Agsursuroka iti Sao ti Dios

Kasano ti Agpili iti Nasayaat a Gagayyem?

Idatag daytoy nga artikulo dagiti saludsod a nalabit nayimtuodmon. Ipakitana met ti pakabasaam kadagiti sungbat iti Bibliam. Maragsakan dagiti Saksi ni Jehova a mangilawlawag kenka kadagiti sungbat.

1. Apay a masapul a pilien ti agbalin a gagayyemtayo?

Gagangay laeng a tarigagayantayo nga akseptarendatayo ti sabsabali. Dayta ti makagapu a masansan a tultuladentayo dagiti kapulpulapoltayo. Nakabilbileg ti impluensia dagiti gagayyem iti tumanor a kababalintayo. Isu a no siasino dagiti pinilitayo a gagayyem, kasdiay met ti pagbalinan ti kinataotayo.​—Basaem ti Proverbio 4:23; 13:20.

Ti mannurat ti Biblia a ni David siaannad a pinilina ti gagayyemna. Nakikadua kadagidiay nakatulong kenkuana nga agtalinaed a matalek nga adipen ti Dios. (Salmo 26:4, 5, 11, 12) Ni Jonatan ti maysa kadagiti nakigayyemanna. Nagunggonaan ni David ta pinaregta ni Jonatan nga agtalek ken Jehova.​—Basaem ti 1 Samuel 23:16-18.

2. Kasano nga agbalinka a gayyem ti Dios?

Nupay mannakabalin-amin ni Jehova, mabalintayo ti makigayyem kenkuana. Kas pagarigan, nagbalin ni Abraham a gayyem ti Dios. Imbilang ni Jehova a gayyemna ni Abraham gapu ta nagtalek ken nagtulnog Kenkuana. (Genesis 22:2, 9-12; Santiago 2:21-23) No agtalektayo ken Jehova ken aramidentayo ti kalikagumanna, agbalintayo met a gayyemna.​—Basaem ti Salmo 15:1, 2.

 3. Ania ti pagimbagan kenka dagiti nasayaat a gagayyem?

Matalek dagiti pudno a gagayyem ken tulongandaka a mangaramid iti umiso. (Proverbio 17:17; 18:24) Kas pagarigan, nupay laklakay ni Jonatan iti agarup 30 a tawen ken isu ti agtawid iti kinaari iti Israel, kanayon a sinuportaranna ni David kas pinili ti Dios nga agbalin nga ari. Sipaprangka met a tubngarendaka dagiti pudno a gagayyemmo no makitada a madi ti ar-aramidem. (Salmo 141:5) Dagiti gagayyem a mangay-ayat iti Dios tulongandaka a maaddaan iti naimbag a kababalin.​—Basaem ti 1 Corinto 15:33.

Maam-ammom dagiti tattao a mangan-annurot iti kinalinteg no mapanka iti Kingdom Hall dagiti Saksi ni Jehova. Masarakam sadiay dagiti gagayyem a mangparegta kenka nga agtultuloy a mangparagsak iti Dios.​—Basaem ti Hebreo 10:24, 25.

Nupay kasta, mabalin nga agbiddut uray dagiti gagayyem a mangay-ayat iti Dios. Saanka koma a nalaka a marurod kadagiti kamalida. (Eclesiastes 7:9, 20-22) Laglagipem nga awan ti perpekto a gayyem ken napateg kadatayo dagiti gagayyem a mangay-ayat iti Dios. Paregtaennatayo ti Sao ti Dios a mangpalabas iti kamali dagiti pada a Kristiano.​—Basaem ti Colosas 3:13.

4. Kasanon no busorendaka dagiti agkunkuna a gagayyemmo?

Adu a makipagad-adal iti Biblia ti busbusoren ti dadduma a gagayyemda. Nalabit saan a maawatan dagiti gagayyemmo dagiti nagsayaat a balakad wenno ti pudno a namnama a naammuam iti Biblia. Mabalinmo a tulongan ida.​—Basaem ti Colosas 4:6.

No dadduma, uyawen dagiti agkunkuna a gagayyem ti naimbag a damag a linaon ti Sao ti Dios. (2 Pedro 3:3, 4) Mabalin a laisenda ti panangaramidmo iti umiso. (1 Pedro 4:4) No kasta ti aramidenda, agpilika no asino ti kayatmo a gayyem. Isuda wenno ti Dios? No ti Dios ti pakigayyemam, pinilim ti kasayaatan pay laeng a gayyem.​—Basaem ti Santiago 4:4, 8.

Para iti kanayonan nga impormasion, kitaem ti kapitulo 12 ken 19 daytoy a libro, Ania a Talaga ti Isursuro ti Biblia?, nga impablaak dagiti Saksi ni Jehova.