Nayanakak iti Quebec City, iti French ti lengguahena a probinsia ti Quebec. Nadungngo dagiti nagannakko a da Louis ken Zélia. Managbabain ni tatangko ken kaykayatna ti agbasa. Magusgustuak ti agsurat ken arapaapko ti agbalin a journalist.

Idi agarup 12 ti tawenko, bimmisita iti balaymi ti maysa a katrabahuan ni tatangko a ni Rodolphe Soucy ken ti maysa a gayyemna, nga agpada a Saksi ni Jehova. Awan unay ti ammok maipapan kadagiti Saksi ni Jehova ken saanak nga interesado iti relihionda. Ngem nagustuak ti lohikal a panangsungbatda kadagiti saludsodmi babaen ti Biblia. Nagustuan met dayta dagiti nagannakko isu a nagpayadalkami iti Biblia.

Iti dayta a tiempo, ages-eskuelaak iti maysa a Katoliko nga eskuelaan. Adda dagiti gundaway nga agsasaritakami kadagiti kaklasek maipapan kadagiti maad-adalko iti Biblia. Idi agangay, naammuan dayta dagiti mannursuromi, a papadi. Imbes nga usarenda ti Biblia a mangpaneknek a kamali ti ibagbagak, maysa kadakuada ti nangakusar kaniak kas rebelde iti sanguanan ti intero a klase! Makapa-stress daydi a situasion, ngem nagsayaatak dayta ta nakitak a saan a maitunos iti ibagbaga ti Biblia ti isursuro ti eskuelaan. Nabigbigko a masapul nga umakarak iti eskuelaan, ket pinalubosandak dagiti nagannakko nga umakar.

Intultuloyko ti nakipagadal iti Biblia, ngem nabayag ti panagrang-ayko ta maamakak a mangasaba iti binalaybalay. Napigsa ti impluensia ti Iglesia Katolika ken kasta unay ti panangbusorda iti panangasabami. Ni Maurice Duplessis a premier  ti Quebec ket nadekket a kaaliado ti simbaan. Gapu iti suportana, minaltrato ken kinabkabil pay ketdi dagiti makapungpungtot a tattao dagiti Saksi. Talaga a kasapulan ti tured a mangasaba kadagidi a tiempo.

Ti maysa a kabsat a nakatulong tapno mapagballigiak ti panagamakko ket ni John Rae, a naggraduar iti maika-9 a klase ti Gilead School. Eksperiensiado ni John, naalumamay, napakumbaba, ken nalaka a maas-asitgan. Manmano a direkta a balakadannak ngem nagadu ti nasursurok iti nasayaat nga ulidanna. Marigatan ni John nga agsao iti French, isu a masansan a kaduaek iti ministerio ken suruak nga agsao iti French. Nakatulong ti pannakikadkaduak ken John tapno makapagdesisionak nga agbalin a maysa a Saksi ni Jehova idi agangay. Sangapulo a tawen kalpasan a damo a naam-ammok dagiti Saksi, nagpabautisarak idi Mayo 26, 1951.

Payunir ti kaaduan iti bassit a kongregasionmi iti Quebec City. Natignayak a nagpayunir gapu iti nasayaat nga impluensiada. Biblia laeng idi ti usarenmi a mangasaba iti binalaybalay. Gapu ta awan ti literaturami, masapul a sursuruenmi ti mas epektibo a panangusar iti Biblia. Isu a tinantandaanak dagiti teksto ti Biblia a pangidepensak iti kinapudno. Ngem adu ti saan a mayat nga agbasa iti uray ania a bersion ti Biblia a saan nga aprobado ti simbaan.

Idi 1952, nagkasarkami ken Simone Patry, a maysa a matalek a kabsat a kakongregasionko. Immakarkami iti Montreal, ket iti uneg ti makatawen, naaddaankami iti anak, ni Lise. Uray no nagsardengakon a payunir sakbay ti kasarmi ken Simone, inkagumaanmi a pagtalinaeden a simple ti biagmi tapno ad-adu ti maaramidanmi kas pamilia kadagiti aktibidad ti kongregasion.

Limmabas pay ti 10 a tawen sakbay a pinanunotko manen ti agpayunir. Idi 1962, bayat ti makabulan a panageskuelami a papanglakayen iti Kingdom Ministry School iti Canada Bethel, nakakuartok ti panglakayen nga agnagan Camille Ouellette. Nagbilibak iti kinaregta ni Camille iti ministerio, lalo ta pamiliado. Iti daydi a tiempo, manmano ti kakabsat a payunir bayat a padpadakkelenda dagiti annakda, ngem kasta ti ikagkagumaan nga aramiden ni Camille. Bayat ti panagkaduami, pinaregtanak nga usigek ti situasionko. Kalpasan ti sumagmamano a bulan, nakitak a mabalinak manen nga agpayunir. Adda  dagiti nangibaga a saan nga umiso ti desisionko, ngem intuloyko latta ken nagtalekak a bendisionan ni Jehova ti panagreggetko a mangpalawa iti ministeriok.

Idi 1964, naapointarankami ken Simone kas special pioneer iti lugarmi a Quebec City, a nagserbianmi iti simmaruno a tawtawen. Iti dayta a tiempo, simmayaaten ti situasion ngem adda latta dagiti bumusbusor iti panangasabami.

Iti maysa a malem ti Sabado, naarestoak idiay Sainte-Marie, maysa a bassit nga ili nga asideg ti Quebec City. Naipanak iti estasion ti polis ken naibaludak gapu ta mangaskasabaak kano nga awan permit-ko. Idi kuan, naipanak iti hues nga agnagan Baillargeon a nauyong a lalaki. Dinamagna no asino ti agbalin nga abogadok. Idi imbagak ti nagan a Glen How, * maysa a pagaammo nga abogado a Saksi, madandanagan a nangibaga: “Ayna! Apay nga isuna?” Pagaammo idi ni Glen How a nalaing nga abogado a mangidepdepensa kadagiti Saksi ni Jehova. Di nagbayag, imbaga ti korte a saanen a maituloy ti kasok.

Gapu iti pannakabusor ti trabahotayo iti Quebec, narigat met ti agbirok iti maabangan a nasayaat a lugar a paggigimongan. Aggigimong laeng ti bassit a kongregasionmi iti nalamiis a garahe. Agus-usar dagiti kakabsat iti oil heater tapno adda pagpapudotanda bayat ti nakalamlamiis a paniempo. Kaaduanna a palawlawanmi dayta iti sumagmamano nga oras sakbay ti gimong bayat a pagiinnestoriaanmi dagiti kapadasanmi.

Makaparagsak a makita a rimmang-ay ti trabaho a panangasaba iti panaglabas ti tawtawen. Idi 1960, sumagmamano laeng ti kongregasion iti Quebec City, Côte-Nord, ken Gaspé Peninsula. Ngem ita, addan nasurok a dua a sirkito kadagita a lugar, ken aggigimongen dagiti kakabsat iti napipintas a Kingdom Hall.

Naawiskami ken Simone nga agserbi iti sirkito idi 1970. Kalpasanna, idi 1973, naawiskami nga agserbi iti distrito. Kadagidi a tawtawen, adu ti naadalko kadagiti nalalaing a kakabsat a kas kada Laurier Saumur * ken David Splane, * nga agpada a nagserbi iti trabaho a panagdaliasat. Kalpasan ti tunggal asamblea, agsaritakami ken David ket mangtedkami iti suhestion iti maysa ken maysa no kasano a mapasayaatmi ti panangisuromi. Malagipko a naminsan, imbaga ni David kaniak: “Léonce, nagustuak diay maudi a palawagmo. Nagmayat, ngem siguro makaaramidak iti tallo a palawag iti amin nga imbagam!” Nakaad-adu ngamin unay nga impormasion ti iramanko kadagiti palawagko. Masapul a sursuruek a paababaen dagita.

Responsabilidad dagiti manangaywan iti distrito a paregtaen dagiti manangaywan iti sirkito.  Ngem adu a kakabsat ti makaam-ammo unay kaniak iti Quebec. Masansan a kayatdak a makadua iti ministerio no bisitaek ti sirkito. Magusgustuak ti makikadua kadakuada iti ministerio, ngem saanko unay a makadkadua ti manangaywan iti sirkito. Naminsan, pinalagipannak ti maysa a naayat a manangaywan iti sirkito: “Mayat met ta ik-ikkam iti panawen dagiti kakabsat, ngem saanmo koma a liplipatan a kasapulak met ti pammaregtam!” Nakatulong kaniak daytoy a naayat a balakad tapno agbalinak a mas balanse.

Makapaladingit ta idi 1976, adda di ninamnama ken nasaem a napasamak. Nagsakit iti nakaro ti ipatpategko nga asawa a ni Simone ket natay. Nakasaysayaat a kadua ta managsakripisio ken ay-ayatenna ni Jehova. Nakatulong ti panagbalinko nga okupado iti ministerio tapno mailiwliwagko ti ladingitko, ket agyamyamanak ken Jehova iti naayat a suportana iti dayta a narigat a tiempo. Idi agangay, inkasarko ni Carolyn Elliott, a naregta a payunir nga Ingles ti lengguahena nga immakar iti Quebec a dakkel ti panagkasapulanna. Nalaka a maas-asitgan ni Carolyn ken talaga nga interesado kadagiti tattao, lalo kadagiti managbabain wenno malidliday. Talaga a dakkel a bendision kaniak ni Carolyn bayat ti panagserbimi iti trabaho a panagdaliasat.

Idi Enero 1978, nadutokanak nga agisuro iti umuna a Pioneer Service School iti Quebec. Madandanaganak a kas kadagiti estudiante ta barbaro kaniak ti kurikulum. Imbag laengen ta adu ti eksperiensiado a payunir iti umuna a klase nga insurok. Uray no siak ti instruktor, adu ti nasursurok kadagiti estudiante!

Idi agangay, idi 1978, naangay ti “Naballigi a Pammati” nga Internasional a Kombension iti Olympic Stadium ti Montreal. Dayta pay laeng ti kadakkelan a kombension iti Quebec, nga inatenderan ti nasurok a 80,000 a tattao. Nadutokanak nga agtrabaho iti News Service Department ti kombension. Adu a journalist ti nakasaritak ket maragsakanak iti adu a positibo nga imbaga ti  media maipapan kadatayo. Nasurok a 20 nga oras a naipabuya iti TV ken naipangngeg iti radio ti pannakainterbiumi, ken ginasut nga artikulo ti nayimprenta maipapan iti dayta. Nagdakkel a panangsaksi dayta!

Idi 1996, adda dakkel a panagbalbaliw iti annongek. Kalpasan ti panagserbik iti Quebec a French ti lengguahena sipud idi nagbautisarak, naibaonak nga agserbi iti Ingles ti lengguahena a distrito iti Toronto. Mariknak a saanak a kualipikado ken maamakak nga agpalawag ta saanak unay a nalaing nga ag-Ingles. Kasapulak a nayonan ti panagkararagko ken ad-adda nga agtalekak ken Jehova.

Madandanaganak idi sakbayak a mangrugi iti dayta nga annongen, ngem maibagak itan a natagiragsakko ti dua a tawen a naragsak a panagserbimi iti Toronto. Siaanus a tinulongannak ni Carolyn tapno manayonan ti kompiansak nga agsao iti Ingles, ken sinuportaran ken pinarparegtadak dagiti kakabsat. Alisto a naaddaankami iti adu a baro a gagayyem.

Malaksid iti dadduma pay nga aktibidad ken panagsagana para iti asamblea iti ngudo ti lawas, masansan a makiramanak iti agarup maysa nga oras iti panangasaba iti binalaybalay iti rabii ti Biernes. Mabalin a pinanunot ti dadduma, ‘Apay a mangasaba isuna ket asamblea inton bigat?’ Ngem nakitak a makapabang-ar no makasarakka iti mayat a makisarita iti ministerio. Uray ita, kanayon a mariknak a naragragsakak kalpasan ti panangasabak.

Idi 1998, naibaonkami manen ken Carolyn iti Montreal kas special pioneer. Iti adu a tawen, karaman iti annongek ti tumulong iti panangorganisar iti special public witnessing ken makipagtrabaho iti news media tapno mailinteg dagiti di umiso nga impormasion maipapan kadagiti Saksi ni Jehova. Ita, maragragsakankami ken Carolyn a mangasaba kadagiti immakar ditoy Canada a mayat nga agsursuro iti ad-adu pay maipapan iti Biblia.

No lagipek ti napalabas nga 68 a tawen a panagserbik kas bautisado nga adipen ni Jehova, mariknak a talaga a nabendisionannak. Maragsakanak unay ta natagiragsakko ti ministeriok ken natulongak ti adu a tattao a mangammo iti kinapudno. Idi dadakkelen ti annak ni Lise a balasangko ken ti manugangko, nangrugidan nga ag-regular pioneer nga agassawa. Maragragsakanak a makakita iti agtultuloy a regtana iti ministerio. Agyamyamanak unay iti nasayaat nga ulidan ken nainsiriban a balakad dagiti kakabsat a nakatulong kaniak a rumang-ay iti naespirituan ken mangasikaso iti nadumaduma nga annongen iti organisasion. Nakitak a makapagtalinaedtayo laeng a matalek iti annongentayo no agtalektayo iti nabileg a nasantuan nga espiritu ni Jehova. (Sal. 51:11) Agtultuloy nga agyamyamanak ken Jehova gapu ta inikkannak iti nakapatpateg a pribilehio a mangidaydayaw iti naganna!​—Sal. 54:6.