Ti Biblia Balbaliwanna ti Biag

ANIA ti nakatulong iti maysa a babai iti Pilipinas a mangisardeng iti nalabes a panagin-inumna ken simmayaat ti biag ti pamiliana? Apay a ti maysa a karatista a taga-Australia ket nagbalin a mannakikappia a ministro ti relihion. Basaem no ania ti isalaysayda.

“Saan a Kaskarina ti Agbalbaliw.”​—CARMEN ALEGRE

PANNAKAYANAKNA: 1949

NAKAYANAKANNA: PILIPINAS

PAKASARITAANNA: MANGNGINUM

TI NAPALABASKO: Naipasngayak idiay San Fernando, maysa nga ili iti probinsia ti Camarines Sur. Ngem idi adda nakemkon, nagnaedak iti Antipolo, Rizal. Idi kasangsangpetko ditoy, ti Antipolo ket maysa a bassit ken naulimek nga ili a masarakan iti naraber ken aduan kaykayo a kabambantayan. No sumipngeten, manmanon ti tao nga agpagnapagna. Ngem ita, ti Antipolo ket nagdakkelen a siudad nga aduan ti tao.

Bayat ti panagnaedko iti Antipolo, naam-ammok ti lalaki nga agnagan Benjamin, ken idi agangay nagkasarkami. Natakuatak a narigrigat gayam ti biag ti naasawaan ngem iti impagarupko. Tapno malipatak dagiti problemak, rinugiak ti aginum. Nagbalinak a nauyong, a nalawag a makita iti panangtratok iti asawak ken annakko. Diak makapagteppel wenno maanusan ti makilangen kadakuada. Awan panagraemko iti asawak, isu a saan a naragsak ti pamiliami.

NO KASANO A BINALBALIWAN TI BIBLIA TI BIAGKO: Maysa a Saksi ni Jehova ti ipagko a ni Editha. Imbagana nga agpayadalkami iti Biblia kadagiti Saksi. Immanamongkami ken Benjamin ta namnamaenmi a sumayaat ti biag ti pamiliami.

Bayat ti panagadalmi iti Biblia, nagadu ti nasursuromi a nagsasayaat a kinapudno. Ti sasao iti Apocalipsis 21:4 ti nangnangruna a nakatignayak. Kuna dayta a teksto maipapan kadagidiay agbiagto iti paraiso a daga nga iturayan ti Pagarian ti Dios a “punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot.” Kayatko a maysaakto met kadagiti agsagrap kadagitoy a bendision.

Nabigbigko a masapul nga ikkatek ti bisiok ken balbaliwak ti kababalinko. Saan a kaskarina ti agbalbaliw, ngem idi agangay naikkatko met laeng ti nalabes a panaginumko. Nasursurok met ti agbalin a naasi ken naanus iti pamiliak. Kanayonanna, nasursurok met a raemen ken  suportaran ni lakayko bayat ti panangidaulona iti pamiliami.

Idi nangrugikami ken Benjamin nga agatender iti gimong dagiti Saksi ni Jehova, nagustuanmi ti nakitami. Saanda nga agsugal, agbartek, ken dida mangidumduma. Nadayaw ti panangtratoda iti amin. Kombinsidokami a nasarakanmin ti pudno a relihion.​—Juan 13:34, 35.

NO KASANO A NAGUNGGONAANAK: Nagdakkel ti nagbalbaliwan ti biag ti pamiliami. Naragsakkamin ken Benjamin, ken maragragsakankami a mangisuro iti Biblia iti sabsabali. Nangrugi metten nga agadal iti Biblia ti dua nga annakmi ken dagiti assawada. Namnamaenmi a kaduaminto idan nga agserbi ken Jehova. Talaga a daytoy ti kasayaatan a wagas ti panagbiag.

“Panagriknak Awan ti Makaatiw Kaniak.”​—MICHAEL BLUNSDEN

PANNAKAYANAKNA: 1967

NAKAYANAKANNA: AUSTRALIA

PAKASARITAANNA: KARATISTA

TI NAPALABASKO: Dimmakkelak idiay Albury, maysa a napintas ken narang-ay a siudad iti New South Wales. Kas iti kaaduan a siudad, adda met latta dagiti krimen. Ngem kaaduanna, natalged a lugar a pagnaedan ti Albury.

Dimmakkelak a nanam-ay ti panagbiagmi. Nupay nagdiborsio dagiti nagannakko idi agtawenak iti pito, siniguradoda nga ipaay ti amin a kasapulanmi nga agkakabsat. Naaddaanak iti nasayaat nga edukasion iti maysa a nalatak a pribado nga eskuelaan iti lugarmi. Kayat ni tatangko nga inton maturposko ti panagadalko agbalinak a negosiante. Ngem kaykayatko ti isports, ket nagbalinak a nalaing iti panagbisikleta ken karate. Idi agangay, nagtrabahoak iti talyer tapno ad-adu ti tiempok iti pagay-ayatko nga isports.

Tagtaginayonek ti nasayaat a pammagik ken ipagpannakkelko dayta. No dadduma, panagriknak awan ti makaatiw kaniak. Mabalinko nga usaren ti pigsak a mangdangran iti sabsabali. Ngem gapu ta ammo ti instruktorko iti karate a lablabanak ti di umiso a panangusarko iti pigsak, impaganetgetna kaniak a maaddaanak iti disiplina ken nasayaat a kababalin. Impaganetgetna ti kanayon a panagtulnog ken kinasungdo.

NO KASANO A BINALBALIWAN TI BIBLIA TI BIAGKO: Idi nagadalak iti Biblia, naammuak a kagura ni Jehova ti kinaranggas. (Salmo 11:5) Idi damo, inrasonko a saan met a kinaranggas ti karate no di ket natalged a kita ti isports. Para kaniak, ti isursurona ti naimbag a kababalin ken nasayaat nga alagaden a kas met iti isursuro ti Biblia. Nakaan-anus ti agassawa a nangyadal kaniak. Dida pulos imbaga nga isardengkon ti martial arts; intultuloyda laeng nga insuro kaniak ti kinapudno ti Biblia.

 Bayat nga umun-uneg ti pannakaammok iti Biblia ken simminged ti relasionko ken Jehova, naiduman ti panangmatmatko iti bambanag. Natignayak idi naammuak ti ulidan ni Jesus nga Anak ni Jehova. Uray mannakabalin, saan a pulos nakilaban. Nagdakkel ti epektona kaniak ti sasaona iti Mateo 26:52: “Amin dagidiay mangaramat iti kampilan mataydanto iti kampilan.”

Bayat nga umad-adu ti pannakaammok maipapan ken Jehova, umun-uneg met ti panagayat ken panagraemko kenkuana. Makaliwliwa a maammuan a maseknan gayam kaniak ti nakasirsirib ken nakalalaing a Namarsua kadatayo. Maragsakanak a makaammo nga uray no mapaayko ni Jehova wenno kasla marigatanak ken kayatkon ti sumuko, dinak pulos baybay-an no la ket ikagumaak nga aramiden ti naimbag. Maliwliwaak iti karina: “Siak, ni Jehova a Diosmo, ig-iggamak ti makannawan nga imam, Daydiay agkunkuna kenka, ‘Dika agbuteng. Siak tulongankanto.’” (Isaias 41:13) Nabigbigko a napalalo ti ayat a naipakita kaniak isu a diak kayat a palusposan.

Ammok a ti karate ti karigatan a tinallikudak. Ngem ammok met a maay-ayo ni Jehova, ken napatpateg ti panagserbik kenkuana ngem iti aniaman a tinallikudak. Ti sasao ni Jesus a nabasak iti Mateo 6:24 ti nangnangruna a nakakombinsirak: “Awan ti makabalin nga agpaadipen iti dua nga appo.” Naamirisko a diak mabalin a paggiddanen ti agserbi ken Jehova ken iti karate. Masapul nga agpiliak no ituloyko ti karate wenno agserbiak ken Jehova.

Marigatanak nga agdesision ta aglalaok ti mariknak. Ngem maragsakanak a makaammo a parparagsakek ni Jehova. Iti sabali a bangir, mariknak met a kasla lipliputak ti instruktorko iti karate. Masansan nga ibilang dagiti karatista a ti panangliput ket basol a di mapakawan. Kaykayat payen ti dadduma ti agpakamatay ngem ti mapabainan.

Mabainak a mangibaga iti instruktorko no apay a sumardengakon iti karate. Isu a pimmanawak lattan a diak nagpakada kadagiti kakaduak iti karate. Ammok nga umiso ti inaramidko a panangisardeng iti karate. Ngem makonsiensiaak met a diak man la inlawlawag ken inranud ti baro a pammatik. Panagriknak pinaayko ni Jehova sakbay pay nga agserbiak kenkuana. Dagitoy ti mangburburibor kaniak. Namin-adu a kayatko ti agkararag ken Jehova ngem diak maituloy ta makasangitak metten.

Mabalin nga adda nakita ni Jehova a naimbag kaniak ta tinignayna dagiti kakabsat iti kongregasion a tumulong kaniak. Naisangsangayan ti ayat, panangliwliwa, ken pannakigayyemda. Naliwliwaak met iti salaysay ti Biblia maipapan kada David ken Bat-seba. Uray nakaaramid ni David kadagiti nadagsen a basol, pinakawan ni Jehova idi sipapasnek a nagbabawi. Nakatulong ti panangutobko iti dayta a salaysay tapno realistiko ti panangmatmatko kadagiti pagkapuyak.

KASANO A NAGUNGGONAANAK: Idi saanak pay nga agad-adal iti Biblia, awan bibiangko iti dadduma, bagbagik laeng ti pampanunotek. Ngem ita, ad-adda a mannakipagriknaakon gapu iti tulong ni Jehova ken ti napintas a baketko, a pito a tawenen a kataktakunaynayko. Maragragsakankami met ta addaankami iti pribilehio a mangisuro iti Biblia iti adu nga indibidual a pakairamanan dagidiay nakalkaldaang ti kasasaadda. Ti pannakakitak iti panagbalbaliw ti biag ti dadduma gapu iti ayat ni Jehova ti ad-adda a mangparparagsak kaniak ngem iti panagbalinko koma a kampeon iti karate.

[Blurb iti panid 14]

“Makaliwliwa a maammuan a maseknan gayam kaniak ti nakasirsirib ken nakalalaing a Namarsua kadatayo”

 [Kahon/Ladawan iti panid 15]

“Agyamanak iti Daytoy Nagsayaat nga Artikulo!”

Naragsakanka kadi a nangbasa kadagiti naisalaysay a kapadasan? Dua laeng dagita kadagiti nasurok a 50 a salaysay a naipablaak iti Pagwanawanan sipud pay idi Agosto 2008. Ti serye a “Ti Biblia Balbaliwanna ti Biag” ket paggugusto dagiti agbasbasa. Apay a pagay-ayat ti adu a tattao a basaen dayta?

Nagduduma ti kasasaad dagiti indibidual a naitampok kadagitoy nga artikulo. Sakbay a naammuanda ti maipapan ken Jehova, dadduma ti kasla naballigi ngem awanan panggep ti biagda. Napasaran met ti dadduma dagiti dadakkel a karit kas iti kinamanagpungpungtot, wenno panagdroga ken panaginum iti arak. Dadduma met ti naisuro maipapan ken Jehova sipud kinaubingda ngem simmardengda a nagserbi kenkuana iti sumagmamano a tiempo. Ipakita dagita a kapadasan a posible ti agbalbaliw tapno maay-ayo ti Dios. Ken kanayon a makagunggona ti panangaramid iti dayta. Ania ti epekto dagitoy a salaysay kadagiti agbasbasa?

Kuna ti maysa a nakabasa iti artikulo iti Pebrero 1, 2009 a nakatulong dayta iti dadduma a balud a babbai.

▪ “Adu kadagiti balud ti makatarus iti kasasaad dagiti indibidual a nadakamat iti artikulo,” kunana. “Ti ladawan a ‘sakbay’ ken ‘kalpasan’ agraman dagiti napalabas a pakasaritaan ti tunggal indibidual ket epektibo unay. Adu a balud ti umarngi ti kasasaadda. Apaman a nabasa ti dua a balud dagitoy a salaysay, rinugiandan ti nagadal iti Biblia.”​—C. W.

Dagiti kapadasan iti daytoy nga artikulo ti nangnangruna a nakatignayan ti dadduma. Kas pagarigan, ti Abril 1, 2011 a ruar itampokna ti kapadasan ni Guadalupe Villarreal, a nangtallikud iti imoral a panagbiagna tapno makapagserbi ken Jehova. Usigem ti dua kadagiti adu a surat a naggapu kadagiti agbasbasa kas panangapresiarda iti salaysayna.

▪ “Natignayak iti kapadasan ni Guadalupe. Makaparagsak a makita no kasano a ti panagayat ken Jehova ken iti Saona naan-anay a binalbaliwanna ti maysa a tao.”​—L. F.

▪ “Ikagkagumaak idi nga iranud ti pammatik iti amin agraman dagiti homoseksual. Ngem idi agangay, madlawko a diak ikankano wenno likliklikak pay ketdi idan. Daytoy nga artikulo ti apag-isu a kasapulak. Tinulongannak daytoy a mangtulad iti panangmatmat ni Jehova kadagitoy a tattao kas potensial nga agdaydayaw kenkuana.”​—M. K.

Ti kapadasan ni Victoria Tong a nagparang iti Agosto 1, 2011, ti sabali pay a salaysay a makagunggona unay iti adu nga agbasbasa. Dinakamat ni Victoria ti nakalkaldaang a panagubingna. Binigbigna a lablabananna ti negatibo a riknana a di maikari iti panagayat ni Jehova, uray nabayagen nga agserserbi Kenkuana. Ken imbagana no ania ti in-inut a nakatulong kenkuana a mangbigbig nga isu ket ay-ayaten ni Jehova. Usigem ti kinuna ti dadduma a nakabasa iti pakasaritaanna.

▪ “Talaga a natignay ti pusok iti kapadasan ni Victoria. Adu ti nakalkaldaang a kapadasak. Kanayon a lablabanak ti negatibo a pampanunotko, uray adun a tawen a nabautisaranak kas maysa a Saksi. Ngem ti kapadasan ni Victoria ti mangparparegta kaniak a mangikagumaan a mangtulad iti panangmatmat ni Jehova kaniak.”​—M. M.

▪ “Idi ubingak, lablabanak ti pannakaadikto iti pornograpia. Iti nabiit pay, nasulisogak manen iti dayta. Nagpatulongak kadagiti panglakayen iti kongregasion, ket naparmekko ti problemak. Impanamnamada kaniak ti panagayat ken asi ni Jehova. Ngem no dadduma, mariknak latta nga awan serserbik a kasla dinak mabalin nga ayaten ni Jehova. Talaga a nakatulong kaniak ti kapadasan ni Victoria. Mabigbigko itan a no pampanunotek a diak maikari iti pammakawan ti Dios, kasla ibagbagak a saan nga umdas ti sakripisio ti Anakna a mangabbong kadagiti basolko. Kinartibko daytoy nga artikulo tapno mabasak ken mautobko no kasta a mariknak a kasla awan serserbik. Agyamanak iti daytoy nagsayaat nga artikulo!”​—L. K.