Ti Panagturpos ti Maika-124 a Klase ti Gilead

Arig Dudon Dagiti Misionero

TUNGGAL innem a bulan, ti Watchtower Bible School of Gilead ket mangang-angay iti maysa a programa ti panagturpos a pakaawisan ti intero a pamilia ti Bethel iti Estados Unidos. Idi Marso 8, 2008, nagtataripnong ti pamilia ti Bethel ken dagiti bisita a naggapu iti nasurok a 30 a pagilian tapno tabunuanda ti panagturpos ti maika-124 a klase ti Gilead School. Amin dagiti 6,411 a timmabuno nakipagragsakda kadagiti estudiante iti aldaw ti panagturposda.

Ti tserman iti programa a ni Stephen Lett, a kameng ti Bagi a Manarawidwid, rinugianna ti programa babaen ti palawag a napauluan iti “Mapankayo a Kadua Dagiti Piguratibo a Dudon nga Imbaon ni Jehova.” Iti Apocalipsis 9:1-4, ti bassit a grupo dagiti napulotan a Kristiano nga aktibo manen iti panagserbi ken Jehova sipud idi 1919 ket nayarig iti pangen dagiti dudon. Napalagipan dagiti estudiante a kas kameng ti “sabsabali a karnero,” nasken a makikaduada kadagitoy a piguratibo a pangen dagiti dudon.​—Juan 10:16.

Ni Lon Schilling, miembro ti Komite ti Sanga iti Estados Unidos, ti simmaruno a nangipalawag iti “Agbalinkayo a Katulongan.” Naibatay dayta iti pagarigan iti Biblia maipapan kada Aquila ken Priscila (wenno, Prisca), agassawa a Kristiano idi umuna a siglo. (Roma 16:3, 4) Ti nagturpos a klase ket buklen iti 28 a pagassawaan. Napalagipanda a tapno agballigida kas misionero, masapul a taginayonenda a natibker ti relasionda kas agassawa. Ti Biblia kanayon nga agkuykuyog a dakamatenna ni Aquila ken ti asawana a ni Priscila. Gapuna, minatmatan ida ni apostol Pablo ken ti kongregasion kas maysa a pareha. Umasping iti dayta, dagiti agassawa a misionero ita rumbeng nga agkaduada nga agtrabaho, agdayaw, ken mangsaranget kadagiti naisangsangayan a karit iti teritoria a nakaibaonanda, iti kasta agtinnulongda.​—Gen. 2:18.

Ti simmaganad a palawag a napauluan iti “Subadan ti Kinaimbag ni Jehova,” ket imbitla ni Guy Pierce a kameng ti Bagi a Manarawidwid. Inlawlawag ni Kabsat Pierce a ti panagbalin a naimbag ket saan laeng a panangliklik nga agaramid iti dakes. Ti naimbag a tao agaramid iti nasayaat a bambanag a pakagunggonaan ti sabsabali. Awan kaasping ti kinaimbag ni Jehova a Dios. (Zac. 9:16, 17) Ti kinaimbag ken ayat ti Dios tignayennatayo nga agaramid iti naimbag kadagiti sabsabali. Ingngudo ni Kabsat Pierce ti palawagna babaen ti panangkomendarna kadagiti estudiante: “Agar-aramidkayon iti naimbag. Mangnamnamakami nga itultuloyyo a subadan ti kinaimbag ti Dios babaen iti nasayaat nga aramidyo iti sadinoman a pangibaonan ni Jehova a Dios kadakayo.”

Ni Michael Burnett, dati a misionero a nabiit pay a natudingan kas instruktor iti Gilead, ti simmaruno a nangipalawag iti “Pagbalinenyo Dayta kas Bedbed iti Muging iti Baet Dagiti Matayo.” Kas iti “bedbed iti muging” iti nagbaetan ti mata dagiti Israelita, masapul a laglagipenda ti namilagruan a panangispal kadakuada ni Jehova manipud Egipto. (Ex. 13:16) Nabalakadan dagiti  estudiante a laglagipenda ti aglaplapusanan nga instruksion nga inawatda iti Eskuelaan ti Gilead ket ibilangda dayta kas bedbed iti nagbaetan dagiti matada. Impaganetget ni Kabsat Burnett a masapul nga agbalinda a napakumbaba ken naemma ken iyaplikarda dagiti prinsipio ti Biblia no risutenda ti aniaman a dida pagkikinnaawatan kadagiti padada a misionero ken iti sabsabali.​—Mat. 5:23, 24.

Imbitla ni Mark Noumair, a nabayagen nga instruktor iti Gilead, ti palawag nga “Ania a Kanta ti Kantaenda Maipapan Kenka?” Idi nagkauna a panawen, kaugalianda a rambakan ti panagballigida iti gubat babaen iti kanta. Ipakita ti maysa kadagita a kanta nga awan ti panagregget dagiti tribu da Ruben, Dan, ken Aser, ngem naidayaw ti tribu ni Zabulon gapu iti panagsakripisiona. (Uk. 5:16-18) Kas kadagiti liriko ti kanta, maammuanto ti sabsabali dagiti aramid ti tunggal Kristiano. Lagipento ni Jehova ti kinaregta ti maysa iti trabaho ti Dios ken ti kinasungdo kadagiti nateokratikuan nga urnos ket agserbi  dayta a nasayaat nga ulidan kadagiti kakabsatna. Bayat a dadduma iti kongregasion imdenganda ti piguratibo a kanta a pinutar dagiti tignaytayo, magutugotda met a mangtulad iti dayta a naimbag a pagwadan.

Kas paset ti pannakasanayda iti Gilead, nangbusbos ti maika-124 a klase iti agarup 3,000 nga oras iti panangasaba. Iti tema a “Panagpaidalan iti Nasantuan nga Espiritu,” insalaysay dagiti estudiante kenni Sam Roberson iti Departamento ti Teokratiko nga Eskuelaan ti sumagmamano a kapadasanda iti tay-ak, ken indemostrada ti dadduma. Dagitoy a makaparegta a kapadasan ket sinaruno ti interbiu nga indauluan ni Patrick LaFranca, miembro ti Komite ti Sanga iti Estados Unidos, kadagiti nagturpos iti Gilead nga agserserbi itan iti nadumaduma a pagilian. Inapresiar dagiti estudiante dagiti praktikal a balakad nga impaay dagitoy a kakabsat.

Impaay ni Anthony Morris, kameng ti Bagi a Manarawidwid, ti maudi a palawag a “Laglagipenyo a Temporario Dagiti Bambanag a Makita.” Balakadannatayo ti Kasuratan nga ipamaysatayo ti isiptayo kadagiti bendision nga itden ni Jehova iti masanguanan imbes nga iti aniaman a temporario a pakarigatan a mabalin a mapaspasarantayo ita. (2 Cor. 4:16-18) Ti nakaro a kinapanglaw, kinaawan ti hustisia, panangidadanes, sakit, ken ipapatay ket talaga a paspasamak a makitkitatayo ita. Mabalin a mapasaran dagiti misionero dagitoy a nakalkaldaang a kasasaad. Ngem ti pananglaglagip a temporario dagitoy ket makatulong kadatayo a mangsalimetmet iti naespirituan a kinatimbengtayo ken manginanama kenni Jehova.

Nagpatingga ti programa idi amin a nagturpos nagtugawda iti entablado bayat a nagimdengda iti maudi a pammalakad ni Kabsat Lett. Pinaregtana ida a saanda a sumuko ket kinunana: “Makapagibturtayo ken masalimetmetantayo ti kinatarnawtayo no tulongannatayo ni Jehova.” Indagadagna kadagiti kabbaro a misionero nga agbalinda a kas kadagiti dudon, a determinadoda nga agtultuloy nga agserbi kenni Jehova ken agtalinaed a naregta, nasungdo, ken natulnog iti agnanayon.

[Kahon iti panid 30]

ESTADISTIKA TI KLASE

Bilang dagiti pagilian a nairepresentar: 7

Bilang dagiti pagilian a pakaibaonan: 16

Bilang dagiti estudiante: 56

Promedio nga edad: 33.8

Promedio a tawen iti kinapudno: 18.2

Promedio a tawen iti amin-tiempo a ministerio: 13.8

[Ladawan iti panid 31]

Maika-124 a Klase a Nagturpos iti Watchtower Bible School of Gilead

Iti listaan iti baba, nanumeruan dagiti intar manipud iti sango nga agpalikud, ken iti kada intar, nailista dagiti nagan manipud iti kannigid nga agpakannawan.

(1) Nicholson, T.; Main, H.; Senge, Y.; Snape, L.; Vanegas, C.; Pou, L. (2) Santana, S.; Oh, K.; Lemaitre, C.; Williams, N.; Alexander, L. (3) Woods, B.; Stainton, L.; Huntley, E.; Alvarez, G.; Cruz, J.; Bennett, J. (4) Williamson, A.; González, N.; Zuroski, J.; Degandt, I.; May, J.; Diemmi, C.; Tavener, L. (5) Lemaitre, W.; Harris, A.; Wells, C.; Rodgers, S.; Durrant, M.; Senge, J. (6) Huntley, T.; Vanegas, A.; Pou, A.; Santana, M.; Bennett, V.; Tavener, D.; Oh, M. (7) Zuroski, M.; Rodgers, G.; Diemmi, D.; Nicholson, L.; Alvarez, C.; Snape, J. (8) Harris, M.; González, P.; Main, S.; Woods, S.; Stainton, B.; Williamson, D.; Durrant, J. (9) Cruz, P.; Degandt, B.; Williams, D.; Wells, S.; Alexander, D.; May, M.

[Ladawan iti panid 32]

Masarakan ti Eskuelaan ti Gilead iti Watchtower Educational Center