Sanayen Dagiti Kakabsat a Lallaki a Rumagpat

“Tunggal maysa a naan-anay a nasursuruan agbalinto a kas iti mannursurona.”​—LUC. 6:40.

1. Bayat ti ministerio ni Jesus ditoy daga, kasano a nangipasdek iti pundasion ti nagdakkel a kongregasion?

 ITI ngudo ti Ebanghelio ni apostol Juan, insuratna: “Iti kinapudnona, adu pay a sabsabali a banag ti inaramid ni Jesus, a, no naisuratda koma iti naan-anay a detalye, pagarupek, ti lubong a mismo saanna a kabaelan a laonen dagiti naisurat a lukot.” (Juan 21:25) Karaman kadagiti naibanag ni Jesus bayat ti ababa ngem narayray a ministeriona ket ti panangsapul, panangsanay, ken panangorganisarna kadagiti lallaki a mangidaulo inton agsubli idiay langit. Idi 33 C.E., nangibati iti bassit a grupo kas pundasion ngem alisto a dimmakkel a nagbalin a kongregasion ti rinibu a manangaskasaba.​—Ara. 2:41, 42; 4:4; 6:7.

2, 3. (a) Apay a kasapulan unay a rumagpat dagiti bautisado a lallaki? (b) Ania ti usigentayo iti daytoy nga artikulo?

² Adda itan nasurok a pito a milion nga aktibo nga agibumbunannag iti Pagarian iti nasurok a 100,000 a kongregasion iti intero a lubong, isu a dakkel ti panagkasapulan kadagiti lallaki a mangidaulo, kas kadagiti panglakayen. Makomendaran dagidiay mangikagkagumaan a mangragpat iti dayta a pribilehio ta ‘tartarigagayanda ti nasayaat nga aramid.’​—1 Tim. 3:1.

 ³ Ngem saan nga automatiko a makualipikar ti maysa a lalaki kadagiti pribilehio iti kongregasion. Saan a ti sekular nga edukasion, abilidad, nagapuanan, wenno dagiti kapadasanna iti biag ti mangisagana kenkuana iti daytoy nga annongen. Tapno maitungpalna a naimbag ti annongenna, masapul nga addaan iti naespirituan a kualipikasion ken galad. Kasano a matulongan dagiti lallaki iti kongregasion nga agbalin a kualipikado? “Tunggal maysa a naan-anay a nasursuruan agbalinto a kas iti mannursurona,” kinuna ni Jesus. (Luc. 6:40) Iti daytoy nga artikulo, usigentayo ti dadduma a pamay-an no kasano a tinulongan ti Nalaing a Mannursuro a ni Jesu-Kristo dagiti adalanna a makualipikar iti dakdakkel a responsabilidad, ken no ania ti maadaltayo kadagita.

“Inawagankay iti Gagayyem”

4. Kasano a nagbalin ni Jesus a pudno a gayyem kadagiti adalanna?

⁴ Saan nga imbilang ni Jesus dagiti adalanna a nababbaba no di ket trinatona ida kas gagayyem. Nakikadua, nagtalek, ken ‘impakaammona kadakuada ti amin a bambanag a nangngegna iti Amana.’ (Basaen ti Juan 15:15.) Panunotem ti ragsakda idi sinungbatan ni Jesus ti saludsodda: “Anianto ti pagilasinan ti kaaddam ken ti panungpalan ti sistema ti bambanag?” (Mat. 24:3, 4) Imbagana pay kadakuada ti mismo a kapanunotan ken rikriknana. Kas pagarigan, iti rabii ti pannakaliputna, inkuyogna da Pedro, Santiago, ken Juan iti hardin ti Getsemani. Sadiay a sipapasnek nga inkararagna ti pakariribukanna. Nalabit saan a nangngeg ti tallo nga apostol no ania ti inkararag ni Jesus ngem ammoda a nakaro ti pannakariribukna. (Mar. 14:33-38) Sakbayna, panunotem met ti epekto ti transpigurasion a nasaksianda. (Mar. 9:2-8; 2 Ped. 1:16-18) Ti nasinged a pannakigayyem ni Jesus kadagiti adalanna ti nangpabileg kadakuada a mangitungpal kadagiti nadagsen nga annongenda.

5. Kasano a matulongan dagiti panglakayen ti sabsabali?

⁵ Kas ken Jesus, mannakigayyem ken manangtulong dagiti panglakayen ita. Naayat ken nasingedda kadagiti kapammatianda babaen ti personal a pannakaseknanda kadakuada. Nupay ammoda a taginayonen dagiti kompidensial a bambanag, saanda a nalimed. Agtalekda kadagiti kakabsatda ken iranudda dagiti naadalda a Nainkasuratan a kinapudno. Dida met tratuen a nababbaba dagiti ministerial nga adipen nga ub-ubing ngem kadakuada. Ibilangda ketdi ida a naespirituan a lallaki nga addaan potensial ken kaduada nga agserserbi iti kongregasion.

“Impasdekko ti Pagtuladan Maipaay Kadakayo”

6, 7. Ania ti inyulidan ni Jesus kadagiti adalanna ken ania ti epekto dayta kadakuada?

⁶ Ipatpateg dagiti adalan ni Jesus dagiti naespirituan a bambanag. Ngem no dadduma, naimpluensiaanda iti dimmakkelan ken kulturada. (Mat. 19:9, 10; Luc. 9:46-48; Juan 4:27) Nupay kasta, saan a binabalaw wenno inungtan ni Jesus dagiti adalanna. Awan ti impaaramidna a dida kabaelan. Saanna met nga impaaramid ti dina kayat a mismo nga aramiden. Imbes ketdi, nangipakita kadakuada iti ulidan.​—Basaen ti Juan 13:15.

⁷ Ania ti inyulidan ni Jesus kadagiti adalanna? (1 Ped. 2:21) Pinagtalinaedna a simple ti biagna tapno nawaya a makapagserbi iti sabsabali. (Luc. 9:58) Napakumbaba ni Jesus ken kanayon nga imbatayna iti Kasuratan dagiti insurona. (Juan 5:19; 17:14, 17) Nalaka nga asitgan ken naasi. Ayat ti nangtignay kenkuana a mangaramid kadagita. (Mat. 19:13-15; Juan 15:12) Nagsayaat ti epekto ti ulidan ni Jesus kadagiti apostolna. Kas pagarigan, dayta ti nangpabileg ken Santiago nga agserbi a simamatalek iti Dios uray no mapapatay. (Ara. 12:1, 2) Simamatalek met a nagserbi ni Juan iti nasurok nga 60 a tawen.​—Apoc. 1:1, 2, 9.

8. Ania ti masapul nga iyulidan dagiti panglakayen kadagiti ub-ubbing a lallaki ken iti sabsabali?

 ⁸ Dagiti panglakayen a managsakripisio, napakumbaba, ken naayat ket nasayaat nga ulidan kadagiti ub-ubbing a lallaki. (1 Ped. 5:2, 3) Kanayonanna, maragsakan dagiti panglakayen a mapagwadan iti pammati, panangisuro, ministerio, ken iti panagbiag kas Kristiano gapu ta ammoda a mabalin a tuladen ti sabsabali ti pammatida.​—Heb. 13:7.

‘Binilin Ida ni Jesus sa Imbaonna Ida’

9. Kasanotayo nga ammo a sinanay ni Jesus dagiti adalanna a mangitungpal iti trabaho a panangasaba?

⁹ Kalpasan ti naregta a panangasaba ni Jesus iti agarup dua a tawen, imbaonna met ti 12 nga apostol a mangasaba. Ngem binilinna nga umuna ida. (Mat. 10:5-14) Sakbay ti simimilagro a panangpakan ni Jesus iti rinibu a tattao, imbagana kadagiti adalanna no kasanoda nga urnosen ken iwarasan ida iti taraon. (Luc. 9:12-17) Nabatad ngarud a sinanay ni Jesus dagiti adalanna babaen ti panangipaayna iti nalawag ken espesipiko a bilin. Dayta a pannakasanay, ken iti tulong ti nasantuan nga espiritu, naorganisar dagiti apostol idi agangay ti nalawa a panangasaba a nangrugi idi 33 C.E.

10, 11. Kasano a progresibo a masanay dagiti kabbaro?

¹⁰ Ita, mangrugi a masanay ti maysa a lalaki no iyadalantayo iti Biblia. Mabalin a tulongantayo nga agbasa a naimbag. Agtultuloy ti panangtulongtayo bayat nga iyad-adalantayo. No kanayonen a makigimong, maammuanna no kasano a makualipikar iti Teokratiko nga Eskuelaan ti Panagministro, agbalin a di bautisado nga agibumbunannag, ken dadduma pay. Kalpasan a mabautisaran, masanay met a tumulong iti panangmantener iti Kingdom Hall. Inton agangay, mabalin a tulongan tapno makualipikar kas ministerial nga adipen.

¹¹ No maikkan iti annongen ti maysa a bautisado a lalaki, maragsakan dagiti panglakayen a tumulong kenkuana tapno maaramidna dayta a naimbag. Ammona koma no ania ti rumbeng nga aramidenna. No marigatan a mangaramid iti dayta, saan koma nga ipapan a dagus ti naayat a panglakayen nga isu ket saan a kualipikado. Imbes ketdi, siaasi nga ilawlawagda no ania ti rumbeng nga aramidenna ken no kasanona nga aramiden dayta. Maragragsakan met dagiti panglakayen no makitada nga ar-aramidenna ti amin a kabaelanna ken mariknana ti rag-o nga itden ti panagserbi iti sabsabali.​—Ara. 20:35.

‘Masirib Daydiay Umimdeng iti Pammatigmaan’

12. Apay nga epektibo dagiti balakad ni Jesus?

¹² Sinanay ni Jesus dagiti adalanna babaen ti panangipaayna iti balakad a kasapulanda. Kas pagarigan, tinubngarna da Santiago ken Juan gapu ta kayatda a bumaba ti apuy manipud langit tapno mauram dagiti Samaritano a di immawat kadakuada. (Luc. 9:52-55) Idi immasideg ken Jesus ti ina da Santiago ken Juan tapno agkiddaw iti natan-ok a saad iti Pagarian para kadagiti annakna, kinuna ni Jesus kadagiti agkabsat: “Daytoy panagtugaw iti makannawanko ken iti makannigidko saanko a biang ti mangipaay, no di ket kukua dayta dagidiay nangisaganaan ni Amak.” (Mat. 20:20-23) Dagiti balakad ni Jesus ket nalawag, praktikal, ken kanayon a naibatay iti Sao ti Dios. Insurona ida nga agpanunot ken agtignay maitunos kadagita a prinsipio. (Mat. 17:21-27) Ammona a saan a perpekto dagiti pasurotna ken adda limitasionda. Binalakadanna ida gapu ta ay-ayatenna unay ida.​—Juan 13:1.

13, 14. (a) Asino ti agkasapulan iti balakad? (b) Ania ti mabalin nga ibalakad ti panglakayen iti maysa a saan a rumangrang-ay iti naespirituan?

¹³ Adda dagiti gundaway nga agkasapulan iti balakad wenno Nainkasuratan a pammagbaga dagiti lallaki a rumagragpat kadagiti annongen iti kongregasion. “Daydiay umimdeng iti pammatigmaan masirib,” kuna ti Proverbio 12:15. Kuna ti maysa nga agtutubo a lalaki: “Ti dakkel a parikutko ket ti bukodko a pagkapuyan. Naaddaanak iti umiso a panangmatmat  iti bagik gapu iti balakad ti maysa a panglakayen.”

¹⁴ No makita dagiti panglakayen a ti maysa ket saan rumangrang-ay iti naespirituan gapu kadagiti kuestionable nga aramidna, siaalumamay a tulonganda a dagus nga agbalbaliw. (Gal. 6:1) No dadduma, masapul a balakadanda gapu iti kababalinna. Kas pagarigan, no dina ar-aramiden ti amin a kabaelanna, makatulong no ibaga ti panglakayen a ni Jesus ket naregta a nangiwaragawag iti Pagarian ken binilinna dagiti pasurotna nga agaramidda iti adalan. (Mat. 28:19, 20; Luc. 8:1) No agparang nga ambisioso, mabalin nga ilawlawag kenkuana ti panglakayen no kasano nga impakita ni Jesus kadagiti adalanna a napeggad ti agbalin a prominente. (Luc. 22:24-27) Kasanon no marigatan ti kabsat a mamakawan? Makatulong ti ilustrasion maipapan iti adipen a saan a nangpakawan iti nakautang kenkuana iti bassit a gatad uray isu ket pinakawanen ti nakautanganna iti nagdakkel a gatad. (Mat. 18:21-35) No kasapulan ti balakad, nasayaat nga ipaay a dagus dayta dagiti panglakayen.​—Basaen ti Proverbio 27:9.

“Sanayem ta Bagim”

15. Kasano a makatulong ti pamilia ti lalaki tapno makapagserbi iti kongregasion?

¹⁵ Dagiti panglakayen ti kangrunaan a mangsanay kadagiti lallaki a rumagpat iti pribilehio ngem mabalin a makatulong met ti dadduma, kas iti pamiliana. Ken no maysan a panglakayen, makatulong latta ti suporta ti naayat nga asawa ken annakna. Napateg ti saanda a panangipaidam kenkuana iti kongregasion tapno sibaballigi a maibaklayna ti annongenna. Ti kinamanagsakripisioda ket mangyeg kenkuana iti ragsak ken apresiaren unay dayta dagiti kakabsat.​—Prov. 15:20; 31:10, 23.

16. (a) Asino ti kangrunaan a mangipakita iti panagregget a rumagpat? (b) Kasano a maragpat ti maysa dagiti pribilehio iti kongregasion?

¹⁶ Nupay makatulong ti sabsabali, ti kabsat a mismo ti mangikagumaan a rumagpat. (Basaen ti Galacia 6:5.) Siempre, saan a kasapulan a ministerial nga adipen wenno panglakayen ti maysa tapno makatulong iti sabsabali ken naan-anay a makiraman iti ministerio. Ngem tapno maaddaan iti pribilehio iti kongregasion, masapul nga ikagumaanna a ragpaten dagiti kualipikasion a nailanad iti Kasuratan. (1 Tim. 3:1-13; Tito 1:5-9; 1 Ped. 5:1-3) Isu a no kalikagumanna ti agserbi kas ministerial nga adipen wenno panglakayen, masapul nga ammuenna no ania ti rumbeng a parang-ayenna tapno maragpatna dayta. Ania ti makatulong kenkuana? Isu ti regular a panagbasa iti Biblia, napasnek a personal a panagadal, panagutob, naimpusuan a panagkararag, ken kinaregta iti ministerio. No aramidenna dagita,  sursurotenna ti balakad ni Pablo ken ni Timoteo: “Sanayem ta bagim buyogen ti nadiosan a debosion kas kalatmo.”​—1 Tim. 4:7.

17, 18. Ania ti aramiden ti maysa a bautisado a lalaki no saan a rumagragpat gapu ta maamak, mariknana a dina kabaelan ti agserbi, wenno awan tarigagayna?

¹⁷ Kasanon no saan a rumagragpat ti maysa gapu ta maamak wenno mariknana a dina kabaelan ti agserbi? Nasayaat a laglagipenna a kanayon a tulongannatayo ni Jehova a Dios ken ni Jesu-Kristo. Inkari ni Jehova nga ‘inaldaw a bagkatenna ti awit maipaay kadatayo.’ (Sal. 68:19) Isu a matulongan ti Nailangitan nga Amatayo ti maysa a kabsat a mangibaklay kadagiti annongenna iti kongregasion. No saan pay a ministerial nga adipen wenno panglakayen, nasayaat a panunotenna nga adda dakkel a panagkasapulan kadagiti lallaki a nataengan iti naespirituan nga umawat kadagiti pribilehio iti organisasion ti Dios. Makatulong dayta tapno maparmekna dagiti negatibo a kapanunotan. Mabalinna a kiddawen ti nasantuan nga espiritu, yantangay karaman iti bunga dayta ti talna ken panagteppel​—dagiti galad a kasapulan tapno maikkat ti panagamak wenno pannakarikna a dina kabaelan ti agserbi. (Luc. 11:13; Gal. 5:22, 23) Ken makapagtalek a bendisionan ni Jehova dagidiay rumagragpat nga addaan iti umiso a motibo.

¹⁸ Kasanon no awan tarigagay ti maysa a bautisado a lalaki a rumagpat iti pribilehio? Ania ti makatulong kenkuana? Insurat ni apostol Pablo: “[Ti Dios], maigapu iti pakaragsakanna unay, agtigtignay kadakayo tapno agpadpada nga agtarigagay ken agtignaykayo.” (Fil. 2:13) Nagtaud ken Jehova ti tarigagay nga agserbi, ken ti espirituna ti mangpabileg iti maysa a mangipaay iti sagrado a panagserbi. (Fil. 4:13) Mabalin met nga ikararag ti maysa a Kristiano ti tulong ti Dios tapno maaramidna ti umiso.​—Sal. 25:4, 5.

19. Ania ti ipasigurado kadatayo ti kaadda ti “pito a pastor, wen, walo a duke”?

¹⁹ Bembendisionan ni Jehova ti panagregget dagiti panglakayen a mangsanay iti sabsabali. Bembendisionanna met dagidiay agregget a rumagpat kadagiti pribilehio iti kongregasion. Ipasigurado ti Biblia nga adda umdas a kakabsat a lallaki a mangidaulo iti kongregasion. Kuna ni Jehova a mangted iti “pito a pastor, wen, walo a duke kadagiti tattao.” (Mik. 5:5) Anian a bendision ta nagadu a kakabsat a lallaki ti masansanay ken sipapakumbaba a rumagragpat kadagiti pribilehio a pakaidayawan ni Jehova!

Ania ti Sungbatyo?

• Kasano a tinulongan ni Jesus dagiti adalanna tapno makualipikarda iti dakdakkel a responsabilidad?

• Kasano a dagiti panglakayen matuladda ni Jesus iti panangtulongda kadagiti lallaki a mangidaulo iti kongregasion?

• Ania ti maitulong ti kapamilia ti kabsat a lalaki tapno makaragpat iti pribilehio?

• Ania ti maaramidan ti maysa tapno makaragpat kadagiti pribilehio?

[Salsaludsod]

[Dagiti Ladawan iti panid 31]

Kasanom a masanay ti iyad-adalam iti Biblia bayat a rumangrang-ay iti naespirituan?

[Ladawan iti panid 32]

Kasano a maipakita dagiti lallaki nga ikagkagumaanda ti rumagpat?