“Mariknam kadi a saanmo a kasapulan ti Dios? Kasta ti marikna ti minilion.” Dagitoy a sasao ti mabasa iti nabiit pay a billboard a binayadan ti grupo dagiti ateista. Patienda a dida kasapulan ti Dios.

Iti sabali a bangir, adu a mamati iti Dios ti agdesision a mangipakita a kasla awan ti Dios. Kinuna ti Katoliko nga arsobispo a ni Salvatore Fisichella maipapan kadagiti miembro ti relihionna: “No kitaendatayo, mabalin a saanda a mailasin a Kristianotayo gapu ta ti panagbiagtayo ket kas kadagiti di manamati.”

Okupado unay ti dadduma ta didan mapanunot ti Dios. Ibilangda a nagadayo, saan a maseknan, ken awan ti pakibianganna iti biagda. Kaaduanna, malagipda laeng ti Dios no adda problemada wenno adda kasapulanda, arigna kasla adipen a nalakada laeng nga ayaban no adda ipaaramidda.

Saan nga an-annuroten ti dadduma ti isursuro ti relihionda gapu ta ipapanda a saan a napateg dagita. Kas pagarigan, 76 a porsiento kadagiti Katoliko idiay Germany ti mamati a saan a dakes nga agkabbalay ti lalaki ken babai a di pay nagkasar—panangmatmat a maikontra iti pannursuro ti relihionda ken iti Biblia. (1 Corinto 6:18; Hebreo 13:4) Siempre, saan laeng a dagiti Katoliko ti di mangituntunos iti biagda iti ibagbaga ti relihionda. Maladingitan ti adu a lider ti relihion ta dagiti miembroda ket agbibiag a kas kadagiti saan a mamati iti Dios.

Umiso laeng ngarud a maisalsaludsod ti: Talaga kadi a kasapulantayo ti Dios? Nabayagen a maisalsaludsod daytoy. Nadakamaten dayta kadagiti umuna a panid ti Biblia. Tapno masungbatan dayta, ammuentayo dagiti pasamak a nairekord iti Genesis a libro ti Biblia.