1. Apay a makunatayo nga agbibiagtayon iti makapagagar a tiempo?

 AGBIBIAGTAYON iti makapagagar a tiempo! Inaldaw a makitkitatayo a matungtungpalen dagiti padto iti Biblia. Kas pagarigan, makitkitatayo nga agkinkinnompetensia “ti ari ti amianan” ken “ti ari ti abagatan” tapno isuda ti agbalin a kabilgan iti lubong. (Dan. 11:​40, ftn.) Makitkitatayo met a maikaskasaban ti naimbag a damag ti Pagarian ti Dios iti intero a daga ket minilionen ti nangpili nga agserbi ken Jehova. (Isa. 60:22; Mat. 24:14) Ken makaaw-awattayo met iti aglaplapusanan a naespirituan a taraon “iti umiso a tiempo.”—Mat. 24:​45-47.

2. Ania ti masiguradotayo, ngem ania ti masapul a bigbigentayo?

² Tultulongannatayo ni Jehova tapno lumawag ti pannakaawattayo kadagiti padpadaanantayo a napateg a pasamak iti masanguanan. (Prov. 4:18; Dan. 2:28) Masiguradotayo nga inton mangrugi ti dakkel a rigat, ammotayton ti amin a masapul a maammuantayo tapno makapagibturtayo a simamatalek ken agkaykaysatayo uray iti dayta a narigat a tiempo. Ngem masapul a bigbigentayo nga adda dagiti saantayo nga ammo maipapan iti masanguanan. Iti daytoy nga artikulo, pagsasaritaantayo nga umuna no apay a masapul nga usigentayo manen dagiti dati nga ibagbagatayo maipapan iti dadduma kadagitoy a pasamak. Kalpasanna, pagsasaritaantayo dagiti ammotayo maipapan iti masanguanan ken no anianto ti aramiden ti nailangitan nga Amatayo.

 TI SAANTAYO NGA AMMO

3. Iti napalabas, ania ti ibagbagatayo a mapasamak kadagiti di manamati apaman a mangrugi ti dakkel a rigat, ken apay a kasta idi ti konklusiontayo?

³ Iti napalabas, ibagbagatayo a no mangrugin ti dakkel a rigat, awan metten ti gundaway dagiti di manamati a mangipakita iti pammatida ken Jehova ken maisalakan iti Armagedon. Kasta idi ti konklusiontayo ta patientayo a dagiti pasamak idi Layus ket adda dakdakkel a kaitungpalanna iti masanguanan. Kas pagarigan, ibagbagatayo idi a no kasano nga awanen ti nakastrek iti daong kalpasan nga “inrikep ni Jehova ti ruangan” dayta, awanto metten ti gundaway dagiti tattao a mangipakita iti pammatida ken Jehova ken maisalakan apaman a mangrugi ti dakkel a rigat.—Mat. 24:​37-39.

4. Apay a saantayon nga ibagbaga nga adda dakdakkel a kaitungpalan ti amin a napasamak idi tiempo ti Layus?

⁴ Masiguradotayo kadi nga amin a napasamak idi tiempo ti Layus ket adda dakdakkel a kaitungpalanna iti masanguanan? Saan. Apay? Ngamin, awan ti direkta nga ibaga ti Biblia maipapan iti dayta. a Agpayso nga inkompara ni Jesus ti tiempo ti kaaddana iti “kaaldawan ni Noe.” Ngem saanna nga imbaga nga amin a napasamak idi tiempo ti Layus ket adda dakdakkel a kaitungpalanna iti masanguanan, kas iti panangirikep ni Jehova iti ruangan ti daong. Ngem saanna a kayat a sawen nga awanen ti masursurotayo iti salaysay maipapan ken Noe ken iti Layus.

5. (a) Ania ti inaramid ni Noe sakbay ti Layus? (Hebreo 11:7; 1 Pedro 3:20) (b) Ania ti pagpadaan ti panangasaba ni Noe iti panangasabatayo ita?

 ⁵ Idi nangngeg ni Noe ti pakdaar ni Jehova, pinaneknekanna nga adda pammatina idi inaramidna ti daong. (Basaen ti Hebreo 11:7; 1 Pedro 3:20.) Kasta met laeng ti masapul nga aramiden ita dagiti tattao a makangngeg iti naimbag a damag maipapan iti Pagarian ti Dios. Masapul a paneknekanda iti aramidda nga adda pammatida. (Ara. 3:​17-20) Imbaga ni Pedro a ni Noe ket “nangikaskasaba iti kinalinteg.” (2 Ped. 2:5) Ngem kas iti napagsasaritaantayo iti napalabas nga artikulo, saantayo nga ammo no nakasabaan ni Noe ti amin a tattao iti daga sakbay ti Layus. Ita, sireregta a makiramramantayo iti sangalubongan a trabaho a panangasaba. Ngem uray no ikagumaantayo, imposible a makasabaantayo ti amin iti daga sakbay nga umay ti panungpalan. Apay?

6-7. Apay a maibagatayo a saantayo a maikasaba ti naimbag a damag iti amin a tattao ditoy daga sakbay ti panungpalan?

⁶ Usigentayo ti imbaga ni Jesus maipapan iti kasaknap ti trabaho a panangasaba. Impakpakaunana a maikaskasabanto ti naimbag a damag “iti intero a daga tapno maammuan ti amin a nasion.” (Mat. 24:14) Mas makitkitatayo itan ti kaitungpalan dayta a padto. Maipakpakaammon ti mensahe ti Pagarian iti nasuroken a 1,000 a lengguahe. Ken gapu iti website-tayo a jw.org, mabalinen a maammuan ti kaaduan a tattao ita ti naimbag a damag maipapan iti Pagarian ti Dios.

⁷ Nupay kasta, imbaga met ni Jesus kadagiti adalanna a didanto “maileppas a kasabaan dagiti tattao kadagiti siudad,” wenno makasabaan ti amin sakbay nga umay. (Mat. 10:23; 25:​31-33) Agaplikar met iti kaaldawantayo ti imbaga ni Jesus. Minilion a tattao ti aggigian iti lugar a maiparparit ti trabaho a panangasaba. Ginasut met ti mayan-anak iti kada minuto. Isu a saantayo a talaga a makasabaan ti amin ditoy daga sakbay ti panungpalan, uray no ikagkagumaantayo a kasabaan ti amin a tattao iti “tunggal nasion ken tribu ken lengguahe.”—Apoc. 14:6.

8. Ania dagiti posible a maisaludsodtayo maipapan kadagiti panangukom ni Jehova iti masanguanan? (Kitaen met dagiti ladawan.)

⁸ Maibatay kadagiti napagsasaritaantayon, mabalin a maisaludsodtayo: Kasano ngay dagidiay saanda a naammuan ti naimbag a damag sakbay a dumteng ti dakkel a rigat? Anianto ti aramiden kadakuada ni Jehova ken ti Anakna a nangitalkanna iti panangukom? (Juan 5:​19, 22, 27; Ara. 17:31) Kuna ti pannakatema a teksto daytoy nga artikulo a ni Jehova “saanna a kayat a madadael ti asinoman.” Imbes ketdi, kayatna nga “agbabawi ti amin.” (2 Ped. 3:9; 1 Tim. 2:4) Nupay ammotayon dagita a banag maipapan ken Jehova, saanna pay nga impakaammo kadatayo no kasanonto ti panangukomna kadagidiay saanda a pulos a naammuan ti naimbag a damag. Siempre, saan nga obligado isuna a mangibaga iti aniaman maipapan kadagiti inaramidnan wenno aramidennanto pay.

9. Iti Biblia, ania dagiti impakaammon kadatayo ni Jehova?

⁹ Iti Saona, impakaammon kadatayo ni Jehova ti dadduma kadagiti aramidenna. Kas pagarigan, ibaga ti Biblia a pagungarento ni Jehova “dagiti nakillo” nga awan gundawayda a nangammo iti naimbag a damag ken nagbalbaliw. (Ara. 24:15; Luc. 23:​42, 43) Gapu iti dayta, adda dagiti tumaud a napateg a saludsod.

10. Ania pay ti dadduma a maisaludsodtayo?

¹⁰ Awan kadin ti namnama a mapagungar ti amin a matay bayat ti dakkel a rigat? Nalawag nga ibaga ti Biblia a saanton a mapagungar dagiti bumusbusor a dadaelento ni Jehova ken  dagiti armadana inton Armagedon. (2 Tes. 1:​6-10) Ngem ti ngay dadduma? Kas pagarigan, bayat ti dakkel a rigat, mabalin nga addanto dagiti matay gapu kadagiti sakit, panaglakay wenno panagbaket. Wenno baka addanto dagiti matay gapu iti aksidente wenno panangpapatay. (Ecl. 9:11; Zac. 14:13) Posible ngata a dadduma kadagita a tattao ket karamanto ‘kadagiti nakillo’ a mapagungar idiay baro a lubong? Saantayo nga ammo.

TI AMMOTAYO

11. Anianto ti pakaibatayan ti pannakaukom dagiti tattao inton Armagedon?

¹¹ Ammotayon ti dadduma a mapasamak iti masanguanan. Kas pagarigan, ammotayo a maukom dagiti tattao inton Armagedon sigun iti panangtratoda kadagiti kakabsat ni Kristo. (Mat. 25:40) Maibilangto a karnero dagidiay mangsupsuporta ken Kristo ken kadagiti dinutokan ti espiritu. Ammotayo met a dadduma a kakabsat ni Kristo ti addanto pay laeng ditoy daga kalpasan a mangrugi ti dakkel a rigat. Umulidanto idiay langit sakbay unay a mangrugi ti Armagedon. Agingga nga adda pay laeng ditoy daga dagiti kakabsat ni Kristo, posible nga addanto gundaway dagiti nasingpet a tattao a mangsuporta kadakuada ken iti trabahoda. (Mat. 25:​31, 32; Apoc. 12:17) Apay a napateg dagita a kinapudno?

12-13. Anianto ti posible a reaksion ti dadduma inton makitada a nadadaelen ti “Babilonia a Dakkel”? (Kitaen met dagiti ladawan.)

¹² Kalpasan a mangrugi ti dakkel a rigat, ania ti mabalin pay a mapasamak? Posible a dadduma kadagiti makakita iti pannakadadael ti “Babilonia a Dakkel” malagipdanto a nabayagen nga ikaskasaba dayta dagiti Saksi ni Jehova. Posible ngata a ti dadduma a makakita kadagitoy a pasamak ket maaddaanton iti pammati ken Jehova?—Apoc. 17:5; Ezek. 33:33.

¹³ Adda kapada dayta a napasamaken idi kaaldawan ni Moises idiay Egipto. “Adu pay a sabali a tattao” ti nakikadua kadagiti Israelita idi pimmanawda iti Egipto. Dadduma kadagita ti mabalin a naaddaan iti pammati ken Jehova idi nakitada a pimmayso dagiti impakdaar ni Moises maipapan iti Sangapulo a Didigra. (Ex. 12:38) No bilang mapasamakto ti  kasta kalpasan a madadael ti Babilonia a Dakkel, masurontayto kadi no makikadua kadatayo dagita a klase ti tattao sakbay unay a mangrugi ti Armagedon? Siempre, saan! Kayattayo a tuladen ti nailangitan nga Amatayo “a naasi ken mannakipagrikna, nabannayat nga agpungtot ken dakkel ti napudno nga ayatna ken kanayon a tungpalenna ti saona.” b—Ex. 34:6.

14-15. Ti kadi namnama ti maysa nga agbiag nga agnanayon ket nakadepende no kaano a matay wenno no sadino ti pagnanaedanna? Ilawlawag. (Salmo 33:​4, 5)

¹⁴ No dadduma, adda dagiti kakabsat a mangibaga maipapan kadagiti natayen a saan a Saksi a kabagianda, “Imbag laengen ta natay sakbay ti dakkel a rigat ta addanto pay namnamana a mapagungar.” Nasayaat met ketdi ti motiboda a nangibaga iti kasta. Ngem ti namnama ti maysa a tao nga agbiag nga agnanayon ket saan a nakadepende no kaano a matay. Ni Jehova ti perpekto nga Ukom—kanayon a nalinteg dagiti desisionna ken naibatay iti hustisia. (Basaen ti Salmo 33:​4, 5.) Makapagtalektayo a “ti Ukom ti intero a daga” aramidennanto ti umiso.—Gen. 18:25.

¹⁵ Rasonable met a panunotentayo a ti namnama ti maysa a tao nga agbiag nga agnanayon ket saan a nakadepende no sadino ti pagnanaedanna. Imposible nga automatiko nga ibilang ni Jehova ti minilion a tattao kas “kalding” gapu laeng ta agnanaedda kadagiti lugar a saan a pulos nadanon ti mensahe ti Pagarian. (Mat. 25:46) No maseknantayo kadagita a tattao, lallalo pay a maseknan kadakuada ti nalinteg nga Ukom ti intero a daga. Saantayo nga  ammo no kasanonto nga imaniobra ni Jehova dagiti pasamak bayat ti dakkel a rigat. Nalabit dadduma kadagita a tattao ti maaddaanto iti gundaway a mangipakita babaen ti aramid nga adda pammatida ken Jehova inton ipakaammona ti nasantuan a naganna iti amin a nasion.—Ezek. 38:16.

16. Ania dagiti ammotayon maipapan ken Jehova? (Kitaen met ti ladawan.)

¹⁶ Gapu iti panagadaltayo iti Biblia, naammuantayo a nakapatpateg ken Jehova dagiti tattao. Impaayna ti biag ti Anakna tapno maaddaantayo iti namnama nga agbiag nga agnanayon. (Juan 3:16) Marikriknatayo ti nadungngo nga ayat ni Jehova. (Isa. 49:15) Ammona ti nagan ti tunggal tao. Kinapudnona, am-ammona a naimbag ti tunggal maysa kadatayo. Isu nga uray no mataytayo, kabaelannatayo a pagungaren. Ngamin, malagipna ti tunggal detalye ti maipapan kadatayo ken maisublina pay ketdi ti memoriatayo! (Mat. 10:​29-31) Makapagtalektayo ngarud a perpekto ti panangukom ti naayat a nailangitan nga Amatayo iti tunggal tao gapu ta isu ket masirib, nalinteg, ken naasi.—Sant. 2:13.

17. Ania ti adalentayo iti sumaruno nga artikulo?

¹⁷ Gapu iti nalawlawagen a pannakaawattayo, kayattayo a lallalo nga iyapura ti mangasaba. Apay? Ken ania ti rason a masapul nga itultuloytayo ti naregta a mangasaba? Iti sumaruno nga artikulo, ammuentayo dagiti detalyado a sungbat dagita a saludsod.