1. Ania ti maysa a kualidad a nakaidumaan dagiti agserserbi ken Jehova kadagiti sinsinan a Kristiano?

 TI KINAREGTA dagiti agserserbi ken Jehova iti ministerio ti maysa a nakaidumaanda kadagiti sinsinan a Kristiano. (Tito 2:14) Ngem no dadduma, baka awan gaganaygayam a mangasaba. Mabalin a mariknam ti narikna ti maysa a nagaget a panglakayen a nangamin, “No dadduma, awan ganasko a mangasaba.”

2. Apay a narigat no dadduma ti agtalinaed a naregta iti ministerio?

² Baka naragragsaktayo no makipasettayo iti sabali a kita ti sagrado a panagserbi ngem no makipasettayo iti trabaho a panangasaba. Apay? Gapu ta no agibangon wenno agmantenertayo kadagiti Kingdom Hall, tulongantayo dagiti biktima iti didigra, wenno no paregtaentayo dagiti kakabsat, dagus a makitatayo dagiti resultana isu a naragsaktayo. No makipagtrabahotayo kadagiti kakabsat, mariknatayo ti panagkaykaysa ken ayat. Ken ammotayo a maap-apresiarda dagiti ar-aramidentayo para kadakuada. Iti sabali a bangir, baka adun a tawen a mangaskasabatayo iti isu met la a teritoria. Ngem manmano ti interesado wenno saanda a magustuan ti mensahetayo. Ammotayo met a bayat nga umas-asideg ti panungpalan, lallalo a kumaro ti ibubusor iti mensahetayo. (Mat. 10:22) Ania ti aramidentayo tapno agtalinaedtayo a naregta wenno naregregta pay iti trabaho a panangasaba?

3. Iti Lucas 13:​6-9, ania ti masursurotayo maipapan iti kinaregta ni Jesus?

³ Adda masursurotayo iti ulidan ni Jesus maipapan iti kinaregta iti trabaho a panangasaba. Bayat ti ministeriona ditoy daga, saan a pulos a bimmaaw ti kinaregtana. Kinaagpaysuanna, bayat ti panaglabas ti tiempo, lallalo pay a rimmegta. (Basaen ti Lucas 13:​6-9.) Kas iti paraaywan iti kaubasan a tallo a tawen a  nangkultibar iti maysa a kayo ti higos a saan man la a nagbunga, agarup tallo a tawen met a kinaskasabaan ni Jesus dagiti Judio. Ngem kaaduan kadakuada ti saan a nagbalin nga adalanna. Nupay kasta, kas iti paraaywan iti kaubasan a saan a naawanan iti namnama iti kayo ti higos, saan a nauma ni Jesus a tumulong kadagiti tattao wenno saan man la bimmaaw ti regtana iti ministerio. Ad-adda pay ketdi nga inkagumaanna a danonen ti puso dagiti tattao.

4. Ania ti uppat a masursurotayo iti ulidan ni Jesus?

⁴ Iti daytoy nga artikulo, pagsasaritaantayo no kasano nga impakita ni Jesus ti kinaregtana, nangnangruna iti maudi nga innem a bulan ti panagministeriona. (Kitaen ti study note nga “After these things” iti Luke 10:1.) Agtalinaedtayo a naregta no maammuantayo dagiti insurona ken tuladentayo dagiti inaramidna. Pagsasaritaantayo ti uppat a masursurotayo iti ulidan ni Jesus: (1) Nagpokus iti pagayatan ni Jehova, (2) ammona dagiti padto ti Biblia ken nagtignay maitunos kadagita, (3) nagtalek a tulongan ni Jehova, ken (4) kanayon a nangnamnama nga adda dagiti dumngeg kenkuana.

NAGPOKUS ITI PAGAYATAN NI JEHOVA

5. Kasano nga impakita ni Jesus a nakapokus iti panagaramid iti pagayatan ti Dios?

⁵ Sireregta nga inkasaba ni Jesus “ti naimbag a damag ti Pagarian” gapu ta ammona a dayta ti kayat ti Dios nga aramidenna. (Luc. 4:43) Nagpokus ni Jesus iti ministeriona ken dayta ti kapatgan iti biagna. Uray iti maudi a bulbulan ti ministeriona, napan “kadagiti siudad ken purok” a nangisursuro kadagiti tattao. (Luc. 13:22) Nangsanay met iti dadduma pay nga adalan a mangikasaba iti naimbag a damag a kas iti inaramidna.—Luc. 10:1.

6. Uray no adda pay dadduma a trabaho a kayat ni Jehova nga aramidentayo, ania ti panangmatmatna iti trabaho a panangasaba? (Kitaen met ti ladawan.)

⁶ Ita, ti panangikasaba iti naimbag a damag ti kapatgan met a trabaho a kayat da Jehova ken Jesus nga aramidentayo. (Mat. 24:14; 28:​19, 20) Aniaman a trabaho nga ar-aramidentayo para ken Jehova ket direkta a konektado iti trabaho a panangasaba. Kas pagarigan, tumultulongtayo a mangibangon kadagiti pasilidad ti organisasion wenno agserserbitayo iti Bethel tapno masuportarantayo ti trabaho a  panangasaba. No adda didigra, siguraduentayo a maipaay ti kasapulan dagiti kakabsat tapno makagimong ken makapangasabada manen. No laglagipentayo a ti trabaho a panangasaba ti kapatgan a trabaho a kayat ni Jehova nga aramidentayo, mas inspiradotayo a regular a makiraman iti ministerio. Kuna ti maysa a panglakayen a ni János a taga-Hungary: “Kanayonko nga ipalpalagip iti bagik nga awanen ti napatpateg pay a trabaho no di ti panangasaba—dayta ti kapatgan a trabahotayo.”

7. Apay a kayat ni Jehova nga itultuloytayo ti mangasaba? (1 Timoteo 2:​3, 4)

⁷ No tuladentayo ti panangmatmat ni Jehova kadagiti tattao, maparayraytayo ti kinaregtatayo iti ministerio. Kayatna nga adu a tattao ti dumngeg ken mangipangag iti naimbag a damag. (Basaen ti 1 Timoteo 2:​3, 4.) Gapu ta makaisalakan ti naimbag a damag, sansanayennatayo ni Jehova nga agbalin a mas epektibo iti trabaho a panangasaba. Kas pagarigan, adda dagiti praktikal a suhestion ti broshur nga Ayatem Dagiti Tattao—Agaramid iti Adalan a makatulong tapno makairugitayo kadagiti saritaan nga agturong iti panagadal iti Biblia. Uray no saan pay a mangrugi dagiti tattao nga agdaydayaw ken Jehova ita, mabalin nga addanto gundawayda a mangaramid iti dayta sakbay nga agpatingga ti dakkel a rigat. Mabalin a malagipdanto dagiti inkasabatayo kadakuada ket baka kayatdanto metten ti agdaydayaw ken Jehova. Ngem mapasamak laeng dayta no itultuloytayo ti mangasaba.

AMMONA DAGITI PADTO TI BIBLIA KEN NAGTIGNAY MAITUNOS KADAGITA

8. Ania dagiti padto ti Biblia a nakatulong ken Jesus tapno nainsiriban ti panangusarna iti tiempona?

⁸ Ammo ni Jesus a matungpal dagiti padto ti Biblia. Ammona met a tallo ket kagudua a tawen laeng ti ministeriona. (Dan. 9:​26, 27) Ammona pay ti padto no kaano ken no kasano ti ipapatayna. (Luc. 18:​31-34) Ammona dagiti naipadto isu nga inusarna ti tiempona iti kasayaatan a pamay-an. Gapu iti dayta, sireregta a nangasaba tapno maileppasna ti trabaho a naited kenkuana.

9. Apay a naregregtatayo a mangasaba no maawatantayo dagiti padto ti Biblia?

⁹ Naregregtatayo a mangasaba no maawatantayo dagiti padto ti Biblia. Ammotayo nga ababan ti nabatbati a tiempo daytoy a sistema. Maawatantayo a dagiti agdama a pasamak ken kababalin dagiti tattao ket pagilasinan ti maudi nga al-aldaw kas kaitungpalan ti padto ti Biblia. Matarusantayo met a ti panagribal wenno panagkinnompetensia ti Anglo-America a Kabilgan a Turay iti Lubong ken ti Russia ken dagiti kaaliadona ket kaitungpalan ti padto maipapan iti ari ti abagatan ken iti ari ti amianan “iti tiempo ti panungpalan.” (Dan. 11:40) Matarusantayo met a ti Anglo-America a Kabilgan a Turay iti Lubong ket irepresentar dagiti saka ti imahen a nadeskribir iti Daniel 2:​43-45. Kombinsidotayo kas ipakita dayta a padto nga asidegen—a dandani unayen—a dadaelen ti Pagarian ti Dios dagiti gobierno ti tao. Amin dagita a padto ti mangipakita a nakaas-asidegen ti panungpalan isu a masapul nga iyapuratayo ti mangasaba.

10. Kadagiti ania pay a pamay-an a maparegtadatayo dagiti padto ti Biblia nga agtultuloy a mangasaba?

¹⁰ Naglaon met dagiti padto ti Biblia iti mensahe a kayattayo la unay nga ipakaammo. “No panunotek dagiti nagsasayaat a kari ni Jehova iti masanguanan, mariknak a masapul nga iranudko dagita iti dadduma,” imbaga ti sister a ni Carrie a taga-Dominican Republic. Innayonna pay: “No makitak ti nagrigat a kasasaad dagiti tattao ita, maamirisko a dagita a kari ket saan laeng a para kaniak no di ket para met kadakuada.” Ipakita dagiti padto ti Biblia a tultulongannatayo ni Jehova iti daytoy a trabaho isu a mapabilegtayo nga agtultuloy a mangasaba.  Imbaga ni Leila a taga-Hungary: “Ipakita ti Isaias 11:​6-9 nga iti tulong ni Jehova, makapagbalbaliw ti asinoman. Dayta ti tumultulong kaniak a mangasaba latta uray kadagiti tattao a panagriknak ket saan nga interesado.” Imbaga met ti brother a ni Christopher a taga-Zambia: “Kas naipadto iti Marcos 13:​10, maipakpakaammon ti naimbag a damag iti intero a lubong, ket nagdakkel a pribilehio ti makiraman iti pannakatungpal dayta a padto.” Ania met dagiti padto iti Biblia a mangtigtignay kenka nga agtultuloy a mangasaba?

NAGTALEK A TULONGAN NI JEHOVA

11. Apay a masapul nga agtalek ni Jesus a tulongan ni Jehova tapno makapagtultuloy a mangasaba a sireregta? (Lucas 12:​49, 53)

¹¹ Nagtalek ni Jesus a tulongan ni Jehova tapno makapagtultuloy a mangasaba a sireregta. Nataktika ni Jesus iti panangasabana. Ngem ammona a ti naimbag a damag ti Pagarian ket mangpataud iti nabara a di panagkikinnaawatan ken nakaro nga ibubusor. (Basaen ti Lucas 12:​49, 53.) Saan a nagustuan dagiti lider ti relihion ti inkaskasaba ni Jesus isu a namin-aduda a pinadas a papatayen. (Juan 8:59; 10:​31, 39) Ngem intultuloy latta ni Jesus ti mangasaba ta ammona a kaduana ni Jehova. Imbagana: “Saanak . . . nga agmaymaysa no di ket kaduak ti Ama a nangibaon kaniak. . . . Saannak a binaybay-an nga agmaymaysa, ta kanayon nga ar-aramidek ti makaay-ayo kenkuana.”—Juan 8:​16, 29.

12. Kasano nga insagana ni Jesus dagiti adalanna tapno agtultuloyda latta a mangasaba uray no adda ibubusor ?

¹² Pinalagipan ni Jesus dagiti adalanna a makapagtalekda a tulongan ida ni Jehova. Maulit-ulit nga impasiguradona kadakuada a tulongan ida ni Jehova no adda ibubusor. (Mat. 10:​18-20; Luc. 12:​11, 12) Gapu ta ammo ni Jesus nga adu ti bumusor iti naimbag a damag, imbagana kadagiti adalanna nga agannadda. (Mat. 10:16; Luc. 10:3) Binilinna ida a saanda nga ipilit ti mensaheda kadagiti saan a dumngeg kadakuada. (Luc. 10:​10, 11) Binilinna met ida a mapanda iti sabali a lugar no maidadanesda. (Mat. 10:23) Nupay naregta ni Jesus ken agtaltalek ken Jehova, saanna nga insarsarak ti bagina kadagiti napeggad a situasion.—Juan 11:​53, 54.

13. Apay a masiguradom a tulongannaka ni Jehova?

¹³ Kasapulantayo ti tulong ni Jehova tapno naregtatayo a mangasaba uray no adda ibubusor. (Apoc. 12:17) Apay a masiguradom a tulongannaka ni Jehova? Kitaentayo ti kararag ni Jesus a naisurat iti Juan kapitulo 17. Kiniddaw ni Jesus ken Jehova nga aywananna dagiti  apostol ket pinatganna dayta a kiddaw. Ipakita ti libro nga Aramid no kasano a tinulongan ni Jehova dagiti apostol tapno sireregta a makapangasabada uray adda pannakaidadanes. Iti kararag ni Jesus, kiniddawna met ken Jehova nga aywananna dagiti mamati iti inkaskasaba dagiti apostol ken dagiti agbalinto a pasurotna. Karamanka iti dayta. Kanayon a sungsungbatan ni Jehova ti kararag ni Jesus. Tulongannaka met no kasano a tinulonganna dagiti apostol.—Juan 17:​11, 15, 20.

14. Apay a masiguradotayo a maitultuloytayo latta ti mangasaba a sireregta uray kadagiti narigat a tiempo? (Kitaen met ti ladawan.)

¹⁴ Bayat nga umas-asideg ti panungpalan, mabalin a rumigat a rumigat ti mangasaba. Ngem impasigurado ni Jesus a maipaayto ti amin a kasapulantayo tapno makapagtultuloytayo a naregta iti dayta a trabaho. (Luc. 21:​12-15) Kas ken Jesus ken dagiti adalanna, saantayo a pilpiliten dagiti tattao a dumngeg iti mensahetayo ken likliklikantayo ti makirinnikiar. Ket uray no maiparparit ti trabahotayo iti dadduma a pagilian, ikagkagumaan latta dagiti kakabsat nga ipakaammo ti naimbag a damag gapu ta agtaltalekda ken Jehova, saan nga iti bukodda a pigsa. No kasano a pinabileg ni Jehova dagiti adipenna idi umuna a siglo, pabpabilgennatayo met “tapno naan-anay a maitungpal ti panangasaba” agingga nga ibaga ni Jehova a nalpasen dayta. (2 Tim. 4:17) Masiguradom a no agtalekka ken Jehova, makapagtultuloyka a mangasaba a sireregta.

KANAYON A NANGNAMNAMA NGA ADDA DAGITI DUMNGEG

15. Ania ti mangipakita a kanayon a nangnamnama ni Jesus nga adda dagiti dumngeg kenkuana iti ministerio?

¹⁵ Kanayon a nangnamnama ni Jesus nga adda dagiti dumngeg iti naimbag a damag. Dayta ti nakatulong kenkuana tapno agtalinaed a positibo iti ministeriona. Kas pagarigan, iti maudi a paset ti 30 C.E., nakita ni Jesus nga adu ti nakasagana a dumngeg iti naimbag a damag. Impadana ida iti natangkenanen a dawa iti talon a mabalinen nga anien. (Juan 4:35) Agarup makatawen kalpasanna, imbagana kadagiti adalanna: “Adu ti anien.” (Mat. 9:​37, 38) Ken idi agangay, impaganetgetna manen: “Adu ti anien . . . Ipakaasiyo ngarud iti Apo ti panagani a mangibaon kadagiti agani iti talonna.” (Luc. 10:2) Saan a pulos a naawanan ni Jesus iti namnama  nga adda dagiti mamati iti naimbag a damag ket naragsakan idi kasta ti napasamak.—Luc. 10:21.

16. Kasano a makatulong kadatayo dagiti ilustrasion ni Jesus tapno mangnamnamatayo latta nga adda dagiti dumngeg iti naimbag a damag? (Lucas 13:​18-21) (Kitaen met ti ladawan.)

¹⁶ Insuro ni Jesus kadagiti adalanna nga agtultuloyda a mangnamnama nga adda dagiti dumngeg iti mensaheda. Nakatulong dayta kadakuada tapno agtalinaedda a naregta iti ministerio. Kas pagarigan, usigentayo ti dua kadagiti ilustrasionna. (Basaen ti Lucas 13:​18-21.) Iti maysa nga ilustrasion, inkompara ni Jesus ti mensahe ti Pagarian iti bassit a bukel ti mustasa a dimmakkel agingga a nagbalin a dakkel a kayo. Kaipapanan dayta nga adu a tattao ti mangawat iti naimbag a damag ken awan ti makalapped iti dayta. Inusarna met ti lebadura a mangyilustrar no kasano nga agsaknap ti mensahe ti Pagarian ken mangbalbaliw iti biag dagiti tattao nupay saan a dagus a madlaw dayta. Impasigurado ngarud ni Jesus kadagiti adalanna a ti mensahe nga ikaskasabada ket makatulong iti adu a tattao.

17. Ania dagiti rason nga agtultuloytayo latta a mangnamnama nga adda dagiti dumngeg iti naimbag a damag?

¹⁷ No panunotentayo no kasano a makatultulong ti trabaho a panangasaba iti adu a tattao iti intero a lubong, makapagtultuloytayo met a mangasaba a sireregta. Kada tawen, minilion nga interesado ti umat-atender iti Memorial ken makipagad-adal kadatayo iti Biblia. Ginasut a ribu ti mababautisaran ken makikadkadua kadatayo iti trabaho a panangasaba. Saantayo nga ammo no mano pay ti mangipangag iti naimbag a damag. Ngem ti ammotayo ket um-ummongenen ni Jehova ti dakkel a bunggoy a makalasat iti um-umayen a dakkel a rigat. (Apoc. 7:​9, 14) Ni Jehova ti Apo ti panagani, ken agtalek nga adu pay ti mangipangag iti naimbag a damag. Isu nga adda naimbag a rason nga agtultuloytayo a mangasaba.

18. Ania ti kayattayo a makita dagiti tattao kadatayo?

¹⁸ Kanayon a sireregta nga inkasaba dagiti pudno nga adalan ni Jesus ti naimbag a damag. Idi nakita dagiti tattao ti kinaregta dagiti apostol, “nailasinda a kakadua ida ni Jesus.” (Ara. 4:13) Kayattayo met a kanayon a naregta ken naturedtayo a mangasaba. No aramidentayo dayta, mabalin a makita dagiti tattao a tultuladentayo ti kinaregta ni Jesus.