1. Ania ti maysa a pamay-an nga ad-adda a naam-ammo ni Job ni Jehova?

 KADAGITI amin a nakasarita ni Job iti intero a panagbiagna, adda maysa a naidumduma unay​—ti pannakisaritana ken Jehova a Dios. Imbaga ni Jehova ken Job a kitaenna ti dadduma kadagiti nakaskasdaaw a pinarsuana tapno mapabilegna ti panagtalek ni Job iti sirib ken abilidadna a mangaywan kadagiti adipenna. Kas pagarigan, impalagip ti Dios ken Job nga ipapaayna dagiti kasapulan dagiti animal, isu a maipaayna met dagiti kasapulan ni Job. (Job 38:39-41; 39:1, 5, 13-16) Babaen ti panangusig iti dadduma kadagiti parsua, adu ti naammuan ni Job maipapan kadagiti kualidad ti Diosna.

2. Apay a marigatantayo no dadduma a mangobserbar kadagiti parsua ni Jehova?

² Maammuantayo met ti ad-adu maipapan iti Diostayo no obserbarantayo dagiti parsuana. Ngem mabalin a saan a kanayon a nalaka nga aramiden dayta. No aggigiantayo iti siudad, baka saan nga inaldaw a makitatayo ti adu kadagiti pinarsua ni Jehova. Uray no saan a siudad ti paggigianantayo, mabalin a bassit ti tiempotayo a mangadal kadagita. Isu a pagsasaritaantayo no apay a nasayaat a mangiwayatayo iti tiempo ken ikagumaantayo nga obserbaran dagiti parsua ti Dios. Usigentayo no kasano nga inusar da Jehova ken Jesus dagiti parsua iti panangisuroda ken dagiti mabalintayo nga aramiden tapno ad-adu ti masursurotayo iti nakaparsuaan.

3. Ania ti mangipakita a kayat ni Jehova a tagiragsaken ni Adan dagiti parsua?

³ Kayat ni Jehova a tagiragsaken ti umuna a tao dagiti parsuana. Idi inaramid ti Dios ni Adan, inikkanna iti nakapimpintas a paraiso a pagyananna tapno kultibaren ken palawaenna dayta.  (Gen. 2:8, 9, 15) Maay-ayatan la ketdi idi ni Adan a mangbuybuya iti panagtubo dagiti bukel ken panagukrad dagiti sabong. Talaga a pribilehio ni Adan nga aywanan ti hardin ti Eden! Kiniddaw met ni Jehova ken Adan a panagananna ti nadumaduma nga animal. (Gen. 2:19, 20) Mabalin koma a ni Jehova lattan ti nangpanagan kadagita, ngem intedna ken Adan dayta a trabaho. Awan duadua a sakbay a pinanaganan ni Adan dagita nga animal, inadalna a naimbag dagita babaen ti panangobserbarna iti langa ken kababalinda. Maragragsakan la ketdi idi ni Adan a mangar-aramid iti dayta. Sigurado a nakatulong dayta a gundaway tapno mapaunegna ti apresasionna iti kinasirib ken kinalaing ti Amana nga agpartuat.

4. (a) Ania ti maysa a rason a masapul nga usigentayo dagiti parsua ni Jehova? (b) Ania ti apresiarem unay kadagiti parsuana?

⁴ Ti maysa a rason a masapul nga usigentayo dagiti parsua ket kayat ni Jehova nga aramidentayo dayta. Iyaw-awisna kadatayo: “Kumitakayo iti langit.” Kalpasanna, insaludsodna: “Asino ti nangparsua kadagitoy a banag?” Nalawag ti sungbat. (Isa. 40:26) Pinunno ni Jehova ti langit, daga, ken baybay kadagiti nakaskasdaaw a parsuana ket adu ti masursurotayo kadagita maipapan kenkuana. (Sal. 104:24, 25) Panunotentayo met ti panangparsua kadatayo ti Dios. Inkabilna iti pusotayo ti abilidad a mangapresiar kadagiti napintas a banag iti nakaparsuaan. Ket tapno maragsakantayo iti nadumaduma a parsuana, inikkannatayo iti lima a sentido​—panagkita, panagdengngeg, panagrikna, panagraman, ken panagangot.

5. Sigun iti Roma 1:20, ania ti pagimbaganna no adalentayo dagiti parsua ni Jehova?

⁵ Ibaga ti Biblia ti sabali pay a napateg a rason a masapul nga obserbarantayo dagiti parsua. Makasursurotayo kadagita maipapan kadagiti kualidad ni Jehova. (Basaen ti Roma 1:20.) Kas pagarigan, kitaentayo dagiti parsua ni Jehova. Talaga a nakapimpintas ti disenio dagita! Saan kadi nga ipakita dagita ti sirib ti Dios? Panunotentayo met ti nadumaduma a taraon a magusgustuantayo. Nalawag nga ebidensia dayta nga ay-ayatenna ti amin a tao. Gapu kadagiti pinarsua ni Jehova, maawatantayo ti personalidadna, isu nga ad-adda a maam-ammotayo isuna ken sumingedtayo kenkuana. Kitaentayo itan ti dadduma a pamay-an nga us-usaren ni Jehova dagiti parsua tapno isurona kadagiti tattao dagiti importante a leksion.

6. Ania ti masursurotayo no paliiwentayo dagiti billit nga umakar iti sabali a lugar?

⁶ Adda tiempo nga inkeddeng ni Jehova iti tunggal banag. Kada tawen, iti nagbaetan ti agtapus  ti Pebrero ken katengngaan ti Mayo, makakita dagiti Israelita kadagiti tikbaboy nga umakar nga agpaamianan. “Ammo uray ti billit a tikbaboy iti tangatang no kaano nga umakar iti sabali a lugar,” imbaga ti Dios kadagiti Israelita. (Jer. 8:7) No kasano a nangikeddeng ni Jehova iti tiempo a panagakar dagitoy a billit, nangikeddeng met iti tiempo a mangipakat kadagiti panangukomna. Ita, no makakitatayo kadagiti billit nga umak-akar, maipalagip kadatayo a makapagtalektayo a ni Jehova ‘naikeddengnan ti tiempo’ a pagpatinggaenna daytoy dakes a lubong.​—Hab. 2:3.

7. Ania dagiti masursurotayo no buyaentayo ti panagtayab ti maysa a billit? (Isaias 40:31)

⁷ Pappapigsaen ni Jehova dagiti agserserbi kenkuana. Inkari ni Jehova a papigsaenna ti ilina no nakapuy wenno maup-upayda. Impaibagana ken Isaias: “Agtayabdanto a kas kadagiti agila.” (Basaen ti Isaias 40:31.) Masansan idi a makakita dagiti Israelita kadagiti agila nga agtaytayab nga agpangato a dida unay agpayakpak ta makigidgiddanda iti agpangato nga angin. Ipalagip dayta kadatayo a no pappapigsaen ni Jehova dagita a billit, sigurado a papigsaenna met dagiti agserserbi kenkuana! No makakitaka iti napigsa a billit a ngumato a ngumato ti panagtayabna ngem manmano nga agpayakpak, laglagipem a mapapigsanaka ni Jehova tapno mapagballigiam dagiti problemam.

8. Ania dagiti nasursuro ni Job idi inusigna dagiti parsua ti Dios, ken ania dagiti masursurotayo?

⁸ Maikari ni Jehova a pagtalkantayo. Tinulongan ni Jehova ni Job tapno lallalo nga agtalek Kenkuana. (Job 32:2; 40:6-8) Idi kinasarita ti Dios ni Job, dinakamatna ti adu kadagiti parsuana, a pakairamanan dagiti bituen, ulep, ken aggilapgilap a kimat. Dinakamat met ni Jehova dagiti animal, kas iti atap a kalakian a baka ken kabalio. (Job 38:32-35; 39:9, 19, 20) Ebidensia amin dagita ti nakaskasdaaw a pannakabalin ti Dios agraman ti ayat ken napalalo a siribna. Gapu iti dayta a saritaan, lallalo a nagtalek ni Job ken Jehova. (Job 42:1-6) No adalentayo met dagiti parsua ni Jehova, maipalagip kadatayo a nasirsirib ken nabilbileg ngem datayo. Kabaelanna met a pagpatinggaen ti amin a suottayo ken sigurado nga aramidennanto dayta. Makatulong dayta tapno lallalo nga agtalektayo kenkuana.

9-10. Ania ti isuro kadatayo ti init ken tudo maipapan ken Jehova?

⁹ Pagaammo unay ni Jesus ti nakaparsuaan. Kas ti “eksperto a trabahador,” naaddaan iti pribilehio a makipagtrabaho ken Amana iti pannakaparsua ti uniberso. (Prov. 8:30) Idi agangay, idi adda ni Jesus ditoy daga, inusarna dagiti parsua tapno isurona kadagiti adalanna ti maipapan ken Amana. Usigentayo ti dadduma nga insurona.

¹⁰ Ipakpakita ni Jehova nga ay-ayatenna ti amin. Iti Sermon ni Jesus iti Bantay, inturongna ti atension dagiti adalanna iti init ken tudo, nga ibilang ti adu a tattao kas ordinario laeng ngem nakapatpateg tapno agbiagtayo. Mabalin koma nga ipaidam ni Jehova dagitoy kadagiti tattao a saan nga agserserbi kenkuana. Ngem siaayat nga ipapaayna ti init ken tudo iti amin. (Mat. 5:43-45) Inusar ni Jesus daytoy a leksion tapno isurona kadagiti adalanna a kayat ni Jehova nga ipakitatayo ti ayat iti amin. Kada maragsakantayo iti nagpintas nga ilelennek ti init wenno iti makarepresko a tudo, panunotentayo ti di mangidumduma nga ayat ni Jehova. Gapu iti ulidanna, matignaytayo a mangipakita iti kasta nga ayat no mangasabatayo iti amin.

11. Apay a maparegtatayo no obserbarantayo dagiti agtaytayab a billit?

¹¹ Ipapaay ni Jehova dagiti kasapulantayo iti biag. Iti dayta met la a sermon, imbaga pay ni Jesus: “Paliiwenyo dagiti billit iti tangatang;  saanda nga agmula iti bin-i wenno agani wenno agipempen kadagiti kamarin, ngem pakanen ida ni Amayo nga adda idiay langit.” Posible nga adda idi dagiti agtaytayab a billit a makitkita dagiti dumdumngeg ken Jesus idi insaludsodna kadakuada: “Saan kadi a napatpategkayo ngem kadakuada?” (Mat. 6:26) Impaawat ni Jesus a siaayat a sigsiguraduen ni Jehova nga ipaayna dagiti kasapulantayo iti biag! (Mat. 6:31, 32) Makaparegta la ketdi kadagiti matalek nga agserserbi ken Jehova ita dayta a masursurotayo iti nakaparsuaan. Maup-upay idi ti maysa nga agtutubo a sister a payunir idiay Spain ta awan ti mabirokanna a pagdagusanna. Ngem nakakita kadagiti billit a mangmangan kadagiti bukbukel ken babassit a prutas. Nakatulong dayta tapno agbalin a positibo, isu a naibagana, “Impalagip kaniak dagidi a billit nga ay-aywanan ida ni Jehova isu nga aywanannak met.” Di nagbayag, nakabirok met laeng dayta a sister iti pagdagusanna.

12. Sigun iti Mateo 10:29-31, ania ti masursurotayo kadagiti billit-tuleng maipapan ken Jehova?

¹² Ipatpategnatayo ni Jehova kas indibidual. Sakbay nga imbaon ni Jesus dagiti apostolna a mangasaba, tinulonganna ida a manglaban iti panagbutengda iti ibubusor. (Basaen ti Mateo 10:29-31.) Inaramidna dayta idi dinakamatna ti maysa kadagiti masansan a makitkita a billit idiay Israel: dagiti billit-tuleng. Idi kaaldawan ni Jesus, nalaka ti presio dagita a billit. Ngem imbagana kadagiti adalanna: “Ammo ni Amayo no matnag ti uray maysa kadakuada iti daga.” Kalpasanna, innayonna: “Napatpategkayo ngem iti adu a billit-tuleng.” Impasigurado ngarud ni Jesus kadagiti adalanna a napategda ken Jehova kas indibidual, isu nga awan ti rason a mabutengda a maidadanes. Sigurado a nalagip dagiti adalan ni Jesus ti imbagana kada makakitada kadagiti billit-tuleng iti panangasabada kadagiti ili ken purok. Kada makakitaka iti bassit a billit, laglagipem a napategka ken Jehova kas indibidual ta uray sika ket ‘napatpateg ngem iti adu a billit-tuleng.’ Iti tulongna, kayam a sanguen a situtured dagiti bumusbusor.​—Sal. 118:6.

13. Ania ti makatulong tapno makasursurotayo kadagiti parsua ti Dios?

¹³ Adu pay ti masursurotayo maipapan ken Jehova babaen kadagiti parsuana. Kasano? Umuna, masapul nga iwayaantayo nga obserbaran dagiti parsua. Kalpasanna, masapul a panunotentayo no ania ti masursurotayo kadagita maipapan ken Jehova. Baka para kadatayo, saan a kanayon a nalaka nga aramiden dagita. Imbaga ti sister a ni Géraldine a taga-Cameroon, “Dimmakkelak iti siudad, isu nga ammok a masapul nga ikagumaak nga obserbaran ti nakaparsuaan.” Imbaga met ti panglakayen a ni Alfonso, “Nasursurok a kasapulan a mangyeskediulak iti oras nga agmaymaysaak tapno maobserbarak dagiti parsua ni Jehova ken mautobko no ania ti isuro dagita maipapan kenkuana.”

14. Ania dagiti nasursuro ni David idi inutobna dagiti parsua ti Dios?

¹⁴ Pinampanunot a naimbag ni David dagiti  parsua ti Dios. Imbagana ken Jehova: “No tumangadak iti langit nga aramid dagiti imam, ti bulan ken dagiti bituen nga insaganam, ania koma ti tao tapno silalagipka kenkuana, ken ti anak ti tao tapno aywanam isuna?” (Sal. 8:3, 4) Wen, no kitkitaen idi ni David ti langit iti rabii, saanna la nga ap-apresiaren ti kinangayed ti uniberso. Inut-utobna met ti isuro dagiti bituen kenkuana maipapan iti Dios. Nasursurona a nakasirsirib ken mannakabalin unay ni Jehova. Adda met idi dagiti kanito a pinampanunot ni David no kasano nga in-inut a dimmakkel isuna iti aanakan ni nanangna. Gapu ta inut-utobna dagita a nakaskasdaaw a detalye, lalo a naapresiarna ti sirib ni Jehova.​—Sal. 139:14-17.

15. Mangted kadagiti pagarigan no kasano a nakitam dagiti kualidad ni Jehova kadagiti parsuana. (Salmo 148:7-10)

¹⁵ Kas ken David, saanen a kasapulan nga umadayoka pay a mangbirok kadagiti parsua a pagpanunotam. No kumitaka iti aglawlawmo, maawatam ti adu kadagiti kualidad ni Jehova. Kas pagarigan, maawatam a mannakabalin ni Jehova no mariknam ti bara ti init. (Jer. 31:35) Agsiddaawka iti sirib ti Dios no makakitaka iti billit nga agar-aramid iti umokna. Panunotem ti kinamanagpakatawa ni Jehova no makakitaka iti uken a mangtiltiliw iti ipusna. Ken agyamanka ken Jehova gapu iti ayatna kada makakitaka iti maysa nga ina a mangrayray-aw iti tagibina. Nakaad-adu ti gundawaytayo a makasursuro maipapan ken Jehova gapu ta idaydayaw isuna ti amin a parsuana​—dadakkel man wenno babassit, adayo man wenno asideg ti ayanda.​—Basaen ti Salmo 148:7-10.

16. Ania koma ti determinasiontayo?

¹⁶ Awan ti kapada ti sirib, ayat, ken pannakabalin ti Diostayo ken ti kinapintas ti amin nga inaramidna. Dagita a kualidad ken adu pay ti masursurotayo no kitaentayo a naimbag dagiti parsua iti aglawlawtayo. Sapay koma ta kanayon a mangiwayatayo iti oras a mangtagiragsak kadagiti parsua ni Jehova ken mangpanunot no ania ti masursurotayo kadagita maipapan kenkuana. No aramidentayo dayta, ad-adda a sumingedtayo iti Namarsua kadatayo. (Sant. 4:8) Iti sumaruno nga artikulo, kitaentayo no kasano a mausar dagiti nagannak dagiti parsua ti Dios tapno matulonganda dagiti annakda a suminged ken Jehova.