IDI tawen 49 C.E., “dagidiay kasla ad-adigi” ti kongregasion a da Pedro, Santiago, ken Juan inikkanda ni apostol Pablo ken ti kaduana a ni Bernabe iti maysa nga annongen. Masapul a sipapanunotda kadagiti napanglaw a Kristiano bayat ti panangasabada kadagiti nasion. (Gal. 2:9, 10) Kasano a naitungpalda daytoy nga annongen?

Ipamatmat dagiti surat ni Pablo nga inasikasona daytoy a banag. Kas pagarigan, insuratna kadagiti Kristiano idiay Corinto: “No maipapan iti panagur-or a maipaay kadagiti sasanto, kas kadagiti imbilinko kadagiti kongregasion ti Galacia, aramidenyo met ti kasta. Tunggal umuna nga aldaw ti lawas tunggal maysa kadakayo mangilasin koma iti bukodna a balay iti idulinna a banag a kas iti irarang-ayna, tapno inton dumtengak saanton a maaramid dagiti panagur-or. Ngem inton makagtengak dita, siasinoman a lallaki nga anamonganyo babaen kadagiti surat, dagitoy ibaonkonto tapno ipanda ti naasi a sagutyo idiay Jerusalem.”​—1 Cor. 16:1-3.

Iti maikadua a suratna kadagiti taga-Corinto, inulit ni Pablo a ti panggep dayta a panagur-or ket “tapno ti pagsursurokanda anayanna met ti pagkurkuranganyo.”​—2 Cor. 8:12-15.

Idi nagsurat ni Pablo kadagiti Kristiano idiay Roma idi agarup 56 C.E., dandanin makompleto ti panagur-or. Kinunana: “Agbaniagaakon idiay Jerusalem tapno agserbiak kadagiti sasanto. Ta dagidiay adda idiay Macedonia ken Acaya naragsakanda a mangiranud iti bambanagda babaen ti kontribusion iti napapanglaw kadagiti sasanto idiay Jerusalem.” (Roma 15:25, 26) Naitungpal ni Pablo ti annongenna di nagbayag kalpasan dayta, ta idi nakasubli idiay Jerusalem ken naaresto, imbagana ken Romano a Gobernador Felix: “Dimtengak tapno mangyegak iti sagsagut ti asi iti nasionko, ken datdaton.”​—Ara. 24:17.

Ti espiritu nga impakita dagiti Kristiano idi umuna a siglo ket nabatad iti kinuna ni Pablo kadagiti taga-Macedonia. Imbagana a “nagpakpakaasida kadakami buyogen ti kasta unay a panagdawdawat iti pribilehio a siaasi a panangted.” Indagadag ti apostol kadagiti taga-Corinto a surotenda koma dayta nga ulidan. Kinunana: “Tunggal maysa aramidenna koma kas iti inkeddengna iti pusona, saan nga iti nadagsen a rikna wenno mapilpilit, ta ti Dios ayatenna ti naragsak a manangited.” Ania ti nakatignayan dagiti kongregasion a mangipakita iti kasta a kinaparabur? “Saan laeng a tapno ipaay a siwawadwad dagiti kasapulan dagiti sasanto no di ket tapno bumaknang met iti adu nga ebkas ti panagyaman iti Dios.” (2 Cor. 8:4; 9:7, 12) Kasta met ti panggep ti kinaparaburtayo. Sigurado a bendisionan ni Jehova a Dios ti kasta a nasayaat ken di managimbubukodan nga espiritu​—ket dayta ti pudno a mangpabaknang.​—Prov. 10:22.

Kas idi kaaldawan ni apostol Pablo, adu ita ti ‘mangidulin’ wenno mangibadyet iti kuarta nga itinnagda kadagiti kahon ti kontribusion a namarkaan iti “Worldwide Work.” (1 Cor. 16:2) Dagiti kongregasion binulan nga ipatulodda dagitoy a kontribusion iti sanga nga opisina dagiti Saksi ni Jehova iti pagilianda. Mabalin met a direkta nga ipatulodmo ti donasionmo iti sanga nga opisina dagiti Saksi ni Jehova iti pagilianyo. Tapno maammuam no siasino ti pangipatulodam, pangngaasim ta kontakem ti sanga nga opisina iti pagilianyo. Masarakan ti adres ti sanga nga opisina iti www.jw.org. Adtoy ti sumagmamano a donasion a mabalinmo a direkta nga ipatulod:

DIREKTA A DONASION

• Donasion a kuarta, alahas, wenno dadduma pay a napapateg a personal a sanikua.

• Mangaramid iti surat a mangipakaammo a direkta nga idonarmo dayta a kuarta wenno sanikua.

KONDISIONAL A DONASION

• Donasion a kuarta a maisubli iti nagdonar no kasapulanna.

• Mangaramid iti surat a mangibagbaga a kondisional dayta a donasion.

NAIPLANO A PANAGIDONAR

Malaksid kadagiti direkta a sagut a kuarta ken napapateg a personal a sanikua, adda pay sabali a pamay-an ti panagidonar tapno masuportaran ti sangalubongan a trabaho ti Pagarian. Aniaman ti kayatmo a pamay-an ti panagidonar, pangngaasim ta kontakem nga umuna ti sanga nga opisina iti pagilianyo. Nasayaat met no makisaritaka nga umuna iti abogado wenno tax adviser yantangay nagduduma dagiti kalikaguman ti linteg ken dagiti pagannurotan iti panagbuis. Adtoy dagiti pamay-an ti naiplano a panagidonar:

Insurance: Mapagbalin kas benepisiario iti life insurance policy wenno retirement/pension plan ti sanga nga opisina dagiti Saksi ni Jehova.

Deposito iti Banko: Deposito iti banko, sertipiko ti deposito, wenno indibidual a deposito iti panagretiro a maitalek wenno maited iti sanga nga opisina dagiti Saksi ni Jehova inton matay ti nagidonar. Suroten dagiti paglintegan ti banko iti lugaryo.

Stock ken Bond: Dagiti stock ken bond a naidonar iti sanga nga opisina dagiti Saksi ni Jehova kas direkta a sagut wenno naidonar babaen iti katulagan a Transfer on Death.

Lote ken Pasdek: Malako a lote wenno pasdek a naidonar iti sanga nga opisina dagiti Saksi ni Jehova kas direkta a sagut. No balay ti naidonar, mabalin nga agnaed sadiay ti nagdonar bayat a sibibiag, no kayatna.

Gift Annuity: Stock, bond, wenno kuarta a naidonar iti sanga nga opisina dagiti Saksi ni Jehova. Ti nagidonar, wenno ti representantena, ket makaawat iti espesipiko a kantidad iti kada tawen bayat a sibibiag. Adda diskuento ti income tax ti nagidonar iti tawen a nangipaay iti gift annuity.

Testamento ken Trust Fund: Sanikua wenno kuarta a naipatawid iti sanga nga opisina dagiti Saksi ni Jehova babaen iti legal a testamento, wenno espesipiko a madakamat ti sanga nga opisina kas benepisiario ti trust agreement. Mabalin a makissayan ti bayadan a buis iti daytoy nga urnos.

Kas ipasimudaag ti termino a “naiplano a panagidonar,” planuen ti maysa ti panagdonarna. Tapno matulongan dagidiay mayat a mangsuporta iti sangalubongan a trabaho dagiti Saksi ni Jehova babaen iti naiplano a panagdonar, naisagana ti Ingles ken Espaniol a broshur a napauluan iti Charitable Planning to Benefit Kingdom Service Worldwide. Naglaon dayta a broshur iti impormasion maipapan iti nadumaduma a pamay-an ti panagidonar, a maited ita wenno inton matay ti agdonar. Mabalin a saan nga agaplikar iti kasasaadmo ti amin a linaon dayta a broshur gapu ta naiduma ti pagannurotan iti panagbuis wenno ti dadduma pay a paglintegan iti pagilianyo. No mabasamon ti broshur, agkonsultaka iti maysa nga abogado wenno tax adviser. Babaen kadagitoy a pamay-an ti panagdonar, adu ti nakatulong iti sangalubongan a narelihiosuan a trabahotayo agraman ti panangsaranaytayo iti sabsabali ken dakkel pay ti naksay iti bayadanda a buis. No adda dayta a broshur iti pagilianyo, mabalinmo ti agkiddaw iti sekretario ti kongregasionyo.

Para iti kanayonan nga impormasion, agsurat wenno tumawag iti Charitable Planning Office, iti adres a nailista iti baba, wenno kontakem ti sanga nga opisina dagiti Saksi ni Jehova a makinsakup iti pagilianyo.