Salsaludsod Dagiti Agbasbasa

Ania ti kayat a sawen ni Jesus idi kinunana kadagiti adalanna: “Nangrugi a makitak a ni Satanas natnagen a kas kimat manipud langit”?

Nangpili ni Jesus iti 70 nga adalan, ket “imbaonna ida a sagdudua nga umun-una ngem isu iti tunggal siudad ken lugar nga umayannanto.” Idi nagsubli dagiti 70 nga adalan, naragsakda gapu iti naballigi a misionda. “Apo, uray dagiti sairo naipasakupda kadakami babaen ti panagusar iti naganmo,” kinunada. Iti dayta a gundaway, kinuna ni Jesus: “Nangrugi a makitak a ni Satanas natnagen a kas kimat manipud langit.”​—Lucas 10:1, 17, 18.

Iti damo, agparang a nalpasen ti pasamak a tuktukoyen ni Jesus. Ngem 60 a tawen kalpasan nga insawang ni Jesus dagita a sasao, ti lakayen nga apostol a ni Juan inaramatna ti umasping a sasao idi insuratna: “Naitapuak ti dakkel a dragon, ti kadaanan a serpiente, daydiay naawagan iti Diablo ken Satanas, a mangyaw-awan iti intero a mapagnaedan a daga; isu naitapuak iti daga, ket dagiti anghelna naitapuakda a naikanunong kenkuana.”​—Apocalipsis 12:9.

Idi insurat ni Juan dagita a sasao, agnanaed pay laeng ni Satanas idiay langit. Kasanotay nga ammo? Ti Apocalipsis ket libro ngamin ti padto, saan a historia. (Apocalipsis 1:1) Gapuna, idi kaaldawan ni Juan, saan pay a naitapuak ni Satanas ditoy daga. Kinapudnona, ipakita ti ebidensia a napasamak laeng dayta di nagbayag kalpasan a naitrono ni Jesus kas Ari iti Pagarian ti Dios idi 1914. *​—Apocalipsis 12:1-10.

Apay ngarud a kasla napasamaken ti pannakapaksiat ni Satanas idiay langit idi dinakamat ni Jesus dayta? Sigun iti dadduma nga eskolar, tubtubngaren ni Jesus dagiti adalanna gapu iti imparangarangda a di umiso a panagpannakkel. Patien dagiti eskolar a kasla kunkuna ni Jesus: ‘Nagballigikayo maibusor kadagiti demonio, ngem diyo ipagpannakkel dayta. Timmangsit ni Satanas, ket dayta ti pakaigapuan ti giddato a pannakapaayna.’

Saantayo a dogmatiko iti dayta a banag. Ngem agparang a makipagragragsak ni Jesus kadagiti adalanna ken tuktukoyenna ti masanguanan a pannakaabak ni Satanas. Ni Jesus ti ad-adda a makaammo iti nakaro a gura ti Diablo. Darepdepenyo ti rag-o ni Jesus apaman a nangngegna a dagiti mannakabalin a demonio naipasakupda kadagiti imperpekto nga adalanna! Dayta a pannakaabak dagiti demonio ket panirpatan laeng iti aldaw inton ni Jesus, kas Miguel nga arkanghel, makigubat ken ni Satanas ket itapuakna ditoy daga manipud langit.

Idi kinuna ni Jesus a nakitana ni Satanas a “natnagen,” nalawag nga ipagpaganetgetna a sigurado ti pannakaabak ni Satanas. Umasping dayta iti dadduma a padto ti Biblia a nangdakamat kadagiti masanguanan a pagteng a kasla ket napasamakdan. Kas pagarigan, imutektekanyo ti panaglalaok dagiti sasao a mangipamatmat iti naglabas ken masanguanan a pasamak mainaig iti padto maipapan iti Mesias a nadakamat iti Isaias 52:13–53:12. Agparang nga inyebkas ni Jesus ti panagtalekna a sigurado a maikkat ni Satanas idiay langit a maitunos iti panggep ni Amana. Sigurado met ni Jesus nga iti panawen nga inkeddeng ti Dios, maigarangugongto ni Satanas ken dagiti demoniona ket inton agangay, naan-anayton a madadael.​—Roma 16:20; Hebreo 2:14; Apocalipsis 20:1-3, 7-10.

[Footnote]