‘Inkayo ket Mangaramidkayo Kadagiti Adalan’

“Isuamin nga autoridad naiteden kaniak idiay langit ken ditoy daga. Inkayo ngarud ket mangaramidkayo iti ad-adalan.”​—MATEO 28:18, 19.

1, 2. (a) Ania ti impaannong ni Jesus kadagiti pasurotna? (b) Ania a salsaludsod ti mausig mainaig kadagiti bilin ni Jesus?

ITI maysa nga aldaw ti primavera idiay Israel idi 33 K.P., naummong dagiti adalan ni Jesus iti bantay ti Galilea. Dandani agpalangit ti napagungar nga Apoda, ngem adda pay napateg nga ibagana. Adda annongen nga italekna kadakuada. Ania nga annongen dayta? Ania ti tignay dagiti adalanna? Ken kasano a nairamantayo iti dayta nga annongen?

² Ti imbaga ni Jesus ket nairekord iti Mateo 28:18-20: “Isuamin nga autoridad naiteden kaniak idiay langit ken ditoy daga. Inkayo ngarud ket mangaramidkayo iti ad-adalan kadagiti tattao iti amin a nasion, a bautisaranyo ida iti nagan ti Ama ken ti Anak ken ti nasantuan nga espiritu, nga isuroyo kadakuada a tungpalenda ti amin a bambanag nga imbilinko kadakayo. Ket, adtoy! addaak kadakayo iti amin nga al-aldaw agingga iti panungpalan ti sistema ti bambanag.” Dinakamat ni Jesus ti maipapan iti “isuamin nga autoridad,” “amin a nasion,” “amin a bambanag,” ken “amin nga al-aldaw.” Dagiti bilinna mainaig kadagita nga uppat a nabagas a sasao pataudenna dagiti napateg a salsaludsod, a mabalin a gupgopen iti sasao nga apay? sadino? ania? ken kaano? Saggaysaentay nga usigen dagita a saludsod. *

“Isuamin nga Autoridad Naiteden Kaniak”

3. Apay a nasken a tungpalentayo ti bilin a mangaramid kadagiti adalan?

³ Umuna, apay a nasken a tungpalentayo ti bilin a mangaramid kadagiti adalan? Kinuna ni Jesus: “Isuamin nga autoridad naiteden kaniak idiay langit ken ditoy daga. Inkayo ngarud ket mangaramidkayo iti ad-adalan.” Ti sao a “ngarud” ipatuldona ti maysa a kangrunaan a rason no apay a masapul a tungpalentayo daytoy a bilin. Naited ngamin ti “isuamin nga autoridad” ken ni Jesus, ti nangipaulog iti dayta a bilin. Ania ti saklawen ti autoridadna?

4. (a) Ania ti saklawen ti autoridad ni Jesus? (b) Kasano a ti pannakaawattayo iti autoridad ni Jesus apektaranna ti panangmatmattayo iti bilin nga agaramid kadagiti adalan?

⁴ Adda autoridad ni Jesus iti kongregasionna, ket sipud idi 1914, adda autoridadna iti kaipaspasdek a Pagarian ti Dios. (Colosas 1:13; Apocalipsis 11:15) Ni Jesus ti arkanghel isu nga adda nailangitan a buyotna a buklen ti ginasgasut a milion nga anghel. (1 Tesalonica 4:16; 1 Pedro 3:22; Apocalipsis 19:14-16) Isu ti inautorisaran ni  Amana a mangtalipupos iti “isuamin a gobierno ken isuamin nga autoridad ken pannakabalin” a bumusor kadagiti nalinteg a pagalagadan. (1 Corinto 15:24-26; Efeso 1:20-23) Ti pannakabalin ni Jesus ket saan laeng nga agpaay kadagiti sibibiag. Isu pay ti “ukom dagiti sibibiag ken dagiti natay” ken inikkan ti Dios iti pannakabalin a mangpagungar kadagidiay naturogen ken patay. (Aramid 10:42; Juan 5:26-28) Mamatmatan la ketdi a kapatgan ti bilin Daydiay nakaitalkan ti kasta a nakadakdakkel nga autoridad. No kasta, siraraem ken sitatallugod nga agtulnogtayo iti bilin ni Kristo a ‘mangaramid kadagiti adalan.’

5. (a) Kasano a nagtulnog ni Pedro kadagiti sasao ni Jesus? (b) Ania a bendision ti inyeg ti panagtulnog ni Pedro kadagiti bilin ni Jesus?

⁵ Idi rugrugi ti ministeriona ditoy daga, iti naisangsangayan a pamay-an insuro ni Jesus kadagiti adalanna a mangyeg kadagiti bendision ti panangbigbig iti autoridadna ken panagtulnog kadagiti bilinna. Naminsan a kinunana ken ni Pedro, a maysa a mangngalap: “Ipanmo iti adalem, ket iwayatyo dagiti iketyo tapno makakalap.” Ammo ni Pedro nga awan ti makalap, isu a kinunana ken Jesus: “Mannursuro, iti agpatpatnag nagbannogkami ket awan ti naalami.” Ngem sipapakumbaba nga innayon ni Pedro: “Ngem gapu iti panangibagam ibabak dagiti iket.” Idi nagtulnog ni Pedro iti bilin ni Kristo, nakakalap iti “adu unay nga ikan.” Gapu iti ragsakna, ni Pedro “nagruknoy kadagiti tumeng ni Jesus, a kunkunana: ‘Adaywannak Apo, agsipud ta maysaak a managbasol a tao.’” Ngem simmungbat ni Jesus: “Isardengmo ti agbuteng. Manipud ita agkalapkan iti tattao a sibibiag.” (Lucas 5:1-10; Mateo 4:18) Ania ti maadaltayo iti dayta a salaysay?

6. (a) Maibatay iti salaysay ti milagro a pannakakalap kadagiti ikan, ania a kita ti panagtulnog ti kalikaguman ni Jesus? (b) Kasanotay a matulad ni Jesus?

⁶ Intalek ni Jesus kada Pedro, Andres, ken dadduma nga apostol ti annongen nga ‘agbalin a dumadaklis iti tattao,’ saan a sakbay, no di ket kalpasan daytoy panagdaklisda iti nakaad-adu nga ikan. (Marcos 1:16, 17) Nalawag, saan a kayat ni Jesus a basta agtulnogda kenkuana. Nangipaay iti makaguyugoy a rason no apay a nasken nga agtulnogda kenkuana. No kasano a nakakalapda iti adu nga ikan idi nagtulnogda iti bilin ni Jesus nga ibabada dagiti iketda, mangyeg met kadagiti dakkel a gunggona ti panagtulnogda iti bilin ni Jesus nga ‘agdaklisda iti tattao.’ Buyogen ti naan-anay a panagtalek, nagtulnog dagiti apostol. Kuna ti maudi a paset ti salaysay: “Insublida dagiti barangay iti daga, ket binaybay-anda ti amin a banag ket simmurotda kenkuana.” (Lucas 5:11) Ita, bayat a paregtaentayo dagiti dadduma a makiraman iti trabaho a panagaramid kadagiti adalan, tuladentayo ni Jesus. Ditay kayat a basta suroten dagiti tattao ti ibagatayo no di ket mangipaaytayo kadagiti makagutugot a rason no apay a nasken nga agtulnogda iti bilin ni Kristo.

Dagiti Makaguyugoy a Rason ken Umiso a Motibo

7, 8. (a) Ania dagiti dadduma a Nainkasuratan a rason no apay nga ikasaba ti Pagarian ken mangaramid kadagiti adalan? (b) Ania a teksto ti nangruna a mangtigtignay kadakayo nga agtultuloy a mangasaba? (Kitaenyo pay ti footnote.)

⁷ Gapu ta bigbigentayo ti autoridad ni Kristo, makipasettayo iti panangikasaba iti Pagarian ken panagaramid iti adalan. Aniada pay a Nainkasuratan a rason ti mabalintay a dakamaten kadagidiay kayattay a tignayen a makiraman kadagiti nasayaat nga aramid tapno makipasetda iti dayta a trabaho? Usigentayo dagiti sumaganad a kapaliiwan dagiti sumagmamano a matalek a Saksi manipud iti nadumaduma a pagilian, ket imutektekanyo no kasano a dagiti nadakamat a teksto suportaranda dagiti komentoda.

⁸ Ni Roy, a nabautisaran idi 1951: “Idi indedikarko ti biagko ken ni Jehova, inkarik nga agnanayon nga agserbiak kenkuana. Kayatko a salimetmetan ti karik.” (Salmo 50:14; Mateo 5:37) Ni Heather, a nabautisaran idi 1962: “No panunotek ti amin nga inaramid ni Jehova agpaay kaniak, kayatko nga ipakita ti panagyamanko babaen ti matalek a panagserbik kenkuana.” (Salmo 9:1, 9-11; Colosas 3:15) Ni Hannelore, a nabautisaran idi 1954: “Tunggal makiramantayo iti ministerio, adda dagiti anghel a mangsaranay kadatayo​—anian a pribilehio dayta!” (Aramid  10:30-33; Apocalipsis 14:6, 7) Ni Honor, a nabautisaran idi 1969: “Inton dumteng ti panangukom ni Jehova, diak kayat nga adda asinoman a kaarrubak a mabalin a mangibaga a nagliway ni Jehova ken dagiti Saksina, ket dida maibaga nga, ‘Awan met ti nangpakdaar kaniak!’” (Ezequiel 2:5; 3:17-19; Roma 10:16, 18) Ni Claudio, a nabautisaran idi 1974: “No mangaskasabatayo, addatayo iti ‘imatang ti Dios’ ken ‘maikuyog ken Kristo.’ Agasenyo! Bayat nga addatayo iti ministerio, tagtagiragsakentayo ti timpuyog dagiti kasingedan a Gagayyemtayo.”​—2 Corinto 2:17. *

9. (a) Kas ipalgak ti salaysay maipapan iti panagdaklis da Pedro ken ti dadduma nga apostol, ania koma ti umiso a motibo iti panagtulnog ken ni Kristo? (b) Ania ti umiso a motibo iti panagtulnog ita iti Dios ken ni Kristo, ken apay?

⁹ Ti salaysay maipapan iti nakaad-adu a nakalap nga ikan ipakitana met ti pateg ti umiso a motibo no apay nga agtulnog ken ni Kristo​—ti ayat. Idi kinuna ni Pedro “Adaywannak Apo, agsipud ta maysaak a managbasol a tao,” saan nga immadayo ni Jesus, wenno dina kinondenar ni Pedro iti aniaman a basol. (Lucas 5:8) Ni Jesus dina binabalaw ni Pedro idi kiniddaw ti apostol nga adaywanna. Imbes ketdi, sidudungngo a kinuna ni Jesus: “Isardengmo ti agbuteng.” Saan a kayat ni Kristo nga agtulnogtayo kenkuana gapu laeng iti buteng. Imbes ketdi, kinuna ni Jesus a dakkel ti pakausaran ni Pedro ken dagiti kakaduana kas dumadaklis iti tattao. Umasping iti dayta, ditay usaren ti pammutbuteng wenno aniaman a negatibo nga emosion, kas iti panangsidir wenno panangpabain tapno mapilitan ti dadduma nga agtulnog ken Kristo. Maragsakan ti puso ni Jehova no amin-kararua ti panagtulnog kenkuana a naibatay iti panagayat iti Dios ken ni Kristo.​—Mateo 22:37.

“Mangaramidkayo iti Ad-adalan Kadagiti Tattao iti Amin a Nasion”

10. (a) Ania nga aspeto ti bilin ni Jesus a mangaramid kadagiti adalan ti nangyeg iti dakkel a karit kadagiti adalanna? (b) Kasano a nagtignay dagiti adalan iti bilin ni Jesus?

¹⁰ Ti maikadua a saludsod a timmaud mainaig  iti bilin ni Jesus ket, Sadino ti pangaramidan kadagiti adalan? Binilin ni Jesus dagiti pasurotna: “Mangaramidkayo iti ad-adalan kadagiti tattao iti amin a nasion.” Sakbay ti ministerio ni Jesus ditoy daga, naabrasa dagiti tattao manipud kadagiti nasnasion no mapanda idiay Israel tapno agserbi ken ni Jehova. (1 Ar-ari 8:41-43) Dagiti natural a Judio ti kaaduan a kinasabaan ni Jesus, ngem iti daydi a kanito, binilinna dagiti pasurotna a kasabaanda dagiti tattao iti amin a nasion. No ar-arigen, ti pagdaklisan wenno teritoria a pangasabaan dagiti adalanna ket limitado idi iti bassit a “ban-aw”​—dagiti natural a Judio​—ngem di nagbayag, sinaklawnan ti intero a “taaw” ti sangatauan. Nupay maysa a karit kadagiti adalan daytoy a panagbalbaliw, sitatallugod a nagtulnogda iti bilin ni Jesus. Awan pay 30 a tawen kalpasan ti ipapatay ni Jesus, insurat ni apostol Pablo a naikasaba ti naimbag a damag saan laeng a kadagiti Judio no di ket iti “isuamin a parsua nga adda iti baba ti langit.”​—Colosas 1:23.

11. Kasano a limmawa ti ‘pagdaklisan’ sipud idi rugrugi ti maika-20 a siglo?

¹¹ Iti di pay nabayag, limmawa met ti teritoria a pangasabaan. Idi rugrugi ti maika-20 a siglo, ti ‘pagdaklisan’ ket limitado iti sumagmamano a pagilian. Kaskasdi, tinulad dagiti pasurot ni Kristo ti ulidan dagiti Kristiano idi umuna a siglo ket sigagagar a pinalawada ti teritoria a pangasabaanda. (Roma 15:20) Idi rugrugi ti dekada 1930, nangaramidda kadagiti adalan iti agarup sangagasut a pagilian. Ita, limmawa ti ‘pagdaklisan’ iti 235 a pagilian.​—Marcos 13:10.

“Manipud Kadagiti Amin a Pagsasao”

12. Ania a karit ti itampok ti padto a masarakan iti Zacarias 8:23?

¹² Maysa a karit ti panagaramid kadagiti adalan iti amin a nasion, saan laeng a gapu iti kalawa dagiti teritoria no di ket gapu iti nadumaduma a lenguahe. Babaen ken propeta a Zacarias, impakpakauna ni Jehova: “Mapasamakto kadagidiay nga aldaw a sangapulo a lallaki manipud kadagiti amin a pagsasao ti nasnasion kumpetdanto, wen, pudno a kumpetdanto iti pandiling ti maysa a lalaki a Judio, a kunkunada: ‘Kumuyogkaminto kadakayo, ta nangngegmi a ti Dios adda kadakayo.’” (Zacarias 8:23) Iti dakdakkel a kaitungpalan daytoy a padto, ti “lalaki a Judio” irepresentarna dagiti natda kadagiti napulotan a Kristiano, bayat a ti “sangapulo a lallaki” irepresentarda ti “dakkel a bunggoy.” * (Apocalipsis 7:9, 10; Galacia 6:16) Daytoy a dakkel a bunggoy dagiti adalan ni Kristo ket masarakan iti adu a nasnasion, ken kas kinuna ni Zacarias, agsaoda iti adu a lenguahe. Kasta met laeng kadi ti ili ti Dios iti daytoy moderno a panawen? Wen, kasta met laeng.

13. (a) Ania a panagrang-ay mainaig kadagiti lenguahe ti napasaran ti moderno-aldaw nga ili ti Dios? (b) Kasano a nagtignay ti klase matalek nga adipen no maipapan iti dumakdakkel a panagkasapulan iti naespirituan a taraon iti nadumaduma a lenguahe? (Iramanyo ti kahon a “Publikasion Agpaay Kadagiti Bulsek.”)

¹³ Idi 1950, Ingles ti kangrunaan a pagsasao ti 3 iti kada 5 a Saksi ni Jehova iti sangalubongan.  Idi 1980, nagbalin a 2 iti kada 5, ket ita 1 laengen iti kada 5 a Saksi. Kasano a nagtignay ti klase matalek ken masirib nga adipen iti daytoy a panagbalbaliw? Babaen ti panangipaayda iti naespirituan a taraon iti ad-adu a lenguahe. (Mateo 24:45) Kas pagarigan, idi 1950 dagiti literaturatayo ket naipablaak iti 90 a lenguahe, ngem ita ngimmato dayta a bilang iti agarup 400. Adda met la kadi nagbanagan daytoy a panangipaay iti dakdakkel nga atension kadagiti grupo ti nagduduma a lenguahe? Wen! Agarup 5,000 a tattao ‘manipud iti amin a pagsasao’ ti agbalbalin nga adalan ni Kristo iti kada lawas iti tunggal tawen! (Apocalipsis 7:9) Ken agtultuloy pay latta ti panagadu. Iti dadduma a pagilian, adu ti makalap ‘dagiti iket’!​—Lucas 5:6; Juan 21:6.

Makagunggona a Ministerio​—Kabaelanyo Kadi ti Makiraman?

14. Kasanotay a matulongan dagidiay adda iti teritoriatayo a ganggannaet ti pagsasaoda? (Iramanyo ti kahon a “Sign Language ken Panagaramid iti Adalan.”)

¹⁴ Iti adu a pagilian iti Laud, ti isasangbay dagiti imigrante ket nangyeg iti karit no iti panagaramid kadagiti adalan iti ‘tunggal pagsasao’ iti mismo a pagilianda. (Apocalipsis 14:6) Kasanotay a matulongan dagidiay adda iti teritoriatayo a ganggannaet ti pagsasaoda? (1 Timoteo 2:4) Mabalintayo nga usaren dagiti maitutop a pagkalap, no ar-arigen. Itukonyo kadagita nga indibidual dagiti literatura iti pagsasaoda. No posible, iyurnosyo a sarungkaran ida ti maysa a Saksi a makapagsao iti lenguaheda. (Aramid 22:2) Nalaklaka ita nga aramiden dayta yantangay adu a Saksi ti nagadal iti sabali a lenguahe tapno matulonganda dagiti ganggannaet nga agbalin nga adalan ni Kristo. Ipakita dagiti report a makaparagsak a kapadasan dagiti kasta a panangtulong.

15, 16. (a) Aniada a pagarigan ti mangipakita a makagunggona ti tumulong kadagidiay ganggannaet ti pagsasaoda? (b) Mainaig iti panangasaba kadagiti ganggannaet ti pagsasaoda, ania a salsaludsod ti mabalintay nga usigen?

¹⁵ Kitaenyo ti dua a kapadasan idiay Netherlands, a sadiay ket maikaskasaba ti Pagarian iti 34 a pagsasao. Maysa nga agassawa a Saksi ti nagboluntario a mangasaba ken mangaramid kadagiti adalan kadagiti Polaco ti pagsasaoda nga imigrante. Makaparagsak ti resulta ti panagreggetda ta uray la natignay ti asawa a lalaki a mangkissay iti sekular a trabahona tapno makaipaay iti kanayonan a maysa nga aldaw iti kada lawas a mangyadal iti Biblia kadagidiay interesado. Di  nagbayag, mangikonkondukta ti agassawa iti nasurok a 20 a panagadal iti Biblia iti kada lawas. Kinunada: “Nakaragragsakkami gapu iti ministeriomi.” Ad-adda pay a naragsak dagidiay manangaramid iti adalan no mangipakita iti apresasion dagidiay makangngeg kadagiti kinapudno iti Biblia iti bukodda a lenguahe. Kas pagarigan, kabayatan ti maysa a gimong a naangay iti pagsasao a Vietnamese, timmakder ti maysa a lakay ket kiniddawna a mapalubosan nga agsao. Makalua a kinunana kadagiti Saksi: “Pagyamanan iti panagreggetyo a masursuro ti nagrigat a pagsasaomi. Agyamanak unay ta adu ti nasursurok a nakaskasdaaw a banag manipud iti Biblia iti laksid ti kinalakayko.”

¹⁶ Saan ngarud a pagsiddaawan a makarikna iti dakkel a gunggona dagidiay agserserbi kadagiti kongregasion a ganggannaet ti pagsasaoda. Kinuna ti maysa nga agassawa manipud Britania: “Ti panangasaba kadagidiay ganggannaet ti pagsasaoda ket maysa kadagiti kangrunaan a makapagagar a kapadasanmi iti 40 a tawen a panagserbimi iti Pagarian.” Mabalinyo kadi a balbaliwan ti kasasaadyo tapno mabaelanyo ti makiraman iti daytoy makaparegta a ministerio? No ages-eskuelakayo pay, mabalinyo kadi ti agsursuro iti maysa a ganggannaet a lenguahe kas panagsagana iti daytoy a kita ti ministerio? Ti panangaramid iti kasta ket mabalin a mangyeg iti makapnek a wagas ti panagbiag a napno kadagiti bendision. (Proverbio 10:22) Apay a diyo pakisaritaan dayta kadagiti dadakkelyo?

Panangbaliwbaliw Kadagiti Metodotayo

17. Kasanotay a madanon ti ad-adu a tattao iti teritoria ti kongregasiontayo?

¹⁷ Siempre, kaaduan kadatayo ti saan a makaiwayat kadagiti ‘iket’ kadagiti teritoria a ganggannaet ti pagsasaoda gapu kadagiti kasasaadtayo. Ngem mabalin a makasaritayo ti ad-adu pay a tattao iti mismo a teritoria ti kongregasiontayo. Kasano? Babaen ti panangbaliwbaliw, saan nga iti mensahe, no di ket kadagiti metodotayo. Iti adu a lugar, umad-adu ti agnanaed kadagiti nainget ti pannakaguardiana a pasdek. Adu ti awan kadagiti pagtaenganda no mapantay mangasaba. Gapuna, mabalin a nasaysayaat no iwayattayo dagiti ‘ikettayo’ iti sabali a panawen ken iti sabali a lugar. Iti kasta, matuladtayo ni Jesus. Impamuspusanna ti nakisarita kadagiti tattao iti nadumaduma a kasasaad.​—Mateo 9:9; Lucas 19:1-10; Juan 4:6-15.

18. Kasano a napaneknekan nga epektibo ti panangasaba iti nadumaduma a kasasaad? (Iramanyo ti kahon a “Panagaramid iti Adalan Kadagiti Lugar ti Negosio.”)

¹⁸ Iti dadduma a paset ti lubong, ti panangasaba kadagiti tattao sadinoman ti pakasarakan kadakuada ket nagpateg a metodo iti panagaramid iti adalan. Kadagiti eksperiensiado iti trabaho a panagaramid kadagiti adalan, umad-adu ti tiempo a busbosenda iti panangasaba iti nadumaduma a lugar. Malaksid iti panangasaba iti binalaybalay, mangaskasaba ita dagiti agibumbunannag kadagiti eropuerto, opisina, tiendaan, paradaan ken pagurayan iti lugan, lansangan, parke, igid ti baybay, ken iti sadinoman. Adu a baro a bautisado a Saksi idiay Hawaii ti damo a nakasarita kadagita a lugar. Makatulong ti panangbaliwbaliw kadagiti metodotayo tapno naan-anay a matungpaltayo ti bilin ni Jesus a mangaramid kadagiti adalan.​—1 Corinto 9:22, 23.

19. Aniada nga aspeto ti bilin ni Jesus kadatayo ti mausig iti sumaruno nga artikulo?

¹⁹ Ti bilin ni Jesus a mangaramid kadagiti adalan ket saan laeng a naglaon kadagiti detalye no apay nga aramidentayo ken sadino ti pangaramidantayo iti dayta a trabaho no di ket iramanna no ania ti nasken nga ikasabatayo ken agingga kaano a mangasabatayo. Daytoy a dua nga aspeto ti bilin kadatayo ni Jesus ti mausig iti sumaruno nga artikulo.

[Footnotes]

Malagipyo Kadi?

• Ania dagiti makagapu ken motibo a makiramantayo iti panangikasaba iti Pagarian ken panagaramid iti adalan?

• Agingga iti ania a dagiti adipen ni Jehova itungpalda ti bilin ni Jesus a mangaramid kadagiti adalan kadagiti amin a nasnasion?

• Kasanotay a mabaliwbaliwan ti ‘metodo ti panagdaklistayo,’ ken apay a nasken nga aramidentayo dayta?

[Salsaludsod]

[Kahon/Dagiti Ladawan iti panid 10]

Publikasion Agpaay Kadagiti Bulsek

Ni Albert ket maysa a Kristiano a panglakayen ken amin-tiempo a ministro nga agnanaed iti Estados Unidos. Bulsek ni Albert. Ti panangusarna iti naibatay-Biblia a literatura a Braille ti namagbalin kenkuana nga ad-adda nga epektibo iti ministeriona, agraman kadagiti aktibidadna kas manangaywan iti serbisio. Kasano ti panangtamingna kadagiti annongenna iti kongregasion?

“Epektibo ni Albert kas manangaywan iti serbisio ti kongregasionmi,” kuna ni James, ti mamangulo a manangaywan. Maysa ni Albert kadagiti agarup 5,000 a bulsek iti Estados Unidos nga umaw-awat kadagiti Braille a naibatay-Biblia a publikasion nga Ingles ken Espaniol. Kinapudnona, sipud idi 1912, ti klase matalek nga adipen ket nangipaay iti nasurok a sangagasut nga agduduma a publikasion a Braille. Iti tulong dagiti kabaruan a metodo, dagiti pagimprentaan dagiti Saksi ni Jehova iti agdama ket mangipabpablaak iti adu a publikasion a Braille iti kada tawen iti nasurok a sangapulo a lenguahe ken ipatulodda iti nasurok a 70 a pagilian. Adda kadi am-ammoyo a mabalin a magunggonaan kadagiti naibatay-Biblia a publikasion a Braille a nairanta para kadagiti bulsek?

[Kahon/Ladawan iti panid 11]

Sign Language ken Panagaramid iti Adalan

Rinibu a Saksi iti intero a lubong, agraman dagiti adu nga agtutubo, ti nagadal iti sign language tapno matulonganda dagiti tuleng nga agbalin nga adalan ni Kristo. Kas resultana, idiay laeng Brazil, 63 a tuleng ti nabautisaran itay nabiit pay a tawen ken 35 a tuleng a Saksi sadiay ti agserserbi ita kas amin-tiempo a managebanghelio. Iti sangalubongan, adda nasurok a 1,200 a kongregasion ken grupo ti sign language. No kalawa ti sirkito ti pagsasaritaan, ti kakaisuna a sirkito ti sign language idiay Russia ti kadakkelan iti intero a lubong, yantangay sakupna ti intero a Russia!

[Kahon iti panid 12]

Panagaramid iti Adalan Kadagiti Lugar ti Negosio

Bayat ti panangasabana kadagiti tattao nga agtartrabaho kadagiti opisina, maysa a Saksi ni Jehova iti Hawaii ti nakaam-ammo iti maysa a manedyer iti maysa a kompania ti transportasion. Nupay okupado, immannugot ti lalaki a mayadalan iti Biblia iti uneg ti 30 a minuto iti kada lawas iti opisinana. Iti kada agsapa ti Mierkoles, bilinenna dagiti empleadona a dina kayat ti madisturbo kadagiti awag ti telepono ket ipaayna ti naan-anay nga atension iti panagadal. Maysa met a Saksi iti Hawaii ti mangyad-adal iti Biblia iti maysa nga akinkukua ti pagtarimaanan ti sapatos. Agadalda iti mismo a counter dayta a shop. No adda sumrek a kostumer, agpaigid ti Saksi. No pumanawen ti kostumer, ituloyda ti panagadal.

Ti manedyer ken ti akinkukua ti shop ket agpada a nakasabaan gapu ta inkagumaan dagiti Saksi nga inwayat ‘dagiti iketda’ iti nadumaduma a lugar. Adda kadi teritoria ti kongregasionyo nga ammoyo a mabalin a makasaritayo dagiti tattao a narigat a madanon kadagiti pagtaenganda?

[Ladawan iti panid 12]

Kabaelanyo kadi ti agserbi iti tay-ak a ganggannaet ti pagsasaoda?