PANAGKUNAM, narigat kadi nga aramiden ti umiso? *— No wen ti sungbatmo, umanamong kenka ti kaaduan a tattao. Uray dagiti natataengan marigatanda a mangaramid iti ammoda nga umiso. Kitaentayo no apay a nangnangruna a narigat para ken Josias ti panangaramid iti umiso. Am-ammom kadi ni Josias?—

Ni Amon nga ari ti Juda ti ama ni Josias. Sangapulo ket innem laeng ti tawenna idi mayanak ni Josias. Nakadakdakes ni Amon a kas met laeng idi ken amana a ni Ari Manases. Kinapudnona, adu a tawen a nagbalin a nakadakdakes nga ari ni Manases. Ngem dimteng ti tiempo nga isu ket kinautibo dagiti Asirio ken imbaludda idiay nakaad-adayo a Babilonia. Iti pagbaludan, impakaasi ni Manases a pakawanen ni Jehova, ket napatgan dayta.

Idi nawayawayaan ni Manases, nagsubli idiay Jerusalem ket nangrugi manen nga agturay kas ari. Insigida nga inlintegna dagiti dakes a naaramidanna ket tinulonganna dagiti umili nga agserbi ken Jehova. Naladingitan la ketdi idi saan a sinurot ti anakna a ni Amon ti nasayaat nga ulidanna. Agarup iti dayta a tiempo a nayanak ni Josias. Saan a dinakamat ti Biblia no kasano kasinged ni Manases iti apokona a ni Josias. Panagkunam, inkagumaan ngata ni Manases a tulongan ti apokona nga agserbi ken Jehova?—

Innem pay laeng ti tawen ni Josias idi matay ni Manases ket ni Amon nga ama ni Josias ti nagbalin nga ari. Dua la a tawen a nagturay ni Amon gapu ta pinatay dagiti mismo nga adipenna. Isu a walo laeng ti tawen ni Josias idi nagbalin nga ari iti Juda. (2 Cronicas, kapitulo 33) Ania ngata ti napasamak idi? Sinurot ngata ni Josias ti dakes nga ulidan ni Amon nga amana wenno ti nasayaat nga ulidan daydi nagbabawi nga apongna a ni Manases?—

Uray no ubing pay ni Josias, ammonan a ti panagserbi ken Jehova ti maiparbeng nga aramidenna. Isu nga impangagna dagidiay mangay-ayat ken Jehova imbes a dagidiay gagayyem idi ni amana. Walo laeng idi ti tawen ni Josias  ngem ammonan a rumbeng nga ipangagna dagidiay mangay-ayat iti Dios. (2 Cronicas 34:1, 2) Kayatmo kadi a maam-ammo dagidiay nagbalin a pagwadan ken mamagbaga ni Josias?—

Ni mammadto a Sofonias ti maysa kadagidiay nagbalin a pagwadan ni Josias. Isu ket kabagian ni Josias yantangay mabalin a kaputotan ti naimbag nga ari a ni Ezekias, ti ama ni Manases. Idi rugrugi ti panagari ni Josias, insurat ni Sofonias ti libro iti Biblia a naipasurot iti naganna. Impakdaar ni Sofonias dagiti dakes a pagbanagan dagidiay di agaramid iti naimbag. Nabatad nga impangag ni Josias dagita a pakdaar.

Ni Jeremias, a nalabit nangnangngegmon, ti maysa pay kadagidiay nagbalin a pagwadan ni Josias. Agkasadaran da Jeremias ken Josias ken agassideg ti dimmakkelanda a lugar. Ni Jehova pinaltiinganna ni Jeremias a mangisurat iti libro iti Biblia a naipasurot iti naganna. Idi natay ni Josias iti paggugubatan, nangisurat ni Jeremias iti naisangsangayan a dung-aw tapno maipeksana ti napalalo a ladingitna. (2 Cronicas 35:25) Talaga la ketdi a nagpimpinnaregtada idi nga agtalinaed a matalek ken Jehova!

Ania ti maadalmo iti kapadasan ni Josias?— No sika ket kas kenkuana a di agserserbi ken Jehova ti amana, adda kadi sabali pay a makaisuro kenka maipapan iti Dios? Wen, mabalin a ni nanangmo, dagiti apongmo, wenno sabali pay a kabagiam. Mabalin met a ti sabali pay nga agserserbi ken Jehova, a nalabit ipalubos ni nanangmo a mangyadal kenka iti Biblia.

Aniaman ti kasasaad, nupay ubing pay idi ni Josias, ammonan a dagiti agserserbi ken Jehova ti nasken a pakigayyemanna. Sapay koma ta tuladem ni Josias ket piliem nga aramiden ti umiso!