Diyo Pagleddaangen ti Nasantuan nga Espiritu ni Jehova

“Dikay koma pagleddaangen ti nasantuan nga espiritu ti Dios, a babaen iti dayta naselioankayo.”​—EFE. 4:30.

1. Ania ti inaramid ni Jehova para iti minilion a tattao, ken ania ti rumbeng nga aramidenda?

ADDA naisangsangayan nga inaramid ni Jehova para iti minilion a tattao nga agbibiag iti daytoy nariribuk a lubong. Pinagbalinna a posible ti iyaadanida kenkuana babaen ti bugbugtong nga Anakna, ni Jesu-Kristo. (Juan 6:44) Maysaka kadakuada no naidedikarmon ti biagmo iti Dios ken itungtungpalmo dayta. Kas maysa a nabautisaran iti nagan ti nasantuan nga espiritu, rumbeng nga agtignayka maitunos iti dayta nga espiritu.​—Mat. 28:19.

2. Ania dagiti saludsod nga usigentayo?

² Datayo nga ‘agimulmula maipaay iti espiritu’ inkawestayo ti baro a personalidad. (Gal. 6:8; Efe. 4:17-24) Ngem balakadan ken pakdaarannatayo ni apostol Pablo a ditay pagleddaangen ti nasantuan nga espiritu ti Dios. (Basaen ti Efeso 4:25-32.) Usigentayo ita a naimbag ti balakad ti apostol. Ania ti kayatna a sawen idi kinunana a  dikay pagleddaangen ti espiritu ti Dios? Kasano a mabalin a maaramid dayta ti maysa a dedikado ken Jehova? Ken kasano a maliklikantayo a pagleddaangen ti espiritu ni Jehova?

Ti Kayat a Sawen ni Pablo

3. Ilawlawagyo ti kaipapanan ti Efeso 4:30.

³ Imutektekanyo nga umuna ti kinuna ni Pablo iti Efeso 4:30: “Dikay koma pagleddaangen ti nasantuan nga espiritu ti Dios, a babaen iti dayta naselioankayo a maipaay iti aldaw a pannakaluk-at babaen ti subbot.” Saan a kayat ni Pablo a mapukaw dagiti dungdunguenna a kakabsat ti relasionda iti Dios. Babaen iti espiritu ni Jehova a ‘naselioanda a maipaay iti aldaw a pannakaluk-at babaen ti subbot.’ Ti nasantuan nga espiritu ti Dios ket agtultuloy a maysa a selio, wenno pakpakauna a “tanda ti banag a dumteng” para kadagiti nasungdo a napulotan. (2 Cor. 1:22) Ti selio ti mangipakita a kukua ida ti Dios ken maikarida iti nailangitan a biag. Dagiti maselioanto a naan-anay ket agdagup iti 144,000.​—Apoc. 7:2-4.

4. Apay a masapul a liklikantayo a pagleddaangen ti espiritu ti Dios?

⁴ No mapagleddaang ti espiritu, mabalin nga agresulta dayta iti naan-anay a pannakapukaw iti pangiwanwan ti aktibo a puersa ti Dios iti biag ti maysa a Kristiano. Posible dayta kas ipakita ti kinuna ni David kalpasan a nagbasol mainaig ken Bat-seba. Agbabbabawi a nagpakaasi ni David ken Jehova: “Saannak nga ibelleng manipud iti sanguanam; ket ti nasantuan nga espiritum O saanmo nga ikkaten kaniak.” (Sal. 51:11) Dagidiay laeng napulotan a mapaneknekan a “matalek uray agingga ken patay” ti umawat iti “korona” nga imortal a biag idiay langit. (Apoc. 2:10; 1 Cor. 15:53) Dagiti Kristiano nga addaan iti naindagaan a namnama kasapulanda met ti nasantuan nga espiritu tapno masalimetmetanda ti kinatarnawda iti Dios, iti kasta, awatenda ti sagut a biag maibatay iti pammatida iti pangsubbot a daton ni Kristo. (Juan 3:36; Roma 5:8; 6:23) Gapuna, kasapulantayo amin ti agannad tapno ditay mapagleddaang ti nasantuan nga espiritu ni Jehova.

Kasano a ti Kristiano Mapagleddaangna ti Espiritu?

5, 6. Kasano a ti maysa a Kristiano posible a mapagleddaangna ti espiritu ni Jehova?

⁵ Kas dedikado a Kristiano, maliklikantayo a pagleddaangen ti espiritu. Maaramidtayo dayta no ‘itultuloytayo ti magna ken agbiag babaen ti espiritu,’ ket iti kasta, saannatay a maringbawan dagiti nainlasagan a tarigagay ken maliklikantayo nga iparangarang dagiti di umiso a kababalin. (Gal. 5:16, 25, 26) Ngem mabalin nga agbaliw dayta. Mapagleddaangtayo ti espiritu ti Dios no in-inut, nalabit a di pay ketdi madmadlaw, a makiramantayo kadagiti aramid a kondenaren ti Sao ti Dios nga impaltiing ti espirituna.

⁶ No itultuloytayo ti agtignay a maisupadi iti panangiwanwan ti nasantuan nga espiritu, mapagleddaangtayo ni Jehova, ti Gubuayan dayta nga espiritu. Ti panangusig iti Efeso 4:25-32 ipakitana no kasano ti rumbeng a panagtignaytayo ken tulongannatayo tapno ditay mapagleddaang ti espiritu ti Dios.

No Kasano a Maliklikan a Mapagleddaang ti Espiritu

7, 8. Ilawlawagyo no apay a nasken nga agbalintayo a napudno.

⁷ Agbalintayo a napudno. Insurat ni Pablo iti Efeso 4:25: “Ita ta inwaksiyon ti kinaulbod, sawenyo ti kinapudno tunggal maysa kadakayo iti padana a tao, agsipud ta datayo ket kamkameng nga agpaay iti maysa ken maysa.” Yantangay nagkaykaysatayo kas “kamkameng nga agpaay iti maysa ken maysa,” ditay koma agbalin a nasikap wenno igagaratayo nga allilawen dagiti kapammatiantayo, yantangay maibilang dayta a panagulbod kadakuada. Asinoman nga agtultuloy a kasta mapukawna ti relasionna iti Dios.​—Basaen ti Proverbio 3:32.

⁸ Dagiti mangallilaw a sao ken aramid dadaelenda ti panagkaykaysa ti kongregasion. Gapuna, agbalintayo koma a kas iti mapagtalkan a ni propeta Daniel, a di pulos nangipakita iti kinadakes. (Dan. 6:4) Laglagipentayo ti balakad ni Pablo kadagiti Kristiano nga addaan iti nailangitan a namnama. Kinunana a ti tunggal kameng “ti bagi ti Kristo” ket kamkameng agpaay iti maysa  ken maysa ken masapul nga agtalinaedda a naikaykaysa kadagiti napudno a napulotan a pasurot ni Jesus. (Efe. 4:11, 12) No kayattayo ti agbiag nga agnanayon iti Paraiso a daga, masapul nga agsaotayo iti pudno tapno mapalagda ti panagkaykaysa ti sangalubongan a panagkakabsattayo.

9. Apay a napateg a tungpalentayo ti balakad iti Efeso 4:26, 27?

⁹ Nasken a busorentayo ti Diablo, ket ditay ikkan iti gundaway a mangdangran iti espiritualidadtayo. (Sant. 4:7) Ti nasantuan nga espiritu tulongannatayo a mangsaranget ken Satanas. Kas pagarigan, maaramidtayo dayta no liklikantayo ti di makontrol a panagpungtot. Insurat ni Pablo: “Agpungtotkayo, nupay kasta dikay agbasol; saannakay koma a malnekan ti init a sipupungtotkayo pay, dikay met ikkan ti lugar ti Diablo.” (Efe. 4:26, 27) No nainkalintegan ti panagpungtottayo, makatulong ti dagus ken naulimek a panagkararag tapno agbalintayo a ‘nalamiis iti espiritu,’ nga agteppeltayo imbes nga agtignaytayo iti wagas a mamagleddaang iti espiritu ti Dios. (Prov. 17:27) Ditay ngarud koma agtalinaed a sipupungtot tapno awan gundaway ni Satanas a mangituggod kadatayo nga agaramid iti dakes. (Sal. 37:8, 9) Ti maysa a pamay-an a masarangettayo ti Diablo ket ti dagus a panangrisut kadagiti di panagkikinnaawatan maitunos iti balakad ni Jesus.​—Mat. 5:23, 24; 18:15-17.

10, 11. Apay a masapul a liklikantayo ti agtakaw wenno agbalin a di mapagpiaran?

¹⁰ Ditay koma tumulok iti sulisog nga agtakaw wenno agbalin a di mapagpiaran. No maipapan iti panagtakaw, insurat ni Pablo: “Ti agtatakaw saan koma nga agtakawen, no di ket agtrabaho koma a sipipinget, nga aramidenna babaen kadagiti imana ti aramid a naimbag, tapno adda koma maibunongna iti asinoman nga agkasapulan.” (Efe. 4:28) No agtakaw ti dedikado a Kristiano, ‘tabtabbaawanna ti nagan ti Dios’ gapu ta mangyeg dayta iti pannakaumsi. (Prov. 30:7-9) Saan a mabalin a pagpambar uray ti kinapanglaw tapno agtakaw ti maysa. Ammo dagiti mangay-ayat iti Dios ken iti padada a tao nga awan a pulos ti kasasaad a mamagbalin nga umiso ti panagtakaw.​—Mar. 12:28-31.

¹¹ Saan laeng a dinakamat ni Pablo no ania ti ditay rumbeng nga aramiden; impatuldona pay no ania ti rumbeng nga aramidentayo. No agbibiag ken magmagnatayo babaen ti nasantuan nga espiritu, ipasnektay ti agtrabaho tapno maipaaytayo ti kasapulan ti pamiliatayo ken adda pay ‘maibunongtayo iti asinoman nga agkasapulan.’ (1 Tim. 5:8) Ni Jesus ken dagiti apostolna nangilatangda iti pondo a pangtulong kadagiti napanglaw, ngem agtaktakaw iti dayta ti mangliliput a ni Judas Iscariote. (Juan 12:4-6) Sigurado a saan a nagpaidalan iti nasantuan nga espiritu. Gapuna, datayo nga agpapaiwanwan iti espiritu ti Dios agbalintayo koma a “mapagtalkan iti amin a bambanag,” kas iti inaramid ni Pablo. (Heb. 13:18) Iti kasta, maliklikantayo a pagleddaangen ti nasantuan nga espiritu ni Jehova.

 Dadduma Pay a Pamay-an Tapno Di Mapagleddaang ti Espiritu

12, 13. (a) Kas ipakita ti Efeso 4:29, ania a kita ti sasao ti nasken a liklikantayo? (b) Kasano ti rumbeng a panagsasaotayo?

¹² Annadantayo ti panagsasaotayo. Kinuna ni Pablo: “Saan koma a rummuar iti ngiwatyo ti rinuker a sasao, no di ket ti aniaman a sasao a naimbag a maipaay a pangpabileg kas iti kasapulan, tapno maipaayna no ania ti mainugot kadagiti agdengdengngeg.” (Efe. 4:29) Saan laeng manen a basta imbaga ti apostol no ania ti ditay rumbeng nga aramiden; imbagana pay no ania ti rumbeng nga aramidentayo. Babaen ti panagpaiwanwan iti espiritu ti Dios, matignaytayo nga ‘agsao iti naimbag maipaay iti pannakapabileg tapno maipaaytayo no ania ti mainugot kadagiti agdengdengngeg.’ Malaksid iti dayta, ditay koma mangisawang kadagiti “rinuker a sasao.” Ti Griego a sao a naipatarus kas “rinuker” ket nausar a mangdeskribir iti malunglungsot a prutas, ikan, wenno karne. No kasano a kaariektayo dagiti kasta a taraon, kaguratayo met dagiti sasao nga ibilang ni Jehova a dakes.

¹³ Masapul a nadayaw, naasi, ken “natemplaan iti asin” ti panagsasaotayo. (Col. 3:8-10; 4:6) Mailasin koma dagiti tattao a naidumatayo no mangngegda dagiti sasaotayo. Gapuna, tulongantayo ti dadduma babaen kadagiti makapabileg a sasao. Ken tuladentayo koma ti rikna ti salmista a nangikanta: “Dagiti sasao ti ngiwatko ken ti panagmennamenna ti pusok agbalinda koma a makaparagsak iti sanguanam, O Jehova a Batok ken Mannubbotko.”​—Sal. 19:14.

14. Sigun iti Efeso 4:30, 31, ania dagiti nasken nga iwaksitayo?

¹⁴ Iwaksitayo ti sakit ti nakem, pungtot, makasair a sasao, ken amin a kinadakes. Kalpasan a namakdaar ni Pablo maibusor iti panamagleddaang iti espiritu ti Dios, insuratna: “Maikkat koma kadakayo ti isuamin a makadangran a kinapait ken unget ken pungtot ken panagririaw ken nabassawang a panagsasao agraman ti isuamin a kinadakes.” (Efe. 4:30, 31) Kas imperpekto a tattao, masapul nga ikagumaantayo a kontrolen ti panunot ken tigtignaytayo. No panuynoyantayo ti “makadangran a kinapait ken unget ken pungtot,” mapagleddaangtayo ti espiritu ti Dios. Kasta met laeng no agbilbilangtayo iti kamali nga inaramid kadatayo dagiti sabsabali, agimulmulatayo iti sakit ti nakem, ken ditay kayat ti makikappia kadagiti nangsair kadatayo. Uray no rugrugiantayo pay laeng nga iyaleng-aleng ti balakad ti Biblia, nalabit a mapatanortayo dagiti kababalin a mangiturong kadatayo nga agbasol maibusor iti espiritu ken mabalin a mapasarantayo dagiti nakas-ang nga ibungana.

15. No adda nakabasol kadatayo, ania ti rumbeng nga aramidentayo?

¹⁵ Masapul a naasi, mannakipagrikna, ken manangpakawantayo. Insurat ni Pablo: “Agbalinkayo a manangngaasi iti maysa ken maysa, nadungngo a mannakipagrikna, a sibubulos a pakawanenyo ti maysa ken maysa no kasano a ti Dios sibubulos a nangpakawan met kadakayo babaen ken Kristo.” (Efe. 4:32) Uray no nasaktan unay ti riknatayo, mangpakawantayo koma, kas iti Dios. (Luc. 11:4) Ipapantayo nga adda di nasayaat nga insarita ti maysa a kabsat maipapan kadatayo. Gapu ta kayattayo a mailinteg ti bambanag, kasaritatayo ti kabsat. Iyebkasna ti panagbabawina ken dumawat iti pammakawan. Pakawanentayo, ngem saan laeng a dayta. “Dika agibales wenno maaddaan iti sakit ti nakem iti annak dagiti  kailiam,” kuna ti Levitico 19:18, “ket masapul nga ayatem ti padam a tao a kas iti bagim. Siak ni Jehova.”

Kasapulan ti Panagannad

16. Mangted iti pagarigan a mangipakita a mabalin a kasapulantayo ti mangaramid iti panagbalbaliw tapno ditay mapagleddaang ti espiritu ni Jehova.

¹⁶ Uray iti panagmaymaysatayo, mabalin a masulisogtayo nga agaramid iti di makaay-ayo iti Dios. Kas pagarigan, maysa a kabsat a lalaki ti agdengdengngeg iti kuestionable a musika. Inton agangay, masidir ti konsiensiana gapu iti dina panangipangag iti balakad ti Biblia a naidatag kadagiti publikasion “ti matalek ken masirib nga adipen.” (Mat. 24:45) Nalabit nga ikararagna dayta a parikutna ken mabalin a malagipna ti sasao ni Pablo iti Efeso 4:30. Gapu ta determinado a di agaramid iti aniaman a mamagleddaang iti espiritu ti Dios, ikagumaannan a liklikan dagiti kuestionable a musika. Sigurado a bendisionan ni Jehova dayta a kababalin ti kabsat. Gapuna, itultuloytayo koma a liklikan a pagleddaangen ti espiritu ti Dios.

17. Ania ti mabalin a mapasamak no ditay agannad ken regular nga agkararag?

¹⁷ No ditay agannad ken regular nga agkararag, mabalin a makaaramidtayo iti narugit wenno dakes nga aramid a mamagleddaang iti espiritu. Gapu ta ti nasantuan nga espiritu ket mangpataud kadagiti galad a mangyanninaw iti personalidad ti Ama, posible a mapagleddaang dayta​—banag a sigurado a ditay kayat nga aramiden. Dagiti Judio nga eskriba idi umuna a siglo sibibiddut nga impagapuda ken Satanas dagiti milagro nga inaramid ni Jesus. (Basaen ti Marcos 3:22-30.) Dagidi a bumusbusor ken Kristo ‘tinabbaawanda ti nasantuan nga espiritu’ ket iti kasta, nakaaramidda iti di mapakawan a basol. Sapay koma ta saan a mapasamak ti kasta kadatayo!

18. Kasanotayo nga ammo a saantay a nakaaramid iti di mapakawan a basol?

¹⁸ Yantangay ditay kayat ti makaaramid iti di mapakawan a basol, masapul a laglagipentayo ti kinuna ni Pablo a ditay pagleddaangen ti espiritu. Ngem kasano no nakaaramidtayo iti nadagsen a basol? No nagbabawitayon ken tinulongandatayon dagiti panglakayen, maibagatayo a pinakawannatayon ti Dios ken saantayo a nakabasol maibusor iti nasantuan nga espiritu. Babaen ti tulong ti Dios, maliklikantayo met a pagleddaangen manen ti espiritu iti aniaman a pamay-an.

19, 20. (a) Ania ti sumagmamano a banag a masapul a liklikantayo? (b) Ania koma ti determinado nga aramidentayo?

¹⁹ Us-usaren ti Dios ti nasantuan nga espirituna a mangitandudo iti ayat, rag-o, ken panagkaykaysa dagiti adipenna. (Sal. 133:1-3) Gapuna, liklikantayo koma a pagleddaangen ti espiritu babaen ti ditay pannakiraman kadagiti makadangran a tsismis wenno panangisawang kadagiti bambanag a mangkissay iti panagraem kadagiti panglakayen a dinutokan ti espiritu. (Ara. 20:28; Jud. 8) Imbes ketdi, masapul a tumulongtayo a mangtaginayon iti panagkaykaysa ken panagraem iti uneg ti kongregasion. Sigurado a ditay kayat nga iparegta ti panaglalasin babaen ti panangbukel iti bukodtayo a grupo iti uneg ti ili ti Dios. Insurat ni Pablo: “Bagbagaankayo, kakabsat, babaen ti nagan ni Apotayo a Jesu-Kristo a rebbeng nga agsaokayo amin a sangsangkatunos, ket awan koma dagiti panaglalasin kadakayo, no di ket naan-anay nga agkaykaysakayo koma iti isu met laeng a panunot ken iti isu met laeng a wagas ti panagpampanunot.”​—1 Cor. 1:10.

²⁰ Sidadaan ken kabaelannatayo a tulongan ni Jehova tapno ditay mapagleddaang ti espirituna. Itultuloytayo koma nga ikararag ti nasantuan nga espiritu ken determinadotayo a di mangpaleddaang iti dayta. Sapay koma ta itultuloytayo ti ‘agmula maipaay iti espiritu,’ a sigaganetget nga agpaidalantayo iti dayta ita ken iti agnanayon.

Ania ti Sungbatyo?

• Ania ti kayat a sawen ti panamagleddaang iti espiritu ti Dios?

• Kasano a ti maysa a dedikado ken Jehova mapagleddaangna ti espiritu ti Dios?

• Kadagiti ania a pamay-an a maliklikantayo a pagleddaangen ti nasantuan nga espiritu?

[Salsaludsod]

[Ladawan iti panid 30]

Dagus a risuten dagiti saan a panagkikinnaawatan

[Ladawan iti panid 31]

Ania a prutas ti kasayaatan a mangiladawan iti panagsasaoyo?