Ti Gobierno a Pagarian ti Dios​—Agturturayen

“Kasano a makapagtutunos ti nagadu a pagilian, a nagduduma ti kultura ken kinarang-ayda? Naikuna a ti iraraut ti taga sabali a planeta ti kakaisuna a mamagkaykaysa iti sangatauan.”​—The Age, periodiko ti Australia.

IRARAUT ti taga sabali a planeta? Nupay ditay sigurado no dayta ti mamagkaykaysa kadagiti amin a nasion ditoy daga, ibaga ti padto ti Biblia nga adda mapaspasungadan a krisis a mamag-aliansa kadagiti nasion ti lubong. Ket pudno a dagiti karkarna a puersa ti mangyeg iti dayta a krisis.

Ni Ari David ti nagkauna nga Israel impadtona daytoy a mapagteng iti lubong. Babaen ti panangipaltiing ti Dios, insuratna: “Ti ar-ari ti daga agtakderda ket dagiti met laeng nangato nga opisial naguurnongda a nagmaymaysa maibusor ken Jehova ken maibusor iti daydiay pinulotanna, a kunkunada: ‘Pugsatentayo dagiti pagparautda ket dagiti paggalutda ibellengtayo iti adayo kadatayo!’” (Salmo 2:2, 3; Aramid 4:25, 26) Imutektekanyo ta dagiti agturay iti lubong agkaykaysada maibusor ken ni Jehova, ti Namarsua iti uniberso, ken iti daydiay pinulotanna, wenno dinutokanna nga Ari, ni Jesu-Kristo. Kasano a mapasamak dayta?

Sigun iti kronolohia ti Biblia ken kaitungpalan dagiti padto, idi 1914, naipasdek idiay langit ti Pagarian ti Dios ket ni Jesu-Kristo ti naitrono kas Ari. * Iti dayta a tiempo, maymaysa ti kapanunotan dagiti nasion ti lubong. Imbes nga agpasakupda  iti soberania ti kaipaspasdek a Pagarian ti Dios, nagiinnartapda iti bileg​—ti Dakkel a Gubat, wenno Sangalubongan a Gubat I.

Ania ti panangmatmat ni Jehova a Dios iti kasta a tignay dagiti natauan nga agtuturay? “Daydiay mismo a situtugaw iti langlangit agkatawanto; ni met laeng Jehova aramidennanto ida a mauy-uyaw. Iti dayta a tiempo isu agsaonto kadakuada iti ungetna ket iti nabara a rurodna riribukennanto ida.” Kalpasanna, kunaen ni Jehova iti Anakna, ti napulotan nga Ari ti Pagarian: “Agkiddawka kaniak, tapno maitedko ti nasnasion kas tawidmo ken dagiti ungto ti daga kas bukodmo a sanikua. Rumekemto ida babaen iti setro a landok, burakemto ida a kasla maysa a basehas ti agdamdamili.”​—Salmo 2:4, 5, 8, 9.

Daytoy a naan-anay a panangparmek kadagiti bumusbusor a nasion babaen ti setro a landok ket mapasamakto inton Armagedon, wenno Har–Magedon. Ti maudi a libro ti Biblia, ti Apocalipsis, deskribirenna daytoy a makapikapik a pasamak kas ti “gubat ti naindaklan nga aldaw ti Dios a Mannakabalin-amin,” a pakaurnongan dagiti “ar-ari iti intero a mapagnaedan a daga.” (Apocalipsis 16:14, 16) Iti sidong ti impluensia dagiti demonio, agkaykaysanto kamaudiananna dagiti nasion ti daga buyogen ti maymaysa a panggep​—tapno makigubatda iti Dios a Mannakabalin-amin.

Napartak nga umad-adani ti tiempo inton sangsangkamaysa a makigubat dagiti tattao maibusor iti kinasoberano ti Dios. Ngem awan iyegna a pagimbagan ti “panagkaykaysada.” Imbes ketdi, dayta ti tanda a dumtengen ti nabayagen a maur-uray a talna para iti sangatauan. Kasano? Iti dayta a maudi a gubat, ti Pagarian ti Dios “rumekennanto ken pagpatinggaenna amin dagitoy a pagarian [ti lubong], ket dayta agtalinaedto agingga kadagiti tiempo a di nakedngan.” (Daniel 2:44) Ti Pagarian ti Dios, saan ket a ti aniaman nga organisasion ti tao, isu ti gobierno a mangyeg iti sangalubongan a talna a tartarigagayan ti tao.

Ti Kangrunaan nga Administrador iti Gobierno a Pagarian

Isu dayta ti Pagarian nga ikarkararag dagiti napasnek a tattao, nga agkunkuna: “Umay koma ti pagariam. Maaramid koma ti pagayatam, kas sadi langit, kasta met iti daga.” (Mateo 6:10) Imbes a maysa laeng a kasasaad ti puso, ti Pagarian ti Dios ket maysa a pudno a gobierno a nakaskasdaaw dagiti nagapuananna sipud idi naipasdek idiay langit idi 1914. Usigentayo ti sumagmamano a kangrunaan a makagapu a mangipakita a naan-anay nga agtigtignay ita ti Pagarian ti Dios.

Umuna iti amin, addaan dayta iti nabileg ken episiente nga ehekutibo a sanga nga idadauluan ti naitrono nga Ari, ni Jesu-Kristo. Idi 33 K.P., ni Jehova a Dios insaadna ni Jesu-Kristo kas Ulo ti kongregasion Kristiano. (Efeso 1:22) Mangidadaulo ni Jesus sipud idin, a mangipakpakita iti abilidadna a mangituray. Kas pagarigan, idi adda nakaro a bisin idiay Judea idi umuna a siglo, dagus a nagtignay ti kongregasion Kristiano tapno matulongan dagiti miembrona. Naorganisar ti trabaho a panangsaranay, ket naibaon da Bernabe ken Saulo manipud Antioquia tapno sumaranay.​—Aramid 11:27-30.

Dakdakkel ti namnamaentayo ken ni Jesu-Kristo ita ta agtigtignayen ti gobierno a Pagarian. Kada mapasamak ti didigra​—ginggined, bisin, layus, allawig, bagyo, wenno panagbettak ti bulkan​—agtignay a dagus ti kongregasion Kristiano dagiti Saksi ni Jehova tapno matulongan dagiti kapammatianda a naapektaran. Kas pagarian,  idi nadidigra ti El Salvador gapu iti ginggined idi Enero ken Pebrero 2001, adda dagiti panangsaranay a nayurnos kadagiti amin a paset ti pagilian, ken addada timmulong a grupo dagiti Saksi ni Jehova manipud Canada, Guatemala, ken Estados Unidos. Napartak a naibangon manen ti tallo kadagiti lugar a pagdayawanda agraman ti nasurok a 500 a pagtaengan.

Dagiti Iturayan ti Gobierno a Pagarian ti Dios

Sipud naipasdek idi 1914 ti nailangitan a Pagarian ti Dios, ur-urnongen ken or-organisarenna dagiti iturayanna a tattao iti sangalubongan. Daytoy ket kas kaitungpalan ti naisangsangayan a padto a nairekord iti Isaias: “Mapasamakto iti kamaudianan a paset dagiti aldaw a ti bantay ti balay ni Jehova [ti naitan-ok a pudno a panagdayaw] sititibkerto ti pannakaipasdekna a nangatngato ngem iti tapaw ti bambantay, . . . ket amin dagiti nasion agayusdanto nga agturong iti dayta.” Ti padto ipakitana nga “adu nga ili” ti sumang-at ken mangipangag kadagiti bilin ken linteg ni Jehova.​—Isaias 2:2, 3.

Gapu iti daytoy nga aktibidad, timmaud ti kapatgan nga organisasion iti moderno a panawen​—maysa nga internasional a panagkakabsat ti nasurok nga 6,000,000 a Kristiano iti nasurok 230 a pagilian ditoy daga. Kadagiti internasional a kombension dagiti Saksi ni Jehova, masansan a masdaaw dagiti tattao a makapaliiw iti ayat, talna, ken panagkaykaysa iti nagbabaetan dagiti dadakkel a gunglo dagiti tattao, ket saan a lapped ti nagduduma a nasionalidad, kultura, ken pagsasaoda. (Aramid 10:34, 35) Saankayo kadi nga umanamong a masapul nga epektibo, natalged, ken pudno nga agtigtignay ti maysa a gobierno tapno mapagkaykaysana ti ginasut nga etniko a grupo buyogen ti talna ken panagtutunos?

Ti Pagarian ti Dios ken ti Panangisuro

Adda dagiti pagalagadan ti amin a gobierno a nasken nga annuroten dagiti umilina, ken amin nga agtarigagay nga agbiag iti sidong dayta a gobierno masapul nga annurotenda dagita a pagalagadan. Umasping iti dayta, ti Pagarian ti Dios ket addaan kadagiti pagalagadan a masapul nga annuroten dagiti amin a makakualipikar kas masakupanna. Ngem sigurado a dakkel a trabaho ti kalikaguman ti panangtulong iti nakaad-adu a tattao nga addaan iti nadumaduma a nalikudan tapno annurotenda ti maymaysa nga estandarte. Adtoy ngarud ti sabali pay a mangpaneknek iti pudno a kaadda ti Pagarian ti Dios ​—ti epektibo a programana a panangisuro, a mangdanon ken mangbalbaliw saan laeng nga iti panunot no di ket iti puso.

Kasano a ti gobierno a Pagarian maitungpalna daytoy a makakarit a trabaho? Babaen ti panangtulad iti inaramid dagiti apostol a panangasaba iti “binalaybalay” ken panangisuro iti Sao ti Dios iti tunggal indibidual. (Aramid 5:42; 20:20) Kasano kaepektibo daytoy a kita ti panangisuro? Ni Jacques Johnson, maysa a Katoliko a padi, nagsurat iti maysa a linawas a pagiwarnak ti Canada maipapan iti panangikagumaanna a mangguyugoy iti maysa a babai tapno saan a makipagadal kadagiti Saksi ni Jehova. “Pinagpanunotnak dayta ket nabigbigko nga awanen  ti maaramidak,” kinunana. “Naammuak nga iti sumagmamano a bulan, adda dagiti Saksi ni Jehova a babbai a sisisinged a nakilangen iti daytoy agkabannuag nga ina a di makaruar iti balayna. Tinulongan ken ginayyemda, a nangipasdekda iti makagunggona a kinasinged kenkuana. Di nagbayag, nagbalin isuna nga aktibo a miembro ti relihionda ket awanen ti maaramidak a manglapped iti dayta.” No kasano a nagutugot ti puso daytoy a dati a Katoliko babaen ti mensahe ti Biblia nga insuro dagiti Saksi ni Jehova ken babaen ti Nakristianuan a konduktada, kasta met ti pannakagutugot ti puspuso ti minilion iti sangalubongan.

Daytoy a kita ti panangisuro​—panangisuro iti Pagarian​—ket naipamaysa iti Biblia, a maitandudo dagiti moral a prinsipio ken pagalagadanna. Isurona dagiti tattao a mangayat ken mangpadayaw iti maysa ken maysa aniaman ti nalikudanda. (Juan 13:34, 35) Tulonganna met dagiti tattao a mangipangag iti daytoy a balakad: “Dikay agpaisukogen iti daytoy a sistema ti bambanag, no di ket agbalbaliwkayo babaen ti panangpabaroyo iti panunotyo, tapno mapaneknekanyo iti bagbagiyo ti naimbag ken makaay-ayo ken naan-anay a pagayatan ti Dios.” (Roma 12:2) Babaen ti panangiwaksida iti dati a panagbiagda ken siraragsak a panangannurotda kadagiti linteg ken prinsipio ti gobierno a Pagarian, minilion ita ti nakasarak iti talna ken ragsak ken naraniag a masanguanan.​—Colosas 3:9-11.

Ti maysa a naisangsangayan a tulong iti pannakaragpat daytoy sangalubongan a panagkaykaysa isu daytoy magasin a Ti Pagwanawanan. Babaen dagiti organisado a metodo ti panangipatarus ken kagawaan a panagipablaak iti adu a lenguahe, dagiti kangrunaan nga artikulo Ti Pagwanawanan ket aggigiddan a maipabpablaak iti 135 a lenguahe, ken nasurok a 95 porsiento kadagiti agbasbasa iti dayta iti sangalubongan ti mabalin nga aggigiddan a mangadal iti dayta iti bukodda a lenguahe.

Maysa a Mormon a mannurat ti nangilista kadagiti naisangsangayan a panagballigi dagiti misionero a saanna a karelihion. Inlistana Ti Pagwanawanan ken Agriingkayo!, nga impablaak dagiti Saksi ni Jehova, kas ti kasayaatan a magasin iti panagebangelio ket kinunana: “Awan ti makaibaga nga iparparegta Ti Pagwanawanan ken Agriingkayo! ti panagpampamayan​—imbes ketdi, suksukayen dagita ti kinaridam a manmano a nakitak kadagiti dadduma a narelihiosuan a publikasion. Makapabang-ar dagiti naibatay iti pasamak, nasirarak a naimbag, ken napateg a linaon Ti Pagwanawanan ken Agriingkayo!”

Aglaplapusanan dagiti pammaneknek a talaga nga agtigtignayen a naan-anay ti Pagarian ti Dios. Dagiti Saksi ni Jehova siraragsak ken sireregta nga iranranudda “daytoy naimbag a damag ti pagarian” kadagiti kaarrubada, nga aw-awisenda ida nga agpasakup iti Pagarian. (Mateo 24:14) Makaay-ayo kadi kadakayo dayta a namnama? Mabalinyo a tagiragsaken dagiti bendision iti pannakitimpuyog kadagidiay sinursuruan ti Pagarian ken mangikagkagumaan nga agbiag maitunos kadagiti pagalagadanna. Kanayonanna, mabalinyo nga aprobetsaren ti namnama nga agbiag iti sidong ti panangituray ti Pagarian iti naikari a baro a lubong a sadiay “agtaeng ti kinalinteg.”​—2 Pedro 3:13.

[Footnote]

[Ladawan iti panid 4, 5]

Idi 1914, nagdadangadang dagiti nasion iti maysa a sangalubongan a gubat

[Dagiti Ladawan iti panid 6]

Ti boluntario a trabaho a panangsaranay paneknekanna ti panagtignay ti Nakristianuan nga ayat

[Ladawan iti panid 7]

Dagiti Saksi ni Jehova iti sangalubongan mabembenepisiaranda iti maymaysa a programa a panangisuro