Dimmakkelak iti Los Angeles, California, U.S.A., kadagiti lugar nga agdindinnamag gapu kadagiti gang ken droga. Maikaduaak iti innem nga agkakabsat.

Pinadakkelnakami ni Nanang kas miembro ti maysa nga evangelical church. Ngem idi tin-edyerakon, nagbalin a doble kara ti panagbiagko. No Domingo, maysaak kadagiti parakanta iti simbaan. Ngem iti dadduman nga aldaw, addaak iti party, agdrogaak, ken agar-aramidak iti seksual nga immoralidad.

Managpungpungtot ken naranggasak idi. Usarek nga armas ti aniaman a banag a magammatak tapno laeng mangabakak. Awan epektona dagiti nasursurok iti simbaan. Kanayon nga irasonko, “Ti Apo ti agibales ket siak ti us-usarenna!” Idi haiskulak bayat ti maud-udi a tawtawen ti 1960’s, naimpluensiaanak ti Black Panthers, maysa a politikal a grupo a pagaammo gapu iti naranggas a panangilabanda iti kalintegan ti tao. Isu a nakimiembroak iti organisasion dagiti estudiante a mangilablaban iti kalintegan ti tao. No dadduma, agprotestakami a pakaigapuan no kua iti temporario a panagserra dagiti eskuelaan.

Kasla kurang pay ti panagprotesta tapno maipapasko ti kinabayolentek. Isu a nakiramanak kadagiti krimen a maigapu iti gura iti saanmi a kapada iti puli. Naminsan, napankami nagbuya kadagiti gagayyemko iti pelikula maipapan iti pannakaparigat idi dagiti Africano a tagabo iti United States. Nakapungtotkami kadagita a kinaawan hustisia, isu a kinabkabilmi dagiti puraw nga agtutubo iti dayta a pagsinean. Kalpasanna, napankami iti lugar dagiti puraw tapno agsapul iti ad-adu pay a kabilenmi.

Idi dandanin 20 ti tawenko, pagaammodakamin nga agkakabsat a lallaki a napeklan a kriminal. Nagbalinkami a sakit ti ulo dagiti autoridad. Nakimiembro ti maysa nga adingko iti agdindinamag a dakes a gang, ket nakikadkaduaak met kadakuada. Dimmakes pay ti dakesen a biagko.

Adda gayyemko a dagiti nagannakna ket Saksi ni Jehova. Inawisdak iti gimongda, ket napanak. Iti pay laeng rugina, nakitakon a naiduma dagiti Saksi. Adda Bibliada amin ken us-usarenda dayta bayat ti gimong. Uray dagiti ubbing, adda pasetda iti sango! Nasdaawak a nakaammo nga adda gayam nagan ti Dios, Jehova, ken us-usarenda dayta. (Salmo 83:18) Nagduduma ti nasionalidadda, ngem nakadkadlaw  nga awan dagiti grupo a makisinsina gapu ta naiduma ti pulida.

Idi damo, diak kayat ti makipagadal iti Biblia kadagiti Saksi, magustuak la ti mapan kadagiti gimongda. Iti maysa a rabii nga immatenderak iti gimongda, napan met nagbuya iti concert ti dadduma a gagayyemko. Kinabkabilda sadiay ti maysa a tin-edyer agingga a natay gapu ta dina kayat nga ited ti leather a jacket-na. Kabigatanna, pinaglastogda pay dayta. Idi simmangoda iti korte, saanda man la nga imbilang a serioso a basol ti inaramidda. Kaaduan kadakuada ti nasentensiaan iti tungpal biag a pannakaibalud. Imbag laengen ta saanak a nakikadua kadakuada iti daydi a rabii. Sipud idin, determinadoakon a mangbalbaliw iti biagko ken agadal iti Biblia.

Gapu ta nasaksiak ti nakaro a panangidumduma iti puli, adda dagiti nakitak kadagiti Saksi a nagsiddaawak. Kas pagarigan, idi napan iti sabali a nasion ti maysa a Saksi a puraw, impaaywanna dagiti annakna iti maysa a pamilia a Black American. Pinagyan met ti maysa a pamilia a puraw ti maysa a Black American nga agtutubo iti balayda gapu ta awan pagyananna. Nakombinsirak a dagiti Saksi ni Jehova ti mangtungtungpal iti sasao ni Jesus iti Juan 13:35: “Babaen iti daytoy maammuanto ti isuamin a dakayo dagiti adalak, no addaankayo iti ayat iti maysa ken maysa.” Ammok a nasarakakon ti pudpudno a panagkakabsat.

Iti panagadalko iti Biblia, naawatak a masapul a baliwak ti pampanunotko tapno agbalinak a mannakikappia, ken makitak a dayta ti kasayaatan a wagas ti panagbiag. (Roma 12:2) In-inut a simmayaat ti personalidadko. Idi Enero 1974, nabautisaranak kas maysa a Saksi ni Jehova.

Ngem uray idi nabautisaranakon, kasapulak latta a labanan ti kinaalistok nga agpungtot. Kas pagarigan, idi mangaskasabakami, adda nangtakaw iti radio iti kotsek. Kinamatko isuna. Idi dandanikon makamatan, inibbatanna ti radiok sa pirmi ti taraynan. Idi inyestoriak iti dadduma no kasanok a nabawi ti radiok, dinamag ti maysa a panglakayen, “Stephen, ania ngata ti inaramidmo no nakamatam isuna?” Dayta ti namagpanunot kaniak ken nangpatibker iti determinasionko nga agbalin nga ad-adda a mannakikappia.

Idi Oktubre 1974, nangrugiak nga agserbi kas amin-tiempo a ministro, a 100 nga oras kada bulan a mangisursuroak maipapan iti Biblia. Di nagbayag, naikkanak iti oportunidad nga agboluntario iti sangalubongan a hedkuarter dagiti Saksi ni Jehova idiay Brooklyn, New York. Idi 1978, nagawidak idiay Los Angeles tapno aywanak ti masakit a nanangko. Kalpasan ti dua a tawen, nagkasarkami iti dungdungnguek a ni Aarhonda. Dakkel ti naitulongna kaniak iti pannakaaywan ni Nanang iti maud-udi a tawtawen ti biagna. Idi agangay, nageskuelakami ken Aarhonda iti Watchtower Bible School of Gilead ket naidestinokami iti Panama, a pagserserbianmi kas misionero agingga ita.

Sipud nabautisaranak, naipasangoak iti adu a situasion a mabalin a mangiduron koma kaniak nga agbalin a bayolente. Nasursurok ti pumanaw lattan no adda mangpadas a mamagpungtot kaniak, wenno mangpakalma iti situasion iti sabali a pamay-an. Adu ti mangap-apresiar kaniak, pati ni baketko, iti panangsangok kadagiti kasta a situasion. Uray siak a mismo, kasla diak mamati kadagita a panagbalbaliwko! Ngem ammok a no sisiak laeng, saanko koma a nabaelan dagita. Patiek nga ebidensia dagita nga adda pannakabalin ti Biblia a mangbalbaliw iti biag.—Hebreo 4:12.

Gapu iti Biblia, addan direksion ti biagko ken nasursurok ti agbalin a pudpudno a mannakikappia. Saanakon a mangbugbugbog kadagiti tattao. Imbes ketdi, tultulongak idan tapno maam-ammoda ti Dios. Inyadalak pay ketdi iti Biblia ti maysa a dati a kalablabanko idi haiskulak! Kalpasan a nabautisaran, nagkakuartokami iti apagbiit. Agingga ita, nadekketkami nga aggayyem. Iti agdama, nasuroken a 80 a tattao ti natulonganmi ken baketko nga agadal iti Biblia agingga a nagbalinda a Saksi ni Jehova.

Napnapno ti pusok iti panagyaman ken Apo Jehova gapu iti intedna a naragsak ken makapnek a biag a kadua dagiti pudpudno a kakabsatko iti pammati.