1. Ania ti dadduma a nasayaat a rason nga agpabautisarka?

 AY-AYATEM kadi ni Jehova a Dios, a mangmangted kenka iti amin a nagsasayaat a sagut, agraman ti biagmo? Kayatmo kadi nga ipakita nga ay-ayatem isuna? Ti kasayaatan a pamay-an a maaramidmo dayta ket ti panangidedikarmo kenkuana iti biagmo ken panagpabautisarmo. No aramidem dagita, agbalinka a paset ti pamilia ni Jehova. Kas resultana, iwanwan ken aywanannaka ti Amam ken Gayyemmo gapu ta kukuanakan. (Sal. 73:24; Isa. 43:​1, 2) No agdedikar ken agpabautisarka, maaddaanka met iti namnama nga agbiag nga agnanayon.—1 Ped. 3:21.

2. Ania ti usigentayo iti daytoy nga artikulo?

² Adda kadi manglaplapped kenka nga agpabautisar? No kasta, saanka nga agmaymaysa. Minilionen ti nangbalbaliw iti kababalin ken panagpampanunotda tapno makualipikarda nga agpabautisar. Nakaragragsak ken nakaregregtada itan nga agserserbi ken Jehova. Ania ti masursurotayo iti dadduma a nagpabautisar idi umuna a siglo? Pagsasaritaantayo dagiti situasion a nakaipasanguanda ken no ania ti masursurotayo iti ulidanda.

NAGPABAUTISAR DAGITI SAMARITANO

3. Ania ti mabalin a nakalapped iti dadduma a Samaritano nga agpabautisar?

³ Dagiti Samaritano idi panawen ni Jesus ket kameng ti maysa a sekta ti relihion. Adu kadakuada ti agnanaed iti aglawlaw ti siudad ti nagkauna a Sikem ken iti Samaria, nga adda iti amianan ti Judea. Sakbay a makualipikar nga agpabautisar dagiti Samaritano, masapul nga akseptarenda ti amin nga ibagbaga ti Sao ti Dios ken ad-adda pay nga agsursuroda iti dayta. Ti laeng patien dagiti Samaritano nga impaisurat ti Dios ket ti umuna a lima a libro iti Biblia, manipud Genesis agingga iti Deuteronomio, ken posible nga uray ti libro a Josue. Nupay kasta, ur-urayen dagiti Samaritano ti iyaay ti Mesias, maibatay iti kari ti Dios a naisurat  iti Deuteronomio 18:​18, 19. (Juan 4:25) Tapno mabautisaranda, masapul nga akseptarenda ni Jesus kas ti naikari a Mesias. “Adu a Samaritano” ti nangaramid iti dayta. (Juan 4:39) Masapul met a paruten ti dadduma a Samaritano dagiti nagramuten a panangidumdumada kadagiti Judio.—Luc. 9:​52-54.

4. Sigun iti Aramid 8:​5, 6, 14, ania ti reaksion ti dadduma a Samaritano iti panangasaba ni Felipe?

⁴ Ania ti nakatulong kadagiti Samaritano nga agpabautisar? Ni Felipe nga ebanghelisador ‘inkasabana ti Kristo’ kadagiti Samaritano. Kas resultana, dadduma kadakuada ti ‘nangawat iti sao ti Dios.’ (Basaen ti Aramid 8:​5, 6, 14.) Uray no Judio ni Felipe, nagimdengda latta kenkuana. Mabalin a nalagipda dagiti bersikulo iti Pentateuko a mangipakita a saan a mangidumduma ti Dios. (Deut. 10:​17-19) “Nagimdeng dagiti tattao iti imbaga ni Felipe” maipapan iti Kristo ket nabigbigda ti nalawag nga ebidensia a ti Dios ti nangibaon ken Felipe. Adu met a milagro ti inaramidna a pakairamanan ti panangpaimbag kadagiti masakit ken panangparuar kadagiti demonio.—Ara. 8:7.

5. Ania dagiti masursurom maipapan kadagiti Samaritano?

⁵ Mabalin koma a saan a dimngeg dagidiay a Samaritano ken Felipe gapu ta maysa isuna a Judio wenno gapu ta damdamoda laeng a mangngeg dagiti inkasabana. Ngem saan a kasta ti reaksionda. Saan nga intantan dagiti Samaritano ti agpabautisar. Ngamin, kombinsidoda a ti kinapudno ti insuro kadakuada ni Felipe. Kuna ti Biblia: “Idi namatida ken Felipe, a mangipakpakaammo iti naimbag a damag maipapan iti Pagarian ti Dios ken iti nagan ni Jesu-Kristo, nagpabautisar agpadpada dagiti lallaki ken babbai.” (Ara. 8:12) Kombinsidoka met kadi a ti Sao ti Dios ket isu ti kinapudno? Kombinsidoka met kadi a saan a mangidumduma dagiti Saksi ni Jehova ken ipakpakitada ti pudpudno nga ayat iti maysa ken maysa—ti pagilasinan dagiti pudno a Kristiano? (Juan 13:35) No wen, saanmo koma ngaruden nga itantan ti agpabautisar. Makapagtalekka a bendisionannaka ni Jehova.

6. Ania ti masursurom iti inaramid ni Ruben?

⁶ Ni Ruben a taga-Germany ket dimmakkel iti Saksi a pamilia. Ngem kas agtutubo, pagduaduaanna ti maipapan iti kaadda ni Jehova. Ania ti inaramidna tapno maparut ti panagduaduana? Naamirisna a kurang ti pannakaammona iti dayta a banag, isu nga inkeddengna nga ammuen ti ad-adu pay. Imbagana: “Nag-personal study-ak tapno maammuak ti agpayso ket maikkat ti panagduaduak. Namin-adu nga inadalko ti topiko nga ebolusion.” Binasa ni Ruben ti libro nga Is There a Creator Who Cares About You? Dakkel ti epekto dayta a publikasion ken Ruben. Imbagana iti bagina: ‘Wow! Talaga nga agpaypayso ni Jehova.’ Nagpasiar ni Ruben iti sangalubongan a hedkuarter, ket lallalo pay nga immuneg ti ayatna iti awan kapadana a nagkaykaysa a sangalubongan a panagkakabsattayo. Idi nakaawiden ni Ruben idiay Germany, nagpabautisar idi agtawen iti 17. No adda panagduaduam kadagiti maad-adalmo, ag-research-ka kadagiti publikasiontayo. No addaanka iti “umiso a pannakaammo,” maparut ti panagduaduam. (Efe. 4:​13, 14) Ket bayat a mangmangngeg ken makitkitam dagiti damag maipapan iti ayat ken panagkaykaysa dagiti agdaydayaw ken Jehova iti dadduma a paset ti lubong ken uray iti kongregasionyo, lallalo pay nga umuneg ti panagayatmo iti sangalubongan a panagkakabsattayo.

NAGPABAUTISAR NI SAULO ITI TARSO

7. Ania idi ti masapul a balbaliwan ni Saulo?

⁷ Kitaentayo ti maipapan ken Saulo iti Tarso. Nagadu ti ammona maipapan iti Judaismo ken nalatak isuna kadagiti Judio. (Gal. 1:​13, 14; Fil.  3:5) Ibilang idi ti adu a Judio nga apostata dagiti Kristiano, isu a nakaro ti panangidadanes kadakuada ni Saulo. Impagarupna nga ar-aramidenna ti pagayatan ti Dios. (Ara. 8:3; 9:​1, 2; 26:​9-11) Ngem tapno maaddaan ni Saulo iti pammati ken Jesus ken mabautisaran tapno agbalin a Kristiano, masapul a sisasagana nga agbalin a puntiria ti pannakaidadanes.

8. (a) Ania ti nakatulong ken Saulo tapno agpabautisar? (b) Sigun iti Aramid 22:​12-16, kasano a tinulongan ni Ananias ni Saulo? (Kitaen met ti ladawan.)

⁸ Ania ti nakatulong ken Saulo tapno agpabautisar? Idi kinasarita ni Apo Jesus manipud langit ni Saulo, nabulsek gapu iti nagsilnag a lawag kenkuana. (Ara. 9:​3-9) Nagayunar ni Saulo iti tallo nga aldaw, ken sigurado a pinampanunotna a naimbag ti napasamak kenkuana. Wen, nakombinsir ni Saulo a ni Jesus ti Mesias ken dagiti Kristiano ti mangan-annurot iti pudno a relihion. Pinagladingitanna la ketdi unay ti panangaprobarna idi iti pannakapapatay ni Esteban! (Ara. 22:20) Iti ngudo ti tallo nga aldaw, napan kenkuana ti adalan nga agnagan Ananias. Insublina ti panagkita ni Saulo ken pinaregtana a saanna nga itantan ti agpabautisar. (Basaen ti Aramid 22:​12-16.) Sipapakumbaba nga inawat ni Saulo dayta a tulong ket dagus a nagpabautisar.—Ara. 9:​17, 18.

9. Ania dagiti masursurom maipapan ken Saulo?

⁹ Adda dagiti masursurotayo maipapan ken Saulo. Dina impalubos a ti kinapannakkel wenno panagbuteng iti tao ti manglapped kenkuana nga agpabautisar. Sipapakumbaba a binalbaliwanna ti biagna tapno agbalin a pasurot ni Kristo. (Ara. 26:​14, 19) Situtulok ni Saulo nga agbalin a Kristiano uray no ammona a maidadanesto. (Ara. 9:​15, 16; 20:​22, 23) Kalpasan a nabautisaran, nagtultuloy a nagpatulong ken Jehova tapno maibturanna ti nagduduma a suot. (2 Cor. 4:​7-10) No agpabautisarka kas maysa kadagiti Saksi ni Jehova, mabalin a masuotkanto wenno masubok ti pammatim. Ngem masiguradom a kanayon a tulongan ken suportarannakanto ti Dios ken ni Kristo.—Fil. 4:13.

10. Ania ti masursurom iti ulidan ni Anna?

 ¹⁰ Dimmakkel ni Anna iti Eastern Europe. Idi nabautisaranen ni nanangna, pinalubosan ni tatangna a makipagadal iti Biblia idi agtawen iti 9. Nupay kasta, idi naammuan dagiti kabbalayda a kabagianna a makipagad-adal isuna iti Biblia kadagiti Saksi ni Jehova, binusorda. Ibilang dagiti kabagianna a pakaibabainan ti pamiliada no panawanna ti dimmakkelanda a relihion. Idi agtawenen iti 12 ni Anna, impakadana ken tatangna a kayatnan ti agpabautisar. Kayat a maammuan ni tatangna no adda mangpilpilit kenkuana wenno no personal a desisionna dayta. Imbaga ni Anna: “Ay-ayatek ni Jehova.” Gapu iti dayta, pinalubosan ni tatangna. Kalpasan a nabautisaran, saanen a nasayaat ti panangtrato kenkuana dagiti kakabagianna. Imbaga ti maysa kadakuada: “Nasaysayaat pay nga agbalinkan nga immoral ken mannigarilio ngem ti agbalinka a Saksi!” Ania ti nakatulong ken Anna? Kinunana, “Pinapigsanak ni Jehova, ken talaga a sinuportarandak dagiti nagannakko.” Isursurat ni Anna dagiti espesipiko a tiempo a nariknana ti tulong ni Jehova. Basbasaenna no kua dayta tapno dina malipatan ti panangtultulong kenkuana ni Jehova. No mabutengka iti ibubusor, laglagipem a tulongannaka met ni Jehova.—Heb. 13:6.

NAGPABAUTISAR NI CORNELIO

11. Ania koma ti mabalin a nakalapped ken Cornelio nga agpabautisar?

¹¹ Adda met masursurotayo iti ulidan ni Cornelio a nadakamat iti Biblia. Maysa isuna a “senturion,” kayatna a sawen, komander ti agarup 100 a soldado iti armada ti Roma. (Ara. 10:​1, ftn.) Gapu iti dayta, nangato la ketdi ti ranggona iti militar ken mabigbigbig iti lugarda. “Adu ti naimbag nga ar-aramidenna kadagiti tattao.” (Ara. 10:2) Imbaon ni Jehova ni apostol Pedro a mangipakaammo iti naimbag a damag kenkuana. Nakalapped ngata ti saad ni Cornelio tapno agpabautisar?

12. Ania ti nakatulong ken Cornelio nga agpabautisar?

¹² Ania ti nakatulong ken Cornelio nga agpabautisar? Mabasatayo nga isu ket “managbuteng iti Dios agraman ti sangakabbalayanna.” Nagtultuloy met a nagpakpakaasi iti Dios. (Ara. 10:2) Idi impakaammo ni Pedro ti naimbag a damag ken Cornelio, naaddaanda a sangapamiliaan iti pammati ken Kristo ket dagus a nagpabautisarda. (Ara. 10:​47, 48) Saan a pulos nagpangadua ni Cornelio a mangaramid kadagiti kasapulan a panagbalbaliw tapno makapagdaydayawda ken Jehova a sangapamiliaan.—Jos. 24:15; Ara. 10:​24, 33.

13. Ania dagiti masursurom maipapan ken Cornelio?

¹³ Kas ken Saulo, saan nga impalubos ni Cornelio a ti posisionna ti manglapped kenkuana nga agbalin a Kristiano. Masapul kadi a mangaramidka kadagiti dadakkel a panagbalbaliw iti biagmo tapno makualipikarka a mabautisaran? No kasta, laglagipem a ni Jehova ti Katulongam. Bendisionanna ti determinasionmo a mangyaplikar kadagiti prinsipio ti Biblia tapno makapagserbika kenkuana.

14. Ania ti masursurom iti kapadasan ni Tsuyoshi?

¹⁴ Masapul a balbaliwan ni Tsuyoshi a taga-Japan ti trabahona tapno makualipikar a mabautisaran. Isu ti assistant ti headmaster wenno prinsipal ti maysa a nalatak nga eskuelaan a mangisursuro iti panangurnos kadagiti sabong (flower arrangement). Ti prinsipal ti mangur-urnos kadagiti sabong a mausar kadagiti pumpon ken makiramraman kadagiti ritual dagiti Budista. No saan a makaatender, masansan a ni Tsuyoshi ti ibaonna a mangirepresentar kenkuana kadagiti ritual. Ngem idi naammuan ni Tsuyoshi ti kinapudno maipapan iti ipapatay, naamirisna a saan a makualipikar nga agpabautisar no agtultuloy latta a makiraman kadagiti ritual dagiti Budista. Isu a nagdesision nga  isardengnan nga aramiden dagita. (2 Cor. 6:​15, 16) Nakisarita ni Tsuyoshi iti prinsipalna maipapan iti dayta a banag. Ania ti napasamak? Saan a nasesante ni Tsuyoshi iti trabahona ken napatgan ti kiddawna a saanen a makipaset kadagiti ritual. Nagpabautisar agarup makatawen sipud nakipagadal iti Biblia. a No kasapulan a baliwam ti trabahom tapno maparagsakmo ni Jehova, manamnamam nga ipaayna dagiti kasapulam ken ti pamiliam.—Sal. 127:2; Mat. 6:33.

NAGPABAUTISAR DAGITI TAGA-CORINTO

15. Ania koma ti mabalin a nakalapped kadagiti taga-Corinto nga agpabautisar?

¹⁵ Ti nagkauna a Corinto ket pagaammo kas lugar dagiti tattao a materialistiko ken immoral. Adu kadakuada ti agar-aramid kadagiti kagura ti Dios. Isu a mabalin a narigatan unay ti asinoman a mangawat iti naimbag a damag. Ngem napan latta sadiay ni apostol Pablo ken inkasabana ti naimbag a damag maipapan ken Kristo. Gapu iti dayta, “namati ken nabautisaran ti adu a taga-Corinto a nakangngeg.” (Ara. 18:​7-11) Kalpasanna, nagparang ni Apo Jesu-Kristo iti maysa a sirmata ket imbagana: “Adu ti tattaok iti daytoy a siudad.” Isu nga intultuloy ni Pablo ti nangasaba sadiay iti maysa ket kagudua a tawen.

16. Ania ti nakatulong iti dadduma a taga-Corinto tapno mabautisaranda? (2 Corinto 10:​4, 5)

¹⁶ Ania ti nakatulong kadagiti taga-Corinto tapno mabautisaranda? (Basaen ti 2 Corinto 10:​4, 5.) Nakatulong kadakuada ti Sao ti Dios ken ti nabileg a nasantuan nga espirituna tapno makaaramidda kadagiti dadakkel a panagbalbaliw iti biagda. (Heb. 4:12) Dagiti taga-Corinto a nangawat iti naimbag a damag maipapan ken Kristo nabaelanda nga isardeng dagiti ar-aramid a kas iti panagbarbartek, panagtakaw, ken homoseksualidad.—1 Cor. 6:​9-11. b

17. Ania ti masursurom maipapan kadagiti taga-Corinto?

¹⁷ Nagdakkel a panagbalbaliw ti kasapulan nga aramiden ti dadduma a taga-Corinto maipapan iti nakairuamandan nga ar-aramid. Ngem saanda a pinanunot a nakarigrigat ti agbalin a Kristiano. Inkagumaanda ti magna iti nailet a dalan nga agturong iti biag nga agnanayon. (Mat. 7:​13, 14) Adda met kadi bisio wenno di umiso nga ar-aramid nga ikarkarigatam nga isardeng wenno labanan tapno makualipikarka nga agpabautisar? Dika pulos sumuksuko! Ipakaasim ken Jehova nga ipaayna ti nasantuan nga espirituna a mangtulong kenka  a manglaban iti tendensiam nga agaramid iti dakes.

18. Ania ti masursurom iti kapadasan ni Monika?

¹⁸ Inkagumaan ni Monika a taga-Georgia nga isardeng ti panagsaona iti dakes ken ti panagdengngeg ken panagbuya kadagiti dakes a paglinglingayan tapno makualipikar nga agpabautisar. Imbagana: “Idi tin-edyerak, ti kararag ti nakatulong kaniak nga agbalbaliw. Ammo ni Jehova a kayatko nga aramiden ti umiso. Kanayon a tinulongan ken inwanwannak.” Nagpabautisar ni Monika idi agtawen iti 16. Adda met kadi dagiti ar-aramid a masapul nga isardengmon nga aramiden tapno anamongan ni Jehova ti panagdaydayawmo? Itultuloymo a dawaten kenkuana ti bileg a kasapulam tapno makapagbalbaliwka. Sipaparabur nga ipaay ni Jehova ti nasantuan nga espirituna.—Juan 3:34.

TI PAMMATIM MAYALISNA DAGITI BANTAY

19. Ania ti makatulong kenka tapno mapagballigiam dagiti kasla bantay a lapped? (Kitaen met ti ladawan.)

¹⁹ Masiguradom nga ay-ayatennaka ni Jehova ken kayatna nga agbalinka a paset ti pamiliana. Agpayso dayta uray no adda dagiti maipaspasango kenka a lapped iti panagpabautisarmo. Imbaga ni Jesus iti maysa a grupo dagiti adalanna idi umuna a siglo: “No adda pammatiyo a kas kabassit ti bukel ti mustasa, mabalinyo nga ibaga iti daytoy a bantay, ‘Umaliska, mapanka sadiay,’ ket umalis dayta. Awanto ti saanyo a kabaelan nga aramiden.” (Mat. 17:20) Sumagmamano pay laeng a tawen a nakadua ni Jesus dagita nga adalanna idi mangngegda dayta, isu a saan pay unay a natibker ti pammatida. Ngem impasigurado ni Jesus a no pabilgenda ti pammatida, tulongan ida ni Jehova a mangyalis kadagiti kasla bantay a lapped. Tulongannaka met ni Jehova a mangaramid iti kasta!

20. Kasanoka a napabileg iti ulidan dagiti Kristiano idi umuna a siglo ken iti kaaldawantayo a nadakamat iti daytoy nga artikulo?

²⁰ No adda makalapped kenka nga agpabautisar, agtignayka a dagus tapno mapagballigiam dagita. Maliwliwa ken mapabilegka kadagiti ulidan dagiti Kristiano idi umuna a siglo ken iti kaaldawantayo. Sapay koma ta mapabileg ken matignayka iti ulidanda a mangidedikar iti biagmo ken Jehova ken agpabautisar. Dayta ti kasayaatan a desision a maaramidmo iti biagmo!