“Siasino ti Pagalinggagetakto?”

“Uray no maibusor kaniak a tumaud ti gubat, no kasta agtalekakto.”​—SAL. 27:3.

KASANO A MAPATUREDNAKA DAGITI SUMAGANAD A TEKSTO?

Salmo 27:1

Salmo 27:4

Salmo 27:11

1. Ania ti maitulong kadatayo ti Salmo 27?

APAY a rumangrang-ay ti trabahotayo a panangasaba uray no dumakdakes ti kasasaad iti lubong? Apay nga adu a tiempo ken pigsa ti busbusbosentayo iti panangasaba nupay rumigrigat ti kasasaad ti biag? Kasano nga agtalinaedtayo a natured idinto ta mabutbuteng ti adu iti masanguanan? Ipaayannatayo ti sungbat ti naipaltiing a kanta ni Ari David iti Salmo 27.

2. Ania ti epekto ti panagalinggaget, ngem makapagtalektayo iti ania?

² Inrugi ni David daytoy a salmo kadagitoy a sasao: “Ni Jehova ti silawko ken pakaisalakanak. Siasino ti pagbutngakto? Ni Jehova ti salindeg ti biagko. Siasino ti pagalinggagetakto?” (Sal. 27:1) Makapakapuy ti buteng, ngem nakarkaro pay ti panagalinggaget. Ngem awan ti aniaman a pagalinggagetan daydiay agbuteng ken Jehova. (1 Ped. 3:14) No ni Jehova ti pagbalinentayo a sarikedkedtayo, “agtaeng[tayo] iti kinatalged ket saan[tayo] a masinga manipud alinggaget ti didigra.” (Prov. 1:33; 3:25) Apay?

“NI JEHOVA TI SILAWKO KEN PAKAISALAKANAK”

3. Kasano a ni Jehova ti silawtayo, ngem ania ti masapul nga aramidentayo?

³ Ti sasao a “ni Jehova ti silawko” kaipapananna a wayawayaannatayo ni Jehova manipud iti kinaignorante ken naespirituan a kinasipnget. (Sal. 27:1) Ti literal a silaw ipakitana ti peggad wenno bangen iti dalantayo, ngem saanna nga ikkaten dayta. Masapul a datayo ti agtignay a lumiklik. Iti umasping a pamay-an, ipalpalgak ni Jehova ti kaipapanan dagiti pasamak iti lubong. Ibagbagana dagiti peggad a liklikantayo iti daytoy a sistema ti bambanag. Mangipapaay met kadagiti prinsipio ti Biblia a kanayon nga epektibo. Ngem masapul  nga iyaplikartayo dagiti maad-adaltayo. No kasta ti aramidentayo, maaddaantayo iti sirib, a kas iti salmista a nagbalin a ‘nasirsirib ngem kadagiti kabusorna’ ken ‘naaddaan iti ad-adu a pannakatarus ngem kadagiti amin a mannursurona.’​—Sal. 119:98, 99, 130.

4. (a) Apay a kombinsido ni David a ‘ni Jehova ti pakaisalakananna’? (b) Kaano a nangnangruna nga ispalennatayo ni Jehova?

⁴ Ipakita dagiti sasao ni David iti Salmo 27:1 a linaglagipna dagiti panangispal ni Jehova kenkuana iti napalabas. Kas pagarigan, inispal ni Jehova iti “gammat ti leon ken iti gammat ti oso.” Pinagballigi met ni Jehova idi nakiranget iti higante a ni Goliat. Idi agangay, inkagumaan ni Saul a gayangen ni David ngem kanayon nga inlisi ni Jehova. (1 Sam. 17:37, 49, 50; 18:11, 12; 19:10) Isu a kombinsido ni David idi kinunana: “Ni Jehova ti . . . pakaisalakanak”! Kasta met laeng ti aramiden ni Jehova kadagiti adipenna ita. Kasano? Babaen ti panangispalna kadakuada iti umad-adanin a “dakkel a rigat.”​—Apoc. 7:14; 2 Ped. 2:9.

LAGLAGIPEM TI TUNGGAL PANAGBALLIGIM

5, 6. (a) Kasanotayo a tumured no lagipentayo dagiti panangtulong ti Dios kadatayo? (b) Kasanonaka a mapatured ti napalabas a panangtulong ni Jehova kadagiti adipenna?

⁵ Ti maysa a makatulong kadatayo a maaddaan iti tured isu ti Salmo 27:2, 3. (Basaen.) Linagip ni David dagiti pasamak a nangispalan kenkuana ni Jehova. (1 Sam. 17:34-37) Dagidiay a pasamak ti nangpabileg kenkuana a mangsango kadagiti narigrigat pay a situasion. Laglagipem met kadi no kasano a tinulongannaka ni Jehova iti napalabas? Kas pagarigan, napadasmo kadin a sipapasnek nga inkararag ti maysa a nadagsen a problemam ket nakitam nga impaayannaka ni Jehova iti sirib ken bileg a nangdaer iti dayta? Wenno, malagipmo kadi no kasano a naikkat dagiti lapped iti panagserbim ken no kasano a naipaayanka iti ad-adu a gundaway a makapagserbi? (1 Cor. 16:9) Ania ti maitulong ti pananglagipmo kadagita? Saan kadi a matignayka nga agtalek a tulongannaka ni Jehova a mangtaming ken mangibtur uray iti daddadakkel a lapped wenno parikut?​—Roma 5:3-5.

⁶ Ania ti aramidentayo no ipangta ti nabileg a gobierno nga ikisap dagiti Saksi ni Jehova kas maysa nga organisasion? Iti  kaaldawantayo, adu ti nanggandat a mangaramid iti kasta ngem saanda a nagballigi. No lagipentayo ti panangispal ni Jehova iti ilina iti napalabas, tumuredtayo a mangsango iti aniaman a mapasamak iti masanguanan.​—Dan. 3:28.

IPATEGMO TI PUDNO A PANAGDAYAW

7, 8. (a) Sigun iti Salmo 27:4, ania ti kiniddaw ni David ken Jehova? (b) Ania ti naindaklan a naespirituan a templo ni Jehova, ken kasanotayo a makapagdaydayaw sadiay?

⁷ Ti maysa pay a makatulong tapno tumuredtayo ket ti panangipateg iti pudno a panagdayaw. (Basaen ti Salmo 27:4.) Idi kaaldawan ni David, ti “balay ni Jehova” isu ti tabernakulo. Ni David ti nangisagana kadagiti kasapulan para iti nangayed a templo nga impatakder ti anakna a ni Solomon. Sinigsiglo kalpasanna, imbaga ni Jesus a saanton a kasapulan a mapan dagiti tattao iti maysa a nadayag a patakder tapno makapagdayawda ken Jehova. (Juan 4:21-23) Kinuna ni apostol Pablo iti Hebreo kapitulo 8 agingga iti 10 a naadda ti naindaklan a naespirituan a templo idi nabautisaran ni Jesus idi 29 C.E., idi indatagna ti bagina a mangaramid iti pagayatan ni Jehova. (Heb. 10:10) Daytoy a naindaklan a naespirituan a templo isu ti urnos nga impaay ni Jehova tapno makaadanitayo Kenkuana babaen iti pammatitayo iti daton a subbot ni Jesus. Kasano a makapagdaydayawtayo iti dayta? Babaen ti panagkararag “buyogen ti napudno a puspuso iti naan-anay a pammasiguro ti pammati”; babaen ti di agressat a panangideklara iti namnamatayo; ken babaen ti panangpampanunot, panangparegta, ken panangpabileg kadagiti kapammatiantayo bayat ti panaggigimongtayo ken iti panagdaydayaw ti pamiliatayo. (Heb. 10:22-25) Mapabilegtayo bayat ti napeggad a maudi nga al-aldaw no ipategtayo ti urnos ti pudno a panagdayaw.

⁸ Iti intero a lubong, umad-adu a tiempo ti busbusbosen dagiti matalek nga adipen ni Jehova iti ministerio, panagadal iti sabali a pagsasao, ken iyaakar kadagiti lugar nga agkasapulan iti ad-adu a manangaskasaba iti Pagarian. Ipakpakitada a kidkiddawenda met ken Jehova ti kinuna ti salmista a kayatna a kitaen ti kinaimbag ni Jehova ken agserbi Kenkuana aniaman ti mapasamak.​—Basaen ti Salmo 27:6.

AGTALEKKA ITI TULONG TI DIOS

9, 10. Ania ti kaipapanan ti pammasiguro a nailanad iti Salmo 27:10?

⁹ Naimpusuan a naikuna ni David maipapan iti panagtalekna iti tulong ni Jehova: “No kas pagarigan ti bukodko nga ama ken ti bukodko nga ina pinanawandak, ni met laeng Jehova pidutennakto.” (Sal. 27:10) Saan met ketdi a binaybay-an dagiti nagannakna sigun iti salaysay ti 1 Samuel kapitulo 22. Ngem adu ita ti inlaksid ti mismo a pamiliada. Nupay kasta, natalgedda gapu iti naayat a pannaranay ti kongregasion Kristiano.

¹⁰ Yantangay nakasagana ni Jehova a mangaywan kadagiti nabaybay-an nga adipenna, sigurado a tulonganna ida iti aniaman a pakarigatanda. Kas pagarigan, madanagantayo kadi no kasanotayo nga ipaay ti material a kasapulan ti pamiliatayo? Laglagipentay koma a tulongannatayo ni Jehova. (Heb. 13:5, 6) Ammona ti kasasaad ken kasapulan ti amin a nasungdo nga ad-adipenna.

11. Ania ti epektona iti sabsabali ti panagtalektayo ken Jehova? Mangted iti pagarigan.

¹¹ Usigentayo ti kasasaad ni Victoria a mayad-adalan iti Biblia idiay Liberia. Bayat a rumangrang-ay iti panagadalna, isu ken ti tallo nga annakna ket pinanawan ti lalaki a kabkabbalayna. Uray no awan balay ken trabahona, intultuloyna ti nakipagadal  agingga a nabautisaran. Maysa nga aldaw, nakapidut ti 13 anyos a balasangna iti pitaka a napno iti kuarta. Tapno dida a masulisog a manggasto iti dayta, saandan a binilang ti kuarta. Imbes ketdi, dagus a binirokda ti akinkukua a maysa a soldado. Imbagana kadakuada a no amin koma a tattao ket mapagtalkan a kas kadagiti Saksi ni Jehova, nasaysayaat ken nataltalna koma ti intero a lubong. Impakita kenkuana ni Victoria ti kari ni Jehova a baro a lubong a masarakan iti Biblia. Nagbilib ti soldado iti kinamatalek ni Victoria ket inikkanna iti dakkel a kantidad. Wen, pagaammo a napudno dagiti Saksi ni Jehova gapu ta naan-anay nga agtalekda nga ipaay ni Jehova dagiti kasapulanda.

12. Ania ti ipakpakitatayo no itultuloytayo ti agserbi ken Jehova uray no mapukawantayo iti trabaho wenno kuarta? Mangted iti pagarigan.

¹² Panunotenyo met ti narikna ni Thomas a di bautisado nga agibumbunannag idiay Sierra Leone. Nagtrabaho kas mannursuro iti haiskul, ngem saanna a maala ti dandani makatawen a sueldona agraman ti back pay-na no dina makompleto dagiti makalikaguman. Ania ti maudi a kalikaguman ti eskuelaan? Isu ti pananginterbiu kenkuana ti school administrator, a maysa a padi. Inlawlawag ti padi a saan a maitunos ti patpatien dagiti Saksi ni Jehova iti sursuro ti eskuelaan. Pinagpilina ni Thomas​—ti trabahona wenno dagiti naibatay-Biblia a patpatienna? Nagikkat ni Thomas uray no saan a naited ti dandani makatawen a sueldona. Nakabirok iti sabali a trabaho, ti panagtarimaan iti radio ken selpon. Adda dagiti dadduma a mabalin a madanagan di la ket ta saan a maipaay dagiti kasapulanda. Ngem kas ipakita daytoy ken dagiti umasping a kapadasan, agtalektayo iti Namarsua iti amin a bambanag ken Manangsalaknib iti ilina.

13. Apay a narang-ay ti trabaho a panangasaba kadagiti napanglaw a pagilian?

¹³ Iti adu a pagilian a narigat ti panagbiag, masansan a nakaregregta dagiti manangiwaragawag iti Pagarian. Apay? Insurat ti maysa a sanga nga opisina: “Awan trabaho ti adu a makipagad-adal iti Biblia isu nga ad-adu ti panawenda a makipagadal. Ad-adu met ti panawen dagiti kakabsat a mangasaba. Saanen a masapul nga ibaga kadagiti tattao, nangruna kadagiti nadidigra a lugar, nga agbibiagtayon iti maudi nga al-aldaw ta mismo a makitkitada ti mapaspasamak iti aglawlawda.” Insurat ti maysa a misionero a nasuroken a 12 a tawen nga agserserbi iti maysa a pagilian nga amin nga agibumbunannag ket addaan iti agarup tallo nga iyad-adalan iti Biblia: “Gapu ta simple laeng ti biag ken manmano ti pakasingaan ti adu nga agibumbunannag, ad-adu ti tiempoda a mangasaba ken mangyadal iti Biblia.”

14. Kadagiti ania a pamay-an a salakniban ti Dios ti dakkel a bunggoy?

 ¹⁴ Inkari ni Jehova a tulongan, salakniban, ken ispalenna dagiti adipenna kas grupo, iti pisikal ken naespirituan, ket agtalektayo nga aramidenna dayta. (Sal. 37:28; 91:1-3) Iti “dakkel a rigat,” addanto dakkel a bunggoy a makalasat. (Apoc. 7:9, 14) Masalaknibanto dayta kas grupo bayat ti nabatbati a paset ti maudi nga al-aldaw. Maipaayto ti amin a kasapulanda tapno maibturanda dagiti pakasuotan ken mataginayonda ti relasionda ken Jehova. Salaknibanto ni Jehova ti ilina iti maudi a paset ti dakkel a rigat.

“ISURONAK, O JEHOVA, ITI DALANMO”

15, 16. Ania ti pagsayaatan ti panangyaplikartayo iti kunaen ti Dios? Mangted iti pagarigan.

¹⁵ Kasapulan a kanayon nga agpaisurotayo iti Dios tapno makapagtalinaedtayo a natured. Nabatad dayta iti kiddaw ni David: “Isuronak, O Jehova, iti dalanmo, ket iturongnak iti dana ti kinapalungdo maigapu kadagiti kadangadangko.” (Sal. 27:11) Maaramidantayo met dayta no denggentayo ti aniaman a naibatay-Biblia a bilin ni Jehova babaen ti organisasionna ken dagus nga iyaplikartayo dagita. Iti laksid ti krisis ti ekonomia, adu ti nagunggonaan idi inyaplikarda ti nainsiriban a balakad maipapan iti panangpasimple iti biag. Imbes a madagdagsenanda nga agbayad iti adu nga utang, nawayada a mangpalawa iti ministerioda. Nasayaat nga isaludsodtayo iti bagitayo, ‘Dagus kadi nga iyap-aplikarko ti tunggal banag a mabasak iti Biblia ken kadagiti publikasion manipud iti klase matalek ken masirib nga adipen, uray no kaipapananna nga agsakripisioak?’​—Mat. 24:45.

¹⁶ Awan ti rumbeng a pagbutngantayo no agpaisuro ken agpaidalantayo ken Jehova iti dana ti kinalinteg. Kas pagarigan, kayat ti maysa a regular pioneer idiay Estados Unidos ti sabali a posision iti trabaho tapno masuportaran ti panagpayunir ti intero a pamiliana. Ngem imbaga ti superbisorna nga imposible dayta gapu ta saan a naggraduar iti kolehio. No sika ti adda iti biangna, pagbabawyam kadi a saanka a nakapagkolehio gapu ta nagpayunirka? Dua a lawas kalpasanna, naikkat ti superbisor, ket dinamag ti sabali a manedyer no ania dagiti plano ti kabsat. Inlawlawagna nga isuda nga agassawa ket amin-tiempo a ministro dagiti Saksi ni Jehova ket kayatda ti makapagtultuloy. Sakbay a maituloy ti kabsat ti ibagbagana, kinuna ti manedyer: “Ammok nga adda banag a nagpaiduma kadakayo! Idi dandanin matay ni tatangko, inaldaw nga umay ti dua a kapammatianyo tapno ibasaanda iti Biblia. Inkarik iti bagik a no maipaayanak iti gundaway a tumulong iti maysa kadagiti Saksi ni Jehova, aramidek dayta.” Iti kabigatanna, naited iti daytoy a kabsat ti mismo a trabaho nga inkedked ti dati a superbisor. Wen, no iyun-unatayo dagiti interes ti Pagarian, tungpalen ni Jehova ti karina a kanayonto nga ipaayna dagiti kasapulantayo.​—Mat. 6:33.

NAPATEG TI PAMMATI KEN NAMNAMA

17. Ania ti makatulong kadatayo a saan nga agbuteng iti masanguanan?

¹⁷ Impaganetget ni David ti kinapateg ti pammati ken namnama. Imbagana nga awan ti namnamana no saan a “naaddaan iti pammati iti pannakakita ti kinaimbag ni Jehova.” (Sal. 27:13) Kinapudnona, asitayo pay no awanantayo iti namnama manipud iti Dios ken no ditay ipateg dagiti banag a nadakamat iti Salmo 27! Itultuloytayo koma nga ikararag ti bileg ken pannalaknib bayat a mapaspasarantayo dagiti narigat a kasasaad sakbay ti Armagedon.​—Basaen ti Salmo 27:14.

[Salsaludsod]

[Ladawan iti panid 23]

Naaddaan ni David iti tured gapu iti pananglagipna kadagiti panangispal kenkuana ni Jehova

[Ladawan iti panid 25]

Matmatantay kadi ti kinarigat ti biag kas gundawaytayo a mangpalawa iti ministeriotayo?