1-2. Apay nga inikkannatayo ni Jehova iti gundaway nga agbalin a paset ti pamiliana, ken kasano?

INAWISNATAYO ni Jehova nga agbalin a paset ti pamiliana a buklen dagiti agdaydayaw kenkuana. Anian a nakasaysayaat nga awis! Ti pamiliatayo ket buklen dagidiay nangidedikar iti biagda iti Dios ken mamati iti pangsubbot a daton ti Anakna. Naragsak ti pamiliatayo. Tagtagiragsakentayo itan ti makapnek a biag, ken adda namnamatayo nga agbiag nga agnanayon​—idiay man langit wenno iti Paraiso ditoy daga.

² Gapu iti ayat ni Jehova, inikkannatayo iti gundaway nga agbalin a paset ti pamiliana, nupay dakkel a sakripisio dayta iti biangna. (Juan 3:16) “Ginatang[natayo] iti dakkel a gatad.” (1 Cor. 6:20) Babaen ti subbot, pinagbalin ni Jehova a posible a maaddaantayo iti nasinged a relasion kenkuana. Dakkel a pribilehiotayo nga awagan kas Ama ti katan-okan a Persona iti uniberso. Kasta met, kas inusigtayo iti napalabas nga artikulo, ni Jehova ti kasayaatan nga Ama.

3. Ania dagiti mabalin a maisaludsodtayo? (Kitaen met ti kahon a “ Sipapanunot Kadi Kaniak ni Jehova?”)

³ Mabalin a maisaludsodtayo ti insaludsod ti maysa a mannurat ti Biblia: “Ania ti isubadko ken Jehova gapu iti amin a naimbag nga inaramidna kaniak?” (Sal. 116:12) Ti sungbat ket saantayo a pulos masubadan ti nailangitan nga Amatayo. Ngem gapu iti ayatna, matignaytayo latta a mangayat kenkuana. Insurat ni apostol Juan: “Agayattayo ta isu ti immuna a nagayat kadatayo.” (1 Juan 4:19) Kadagiti ania a pamay-an a maipakitatayo nga ay-ayatentayo ti nailangitan nga Amatayo?

4. Sigun iti Santiago 4:8, apay a masapul nga agreggettayo nga umasideg ken Jehova?

⁴ Kayat ni Jehova nga umasideg ken makisaritatayo kenkuana.  (Basaen ti Santiago 4:8.) Iparparegtana nga “itultuloy[tayo] ti agkararag,” ken kanayon a dumdumngeg. (Roma 12:12) Kanayon nga adda tiempona ken saan a mabannog a dumngeg kadatayo. Dumngegtayo met kenkuana no basaentayo ti Saona, ti Biblia, ken dagiti publikasion a tumulong kadatayo a mangtarus iti dayta. Kasta met, dumngegtayo kenkuana no atentibotayo kadagiti gimong. No kasano a makatulong ti regular a komunikasion tapno agtalinaed a nasinged dagiti annak kadagiti nagannakda, makatulong met ti regular a komunikasion tapno agtalinaedtayo a nasinged ken Jehova.

5. Kasanotayo a mapasayaat ti kalidad dagiti kararagtayo?

⁵ Panunotem no ania ti kalidad ti pannakisaritam iti Dios. Kayat ni Jehova nga ibukboktayo kenkuana ti linaon ti pusotayo babaen ti kararag. (Sal. 62:8) Nasayaat nga isaludsodtayo iti bagitayo: ‘Dagiti kadi kararagko ket kas iti di naimpusuan a natultulad laeng a mensahe, wenno kas iti naimpusuan a mensahe nga insurat ti ima?’ Awan duadua nga ay-ayatem unay ni Jehova, ket kayatmo a pagtalinaeden a natibker ti relasionmo kenkuana. Tapno maaramidmo dayta, masapul a regular a makisaritaka kenkuana. Ibagam kenkuana ti rikriknam. Ibagam dagiti pakaragsakam ken dagiti pakaladingitam. Agtalekka a mabalinmo ti agpatulong kenkuana.

6. Ania ti masapul nga aramidentayo tapno agtalinaedtayo a nasinged iti nailangitan nga Amatayo?

⁶ Tapno agtalinaedtayo a nasinged iti nailangitan nga Amatayo, masapul a kanayon nga agyamantayo kenkuana. Umanamongtayo iti salmista a nangisurat: “O Jehova a Diosko, nakaad-adu ti inaramidmo, dagiti nakaskasdaaw nga aramidmo ken pampanunotem para kadakami. Awan ti kas kenka; no padasek nga ibaga ken estoriaen dagita, diak masaggaysa gapu iti kinaaduda!” (Sal. 40:5) Saantay laeng koma a marikna ti panagyaman; ipakitatayo dayta ken Jehova babaen ti sasao ken aramidtayo. Daytoy ti nakaidumaantayo iti adu a tattao ita. Agbibiagtayo iti lubong a saan nga agyamyaman dagiti tattao iti amin nga ar-aramiden ti Dios para kadakuada. Kinapudnona, ti maysa a pagilasinan nga agbibiagtayo iti “maudi nga al-aldaw” ket saan a managyaman dagiti tattao. (2 Tim. 3:1, 2) Saantay koma a tultuladen dayta a kababalin!

7. Ania ti kayat ni Jehova nga aramidentayo, ken apay?

⁷ Saan a kayat dagiti nagannak nga agririri dagiti annakda no di ket aggagayyemda koma. Kayat met ni Jehova nga agkakatunosan ti amin nga annakna. Kinapudnona, ti ayattayo iti maysa ken maysa ti pakailasinantayo kas pudno a Kristiano. (Juan 13:35) Umanamongtayo iti insurat ti salmista: “Anian a nagsayaat ken anian a makaay-ayo ti sangsangkatunos a panagkakadua dagiti agkakabsat!” (Sal. 133:1) No ay-ayatentayo dagiti kakabsattayo, pampaneknekantayo ken Jehova nga ay-ayatentayo. (1 Juan 4:20) Anian a nagsayaat ti agbalin a paset ti maysa a pamilia a ‘naimbag iti tunggal maysa, sidudungngo a mannakipagrikna’!​—Efe. 4:32.

8. Sigun iti 1 Juan 5:3, ania ti kangrunaan a rason nga agtulnogtayo ken Jehova?

⁸ Namnamaen ni Jehova nga agtulnog dagiti annak kadagiti nagannakda, ken namnamaenna met nga agtulnogtayo kenkuana. (Efe. 6:1) Maikari a pagtulnogantayo ta isu ti Namarsua kadatayo, ti Mangsussustiner iti biagtayo, ken ti kasisiriban iti amin a nagannak. Nupay kasta, ti kangrunaan a rason nga agtulnogtayo ken Jehova ket gapu ta  ay-ayatentayo. (Basaen ti 1 Juan 5:3.) Uray adu ti rason a masapul nga agtulnogtayo ken Jehova, dinatay piliten a mangaramid iti dayta. Inikkannatayo ni Jehova iti sagut a wayawaya nga agpili, isu a naragsak no pilientayo ti agtulnog gapu iti ayattayo kenkuana.

9-10. Apay a napateg nga ammuentayo dagiti pagalagadan ti Dios ken surotentayo dagita?

⁹ Kayat dagiti nagannak a natalged dagiti annakda. Dayta ti makagapu a mangaramidda kadagiti paglintegan tapno maprotektaran dagiti annakda. No agtulnog dagiti annak, ipakpakitada nga agtaltalek ken raraemenda dagiti nagannakda. Ngem adayo a napatpateg ti panangammotayo kadagiti pagalagadan ti nailangitan nga Amatayo ken ti panangsurottayo kadagita. No aramidentayo dayta, ipakpakitatayo nga ay-ayaten ken raraementayo ni Jehova ket magunggonaantayo met. (Isa. 48:17, 18) Ngem saan a magunggonaan dagiti manglaksid ken Jehova ken kadagiti pagalagadanna.​—Gal. 6:7, 8.

¹⁰ No makaay-ayo ken Jehova ti panagbiagtayo, maprotektarantayo iti pisikal, emosional, ken naespirituan a pannakadangran. Ammo ni Jehova ti kasayaatan para kadatayo. Imbaga ni Aurora a taga-United States, “Ammok a kanayon a pagsayaatak ti panagtulnog ken Jehova.” Pudno dayta kadatayo amin. Kasanoka a nagunggonaan iti panagtulnogmo iti naayat a panangiwanwan ni Jehova?

11. Kasano a makatulong kadatayo ti kararag?

¹¹ Tulongannatayo ti kararag nga agbalin a natulnog, uray no narigat dayta. No dadduma,  marigatantayo nga agtulnog ken Jehova, ngem masapul a kanayon a labanantayo ti tendensiatayo nga agbasol. Impakaasi ti salmista iti Dios: “Tignayennak a situtulok nga agtulnog kenka.” (Sal. 51:12) Kuna ni Denise a maysa a regular pioneer, “No marigatanak nga agtulnog iti maysa a bilin ni Jehova, ikararagko nga ikkannak iti bileg a mangaramid iti umiso.” Masiguradotayo a kanayon a sungbatan ni Jehova ti kasta a kararag.​—Luc. 11:9-13.

12. Sigun iti Efeso 5:1, ania ti masapul nga aramidentayo?

¹² Basaen ti Efeso 5:1. Kas “annak a dungdungnguen” ni Jehova, aramidentayo ti amin a kabaelantayo a mangtulad kenkuana. Tuladentayo dagiti kualidadna babaen ti panagbalintayo a naayat, naasi, ken manangpakawan iti sabsabali. No makita dagiti saan a makaam-ammo iti Dios ti nasayaat a kababalintayo, mabalin a matignayda a mangam-ammo kenkuana. (1 Ped. 2:12) Masapul a tuladen dagiti Kristiano a nagannak ni Jehova iti pamay-an a panangtratoda kadagiti annakda. No aramidenda dayta, mabalin a matignay met dagiti annakda a makigayyem iti naayat nga Amatayo.

13. Ania ti masapul a panunotentayo tapno tumuredtayo?

¹³ Ipagpannakkel ti maysa nga ubing ti amana ken maragsakan a mangyestoria iti maipapan kenkuana. Kasta met,  ipagpannakkeltayo ti nailangitan nga Amatayo, ni Jehova, ken kayattayo nga isu ket maam-ammo ti sabsabali. Iti pusotayo, mariknatayo ti insurat ni Ari David: “Ipagpannakkelko ni Jehova.” (Sal. 34:2) Ngem kasanon no managbabaintayo? Kasano nga agbalintayo a natured? Tumuredtayo no panunotentayo a nakaragragsak ni Jehova no isarsaritatayo ti maipapan kenkuana ken no panunotentayo a magunggonaan dagidiay mangam-ammo kenkuana. Paturedennatayo ni Jehova no kasapulan. Tinulonganna nga agbalin a natured dagiti kakabsattayo idi umuna a siglo, ket tulongannatayo met.​—1 Tes. 2:2.

14. Ania ti dadduma a rason a napateg ti makiraman iti trabaho a panagaramid iti ad-adalan?

¹⁴ Saan a mangidumduma ni Jehova, ken naragsak no makitana nga ipakpakitatayo ti ayat iti sabsabali, aniaman ti nalikudanda. (Ara. 10:34, 35) Ti maysa a kasayaatan a pamay-an a maipakitatayo ti ayat iti sabsabali ket ti panangipakaammotayo kadakuada iti naimbag a damag. (Mat. 28:19, 20) Ania ti maaramidan daytoy a trabaho? Dagidiay dumngeg kadatayo mapasayaatda itan ti biagda ken maaddaanda iti namnama nga agbiag nga agnanayon iti masanguanan.​—1 Tim. 4:16.

15-16. Ania dagiti rason nga agragsaktayo?

¹⁵ Ni Jehova ket naayat nga Ama, isu a kayatna nga agbalin a naragsak ti pamiliana. (Isa. 65:14) Adu ti rason a maragsakantayo ita, uray no adda dagiti problematayo. Kas pagarigan, siguradotayo a dungdungnguennatayo ti nailangitan nga Amatayo. Adda umiso a pannakaammotayo iti Sao ti Dios, ti Biblia. (Jer. 15:16) Ken pasetnatayo ti naisangsangayan a pamilia a buklen dagiti tattao a mangay-ayat ken Jehova, mangipatpateg kadagiti nangato a moral a pagalagadanna, ken mangay-ayat iti maysa ken maysa.​—Sal. 106:4, 5.

¹⁶ Makapagtalinaedtayo a naragsak gapu ta sigurado ti namnamatayo a nasaysayaatto ti biag iti masanguanan. Ammotayo nga asidegen nga ikkaten ni Jehova ti amin a managdakdakes ken agbalinto manen a Paraiso ti daga inton agturay ti Pagarianna. Addaantay met iti nagsayaat a namnama a mapagungarto dagiti natay ket makaduadanto manen dagiti ipatpategda. (Juan 5:28, 29) Talaga a nakaragragsakto dayta! Ken kapatgan iti amin, siguradotayo nga iti asidegen a masanguanan, tunggal maysa idiay langit ken ditoy daga ipaaydanto ti dayaw ken debosion a maikari iti naayat nga Amatayo.