1. Ania ti kaipapananna no usarentayo ti abilidadtayo nga agpanunot? (2 Timoteo 4:5)

 NO ADDA dagiti problema, mabalin a masubok ti kinamatalektayo ken Jehova ken iti organisasionna. Ania dagiti mabalintayo nga aramiden? Masapul nga usarentayo ti abilidadtayo nga agpanunot, agtalinaedtayo a siririing, ken patibkerentayo ti pammatitayo. (Basaen ti 2 Timoteo 4:5.) Us-usarentayo ti abilidadtayo nga agpanunot no agtalinaedtayo a kalmado, agpanunottayo a naimbag, ken ikagumaantayo a kitaen ti bambanag maitunos iti panangmatmat ni Jehova. No aramidentayo dagita, ti panagpampanunottayo ket saan nga abaken ti emosiontayo.

2. Ania ti pagsasaritaantayo iti daytoy nga artikulo?

² Iti napalabas nga artikulo, inusigtayo ti tallo a problema a mabalin nga aggapu iti ruar ti kongregasion. Iti daytoy nga artikulo, usigentayo dagitoy tallo a problema nga aggapu iti uneg ti kongregasion a mabalin a mangsubok iti kinamatalektayo ken Jehova: (1) no panagriknatayo ket saan a nasayaat ti trato kadatayo ti maysa a kabsat, (2) no nadisiplinatayo, ken (3) no marigatantayo a mangsurot kadagiti panagbalbaliw iti organisasion. Kadagita a situasion, kasanotayo nga usaren ti abilidadtayo nga agpanunot tapno agtalinaedtayo a matalek ken Jehova ken iti organisasionna?

3. Ania ti mabalin a reaksiontayo no mariknatayo a saan a nasayaat ti trato kadatayo ti maysa a kabsat?

³ Nariknam kadin a saan a nasayaat ti trato kenka ti maysa a kabsat, a mabalin pay ketdi a mangidadaulo iti kongregasion?  Posible a saanna nga inggagara a saktannaka. (Roma 3:23; Sant. 3:2) Ngem mabalin a nakaungetka iti inaramidna. Baka saanka pay ketdin a nakaturog. Nalabit napanunotmo, ‘No adda ti kasta a kabsat iti kongregasion, talaga kadi a daytoy ti organisasion ti Dios?’ Dayta ti kayat ni Satanas a panunotentayo. (2 Cor. 2:11) Ti kasta a negatibo a panagpampanunot ti mabalin a mangisina kadatayo ken Jehova ken iti organisasionna. Isu a no mariknatayo a saan a nasayaat ti trato kadatayo ti maysa a kabsat, kasanotayo nga usaren ti abilidadtayo nga agpanunot ken maliklikan ti negatibo a panagpampanunot?

4. Kasano nga inusar ni Jose ti abilidadna nga agpanunot iti saan a nasayaat a pannakatratona, ken ania dagiti masursurotayo iti ulidanna? (Genesis 50:19-21)

⁴ Saan koma nga agsakit ti nakemmo. Idi tin-edyer ni Jose, saan a nasayaat ti trato kenkuana dagiti manongna. Kagurgurada ken kayat pay ketdi ti dadduma kadakuada a patayen isuna. (Gen. 37:4, 18-22) Idi agangay, inlakoda kas adipen. Isu nga iti agarup 13 a tawen, napasaran ni Jose dagiti nakaro a pannubok. Napanunot ngata ni Jose a saan isunan nga ay-ayaten ni Jehova? Ken impagarupna ngata a binaybay-anen ni Jehova idi kasapulanna unay ti tulong? Saan. Saan a nagsakit ti nakem ni Jose. Inusarna ketdi ti abilidadna nga agpanunot isu a nagtalinaed a kalmado. Idi adda koma gundawayna nga agibales kadagiti kakabsatna, saanna nga inaramid dayta. Impakitana ti ayat ken pinakawanna ida. (Gen. 45:4, 5) Inaramid dagita ni Jose ta nagpanunot a naimbag. Imbes nga agpokus kadagiti problemana, nagpokus iti kapatgan​—ti panggep ni Jehova. (Basaen ti Genesis 50:19-21.) Ania dagiti masursurotayo? No saan a nasayaat ti pannakatratom, saan koma nga agsakit ti nakemmo ken Jehova wenno dimo ipagarup a binaybay-annakan. Panunotem ketdi no kasanonaka a tultulongan a mangibtur iti pannubok. Ken no saan a nasayaat ti trato kenka ti dadduma, ikagumaam nga abbongan iti ayat dagiti pagkapuyanda.​—1 Ped. 4:8.

5. Kasano nga inusar ni Miqueas ti abilidadna nga agpanunot idi nariknana a saan a nasayaat ti pannakatratona?

⁵ Kitaentayo ti kapadasan ti maysa a panglakayen a taga-South America a ni Miqueas. b Nalagipna nga adda idi tiempo a saan a nasayaat ti panangtrato kenkuana ti dadduma a panglakayen. Imbagana: “Idi pay la a napadasak ti kasta nga stress. Mabutbutengak. Saanak a makaturog iti rabii, ken agsangsangitak ta panagriknak, awanen ti maaramidak.” Ngem inusar ni Miqueas ti abilidadna nga agpanunot ken inkagumaanna a kontrolen ti rikriknana. Kanayon nga inkararagna nga ikkan ni Jehova iti nasantuan nga espiritu ken bileg tapno makapagibtur. Nag-research met kadagiti publikasiontayo iti impormasion a makatulong kenkuana. Ania dagiti masursurotayo? No mariknam a saan a nasayaat ti trato kenka ti maysa a kabsat, agtalinaedka a kalmado ken ikagumaam a kontrolen ti aniaman a negatibo a marikriknam. Dimo ammo no apay a naibaga wenno naaramidna dayta. Isu nga agkararagka ken Jehova, ken kiddawem a tulongannaka a mangkita iti bambanag maitunos iti panangmatmat dayta a kabsat. Iti kasta, saanmo a mapanunot nga inggagara dayta a kabsat a saktan ti riknam isu a mapakawanmo. (Prov. 19:11) Laglagipem nga ammo ni Jehova ti situasionmo ken ikkannaka iti bileg a kasapulam nga agibtur.​—2 Cron. 16:9; Ecl. 5:8.

6. Apay a napateg a maawatantayo a ti disiplina ni Jehova ket ebidensia nga ay-ayatennatayo? (Hebreo 12:5, 6, 11)

⁶ Mabalin a masaktan ti riknatayo no madisiplinatayo. Ngem no dayta laeng ti  sangkapanunottayo, baka tagibassitentayo ti disiplina, ken mariknatayo a saan a nainkalintegan wenno naulpit unay dayta. Baka ditay no kuan maawatan a ti disiplina ket ebidensia nga ay-ayatennatayo ni Jehova. (Basaen ti Hebreo 12:5, 6, 11.) No paturayentayo ti emosiontayo, ik-ikkantayo iti oportunidad ni Satanas a manggundaway iti riknatayo. Dina kayat nga awatentayo ti disiplina. Dakdakes pay, kayatnatayo nga iyadayo ken Jehova ken iti kongregasion. No nadisiplinaka, kasanom nga usaren ti abilidadmo nga agpanunot?

7. (a) Kas makita iti ladawan, kasano nga inusar ni Jehova ni Pedro kalpasan nga inakseptarna ti disiplina? (b) Ania dagiti masursurom iti ulidan ni Pedro?

⁷ Akseptarem ti disiplina, ken mangaramidka kadagiti panagbalbaliw. Saan la a naminsan a kinorehir ni Jesus ni Pedro iti sango ti dadduma nga apostol. (Mar. 8:33; Luc. 22:31-34) Napabainan la ketdi ni Pedro! Ngem nagtalinaed a matalek ken Jesus. Inakseptarna ti disiplina ken nakasursuro kadagiti kamalina. Idi agangay, binendisionan ni Jehova ti kinamatalek ni Pedro ket inikkanna kadagiti nadagsen a responsabilidad iti kongregasion. (Juan 21:15-17; Ara. 10:24-33; 1 Ped. 1:1) Ania dagiti masursurotayo iti ulidan ni Pedro? Pagsayaatantayo ken ti dadduma no ditay sangkapanunot ti pannakaibabaintayo. Akseptarentayo ketdi ti disiplina ken mangaramidtayo kadagiti panagbalbaliw. No aramidentayo dagita, ad-adda nga usarennatayo ni Jehova ken makatulongtayo kadagiti kakabsat.

8-9. Ania ti damo a narikna ni Bernardo idi nadisiplina, ngem ania ti nakatulong tapno makorehirna ti panagpampanunotna?

⁸ Kitaentayo ti napasamak ken ni Bernardo a taga-Mozambique. Naikkat kas panglakayen. Ania ti damo a nariknana? Imbagana: “Nagsakit idi ti nakemko ta diak maakseptar ti disiplina a naawatko.” Madanagan ta awanen ti maiparangna a rupana kadagiti kakongregasionna. Inaminna: “Sumagmamano met a bulan ti napalabas sakbay a naaddaanak iti umiso a panangmatmat iti napasamak ken tapno agtalekak manen ken Jehova ken iti organisasionna.” Ania ti nakatulong ken Bernardo tapno mailinteg ti panagpampanunotna?

⁹ Kinorehir ni Bernardo ti panagpampanunotna. Inlawlawagna: “Idi panglakayenak pay, us-usarek ti Hebreo 12:7 tapno matulongak ti dadduma a maaddaan iti umiso a panangmatmat iti disiplina ni Jehova. Insaludsodko iti bagik, ‘Siasino ti pagaplikaran daytoy  a teksto?’ Amin nga agdaydayaw ken Jehova​—a pakairamanak.” Kalpasanna, nagbalbaliw ni Bernardo ket insublina ti panagtalekna ken Jehova ken iti organisasionna. Inggaggagetna ti nagbasa iti Biblia ken nagutob. Uray no mabain a sumango kadagiti kakabsat, nakikadua kadakuada iti ministerio ken nakipaset kadagiti gimong. Idi agangay, naisubli kas panglakayen. No nadisiplinaka kas ken Bernardo, saan koma a ti bain ti sangkapanunotmo. Akseptarem ketdi ti balakad ken agbalbaliwka. c (Prov. 8:33; 22:4) No aramidem dagita, masiguradom a bendisionannaka ni Jehova ta nagtalinaedka a matalek kenkuana ken iti organisasionna.

10. Ania a panagbalbaliw iti organisasion ti mabalin a nangsubok iti kinamatalek ti dadduma nga Israelita a lallaki?

¹⁰ Mabalin a masubok ti kinamatalektayo no adda dagiti panagbalbaliw iti organisasion. No ditay agannad, mabalin a dagita ti mangisina kadatayo ken Jehova. Kas pagarigan, kitaentayo no kasano a naapektaran ti dadduma nga Israelita idi adda urnos a nabaliwan gapu iti kaaddan ti Mosaiko a Linteg. Sakbay nga inted ni Jehova ti Linteg, dagiti ulo ti pamilia ti mangaramid kadagiti trabaho dagiti papadi. Agaramidda iti altar ken agidatonda ken Jehova para iti pamiliada. (Gen. 8:20, 21; 12:7; 26:25; 35:1, 6, 7; Job 1:5) Ngem idi addan ti Linteg, naikkaten dayta a pribilehio kadagiti ulo ti pamilia. Nangdutok ni Jehova kadagiti papadi iti pamilia ni Aaron tapno isuda ti agidaton. Sipud idin, no aramiden ti maysa nga ulo ti pamilia dagiti trabaho ti maysa a padi ngem saan met a kapamilia ni Aaron, masapul a mapapatay. d (Lev. 17:3-6, 8, 9) Dayta ngata a panagbalbaliw ti rason a nagrebelde kada Moises ken Aaron da Kore, Datan, Abiram, ken ti 250 a panguluen? (Num. 16:1-3) Posible. Ngem aniaman ti rason, saan a nagtalinaed a matalek ken Jehova ni Kore ken dagiti kakaduana. No masubok ti kinamatalekmo gapu kadagiti panagbalbaliw iti organisasion, ania ti mabalinmo nga aramiden?

11. Ania dagiti masursurotayo iti ulidan ti dadduma a Cohatita a Levita?

¹¹ Naan-anay a suportaram dagiti panagbalbaliw iti organisasion. Bayat ti panagdaliasat dagiti Israelita iti let-ang, espesial ti trabaho dagiti Cohatita. Kada umakar dagiti Israelita, bagkaten ti dadduma a Cohatita ti lakasa ti tulag a makitkita ti amin a tattao. (Num. 3:29, 31; 10:33; Jos. 3:2-4) Naisangsangayan a pribilehio! Ngem nagbaliw dayta idi addan dagiti Israelita iti Naikari a Daga. Saanen a kasapulan a kanayon a mayakar ti Lakasa. Isu nga idi arin ni Solomon, sabalin ti trabaho ti dadduma a Cohatita. Adda parakanta, parabantay iti ruangan, ken mangasikaso kadagiti pagidulinan. (1 Cron. 6:31-33; 26:1, 24) Awan ti pakabasaan a nagreklamo wenno nagkiddaw dagiti Cohatita iti natantan-ok a trabaho gapu ta espesial idi ti trabahoda. Ania dagiti masursurotayo? Naimpusuan a suportaram dagiti panagbalbaliw iti organisasion ni Jehova, agraman ti aniaman a mangapektar iti asaynmentmo. Naragsakka latta koma aniaman ti maawatmo nga asaynment. Laglagipem a saan a ti asaynmentmo ti pangrukodan ni Jehova iti kinapategmo. Adayo a napatpateg kenkuana ti panagtulnogmo ngem iti aniaman nga asaynmentmo.​—1 Sam. 15:22.

12. Ania ti narikna ni Zaina idi na-reassign manipud iti Bethel?

 ¹² Kitaentayo ti napasamak iti sister a ni Zaina a taga-Middle East. Nabaliwan ti asaynmentna isu a naawan kenkuana ti ipatpategna a pribilehio. Na-reassign kas special pioneer kalpasan ti nasurok a 23 a tawen a panagserbina iti Bethel. Imbagana: “Nakigtotak unay idi nabaliwan ti asaynmentko. Panagriknak, awan ti serserbik ken sangkadamagko iti bagik, ‘Ania ti nagkurangak?’” Lallalo a nalidayan ta imbaga ti dadduma a kakongregasionna: “No koma linalaingmo, saanka koma a na-reassign.” Iti sumagmamano a tiempo, naupay ni Zaina isu a rinabii nga agsangsangit. Ngem imbagana: “Nikaanoman, diak pulos pinagduaduaan ti organisasion wenno ti ayat ni Jehova.” Kasano nga inusar ni Zaina ti abilidadna nga agpanunot?

13. Ania ti inaramid ni Zaina tapno malabananna dagiti negatibo a riknana?

¹³ Nalabanan ni Zaina dagiti negatibo a riknana. Kasano? Binasana dagiti artikulo kadagiti publikasiontayo a maitutop iti situasionna. Nagdakkel ti naitulong kenkuana ti artikulo a “Maparmekyo ti Pannakaupay!” iti Pebrero 1, 2001 a ruar Ti Pagwanawanan. Inlawlawag dayta nga artikulo ti narikna met ni Marcos, a nangisurat idi iti Biblia, idi nabaliwan ti asaynmentna. Malagip ni Zaina, “Ti ulidan ni Marcos ti agas ti pannakaupayko.” Imbes nga iputputong ni Zaina ti bagina, nagtalinaed a nasinged kadagiti gagayyemna, ken dina imbilang ti bagina a nakapimpiman. Imbagana nga agtigtignay ti espiritu ni Jehova iti organisasionna ken ipatpateg isuna dagiti kakabsat a mangidadaulo. Ngem naamirisna met a masapul nga aramiden ti organisasion ti Dios ti kasayaatan tapno mairingpas ti trabaho ni Jehova.

14. Ania a panagbalbaliw iti organisasion ti nakita ni Vlado a narigat nga akseptaren, ngem ania ti nakatulong kenkuana?

¹⁴ Ni Vlado ket agtawen iti 73 ken maysa a panglakayen idiay Slovenia. Idi damo, marigatan a mangakseptar iti pannakaitipon ti kongregasionna iti sabali a kongregasion ken saanen a mausar ti dati a Kingdom Hall a paggigimonganda. Kunana: “Diak maawatan no apay a masapul a maipaserra ti kasta kapintas a Kingdom Hall. Nasaktanak ta kalkalpasmi la idi nga i-renovate. Karpinteroak, ken siak ti nangaramid iti dadduma a baro a muebles. Maysa pay, gapu iti panagtipon  ti dua a kongregasion, adu ti nabaliwan ket narigat dayta para kadakami a nataenganen.” Ania ti nakatulong ken Vlado a mangsurot iti dayta nga urnos? Inlawlawagna: “Kanayon a bendisionannatayo ni Jehova no surotentayo dagiti panagbalbaliw iti organisasionna. Dagita a panagbalbaliw ti mangisagsagana kadatayo iti daddadakkel a panagbalbaliw iti masanguanan.” Marigrigatanka kadi nga ag-adjust iti pannakaitipon ti kongregasionyo iti sabali wenno gapu ta nabaliwan ti asaynmentmo? Masiguradom a maawatan ni Jehova ti riknam. No suportaram dagita a panagbalbaliw ken agtalinaedka a matalek ken Jehova ken iti organisasion nga us-usarenna, sigurado a bendisionannaka.​—Sal. 18:25.

15. Kasanotayo nga usaren ti abilidadtayo nga agpanunot no maipasangotayo kadagiti problema nga aggapu iti uneg ti kongregasion?

¹⁵ Bayat nga umas-asideg ti panagpatingga daytoy sistema ti bambanag, ekspektarentayo nga adda dagiti problema nga aggapu iti uneg ti kongregasion. Mabalin a dagita ti mangsubok iti kinamatalektayo ken Jehova. Masapul ngarud nga usarentayo ti abilidadtayo nga agpanunot. No panagriknam ket saan a nasayaat ti trato kenka ti maysa a kabsat, saan koma nga agsakit ti nakemmo. No nadisiplinaka, saanka nga agpokus iti bain. Akseptarem ketdi ti balakad ken agbalbaliwka. No met naapektaranka kadagiti naaramid a panagbalbaliw iti organisasion ni Jehova, naimpusuan nga akseptarem dagita ken surotem dagiti urnos.

16. Kasano a mapagtalinaedmo ti panagtalekmo ken Jehova ken iti organisasionna?

¹⁶ Makapagtalekka ken Jehova ken iti organisasionna uray no masubok ti kinamatalekmo. Ngem tapno maaramidmo dayta, masapul nga usarem ti abilidadmo nga agpanunot, kayatna a sawen, agtalinaedka a kalmado, agpanunotka a naimbag, ken kitaem ti bambanag maitunos iti panangmatmat ni Jehova. Gagetam nga adalen ti kabibiag dagiti karakter iti Biblia a napagballigianda dagiti problemada ken utobem ti ulidanda. Agpatulongka ken Jehova babaen ti kararag. Ken dimo pulos isinsina ti bagim iti kongregasion. No aramidem dagita, dinakanto maisina ni Satanas manipud ken Jehova wenno iti organisasionna, aniaman ti mapasamak.​—Sant. 4:7.