“Inton makitayo ti Jerusalem a nalikmut kadagiti nagkampo a buyot, iti kasta ammuenyo a ti pannakalangalangna immasidegen. Iti kasta dagidiay adda idiay Judea rugianda koma ti agkamang iti bambantay, ket dagidiay adda iti tengngana pumanawda koma.” (Lucas 21:20, 21) Dayta ti imbilin ni Jesus kadagiti adalanna maipapan iti dumteng a pannakadadael ti Jerusalem. Adda kadi pammaneknek nga impangag dagiti adalan ti pakdaar ni Jesus?

Pinullo a tawen kalpasan ti ipapatay ni Jesus, rimmaut ti buyot dagiti Romano iti Palestina nga indauluan ni Cestius Gallus tapno pasardengenna ti iyaalsa. Daytoy nga iraraut ket pinatalgedan ti Judio a historiador a ni Josephus ta nasaksianna dayta a pasamak. Ti dakkel a buyot dagiti Romano linikmutda idin ti Jerusalem ken kasla siguradon a maparmekda dayta. Pagammuan ta binilin ni Gallus ti buyotna nga agsanudda. Sigun iti historiador ti Kakristianuan a ni Eusebius, ginundawayan dagiti Kristiano a taga-Judea ti nagkamang idiay Pella, maysa a siudad iti kabambantayan ti Decapolis.

Sumagmamano a tawen kalpasanna, idi 70 C.E., nagsubli ti sabali a buyot dagiti Romano nga indauluan ni Heneral Tito ket rinautda ti Jerusalem. Iti daytoy a gundaway, intuloyda ti saan a naaramidan ni Cestius Gallus ket dinadaelda ti siudad. Ginasut a ribu ti saanen a nakaruar ken natay idiay Jerusalem.

Dagiti salaysay ti Biblia maipapan kada propeta Samuel, Elias, ken Eliseo tukoyenda dagiti lallaki nga “annak dagiti mammadto.” Kas pagarigan, idi a ni Eliseo dinutokanna ni Jehu nga agbalin nga ari ti Israel, imbaonna ti “maysa kadagiti annak dagiti mammadto,” a mangpulot ken Jehu.​—2 Ar-ari 9:1-4.

Patien dagiti iskolar a dayta a termino ket tumukoy iti grupo dagiti tattao nga agnanaed ken agkakadua nga agtartrabaho imbes nga annak dagiti propeta. Sigun iti Journal of Biblical Literature, dagiti miembro daytoy a grupo ket nalabit indibidual a “nangipamaysa iti panagserbi ken Yahweh [Jehova] nga indauluan ti maysa a propeta . . . kas naespirituan nga amada.” (Idilig iti 2 Ar-ari 2:12) Kinapudnona, ti salaysay maipapan iti pannakapulot ni Jehu tukoyenna ti babaonen ni Eliseo kas “ti katulongan ti mammadto.”​—2 Ar-ari 9:4.

Simple laeng ti panagbiag ti “annak dagiti mammadto.” Idi tiempo ni Eliseo, maysa kadagita a grupo ti nadakamat a nangbangon iti bukodda a pagnaedan ken nagusar iti binulod a wasay. (2 Ar-ari 6:1-5) Adda asawa ti dadduma kadakuada ta dinakamat ti maysa a reperensia ti maysa a balo “ti annak dagiti mammadto.” (2 Ar-ari 4:1) Nalawag nga inapresiar dagiti matalek nga Israelita ti annak dagiti propeta, ken iti maysa a salaysay, adda gundaway nga inikkanda ida iti taraon.​—2 Ar-ari 4:38, 42.