1-2. Ania ti pagpadaan ti situasion ti sangatauan iti situasion ti agtutubo a lalaki a nadakamat iti parapo 1?

 PANUNOTEM ti situasion daytoy nga agtutubo: Napadakkel iti nabaknang a pamilia. Ngem maysa nga aldaw, naaksidente dagiti nagannakna ket natayda. Permi la ketdi ti ladingitna. Nupay kasta, adda pay sabali a makapakigtot a naammuan daytoy nga agtutubo. Naammuanna a winaldas dagiti nagannakna ti kinabaknang ti pamiliada ken nailumlomda iti nagdakkel nga utang. Imbes a kinabaknang ti matawidna, saanen, no di ket ti utang dagiti nagannakna. Agkarasubli payen dagiti nakautanganda tapno agsingir. Ti rigatna, saanna a kabaelan a bayadan amin dagita.

² Kasla kasta met laeng ti situasiontayo. Perpekto idi ti immuna a nagannaktayo a da Adan ken Eva, ken agnanaedda iti napintas a paraiso. (Gen. 1:27; 2:​7-9) Adda pay ketdi namnamada nga agbiag a naragsak iti agnanayon. Ngem saan a napasamak dayta ta nagbasolda. Napukawda ti Paraiso a pagnanaedanda ken ti namnamada nga agbiag nga agnanayon. Ania ngarud ti maipatawidda kadagiti agbalin pay la idi nga annakda? Kuna ti Biblia: “Babaen ti maysa a tao [ni Adan], simrek ti basol iti lubong ken ti ipapatay babaen ti basol, isu a matay ti amin a tao ta nagbasolda amin.” (Roma 5:12) Ti impatawid kadatayo ni Adan ket basol nga agresulta iti ipapatay. Dayta nga impatawidna a basol ket kas iti nagdakkel nga utang a saan a mabayadan ti asinoman kadatayo.—Sal. 49:8.

 3. Apay a dagiti basoltayo ket kas iti ‘utang’?

³ Impada ni Jesus dagiti basoltayo iti ‘utang.’ (Mat. 6:12; Luc. 11:4) No agbasoltayo, kas man la nakautangtayo ken Jehova.  Saantayo a kaya a bayadan dayta nga utang a datdatayo. Makabayadtayo laeng no mataytayo.—Roma 6:​7, 23.

 4. (a) No awan ti tumulong, ania ti mapasamak iti amin a managbasol? (Salmo 49:​7-9) (b) Ania ti tuktukoyen ti sao a “basol” a nausar iti Biblia? (Kitaen ti kahon a “ Basol.”)

⁴ Kabaelantayo kadi a mapasubli ti amin a napukaw da Adan ken Eva? Saan, no iti bukodtayo a panangikagumaan. (Basaen ti Salmo 49:​7-9.) No awan ti tumulong kadatayo, awanen ti namnamatayo nga agbiag nga agnanayon wenno mapagungar pay. Mataytayonto lattan a kas kadagiti animal, nga awanen ti namnamada nga agbiag manen.—Ecl. 3:19; 2 Ped. 2:12.

 5. Ania ti inaramid ti nadungngo nga Amatayo tapno mabayadan ti natawidtayo a basol? (Kitaen ti ladawan.)

⁵ Panunotentayo manen ti agtutubo a nadakamat itay. Ania ngata ti reaksionna no adda nabaknang a tao a nangibaga nga isuna laengen ti mangbayad iti amin a natawidna nga utang? Sigurado nga apresiarenna unay dayta ken awatenna dayta a nagdakkel a tulong. Kasta met laeng ti inaramid ti nadungngo nga Amatayo a ni Jehova. Adda inregalona kadatayo tapno mabayadan ti natawidtayo a basol ken Adan. Inlawlawag ni Jesus: “Kasta unay ti panagayat ti Dios iti lubong nga uray la intedna ti bugbugtong nga Anakna, tapno saan a madadael ti asinoman a mangipakita iti pammati kenkuana no di ket maaddaan iti biag nga agnanayon.” (Juan 3:16) Gapu met laeng iti dayta a regalo, posible a maaddaantayo iti nasayaat a relasion ken Jehova.

 6. Ania dagiti termino iti Biblia nga usigentayo iti daytoy nga artikulo, ken apay?

⁶ Kasanotayo a magunggonaan iti dayta a nagsayaat a regalo tapno mapakawan dagiti basoltayo, wenno ‘utangtayo’? Tapno masungbatan dayta, pagsasaritaantayo iti daytoy nga artikulo dagiti sumaganad a termino iti Biblia ken ti kaipapananda: pannakikappia, panangabbong, panangsubbot, panangsaka, ken pannakaideklara a nalinteg. No maawatantayo a naimbag ti kaipapanan dagita, lallalo a maapresiartayo dagiti inaramid ni Jehova tapno mapakawan dagiti basoltayo.

PANGGEP: PANNAKIKAPPIA

 7. (a) Ania pay dagiti napukaw da Adan ken Eva? (b) Kas annak da Adan ken Eva, ania ti kasapulantayo unay? (Roma 5:​10, 11)

⁷ Idi nagbasol da Adan ken Eva, saanda la a napukaw ti namnamada nga agbiag nga agnanayon. Napukawda pay ti nasayaat a relasionda iti Amada a ni Jehova isu a nagbalinda a  kabusorna. Idi damo, da Adan ken Eva ket paset ti pamilia ti Dios. (Luc. 3:38) Ngem idi nagsukirda ken Jehova, saandan a paset ti pamiliana sakbay pay a naaddaanda iti annak. (Gen. 3:​23, 24; 4:1) Kas annakda, kasapulantayo ngarud ti maikappia ken Jehova. (Basaen ti Roma 5:​10, 11.) Iti sabali a pannao, masapul a maaddaantayo iti nasayaat a relasion kenkuana. Sigun iti maysa a reperensia, ti Griego a sao a nausar ditoy para iti “pannakikappia” kaipapananna ti “pannakigayyem iti maysa a kabusor.” Nakaim-imbag ni Jehova ta isu a mismo ti immuna a nagtignay tapno maikappiatayo kenkuana. Kasano?

URNOS: PANANGABBONG

 8. Ania ti panangabbong?

⁸ Ti panangabbong ket ti urnos nga inaramid ni Jehova tapno maaddaan dagiti managbasol a tattao iti nasayaat a relasion kenkuana. Iti dayta nga urnos, nangipaay ni Jehova iti katupag ni Adan tapno maisubli wenno masuktan ti banag a napukaw. Nadakamat met iti Griego a Kasuratan ti inaramid ni Jehova tapno maaddaan ti tunggal maysa kadatayo iti nasayaat a relasion kenkuana.—Roma 3:25.

 9. Ania ti temporario nga inyurnos ni Jehova tapno mapakawan dagiti basol dagiti Israelita?

⁹ Adda temporario nga inyurnos ni Jehova tapno mapakawan dagiti basol dagiti Israelita ken maaddaanda iti nasayaat a relasion kenkuana. Dayta ti Aldaw ti Panangabbong, a tinawen a selselebraran dagiti Israelita. Iti dayta nga aldaw, ti nangato a padi ket agdaton kadagiti animal para kadagiti Israelita. Ngem saan a naan-anay a maabbongan dagita a daton dagiti basolda. Ngamin, adayo a natantan-ok dagiti tattao ngem kadagiti animal. Nupay kasta, no la ket ta agdaton dagiti agbabbabawi nga Israelita kadagiti kidkiddawen ni Jehova, nakasagana a mangpakawan kadagiti basolda. (Heb. 10:​1-4) Gapu iti dayta nga urnos ken ti regular a panagdaton dagiti Israelita para kadagiti basolda, naamirisda a managbasolda ken kasapulanda la unay ti permanente a solusion tapno naan-anay a maabbongan dagiti basolda.

10. Ania ti permanente nga inyurnos ni Jehova tapno mapakawan dagiti basol?

¹⁰ Adda permanente nga inyurnos ni Jehova tapno mapakawan dagiti basol. Inyurnosna a ti dungdungnguenna nga Anak ket ‘maminsan laeng a maidaton tapno awitenna dagiti basol ti adu a tattao.’ (Heb. 9:28) Inted ni Jesus “ti biagna kas pangsubbot iti adu.” (Mat. 20:28) Ania ti subbot?

GATAD: TI SUBBOT

11. (a) Sigun iti Biblia, ania ti subbot? (b) Ania ti kasapulan tapno mabayadan dayta a subbot?

¹¹ Sigun iti Biblia, ti subbot ket ti gatad a maibayad tapno maabbongan dagiti basoltayo ken maikappiatayo manen iti Dios. a Para ken Jehova, dayta ti pakaibatayan ti pannakaisubli ti napukaw. Kasano? Laglagipentayo a napukaw da Adan ken Eva ti perpekto a biagda ken ti namnamada nga agbiag nga agnanayon. Kasapulan ngarud a ti subbot ket katupag ti napukaw. (1 Tim. 2:6) Mabayadan laeng dayta ti maysa nga adulto a tao a (1) perpekto; (2) posible nga agbiag nga agnanayon ditoy daga; ken (3) nakasagana a mangted wenno mangisakripisio iti biagna para kadatayo. Ti laeng biag dayta a tao ti mabalin a mangsukat wenno mangabbong iti biag a napukaw.

12. Apay a ni laeng Jesus ti makaipaay iti kasapulan a gatad a pangsubbot?

¹² Kitaentayo ti tallo a rason a ni laeng Jesus  ti makaipaay iti kasapulan a gatad a pangsubbot. (1) Isu ket perpekto, kayatna a sawen, “saan a nagbasol.” (1 Ped. 2:22) (2) Gapu iti dayta, posible nga agbiag nga agnanayon ditoy daga. (3) Nakasagana a matay ken mangisakripisio iti biagna para kadatayo. (Heb. 10:​9, 10) Gapu ta ni Jesus ket perpekto idi a tao, isu ti katupag ti immuna a tao a ni Adan sakbay a nagbasol. (1 Cor. 15:45) Isu nga idi natay ni Jesus para kadatayo, nabayadanna ti eksakto a gatad a kasapulan tapno maisubli ti napukaw ni Adan. (Roma 5:19) Nagbalin ngarud ni Jesus a “ti maudi nga Adan.” Saanen a kasapulan nga umay ti sabali pay a perpekto a persona a mangbayad iti napukaw ni Adan. “Naminsan laeng” a natay ni Jesus.—Heb. 7:27; 10:12.

13. Ania ti nagdumaan ti urnos a panangabbong ken ti subbot?

¹³ Ania ngarud ti nagdumaan ti urnos a panangabbong ken ti subbot? Ti urnos a panangabbong ket ti inaramid ti Dios tapno maaddaan manen iti nasayaat a relasion dagiti tattao kenkuana. Ti met subbot ket ti gatad a naibayad tapno maabbongan ti basol dagiti tattao. Ti napateg a dara ni Jesus a naibukbok para kadatayo ti irepresentar ti gatad a naibayad.—Efe. 1:7; Heb. 9:14.

RESULTA: PANNAKASAKA KEN PANNAKAIDEKLARA A NALINTEG

14. Ania ti pagsasaritaantayo itan, ken apay?

¹⁴ Ania dagiti resulta ti urnos a panangabbong? Tapno masungbatan dayta a saludsod, pagsasaritaantayo ti dua a termino a nausar iti Biblia. Iti kasta, maawatantayo no kasanotayo a magunggonaan iti panangpakawan ni Jehova.

15-16. (a) Iti Biblia, ania ti kaipapanan ti sao a “pannakasaka”? (b) Ania ti mariknatayo gapu iti dayta?

¹⁵ Iti Biblia, ti pannakasaka ket tumukoy iti pannakawayawaya, wenno pannakaabsuelto, gapu iti naibayad a subbot. Kastoy ti imbaga ni apostol Pedro: “Ammoyo a saan a babaen ti madadael a bambanag a kas iti pirak wenno balitok a nawayawayaankayo [lit., “nasubbotkayo; nasakakayo”] iti awan mamaayna a wagas ti panagbiagyo nga impatawid dagidi ammayo, no di ket babaen ti napateg a dara ni Kristo, kas iti dara ti kordero a nadalus ken awan depektona.”—1 Ped. 1:​18, 19; ftn.

¹⁶ Gapu iti daton a pangsubbot, mawayawayaantayo manipud iti basol ken ipapatay a mangparparigat unay kadatayo. (Roma 5:21) Talaga nga agyamyamantayo unay ken mariknatayo a nagdakkel ti utangtayo a naimbag a nakem kada Jehova ken Jesus gapu ta sinakadatayo babaen ti nagpateg a dara, wenno biag, ni Jesus.—1 Cor. 15:22.

17-18. (a) Ania ti kaipapanan ti pannakaideklara a nalinteg? (b) Ania dagiti nagbalin a posible gapu iti dayta?

¹⁷ Ti pannakaideklara a nalinteg kaipapananna a saanen a singiren ni Jehova dagiti basoltayo ta pinunas wenno binuranan dagita. Uray no inaramid dayta ni Jehova, dina kaipapanan a saanna a sursuroten dagiti mismo a pagalagadanna iti hustisia. Saannatayo nga ideklara a nalinteg babaen kadagiti aramidtayo. Ngem gapu iti pammatitayo iti urnos a panangabbong ken iti gatad ti naibayad a pangsubbot, adda pangibatayan ni Jehova a mangpunas kadagiti basoltayo.—Roma 3:24; Gal. 2:16.

¹⁸ Ania dagiti nagbalin a posible gapu iti dayta? Dagiti napili a makipagturay ken Jesus idiay langit ket naideklaran a nalinteg kas annak ti Dios. (Tito 3:7; 1 Juan 3:1) Napakawanen dagiti basolda. Arigna nadalusen ti rekordda isu a kualipikadodan a makipagturay iti Pagarian. (Roma 8:​1, 2, 30) Dagidiay met mangnamnama nga agbiag nga  agnanayon ditoy daga ket naideklaran a nalinteg kas gagayyem ti Dios ta napakawanen dagiti basolda. (Sant. 2:​21-23) Ti dakkel a bunggoy a makalasatto iti Armagedon ket posible a saandan a mapadasan ti matay. (Juan 11:26) “Dagiti nalinteg” ken “dagiti nakillo” a natayen ket mapagungarto met. (Ara. 24:15; Juan 5:​28, 29) Inton agangay, amin a natulnog nga adipen ni Jehova ditoy daga ket “maaddaanto iti nadayag a wayawaya dagiti annak ti Dios.” (Roma 8:21) Anian a nagsayaat a bendision ti masagraptayto gapu iti urnos a panangabbong ta naan-anayton a maikappiatayo iti Amatayo a ni Jehova!

19. Kasano a simmayaat ti situasiontayo? (Kitaen met ti kahon a “ Dagiti Naaramidan ti Panangpakawan ni Jehova.”)

¹⁹ Talaga a ti situasiontayo idi ket kas iti agtutubo a lalaki a nadakamaten a napukawna ti amin ken natawidna pay ti nagdakkel nga utang a dina pulos mabayadan. Ngem tinulongannatayo ni Jehova. Simmayaat ti situasiontayo gapu iti urnos a panangabbong ken ti naibayad a subbot. Nasaka wenno nawayawayaantayon manipud iti basol ken ipapatay gapu iti pammatitayo ken Jesu-Kristo. Maburan dagiti basoltayo ta pinakawannatayo ni Jehova isu a nadalusen ti rekordtayo. Ngem kangrunaan iti amin, maaddaantayon iti nasayaat a relasion iti naayat a nailangitan nga Amatayo a ni Jehova.

20. Ania ti pagsasaritaantayo iti sumaruno nga artikulo?

²⁰ Bayat nga ut-utobentayo dagiti inaramid da Jehova ken Jesus para kadatayo, mapno ti pusotayo iti panagyaman. (2 Cor. 5:15) No saandatayo a tinulongan, awan koman a pulos ti namnamatayo! Ngem ania ti magunggona ti tunggal maysa kadatayo gapu iti panangpakawan ni Jehova? Pagsasaritaantayo dayta iti sumaruno nga artikulo.