1-2. Sigun iti Mateo 5:11, kasano ti rumbeng a panangmatmattayo kadagiti suot?

INKARI ni Jesus kadagiti pasurotna nga agbalinda a pudpudno a naragsak. Impakdaarna met kadagidiay mangay-ayat kenkuana a maipasangoda kadagiti suot. (Mat. 10:22, 23; Luc. 6:20-23) Naragsaktayo ta adalannatayo ni Kristo. Ngem ania ti mariknatayo no busorennatayo ti pamiliatayo, idadanesnatayo ti gobierno, wenno pilitendatayo dagiti katrabahuan wenno kaeskuelaantayo nga agaramid iti dakes? Natural nga agdanagtayo kadagita a posibilidad.

² Saan nga ibilang ti kaaduan a makaparagsak ti pannakaidadanes. Ngem dayta ti eksakto nga ibaga ti Sao ti Dios nga aramidentayo. Kas pagarigan, insurat ni adalan a Santiago nga ibilangtayo a makaparagsak no masuottayo, imbes a makapaladingit. (Sant. 1:2, 12) Ken imbaga ni Jesus a naragsaktayo koma uray no maidadanestayo. (Basaen ti Mateo 5:11.) Kasanotayo nga agtalinaed a naragsak uray masuottayo? Adu ti masursurotayo iti insurat ni Santiago kadagiti nagkauna a Kristiano. Umuna, usigentayo dagiti pakarigatan nga inibturan dagidiay a Kristiano.

3. Ania ti napasamak di nagbayag kalpasan a nagbalin ni Santiago nga adalan ni Jesus?

³ Ni Santiago ket kabsat ni Jesus iti ina. Di nagbayag kalpasan a nagbalin nga adalan, naidadanes dagiti Kristiano idiay Jerusalem. (Ara. 1:14; 5:17, 18) Ket idi napapatay ni adalan nga Esteban, adu a Kristiano ti pimmanaw iti siudad ken ‘naiwarawara  kadagiti rehion ti Judea ken Samaria,’ agingga iti adayo a luglugar kas iti Chipre ken Antioquia. (Ara. 7:58–8:1; 11:19) Nakaad-adu a pakarigatan ti kasapulan nga ibturan dagiti adalan. Ngem sigagagar latta nga inkasabada ti naimbag a damag iti sadinoman a napananda, isu a nabuangay dagiti kongregasion iti intero nga Imperio ti Roma. (1 Ped. 1:1) Ngem ad-adu pay a pakarigatan ti pakaipasanguan idi dagiti nagkauna a Kristiano.

4. Ania pay dagiti suot nga inibturan dagiti nagkauna a Kristiano?

⁴ Inibturan dagiti nagkauna a Kristiano ti nadumaduma a suot. Kas pagarigan, idi agarup 50 C.E., imbilin ti Romano nga Emperador a ni Claudio a pumanaw ti amin a Judio iti Roma. Isu a dagiti Judio a nagbalin a Kristiano napilitanda a mangpanaw kadagiti balayda ken agyan iti sabali a lugar. (Ara. 18:1-3) Idi agarup 61 C.E., insurat ni apostol Pablo a dagiti padana a Kristiano ket naum-umsi iti publiko, naibalud, ken naagaw dagiti sanikuada. (Heb. 10:32-34) Ken kas iti dadduma a tattao, inibturan met dagiti Kristiano ti kinapanglaw ken sakit.—Roma 15:26; Fil. 2:25-27.

5. Ania dagiti saludsod a sungbatantayo?

⁵ Idi inaramid ni Santiago ti suratna sakbay ti 62 C.E., ammona dagiti suot a mapaspasaran dagiti kakabsatna. Inwanwan ni Jehova ni Santiago a suratanna dagidiay a Kristiano tapno ikkanna ida iti praktikal a balakad a makatulong tapno naragsakda latta uray maipasangoda kadagiti suot. Usigentayo ti insurat ni Santiago ken sungbatantayo dagitoy a saludsod: Ania a ragsak ti tuktukoyen ni Santiago iti suratna? Ania dagiti mabalin a mangikkat iti rag-o ti maysa a Kristiano? Ken kasano a matulongannatayo ti sirib, pammati, ken tured tapno naragsaktayo latta aniaman a suot a pakaipasanguantayo?

6. Sigun iti Lucas 6:22, 23, apay a naragsak ti maysa a Kristiano uray no masusuot?

⁶ Mabalin a pampanunoten dagiti tattao a naragsakda laeng no nasalun-atda, adu ti kuartada, ken natalna ti pamiliada. Ngem ti kita ti rag-o nga insurat ni Santiago ket paset ti bunga ti espiritu ti Dios ken saan a nakadepende kadagiti kasasaad ti maysa a tao. (Gal. 5:22) Agrag-o wenno agbalin a nakaragragsak ti maysa a Kristiano gapu ta ammona a maparparagsakna ni Jehova ken sursurotenna ti ulidan ni Jesus. (Basaen ti Lucas 6:22, 23; Col. 1:10, 11) Kas iti apuy iti uneg ti lampara, daytoy a kita ti rag-o ket sumsumged iti puso ti maysa a Kristiano. Saan nga agkuridemdem no agsakit wenno bassit ti kuartana. Ken saan a maiddep uray no umsien wenno busoren ti kapamiliana wenno ti dadduma. Imbes a maiddep, rumangrang ti apuy kada padasen dagiti bumusbusor nga iddepen dayta. Dagiti suot a pakaipasanguantayo gapu iti pammatitayo ti mangpaneknek a datayo dagiti pudno nga adalan ni Kristo. (Mat. 10:22; 24:9; Juan 15:20) Gapu iti dayta, insurat ni Santiago: “Agragsakkayo no maipasangokayo iti nadumaduma a pakasuotan.”—Sant. 1:2.

7-8. Kasano a magunggonaan ti pammatitayo no masuboktayo?

⁷ Imbaga ni Santiago ti sabali pay a rason a sisasagana dagiti Kristiano a mangsango kadagiti nakaro a suot. Kunana: “Ti nasubok a pammatiyo pataudenna ti panagibtur.” (Sant. 1:3) Dagiti suot ket kas iti apuy a pagpanday iti espada a landok. No maipapudot iti apuy ken maitaneb iti danum, tumibker ti espada. Umasping iti dayta, no ibturantayo dagiti suot, tumibker ti pammatitayo. Dayta ti makagapu nga insurat ni Santiago: “Bay-anyo nga itungpal ti panagibtur ti panggepna, tapno agbalinkayo a naan-anay ken awan pakababalawanna iti amin a banag.” (Sant. 1:4) No makitatayo a tumibtibker ti pammatitayo gapu kadagiti suot, siraragsak a maibturantayo dagita.

⁸ Iti surat ni Santiago, dinakamatna met ti dadduma a mangikkat iti rag-otayo. Ania dagita a problema, ken kasano a mapagballigiantayo dagita?

9. Apay a kasapulantayo ti sirib?

⁹ Ti problema: No ditay ammo ti aramidentayo. No masusuottayo, kayattayo ti agpatulong ken Jehova tapno makaaramidtayo kadagiti desision a mangparagsak kenkuana, makatulong kadagiti kakabsattayo, ken makatulong kadatayo nga agtalinaed a matalek. (Jer. 10:23) Kasapulantayo ti sirib tapno ammotayo ti aramidentayo ken ibagatayo kadagiti  bumusbusor kadatayo. No ditay ammo ti aramidentayo, mabalin a mariknatayo a kakaasitayo a biktima dagiti kasasaadtayo, ken alisto la a mapukaw ti rag-otayo.

10. Tapno maaddaantayo iti sirib, ania ti ibaga ti Santiago 1:5 a masapul nga aramidentayo?

¹⁰ Ti solusion: Dumawat ken Jehova iti sirib. Siraragsak a maibturantayo dagiti suot no ikararagtayo nga umuna iti nailangitan nga Amatayo a ni Jehova nga ikkannatayo iti sirib a mangaramid kadagiti nasayaat a desision. (Basaen ti Santiago 1:5.) Ania ti aramidentayo no kasla saanna a dagus a sungbatan ti kararagtayo? Imbaga ni Santiago a masapul nga ‘itultuloytayo ti agdawat’ iti Dios. Saan a masuron ni Jehova no kanayon a dumawattayo iti sirib. Dinatay pagungtan. ‘Sipaparabur nga ikkannatayo’ iti sirib a mangibtur kadagiti pakasuotantayo. (Sal. 25:12, 13) Makitkita ni Jehova dagiti pakasuotantayo; maasian ken magagaran a tumulong kadatayo. Maysa dayta a rason a nakaragragsaktayo! Ngem kasano nga ikkannatayo ni Jehova iti sirib?

11. Ania pay ti masapul nga aramidentayo tapno maaddaantayo iti sirib?

¹¹ Ikkannatayo ni Jehova iti sirib babaen ti Saona. (Prov. 2:6) Tapno maaddaantayo iti dayta a sirib, masapul nga adalentayo ti Sao ti Dios ken dagiti naibatay-Biblia a publikasion. Ngem saan la a basta pananggun-od iti pannakaammo ti masapul nga aramidentayo. Masapul nga usarentayo ti sirib ti Dios babaen ti panangyaplikartayo iti balakadna iti biagtayo. Insurat ni Santiago: “Agbalinkayo a managtungpal iti sao, imbes a managdengngeg laeng.” (Sant. 1:22) No iyaplikartayo ti balakad ti Dios, agbalintayo nga ad-adda a mannakikappia, mas rasonable, ken naas-asi. (Sant. 3:17) Dagita a kualidad ti tumulong kadatayo a mangibtur iti aniaman a suot a ditay mapukaw ti rag-otayo.

12. Apay a nagpateg nga adalentayo a naimbag ti Biblia?

 ¹² Ti Sao ti Dios ket kas iti sarming. Tulongannatayo a mangkita kadagiti masapul a parang-ayentayo, ken no kasanotayo nga aramiden dagita. (Sant. 1:23-25) Kas pagarigan, kalpasan nga inadaltayo ti Sao ti Dios, mabalin a mabigbigtayo a masapul a kontrolentayo ti ungettayo. Iti tulong ni Jehova, masursurotayo ti agbalin a naalumamay no adda tattao wenno problema a mamagpungtot kadatayo. Gapu ta naalumamaytayo, nasaysayaat ti reaksiontayo no adda problematayo. Nalawlawag ti panagpanunottayo ken makaaramidtayo iti nasaysayaat a desision. (Sant. 3:13) Nagpateg ngarud nga adalentayo a naimbag ti Biblia!

13. Apay a masapul nga adalentayo ti ulidan dagiti karakter iti Biblia?

¹³ No dadduma, satay la masursuro ti liklikantayo nga aramiden no nagkamalitayon. Ngem narigat dayta a pamay-an ti panagsursuro. Ti nasaysayaat a pamay-an tapno magun-odtayo ti sirib ket ti panagsursuro kadagiti nasayaat nga inaramid ken nagkamalian ti dadduma. Dayta ti rason nga imparegta ni Santiago nga agsursurotayo iti ulidan dagiti karakter iti Biblia a kas kada Abraham, Rahab, Job, ken Elias. (Sant. 2:21-26; 5:10, 11, 17, 18) Dagitoy a matalek nga adipen ni Jehova naibturanda dagiti suot a mabalin a nangikkat koma iti rag-oda. Ipakita ti ulidanda nga iti tulong ni Jehova, makapagibturtayo met.

14-15. Apay a masapul a solbarentayo dagiti panagduaduatayo?

¹⁴ Ti problema: Di nasolbar a panagduadua. No dadduma, mabalin nga adda ditay maawatan iti Sao ti Dios. Wenno mabalin a saan a sungbatan ni Jehova ti kararagtayo iti pamay-an a namnamaentayo, isu a mabalin nga agduaduatayo. No ditay solbaren dagiti panagduaduatayo, dagita ti mangpakapuy iti pammatitayo ken mangdadael iti relasiontayo ken Jehova. (Sant. 1:7, 8) Dagita pay ketdi ti mangpukaw iti namnamatayo iti masanguanan.

¹⁵ Sigun ken apostol Pablo, ti namnamatayo iti masanguanan ket kas iti angkla. (Heb. 6:19) Gapu iti angkla, saan a mayallo-allon ti barko no agbagyo ken saan a maisadsad iti kabatuan. Ngem makatulong laeng ti angkla no saan a mapugsat ti kadenana a nakakabit iti barko. No kasano a ti lati pakapuyenna ti kadena ti angkla, dagiti di nasolbar a panagduadua pakapuyenda met ti pammatitayo. No mabusor ti maysa a tao nga adda panagduaduana, mabalin a mapukawna ti pammatina a tungpalen ni Jehova dagiti karina. No mapukawtayo ti pammatitayo, mapukawtayo ti namnamatayo. Imbaga ni Santiago a ti managduadua “ket kas iti dalluyon ti baybay nga idurduron ti angin ken mayallo-allon.” (Sant. 1:6) Ti kasta a tao ket mabalin a saan a pulos a naragsak!

16. Ania ti masapul nga aramidentayo no agduaduatayo?

¹⁶ Ti solusion: Solbarem dagiti panagduaduam; patibkerem ti pammatim. Agtignayka a dagus. Idi tiempo ni propeta Elias, saan a makapagdesision ti ili ni Jehova. Imbaga kadakuada ni Elias: “Kasanonto kabayag nga agallaallatiwkayo iti nagduma a kapanunotan? No ni Jehova ti pudno a Dios, sumurotkayo kenkuana; ngem no ni Baal, sumurotkayo kenkuana!” (1 Ar. 18:21) Kasta met laeng ita. Masapul nga ag-research-tayo tapno mapaneknekantayo iti bagitayo a ni Jehova ti Dios, ti Biblia ti Saona, ken dagiti Saksi ni Jehova ti ilina. (1 Tes. 5:21) No aramidentayo amin dagita, mapukaw dagiti panagduaduatayo ken tumibker ti pammatitayo. No kasapulantayo ti tulong tapno masolbartayo dagiti panagduaduatayo,  agpatulongtayo kadagiti panglakayen. Masapul nga agtignaytayo a dagus tapno agtalinaedtayo a naragsak nga agserbi ken Jehova!

17. Ania ti mapasamak no mapukaw ti turedtayo?

¹⁷ Ti problema: Pannakaupay. Kuna ti Sao ti Dios: “No maupayka iti aldaw ti rigat, agkurangto ti pigsam.” (Prov. 24:10) Ti Hebreo a sao a naipatarus a ‘maupay’ kaipapananna ti “mapukaw ti tured.” No mapukawmo ti turedmo, alisto a mapukaw ti ragsakmo.

18. Ania ti kayat a sawen ti panagibtur?

¹⁸ Ti solusion: Agtalekka ken Jehova a paturedennaka nga agibtur. Kasapulantayo ti tured tapno maibturantayo dagiti suot. (Sant. 5:11) Ti sao nga inusar ni Santiago a naipatarus kas ‘agibtur’ ipalagipna ti maysa a tao nga agtalinaed iti ayanna. Mabalin a mapanunottayo ti maysa a soldado a situtured a nakatakder iti ayanna ken saan nga agtaray uray umatake dagiti kabusor.

19. Ania ti masursurotayo iti ulidan ni apostol Pablo?

¹⁹ Nagsayaat nga ulidan ni apostol Pablo iti kinatured ken panagibtur. Adda dagiti tiempo a nariknana a nakapuy. Ngem nakapagibtur ta impaay ni Jehova ti bileg a kasapulanna. (2 Cor. 12:8-10; Fil. 4:13) Maaddaantayo met iti kasta a tured no sipapakumbaba a bigbigentayo a kasapulantayo ti tulong ni Jehova.—Sant. 4:10.

20-21. Ania ti masiguradotayo?

²⁰ Masiguradotayo a dagiti suot ket saan a pannusa ni Jehova. Impasigurado ni Santiago: “No masubok ti maysa, saanna koma nga ibaga: ‘Subsubokennak ti Dios.’ Ta saan a mabalin a masubok ti Dios iti dakes a bambanag, ken saanna met a suboken ti asinoman.” (Sant. 1:13) No patientayo dayta, agbalintayo a nasingsinged iti nadungngo a nailangitan nga Amatayo.—Sant. 4:8.

²¹ Ni Jehova ket “saan nga agbaliw.” (Sant. 1:17) Sinuportaranna dagiti Kristiano idi umuna a siglo kadagiti nakasuotanda, ket tulonganna met ti tunggal maysa kadatayo ita. Sipapasnek nga agpatulongka ken Jehova tapno maaddaanka iti sirib, pammati, ken tured. Sungbatanna dagiti kararagmo. Ket masiguradom a tulongannaka tapno agtalinaedka a naragsak bayat nga ib-ibturam dagiti suot!