitam idan a mangaskasaba iti binalaybalay wenno iti publiko a lugar, mangiwarwaras iti naibatay-Biblia a pagbasaan, ken mangyaw-awis iti libre a panagadal iti Biblia. Mabalin a maysa pay ketdi kadakuada ti nangted iti daytoy a magasin. Ngem baka pampanunotem latta, ‘Sino a talaga dagiti Saksi ni Jehova?’ Baka kapadam iti kapanunotan ti maysa kadagiti nagkomento iti ngato.
No adda kakasta a saludsod wenno pampanunotem, pakasarakam iti sungbat? Kasanom a maammuan no ania a talaga ti patpatien dagiti Saksi ni Jehova, paggapgapuan ti pondo para iti panangasabada ken panagibangon kadagiti lugar a pagdaydayawanda, apay a bisbisitaendaka iti balayyo, ken apay a kasarsaritadaka iti publiko a lugar?
“Adun ti nabasak iti Internet maipapan kadagiti Saksi ni Jehova,” kuna ni Cecilie a nagkomento iti ngato. “Adda dagiti nangngegko a tsismis, ken pinatik dagiti pammadakes kadakuada. Isu a nakamadmadi idi ti panagkitak kadakuada.” Idi kuan, dagiti Saksi ni Jehova a mismo ti kinasaritana ket napnek iti sungbatda kadagiti saludsodna.
Kayatmo kadi a maammuan ti pudpudno a sungbat dagiti saludsodmo maipapan kadakami? Irekomendami nga umasidegka iti kasayaatan a mabalinmo a pagsaludsodan—dagiti Saksi ni Jehova a mismo, a mangipabpablaak iti daytoy a magasin. (Proverbio 14:15) Sapay koma ta makatulong dagiti sumaganad nga artikulo tapno maawatam no asinokami, ti patpatienmi, ken ti trabahomi.
