Talaga a Maseknan Kadakayo ti Dios

NATURAL laeng nga agpatulongtayo iti Dios no adda pakarigatantayo. Ngamin, “naindaklan ken naruay iti pannakabalin; ti pannakaawatna di maibinsabinsa.” (Salmo 147:5) Isu ti kangrunaan a makatulong tapno mapagballigiantayo dagiti parikuttayo. Maysa pay, aw-awisennatayo ti Biblia nga ‘iparukpoktayo ti pusotayo’ iti sanguananna. (Salmo 62:8) Apay ngarud a nagadu ti mangipagarup a saan a sungbatan ti Dios dagiti kararagda? Kayatna kadi a sawen a saan a maseknan ti Dios?

Imbes nga agdarasudos a mangpabasol iti Dios gapu iti kasla saanna a panagtignay, lagipenyo daydi kinaubingyo. No saan a dagus a patgan dagiti dadakkelyo ti tunggal kiddawyo, ibagayo kadi a didakay ay-ayaten? Kasta ti marikna ti adu nga ubbing. Ngem idi dimmakkelkayo, naamirisyo a mayebkas ti ayat iti adu a pamay-an ken saan a talaga a naayat a tignay no itulok ti amin a kiddaw ti ubing.

Kasta met, no saan a kanayon a sungbatan ni Jehova dagiti kararagtayo iti pamay-an a namnamaentayo, dina kayat a sawen a binaybay-annatayo. Iti kinapudnona, iti adu a pamay-an, ipakpakita ti Dios ti pannakaseknanna kadatayo.

“Babaen Kenkuana Addaantayo ti Biag”

Umuna iti amin, ti Dios ti makagapu nga “addaantayo ti biag ken aggunaytayo.” (Aramid 17:28) Nabatad a siaayat a maseknan ti Dios kadatayo agsipud ta impaayannatayo iti biag!

Kanayonanna, ipapaay ni Jehova ti kasapulantayo tapno agtultuloytayo nga agbiag. Mabasatayo: “Pagtubuenna dagiti berde a ruot maipaay kadagiti animal, ken mulmula nga usaren ti sangatauan, tapno mangparnuay iti taraon manipud iti daga.” (Salmo 104:14) Iti kinapudnona, ti Namarsua kadatayo saanna laeng nga ipaay dagiti kangrunaan a kasapulan iti biag. Sipaparabur a mangipapaay “kadagiti tudo manipud langit ken kadagiti nabunga a panawen, a pinunnona a naan-anay dagiti puso[ta]yo iti taraon ken ragsak.”​—Aramid 14:17.

Ngem mabalin a panunoten ti dadduma, ‘No ipatpategnatayo unay ti Dios, apay nga ipalpalubosna nga agsagabatayo?’ Ammoyo kadi ti sungbat dayta a saludsod?

Ti Dios Kadi ti Mapabasol?

Ti tao met laeng ti mapabasol iti adu a sagsagabaenna. Kas pagarigan, adda dagiti pagaammo a napeggad unay nga aktibidad. Kaskasdi, makiraman dagiti tattao iti seksual nga imoralidad, agbartek ken agdrogada, agsigarilioda, makipasetda kadagiti napeggad nga ay-ayam, napartak unay ti panagmanehoda, ken dadduma pay. No agresulta iti panagsagaba dagiti kasta nga aramid, siasino ti mapabasol? Ti Dios wenno daydiay nagtignay a simamaag? Kuna ti naipaltiing a Sao ti Dios: “Dikay payaw-awan: Ti Dios saan a maysa a marabrabak. Ta aniaman nga imulmula ti maysa a tao, daytoyto met ti apitenna.”​—Galacia 6:7.

Kanayonanna, masansan nga agririnnanggas dagiti tattao. No makigubat ti maysa a nasion, sigurado a saan a ti Dios ti mapabasol iti resultana a panagsagaba. No ti kriminal rautenna ti padana nga umili, ti Dios kadi ti mapabasol no adda madangran wenno mapapatay? Siempre saan! No ti maysa a diktador irurumen, tutuoken, ken papapatayna dagiti masakupanna, rumbeng kadi a pabasolentayo ti Dios? Saan la ketdi a nainkalintegan dayta.​—Eclesiastes 8:9.

Ngem komusta met dagiti agsagsagaba iti kinapanglaw wenno mabisbisinan? Ti Dios kadi ti mapabasol? Saan. Ti daga a pagtaengantayo mangipapaay iti nawadwad a taraon para iti amin. (Salmo 10:2, 3; 145:16) Nasaknap ti bisin ken kinakurapay gapu iti saan a padapada a pannakaiwaras ti nawadwad a taraon manipud iti Dios. Ket saan a marisut dayta a parikut gapu iti kinaagum dagiti tattao.

 Ti Kangrunaan a Makagapu

Ngem siasino ti mapabasol no adda agsakit wenno matay gapu iti panaglakay? Pagsiddaawanyo kadi a maammuan a saan met a ti Dios ti mapabasol iti dayta? Saan a pinarsua ti Dios ti tao tapno lumakay ken matay.

Idi a ti umuna a pagassawaan, da Adan ken Eva, naikabilda iti minuyongan ti Eden, inikkan ida ni Jehova iti gundaway nga agbiag nga agnanayon iti maysa a paraiso a daga. Ngem nalawag a kayatna a mapunno ti daga kadagiti tattao a mangapresiar iti tawidda. Gapuna, adda kondision ti Dios tapno matagiragsakda dagiti namnama nga agur-uray kadakuada. Agtalinaed da Adan ken Eva iti Paraiso no la ket ta agtultuloyda nga agpasakup iti naayat a Namarsua kadakuada.​—Genesis 2:17; 3:2, 3, 17-23.

Makapaladingit ta nagrebelde da Adan ken Eva. Impangag ni Eva ni Satanas a Diablo. Nagulbod ni Satanas kenkuana ken impasimudaagna nga adda naimbag a banag nga ipapaidam kenkuana ti Dios. Pinili ngarud ni Eva ti agbalin nga agwaywayas ket pinadasna ti ‘agbalin a kas iti Dios, a makaammo iti naimbag ken dakes.’ Kimmanunong ni Adan iti panagrebeldena.​—Genesis 3:5, 6.

Idi naaramidda dayta a panagbasol, impakita da Adan ken Eva a saanda a maikari nga agbiag nga agnanayon. Sinagabada ti makadidigra a resulta ti basolda. Kimmapuy ti pigsa ken salun-atda, agingga a natayda. (Genesis 5:5) Ngem adda pay nakarkaro nga imbunga ti panagrebeldeda. Sagsagabaentayo pay laeng dagiti epekto ti basol da Adan ken Eva. Insurat ni apostol Pablo: “Babaen iti maysa a tao [ni Adan] simrek ti basol iti lubong ken ti ipapatay babaen iti basol, ket iti kasta ti ipapatay nagsaknap iti amin a tattao agsipud ta nagbasolda amin.” (Roma 5:12) Nabatad, gapu iti panagrebelde da Adan ken Eva, nagwaras ti basol ken ipapatay iti amin a tattao a kas iti makapapatay a sakit.

Ti Kabilgan a Pammaneknek a Maseknan ti Dios

Kayatna kadi a sawen nga awanen ti namnama dagiti tattao a pinarsua ti Dios? Adda, ket mainaig dayta ti kabilgan a pammaneknek a maseknan kadatayo ti Dios. Buyogen ti dakkel a panagsakripisio, nangipaay ti Dios iti pamay-an tapno masubbot ti sangatauan manipud iti basol ken ipapatay. Ti pangsubbot isu ti perpekto a biag ni Jesus, a situtulok a naidiaya agpaay kadatayo. (Roma 3:24) Gapuna,  insurat ni apostol Juan: “Ti Dios inayatna ti lubong iti kasta unay isu nga intedna ti bugbugtong nga Anakna, tapno tunggal maysa a mangwatwat iti pammati kenkuana saan koma a madadael no di ket maaddaan iti agnanayon a biag.” (Juan 3:16) Kas resulta daytoy a naisangsangayan nga ebkas ti ayat, addaantayo manen iti namnama nga agbiag nga agnanayon. Insurat ni Pablo kadagiti taga Roma: “Babaen ti maysa nga aramid a panangpalinteg imbungana iti amin a kita ti tattao ti pannakaideklarada a nalinteg maipaay iti biag.”​—Roma 5:18.

Masiguradotayo nga iti tiempo nga intuding ti Dios, awanton ti panagsagaba ken ipapatay iti planeta a Daga. Imbes ketdi, agrairanto dagiti kasasaad a nasirmata iti libro nga Apocalipsis: “Adtoy! Ti tolda ti Dios adda iti sangatauan, ket isu makipagnaedto kadakuada, ket isudanto dagiti ilina. Ket ti Dios a mismo addanto kadakuada. Ket punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot. Ti immuna a bambanag naglabasdan.” (Apocalipsis 21:3, 4) Nalabit nga ibagam, ‘Mabalin a natayakton inton dumteng dayta a tiempo.’ Ngem mabalin a makitamto dayta. Ken uray no matayka, mapagungarnaka ti Dios. (Juan 5:28, 29) Dayta ti panggep ti Dios para kadatayo, ket isu dayta ti mapasamak. Saan ngarud nga umiso a panunoten a saan a maseknan ti Dios kadatayo!

“Umadanikayo iti Dios”

Makaliwliwa a maammuan a nangyussuat ti Dios iti agpaut, permanente a solusion iti panagsagaba ti sangatauan. Ngem komusta ngay iti agdama? Ania ti mabalintay nga aramiden no matay ti maysa a patpatgentayo wenno agsakit ti anaktayo? Bueno, saan pay a tiempo tapno ikkaten ti Dios ti sakit ken ipapatay. Ipasimudaag ti Biblia a masapul a palabsentayo pay ti bassit a tiempo sakbay ti naan-anay a solusion. Ngem saannatayo a baybay-an ti Dios nga awanan iti tulong. Kinuna ni adalan a Santiago: “Umadanikayo iti Dios, ket isu umadaninto kadakayo.” (Santiago 4:8) Wen, aw-awisennatayo ti Namarsua a pasingedentayo ti relasiontayo kenkuana. Dagidiay mangaramid iti kasta ti kanayon a makarikna iti tulongna uray kadagiti karikutan a kasasaad.

Kasanotayo nga umadani iti Dios? Kasta met laeng ti inyimtuod ni Ari David agarup tallo a milenio ti napalabasen, a kunkunana: “O Jehova, . . . siasinonto ti agtaeng iti nasantuan a bantaymo?” (Salmo 15:1) Sinungbatan ni David ti bukodna a saludsod idi intuloyna: “Daydiay magmagna nga awan pagkuranganna ken mangan-annurot iti kinalinteg ken agsasao iti kinapudno iti pusona. Isu saan a nangpardaya babaen iti dilana. Iti kaduana awan inaramidna nga aniaman a dakes.” (Salmo 15:2, 3) Iti sabali a pannao, aw-awisen ni Jehova dagidiay mangsalimetmet iti kurso ti panagbiag a linaksid da Adan ken Eva. Ti Dios umadani kadagidiay mangaramid iti pagayatanna.​—Deuteronomio 6:24, 25; 1 Juan 5:3.

Kasanotayo a maaramid ti pagayatan ti Dios? Nasken nga adalentayo no ania ti “nasayaat ken makaay-ayo iti imatang ti Manangisalakantayo, ti Dios,” sa agtignaytayo a maitunos iti dayta. (1 Timoteo 2:3) Ramanenna dayta ti pananggun-od iti umiso a pannakaammo iti Sao ti Dios, ti Biblia. (Juan 17:3; 2 Timoteo 3:16, 17) Saan laeng a ti panagbasa iti Biblia ti kasapulan. Nasken a tuladentayo dagiti Judio idiay Berea idi umuna a siglo a dimngeg iti panangasaba ni Pablo. Maipapan kadakuada, mabasatayo: “Inawatda ti sao buyogen ti napalalo unay a kinagagar ti panunot, a siaannad a suksukimatenda ti Kasuratan iti inaldaw no agpayso dagitoy a banag.”​—Aramid 17:11.

Kasta met ita, ti naan-anay a panagadal iti Biblia pabilgenna ti pammatitayo iti Dios ken tulongannatayo a maaddaan iti nasinged a relasion kenkuana. (Hebreo 11:6) Tulongannatayo met a mangtarus a naimbag no kasano ti pannakilangen ni Jehova iti sangatauan​—a saan laeng a temporario a pagimbagan no di ket napaut a pagimbagan dagidiay umiso ti pagannayasanda.

Utobenyo dagiti ebkas ti sumagmamano a Kristiano nga addaan iti nasinged a relasion iti Dios. “Ipatpategko unay ni Jehova, ken adu ti pagyamanak kenkuana,” kuna ti agtawen iti  16 a ni Danielle. “Pinaraburannak kadagiti naayat a nagannak a napudno ti panagayatda kenkuana ken nangisuro kaniak maitunos iti Saona.” Maysa a Kristiano idiay Uruguay ti nangisurat: “Napno ti pusok iti apresasion, ken agyamyamanak ken ni Jehova gapu iti di kaikarian a kinamanangngaasi ken kinasingedna.” Aw-awisen ti Dios uray dagiti ubbing pay. Kuna ti agtawen iti pito a ni Gabriela: “Dakdakkel ti panagayatko iti Dios ngem iti aniaman nga adda iti lubong! Adda bukodko a Biblia. Pagay-ayatko ti makasursuro maipapan iti Dios ken iti Anakna.”

Ita, minilion a tattao iti sangalubongan ti naimpusuan nga umanamong iti salmista a nagkuna: “Ti iyaadani iti Dios naimbag kaniak.” (Salmo 73:28) Natulonganda a mangtaming kadagiti parikutda ita, ken addaanda iti natalged a namnama nga agbiag nga agnanayon iti Paraiso a daga. (1 Timoteo 4:8) Apay a diyo aramiden a kalatyo ti ‘umadani iti Dios’? Kinapudnona, naipanamnama kadatayo a ti Dios “saan nga adayo iti tunggal maysa kadatayo.” (Aramid 17:27) Wen, ti Dios talaga a maseknan kadakayo!

[Dagiti Ladawan iti panid 5]

Naiparangarang iti adu a wagas ti pannakaseknan kadatayo ti Dios

[Ladawan iti panid 7]

Uray dagiti ubbing mabalinda ti umadani iti Dios

[Dagiti Ladawan iti panid 7]

Iti agdama, tultulongannatayo ti Dios nga agibtur. Iti maitutop a tiempo, ikkatennanto ti sakit ken ipapatay