1-2. (a) Ania ti inaramid ni Jesus iti rabii sakbay a napapatay? (b) Ania dagiti saludsod a pagsasaritaantayo iti daytoy nga artikulo?

 RABII idi ti Huebes, Nisan 14, 33 C.E. Dandani idin matraidor, maukom, makondenar, maparparigat, ken mapapatay ni Jesus. Kalkalpas la idi ti espesial a pangrabii a kaduana dagiti matalek nga apostolna iti makinngato a kuarto. Kalpasan la unay dayta a pannangan, pinaregtana dagiti apostolna. Idi dandanidan pumanaw, adda nakapatpateg nga inkararag ni Jesus. Insurat ni apostol Juan dayta a kararag a mabasa iti Juan kapitulo 17.

² Ania ti isuro ti kararag ni Jesus maipapan kadagiti pakaseknanna iti daydi a tiempo? Kasano nga ipakita dayta a kararag no ania ti kapatgan kenkuana bayat ti panagbiagna ditoy daga? Pagsasaritaantayo dagiti sungbat kadagita a saludsod.

“IMPAKAAMMOK KADAKUADA TI NAGANMO”

3. Ania ti imbaga ni Jesus maipapan iti nagan ni Jehova, ken ania ti kayatna a sawen? (Juan 17:​6, 26)

³ Iti kararag ni Jesus, imbagana: “Impakaammok kadakuada ti naganmo.” Kinapudnona, namindua a dinakamatna nga impakaammona ti nagan ni Jehova kadagiti adalanna. (Basaen ti Juan 17:​6, 26.) Ania ti kayatna a sawen? Inlawlawagna kadi kadagiti adalanna a ti nagan ti Dios ket Jehova? Judio dagiti adalan ni Jesus, isu nga ammodan a Jehova ti nagan ti Dios. Rinibu a daras a makita dayta iti Hebreo a Kasuratan. Isu a ti tuktukoyen ni Jesus ket saan a ti personal a nagan ti Dios. Imbes ketdi, ti tuktukoyenna ket ti irepresentar dayta a nagan. Impakaammona no siasino a talaga ni Jehova a Dios, agraman dagiti panggepna, dagiti inaramid ken aramidennanto, ken dagiti kualidadna. Naaramid dayta ni Jesus ta isu laeng ti talaga a makaam-ammo ken Jehova.

4-5. (a) Kasano nga agbalin a nakapatpateg kadatayo ti nagan ti maysa a tao? Mangted iti pagarigan. (b) Kasano a dagiti adalan ni Jesus mas naam-ammoda ti nagan ni Jehova?

 ⁴ Kas pagarigan, imadyinem nga adda kakongregasionyo a panglakayen nga agnagan David. Maysa met isuna a doktor. Adun a tawen nga am-ammom dayta a brother. Maysa nga aldaw, delikado ti situasionmo isu a kasapulam ti agpadoktor. Intaraydaka iti ospital. Imbag laengen ta idiay nga agtrabtrabaho dayta a panglakayen a doktor. Gapu kenkuana, nasalbar ti biagmo. Saan kadi a mas napatpateg kenka itan dayta a brother, a no mangngegmo ti naganna ket mapanunotmo a dagus ti inaramidna kenka? Siempre! Ibilbilangmon ni David, saan laeng a kas maysa a panglakayen, no di ket kas iti doktor a nangsalbar iti biagmo.

⁵ Iti umasping a pamay-an, ammon dagiti adalan ni Jesus ti nagan ni Jehova. Ngem nagbalin dayta a napatpateg kadakuada gapu ta tinulongan ida ni Jesus a mas mangam-ammo ken Jehova. Apay a maibagatayo dayta? Gapu ta tinulad ni Jesus ti Amana iti amin nga imbaga ken inaramidna. Dagiti apostol ad-adda ngarud a ‘naam-ammoda’ ni Jehova idi dimngegda iti pamay-an ni Jesus a nangisuro ken idi pinaliiwda ti panangtratona kadagiti tattao.—Juan 14:9; 17:3.

TI “NAGANMO NGA INTEDMO KANIAK”

6. Ania ti kayat a sawen ni Jesus idi imbagana nga inted kenkuana ni Jehova ti naganna? (Juan 17:​11, 12)

⁶ Idi inkararagan ni Jesus dagiti adalanna, imbagana: “Aywanam ida maigapu iti naganmo nga intedmo kaniak.” (Basaen ti Juan 17:​11, 12.) Kayat kadi a sawen dayta nga agbalinen a Jehova ti nagan ni Jesus? Saan. Iti kararag ni Jesus, tinukoyna ti nagan ni Jehova kas ti “naganmo.” No kasta, saan a nagbalin a Jehova ti personal a naganna. Ania ngarud ti kayat a sawen ni Jesus idi imbagana a naited kenkuana ti nagan ti Dios? Umuna, ni Jesus ti pannakabagi ken Pannakangiwat ni Jehova. Immay iti nagan ti Amana ken nangaramid kadagiti milagro iti nagan ti Amana. (Juan 5:43; 10:25) Maikadua, ti kaipapanan ti nagan ni Jesus ket “Ni Jehova ti Mangisalakan.” No kasta, ti nagan ni Jehova ket karaman iti kaipapanan ti nagan ni Jesus.

7. Apay a makapagsao ni Jesus iti nagan ni Jehova? Mangted iti pagarigan.

⁷ Tapno maawatantayo no apay a makapagsao ni Jesus iti nagan ni Jehova, panunotentayo daytoy a pagarigan. Ti maysa nga ambassador (embahador) ti pannakabagi ti presidente ti pagilianna. Mabalin nga agsao isuna para iti presidente ken maibilang dayta a kasla naggapu a mismo iti presidente. Iti umasping a pamay-an, adda autoridad ni Jesus nga agsao iti nagan ni Jehova gapu ta isu ti pannakabagi ti Amana.—Mat. 21:9; Luc. 13:35.

8. Apay a makuna nga “adda” ken Jesus ti nagan ni Jehova sakbay pay nga immay ditoy daga? (Exodo 23:​20, 21)

⁸ Sigun iti Biblia, ni Jesus ti Sao gapu ta isu ti inusar ni Jehova a mangipakaammo kadagiti anghel ken tattao iti kayatna a maammuan ken aramidenda. (Juan 1:​1-3) Posible a ni Jesus met ti anghel nga imbaon ni Jehova a mangaywan kadagiti Israelita bayat ti kaaddada iti let-ang. Imbaga ni Jehova kadagiti Israelita no apay a masapul nga agtulnogda iti dayta nga anghel: “Gapu ta adda kenkuana ti naganko.” a (Basaen ti Exodo 23:​20, 21.) Ti nagan ni Jehova ket “adda” ken Jesus gapu ta isu ti pannakabagi ni Jehova ken isu ti kangrunaan  a mangalangon ken mangsantipikar iti nagan ti Amana.

“AMA, PADAYAGEM TI NAGANMO”

9. Kasano kapateg ken Jesus ti nagan ni Jehova? Ilawlawag.

⁹ Kas napagsasaritaantayo, sakbay pay nga immay ni Jesus ditoy daga, ti nagan ni Jehova ti kapatganen kenkuana. Isu met la gayam nga idi adda ditoy daga, impakitana iti amin nga inaramidna a ti nagan ni Jehova ti kapatgan kenkuana! Idi dandanin agpatingga ti ministerio ni Jesus, kiniddawna ken Amana: “Ama, padayagem ti naganmo.” Dagus a simmungbat ti Amana iti napigsa a timek manipud langit: “Pinadayagko dayta ket padayagekto manen.”—Juan 12:28.

10-11. (a) Kasano nga impadayag ni Jesus ti nagan ni Jehova? (Kitaen met ti ladawan.) (b) Apay a masapul a masantipikar ken maalangon ti nagan ni Jehova?

¹⁰ Impadayag met ni Jesus ti nagan ti Amana. Kasano? Ti maysa a pamay-an ket impakaammona kadagiti tattao dagiti nagsayaat a kualidad ken aramid ti Amana. Ngem saan la a dayta ti karaman iti panangipadayag iti nagan ni Jehova. Masapul met a masantipikar ti nagan ni Jehova ken maalangon ti reputasionna. b Impakita ni Jesus ti kinapateg dayta idi insurona kadagiti pasurotna ti pagtuladan a kararag. Imbagana: “Amami nga adda iti langit, masantipikar koma ti naganmo.”—Mat. 6:9.

¹¹ Apay a masapul a masantipikar ken maalangon ti nagan ni Jehova? Ngamin, idiay hardin ti Eden, adda dagiti kinaulbod nga imbaga ni Satanas a Diablo maipapan ken Jehova  a Dios. Sigun ken Satanas, ulbod kano ni Jehova ken adda nasayaat nga ipapaidamna kada Adan ken Eva. (Gen. 3:​1-5) Kayat met a paruaren ni Satanas a saan a nasayaat ti panangituray ni Jehova. Dagita nga ulbod a pammabasol ni Satanas ket direkta a panangdadaelna iti reputasion wenno nagan ni Jehova. Idi tiempo ni Job, imbaga met ni Satanas nga agserserbi laeng dagiti tattao ken Jehova, gapu kadagiti bendision a maaw-awatda manipud Kenkuana. Imbaga pay ti Diablo a no masuot ken agrigat dagiti tattao, sumardengdan nga agserbi ken Jehova. Ngamin, saanda met a talaga nga ay-ayaten ni Jehova. (Job 1:​9-11; 2:4) Tiempo ti kasapulan tapno mapaneknekan no asino ti ulbod—ni Jehova wenno ni Satanas.

“ITEDKO TI BIAGKO”

12. Ania ti situtulok nga inaramid ni Jesus gapu iti panagayatna iti nagan ni Jehova?

¹² Ay-ayaten ni Jesus ni Jehova. Gapu iti dayta, inaramidna ti amin a kabaelanna tapno masantipikar ken maalangon ti nagan ni Jehova. “Itedko ti biagko,” imbaga ni Jesus. (Juan 10:​17, 18) Wen, situtulok pay ketdi ni Jesus a matay para iti nagan ni Jehova. c Ti kaunaan a dua a perpekto a tattao a da Adan ken Eva tinallikudanda ni Jehova ken dimmasigda ken Satanas. Ngem saan a kasta ti inaramid ni Jesus. Situtulok nga immay ditoy daga tapno paneknekanna nga ay-ayatenna ni Jehova. Inaramid dayta ni Jesus babaen ti panagtulnogna ken Jehova iti amin nga inaramid ken imbagana. (Heb. 4:15; 5:​7-10) Nagtalinaed a matalek agingga a natay iti kayo a pagtutuokan. (Heb. 12:2) Gapu iti dayta, napaneknekanna nga ay-ayatenna ni Jehova ken ti naganna.

13. Apay a ni Jesus ti kasayaatan a mangpaneknek nga ulbod ni Satanas? (Kitaen met ti ladawan.)

¹³ Iti amin nga inaramid ni Jesus, pinaneknekanna a ti ulbod ket ni Satanas, saan a ni Jehova! (Juan 8:44) Awanen ti asino pay a tao a nagbiag ditoy daga a makaam-ammo unay ken Jehova no di ni Jesus. No koma agpaypayso dagiti akusasion ni Satanas kontra ken Jehova, sigurado la ketdi nga ammo koma dagita ni Jesus. Ngem determinado ni Jesus a mangidepensa iti reputasion wenno nagan ni Jehova, gapu ta ammona nga ulbod dagita nga akusasion. Ket uray idi inikkaten ni Jehova ti proteksionna kenkuana, situtulok latta ni Jesus a matay ken agtalinaed a matalek imbes a tallikudanna ti naayat nga Amana.—Mat. 27:46. d

 “INLEPPASKO TI TRABAHO NGA INTEDMO”

14. Kasano a ginunggonaan ni Jehova ti kinamatalek ni Jesus?

¹⁴ Iti kararag ni Jesus iti rabii sakbay a natay, imbagana: “Inleppasko ti trabaho nga intedmo.” Nagtalek a gunggonaan ni Jehova ti kinamatalekna. (Juan 17:​4, 5) Umiso laeng a nagtalek ni Jesus iti Amana. Ngamin, saan a binaybay-an ni Jehova nga agtalinaed isuna iti tanem. (Ara. 2:​23, 24) Pinagungarna ni Jesus ken inikkanna iti nangatngato a posision idiay langit. (Fil. 2:​8, 9) Idi agangay, nagturayen ni Jesus kas Ari ti Pagarian ti Dios. Anianto ti aramiden dayta a Pagarian? Kastoy ti ibaga kadatayo ti maikadua a paset ti pagtuladan a kararag: “Umay koma ti Pagariam. Maaramid koma ti pagayatam [Jehova] ditoy daga, a kas sadi langit.”—Mat. 6:10.

15. Anianto pay dagiti aramiden ni Jesus?

¹⁵ Iti asidegen a masanguanan, makigubatto ni Jesus kadagiti kabusor ti Dios ken dadaelenna dagiti managdakdakes inton Armagedon. (Apoc. 16:​14, 16; 19:​11-16) Di agbayag kalpasan dayta, itapuaknanto ni Satanas iti “nakaun-uneg nga abut,” iti kasasaad a kasla natay, nga awan a pulos ti maaramidanna. (Apoc. 20:​1-3) Kalpasanna, isublinto ni Jesus ti talna ditoy daga. Tulongannanto dagiti tattao nga agbalin a perpekto bayat ti Sangaribu a Tawen a Panagturayna. Pagungarennanto dagiti natay. Pagbalinennanto ti intero a daga a paraiso. Matungpalton ti panggep ni Jehova!—Apoc. 21:​1-4.

16. Anianto ti kasasaad kalpasan ti Sangaribu a Tawen a Turay?

¹⁶ Ania ti manamnamatayo a kasasaad kalpasan ti Sangaribu a Tawen a Turay? Awanton ti basol ken kinaimperpekto. Saanton a kasapulan dagiti tattao ti dumawat iti pammakawan para kadagiti basolda maibatay iti subbot. Saantayto metten a kasapulan ti mangibabaet wenno Nangato a Padi. “Mapukawto” metten “ti maudi a kabusor, ni patay.” Awanton ti nagyan  dagiti tanem. Agbiagto manen dagiti natay. Perpektonton ti amin a tattao ditoy daga.—1 Cor. 15:​25, 26.

17-18. (a) Anianto ti mapasamak kalpasan ti Sangaribu a Tawen a Turay? (b) Anianto ti aramiden ni Jesus inton malpasen ti panagturayna? (1 Corinto 15:​24, 28) (Kitaen met ti ladawan.)

¹⁷ Anianto pay ti mapasamak kalpasan ti Sangaribu a Tawen a Turay? Nakaes-espesial ti mapasamakto iti dayta a tiempo. Awanton ti asinoman nga agduadua a ni Jehova ti nasantuan ken patas a Dios. Apay? Idiay ngamin hardin ti Eden, pinagparang ni Satanas nga ulbod kano ni Jehova ken saan a naayat ti panangiturayna kadagiti tattao. Ngem manipud iti dayta a tiempo, maulit-ulit a pinaneknekan dagiti mangidaydayaw ken mangraraem ken Jehova a ti panangiturayna ti kasayaatan. Kalpasan ngarud ti Sangaribu a Tawen a Turay, naan-anayton a naalangon ti reputasion ni Jehova. Napaneknekannanton a talaga nga isu ti naayat a nailangitan nga Amatayo.

¹⁸ Mapaneknekanto met laengen a kinaulbod ti amin nga akusasion ni Satanas kontra ken Jehova. Anianto ti aramiden ni Jesus kalpasan ti panagturayna? Tuladennanto kadi ni Satanas ken agrebelde ken Jehova? Saan! (Basaen ti 1 Corinto 15:​24, 28.) Isublinto ni Jesus ti Pagarian iti Amana. Agpasakupto iti panangituray ni Jehova. Wen, saan a kas ken Satanas, situtulok ni Jesus a mangisubli iti amin nga autoridad ken Jehova. Apay? Ay-ayatenna ngamin ti Amana.

19. Kasano kapateg ken Jesus ti nagan ni Jehova?

¹⁹ Ditay ngarud pakasdaawan no apay a situtulok nga inted ni Jehova ken Jesus ti naganna! Pinaneknekan ni Jesus nga isu ti perpekto a pannakabagi ti Amana. Kasano ngarud kapateg ken Jesus ti nagan ni Jehova? Dayta ti kapatgan kenkuana! Situtulok a natay para iti dayta a nagan ken situtulok a mangisubli iti amin ken Jehova kalpasan ti Sangaribu a Tawen a Turay. Kasanotayo met a matulad ti ulidan ni Jesus? Ammuentayo ti sungbat dayta a saludsod iti sumaruno nga artikulo.