Abraham​—Ulidan ti Kinapakumbaba

Situtugaw ni Abraham nga aglinlinong iti toldana iti kapudpudotan ti aldaw idi adda tallo a lallaki a nasaripatpatanna a sumungsungad. a Dagus a timmaray tapno sabtenna ida sa inayabanna ida nga aginana biit iti toldana. Inyawisna a manganda iti sangkabassit a “tinapay,” ngem nangisagana metten iti agkakaimas a taraon a kas iti tinapay a kalutluto, mantekilia, gatas, ken nalukneng a karne. Iti panangisaganana iti taraon, saan laeng nga impakita ni Abraham ti naisangsangayan a panagpadagus no di ket impakitana met ti naimpusuan a kinapakumbaba.​—Genesis 18:1-8.

ANIA TI KINAPAKUMBABA? Ti kinapakumbaba ket kasungani ti kinapannakkel wenno kinapangas. Ti napakumbaba a tao ibilangna a nalalaing ti sabsabali. (Filipos 2:3) Dumngeg iti singasing ti dadduma, ken situtulok a mangaramid iti nanumo nga annongen agpaay iti sabsabali.

KASANO NGA IMPAKITA NI ABRAHAM TI KINAPAKUMBABA? Situtulok a nagserbi ni Abraham iti sabsabali. Kas nadakamaten, idi nasaripatpatan ni Abraham ti tallo a ganggannaet a lallaki, dagus nga inasikasona ida. Nadardaras met ni Sara a nangisagana iti taraon. Ngem paliiwem no asino ti kaaduan ti inaramid: Ni Abraham ti nangsabet kadagiti bisita, isu ti nangitukon iti taraon, isu ti nangala ken nangpili iti animal a maparti, ken isu ti nangidasar iti amin a taraon kadagiti bisita. Saanna nga impabiang ti amin a trabaho kadagiti adipenna, no di ket sipapakumbaba nga inasikasona ti aniaman a kasapulan. Dina imbilang a nababa a trabaho ti agserbi iti sabsabali.

Dimngeg ni Abraham iti singasing ti sabsabali a nababbaba ngem isu. Manmano ti nairekord iti Biblia a panagsarita da Abraham ken Sara. Ngem namindua a nadakamat nga  impangag ni Abraham ti singasing ni Sara. (Genesis 16:2; 21:8-14) Iti maysa a gundaway, “makaparurod unay” ken Abraham ti singasing ni Sara. Ngem idi imbaga ni Jehova a nasayaat dayta a singasing, sipapakumbaba nga impangag ken inaramid dayta ni Abraham.

ANIA DAGITI PUNTO A MAADALTAYO? No talaga a napakumbabatayo, sitatallugod nga agserbitayo iti sabsabali. Maragsakantayo a mangaramid iti aniaman a kabaelantayo tapno agbalinda a komportable.

Maipakitatayo met ti kinapakumbaba no ikabilangantayo ti singasing ken kapanunotan ti dadduma, uray no naiduma dayta iti kapanunotantayo. (Proverbio 15:22) Dakkel ti maitulong ti kasta a kababalin nangruna kadagiti addaan autoridad. “Pagarupek a nasayaat no ti manangaywan ikkanna iti gundaway dagiti adda iti babaenna a mangyebkas iti kapanunotanda,” kuna ti aduan kapadasan a superbisor nga agnagan John. Kunana pay: “Masapul ti kinapakumbaba tapno mabigbigmo nga adda idadauluam a nasaysayaat ngem sika ti pamay-anna a mangaramid iti bambanag. Ken awan ti asinoman​—uray ti manangaywan​—a mangbukbukod iti amin a nasayaat a kapanunotan.”

No ipangagtayo ti singasing ti dadduma ken aramidentayo dagiti nanumo a trabaho agpaay kadakuada, matuladtayo ni Abraham ken anamongannatayo ni Jehova. Laglagipentayo a “ti Dios busorenna dagiti natangsit, ngem mangted iti di kaikarian a kinamanangngaasi kadagiti napakumbaba.”​—1 Pedro 5:5.

[Footnote]