Umadanika iti Dios

Panangtungpal iti Obligasiontayo iti Dios

NAISALUDSODMO kadin no ania ti panggep ti biag? Ti kasta a panagsaludsod ket abilidad a naggapu ken Jehova. Ngem saan la a dayta, impaayna met ti nasged a tarigagay a mangammo iti sungbat dayta. Agyamantayo iti naayat a Diostayo ta masarakantayo dayta a sungbat iti naisurat a Saona, ti Biblia. Usigem ti sasao ni Ari Solomon a masarakan iti Eclesiastes 12:13.

Makatulong ti kinuna ni Solomon no kasano a masarakantayo ti kinaragsak ken ti makagunggona a biag. Tangay naparaburan iti naisangsangayan a sirib, aglaplapusanan a kinabaknang, ken naarian nga autoridad, naan-anay a masukisokna ti ar-aramid ti tao, a pakairamanan ti panangbirok iti kinabaknang ken kinatan-ok. (Eclesiastes 2:4-9; 4:4) Kalpasanna, tinignay ti Dios a manggupgop iti natakuatanna babaen kadagitoy a sasao: “Ti panungpalan ti banag, ti isuamin a nangngeganen, ket: Agbutengka iti pudno a Dios ket salimetmetam dagiti bilinna. Ta daytoy isu ti intero a pagrebbengan ti tao.” Sagudayen dagitoy a sasao ti kasayaatan a maaramidan ti tao.

“Agbutengka iti pudno a Dios.” Mabalin a kasla negatibo ti kaipapanan ti panagbuteng iti Dios. Ngem saan ta makagunggona daytoy. Mabalin a mapanunottayo ti maysa nga ubing a magagaran a mangparagsak iti naayat nga amana imbes a ti maysa nga adipen a maam-amak nga amangan no mapagpungtotna ti nauyong nga apona. Sigun iti maysa a reperensia, ti panagbuteng iti Dios ket ti “nauneg a panagraem dagiti adipenna gapu iti panagayatda Kenkuana ken gapu iti panagraemda iti pannakabalin ken kinatan-okna.” No kasta ti panangmatmattayo, magutugottayo nga agtungpal iti pagayatan ti Dios gapu ta ay-ayatentayo ken ammotayo nga ay-ayatennatayo. Saan laeng a basta rikna daytoy nga umiso a panagbuteng no di ket maiparangarang dayta iti ar-aramid. Kasano?

“Salimetmetam dagiti bilinna.” Ti panagbuteng iti Dios tignayennatayo nga agtulnog kenkuana. Maiparbeng laeng a pagtulnogantayo ti Dios. Kas Namarsua, ammona ti kasayaatan nga aramidentayo tapno agbiagtayo, no kasano a ti nangaramid iti produkto ammona nga aramaten dayta iti kasayaatan a pamay-an. Kasta met, maseknan ni Jehova iti pagimbagantayo. Kayatna a naragsaktayo, ket nairanta a pagimbagantayo dagiti kalikagumanna kadatayo. (Isaias 48:17) Kinuna ni apostol Juan: “Ta daytoy ti kaipapanan ti ayat iti Dios, a tungpalentayo dagiti bilinna; ket kaskasdi a dagiti bilinna saanda a makapadagsen.” (1 Juan 5:3) Maipakitatayo nga ay-ayatentayo ti Dios no agtulnogtayo kenkuana, ket ipasimudaag dagiti bilinna nga ay-ayatennatayo.

“Daytoy isu ti intero a pagrebbengan ti tao.” Ipakita dagitoy a sasao ti kapatgan a rason no apay nga agbuteng ken agtulnogtayo iti Dios. Dayta ti pagrebbengan wenno obligasiontayo. Ni Jehova ti Namarsua kadatayo, isu nga utangtayo kenkuana ti mismo a biagtayo. (Salmo 36:9) Obligasiontayo met ti agtulnog kenkuana. No agbiagtayo maitunos iti pagayatanna, ar-aramidentayo ti obligasiontayo.

Ania ngarud ti panggep ti biag? Isu daytoy: Naparsuatayo a mangaramid iti pagayatan ti Dios. Dayta ti kasayaatan a panggep ti biag. Paregtaendaka a mangammo iti ad-adu pay maipapan iti pagayatan ni Jehova ken no kasano nga agbiagka maitunos iti dayta. Maragsakan dagiti Saksi ni Jehova a tumulong kenka.

Singasing a basaen iti Biblia iti Nobiembre:

◼ Proverbio 22-31; Eclesiastes 1-12–Kanta ni Solomon 1-8