1-2. Ania a banag ti nakapatpateg kadagiti Saksi ni Jehova?

ADDA dagiti nakapatpateg nga isyu a pakaipaspasanguantayo ita—ti kinasoberano ken pannakaalangon. Kas Saksi ni Jehova, magusgustuantayo a pagsasaritaan dagita a makapainteres a banag. Ngem ti kinasoberano ti Dios ken ti pannakasantipikar ti naganna ket saan a nagduma a banag.

² Ammotayo amin a masapul a maikkat ti pakaumsian ti nagan ti Dios. Naammuantayo met a ti kinasoberano ni Jehova, wenno ti pamay-anna a mangituray, ket masapul a mapaneknekan kas ti kasayaatan. No kasta, agpada a napateg dagitoy nga isyu.

3. Ania ti ramanen ti nagan ni Jehova?

³ Kinapudnona, ti nagan ni Jehova ramanenna ti amin maipapan iti Diostayo, a pakairamanan ti pamay-anna a mangituray. Isu a no ibagatayo a ti kapatgan nga isyu ket ti pannakaikkat ti amin a pakaumsian ti nagan ni Jehova, ibagbagatayo met a masapul a mapaneknekan a ti pamay-an ti panangituray ni Jehova ti kasayaatan. Dakkel ti nakainaigan ti nagan ni Jehova iti pamay-an ti panangiturayna kas ti mannakabalin-amin a Soberano.—Kitaen ti kahon a “ Dagiti Karaman iti Nakapatpateg nga Isyu.”

4. Ania ti kuna ti Salmo 135:13 maipapan iti nagan ti Dios, ken ania dagiti saludsod a sungbatantayo iti daytoy nga artikulo?

⁴ Naisangsangayan unay ti nagan ni Jehova. (Basaen ti Salmo 135:13.) Apay a nagpateg ti nagan ti Dios? Kasano a napadpadakes dayta idi un-unana? Kasano a santipikaren dayta ti Dios? Ken kasano a makatulongtayo a mangidepensa iti naganna? Sungbatantayo dagitoy a saludsod.

5. Ania ti nalabit isaludsod ti dadduma no mangngegda a masapul a masantipikar ti nagan ti Dios?

⁵ “Masantipikar koma ti naganmo.” (Mat. 6:9) Dayta ti imbaga ni Jesus a maysa kadagiti kapatgan nga ikararagtayo. Ngem ania ti kayat a sawen ti imbaga ni Jesus? Ti panangsantipikar iti maysa a banag kaipapananna a pagbalinen dayta a nasantuan, nadalus, wenno nasin-aw. Ngem nalabit adda dagiti mangisaludsod, ‘Saan kadi a nasantuan, nadalus, ken nasin-awen ti nagan ni Jehova?’ Tapno masungbatan dayta, masapul a panunotentayo no ania ti nairaman iti maysa a nagan.

6. Ania ti mamagbalin a napateg iti maysa a nagan?

⁶ Ti nagan ket saan laeng a maysa a grupo dagiti letra a maisurat wenno maibalikas. Kuna ti Biblia: “Pilien ti naimbag a nagan imbes a ti adu a kinabaknang.” (Prov. 22:1; Ecl. 7:1) Apay a nagpateg ti maysa a nagan? Gapu ta ramanenna ti reputasion, ti pampanunoten dagiti tattao maipapan iti daydiay makinnagan iti dayta. Isu a ti kapatgan ket saan a ti pannakaisurat wenno pannakaibalikas ti maysa a nagan no di ket ti pampanunoten dagiti tattao no makita wenno mangngegda dayta a nagan.

7. Kasano a pinadakes dagiti tattao ti nagan ti Dios?

⁷ No adda kinaulbod nga ibaga dagiti tattao maipapan ken Jehova, daddadaelenda ti reputasionna. No daddadaelenda ti reputasionna, padpadaksenda ti naganna. Ti kaunaan a pannakapadakes ti nagan ken reputasion ti Dios ket napasamak idi rugi ti pakasaritaan ti tao. Usigentayo ti masursurotayo iti dayta a pasamak.

8. Ania ti ammo da Adan ken Eva, ken ania dagiti tumaud a saludsod?

⁸ Ammo da Adan ken Eva ti nagan ni Jehova, agraman dagiti napateg a kinapudno maipapan kenkuana. Ammoda nga isu ti Namarsua, Daydiay nangted iti biagda, napintas a Paraiso a pagtaenganda, ken perpekto nga asawa. (Gen. 1:26-28; 2:18) Nupay kasta, itultuloyda kadi nga usaren ti perpekto nga isipda tapno utobenda ti amin nga inaramid ni Jehova para kadakuada? Itultuloyda kadi a paunegen ti ayat ken apresasionda Kenkuana? Nalawag ti sungbat idi sinubok ida ti kabusor ti Dios.

9. Sigun iti Genesis 2:16, 17 ken 3:1-5, ania ti imbaga ni Jehova iti umuna a pagassawaan, ken kasano a tiniritir ni Satanas ti kinapudno?

 ⁹ Basaen ti Genesis 2:16, 17 ken 3:1-5. Nangusar ni Satanas iti uleg a mangisaludsod ken Eva: “Agpayso kadi nga imbaga ti Dios a saanyo a kankanen ti bunga ti tunggal kayo iti hardin?” Naglaon dayta a saludsod iti di madmadlaw a kinaulbod a kas iti nailemmeng a sabidong. Kinaagpaysuanna, imbaga ti Dios a mabalinda ti mangan iti bunga ti tunggal kayo malaksid iti maysa. Nakaad-adu a bunga ti nadumaduma a kayo ti mabalin a pagpilian da Adan ken Eva. (Gen. 2:9) Wen, talaga a naparabur ni Jehova. Ngem imparit ti Dios a kanen da Adan ken Eva ti bunga ti maysa a kayo. Ti ngarud saludsod ni Satanas ti nangtiritir iti kinapudno. Pinagparang ni Satanas a kasla saan a naparabur ti Dios. Mabalin a pinanunot ni Eva, ‘Adda kadi nasayaat a banag nga iyim-imut ti Dios?’

10. Kasano a direkta a pinadakes ni Satanas ti nagan ti Dios, ken ania ti epekto dayta?

¹⁰ Iti dayta a kanito, bigbigen pay laeng ni Eva a ni Jehova ti Agturay kenkuana. Simmungbat ni Eva ken Satanas babaen ti panangibagana iti nalawag a bilin ti Dios. Imbagana pay a masapul a saanda a sagsagiden ti kayo. Ammona a matay no sukirenna ti pakdaar ti Dios. Ngem insungbat ni Satanas: “Sigurado a saankayto a matay.” (Gen. 3:2-4) Saanen a nagpalpalikaw ni Satanas no di ket direkta a pinadakesna ti nagan ti Dios, a kas man la ibagbagana ken Eva nga ulbod ni Jehova. Nagbalin ngarud ni Satanas a diablo, wenno manangpardaya. Naan-anay a naallilaw ni Eva ket pinatina ni Satanas. (1 Tim. 2:14) Ad-adda a nagtalek ken Satanas ngem ken Jehova isu a nakaaramid iti kadaksan a desision. Inkeddengna a sukiren ni Jehova. Kinnanna ti bunga ti kayo nga imparit ni Jehova. Kalpasanna, inikkanna met ni Adan.—Gen. 3:6.

11. Ania koma ti inaramid dagiti immuna a nagannaktayo, ngem ania ti saanda nga inaramid?

¹¹ Panunotem biit no ania koma ti rumbeng nga imbaga ni Eva ken Satanas. Ipapanmo a kastoy ti imbagana: “Dika am-ammo ngem am-ammok ti Amak a ni Jehova, ken ay-ayatek ken agtalekak kenkuana! Isu ti nangted kadakami ken Adan iti amin nga adda kadakami. Nagturedka ketdin a mangpadakes kenkuana? Pumanawka!” Sigurado a naragsakan koma ni Jehova a makangngeg iti kasta a matalek a sasao ti nadungngo nga anakna! (Prov. 27:11) Ngem saan a napudno ti ayat ni Eva ken Jehova ket kasta met ni Adan. Gapu ta awan ti kasta nga ayatda ken Jehova, dida naidepensa ti naganna iti pammardaya.

12. Kasano a nangimula ni Satanas iti panagduadua iti isip ni Eva, ket ania ti saan a naaramid da Adan ken Eva?

¹² Kas nakitatayo, rinugian ni Satanas ti agimula iti panagduadua iti isip ni Eva. Inimpluensiaanna ni Eva nga agduadua no nasayaat met la nga Ama ni Jehova. Gapu iti dayta, saan a naidepensa da Adan ken Eva ti nagan ken reputasion ni Jehova. Timmulokda iti singasing  ni Satanas ket nagrebeldeda iti Amada. Kasta met laeng dagiti taktika ni Satanas ita. Padpadaksenna ti nagan ni Jehova. Dagiti tattao a mamati kadagiti kinaulbod ni Satanas ket nalaka a maimpluensiaan a mangilaksid iti nalinteg a panangituray ni Jehova.

13. Kasano nga itampok ti Ezekiel 36:23 ti kangrunaan a mensahe ti Biblia?

¹³ Baybay-an latta kadin ni Jehova ti kasta a pammadakes a dinan idepensa ti bagina? Siempre, saan! Nakapokus ti intero a Biblia kadagiti ar-aramiden ni Jehova tapno mapaneknekan a saan nga agpayso dagiti pammadakes kenkuana idiay Eden. (Gen. 3:15) Kinapudnona, kastoy ti mabalintayo a pangsumario iti kangrunaan a mensahe ti Biblia: Santipikaren ni Jehova ti naganna babaen ti Pagarian nga iturayan ti Anakna ken isublina ti kinalinteg ken talna ditoy daga. Naglaon ti Biblia iti impormasion a makatulong kadatayo a mangtarus no ania dagiti ar-aramiden ni Jehova a mangsantipikar iti naganna.—Basaen ti Ezekiel 36:23.

14. Kasano a nasantipikar ti nagan ni Jehova iti panangtamingna iti panagrebelde idiay Eden?

¹⁴ Ar-aramiden ni Satanas ti amin a kabaelanna a mangpasardeng ken Jehova a mangitungpal iti panggepna. Ngem kanayon a mapaay ni Satanas. Ipakita ti Biblia ti inaramid ni Jehova ket paneknekan dayta nga awan ti kas ken Jehova a Dios. Agpayso a nasaktan unay ni Jehova iti panagrebelde ni Satanas ken ti amin a dimmasig kenkuana. (Sal. 78:40) Ngem inusarna ti sirib, anus, ken hustisia iti panangtamingna iti daytoy nga isyu. Namin-adu metten nga impakitana ti awan kapadana a pannakabalinna. Kangrunaanna, ipakpakitana ti ayatna iti amin nga ar-aramidenna. (1 Juan 4:8) Saan nga agsardeng ni Jehova a mangsantipikar iti naganna.

15. Kasano a padpadaksen ita ni Satanas ti nagan ti Dios, ken ania ti resulta dayta?

¹⁵ Padpadaksen pay la ita ni Satanas ti nagan ti Dios. Al-allilawenna dagiti tattao tapno pagduaduaanda a ti Dios ket mannakabalin, nalinteg, masirib, ken naayat. Kas pagarigan, padpadasen ni Satanas a kombinsiren dagiti tattao a saan a ni Jehova ti Namarsua. Ket no  patienda met nga adda Dios, mangaramid ni Satanas kadagiti pamay-an tapno mamatida a nainget ken di nainkalintegan ti Dios ken dagiti pagalagadanna. Isursurona pay ketdi kadagiti tattao a ni Jehova ket awanan asi ken naulpit a Dios a manguram kadagiti tattao iti umap-apuy nga impierno. No patienda ti kasta a pammadakes, posible nga ilaksidda ti nalinteg a turay ni Jehova. Agingga a saan a madadael ni Satanas, itultuloyna a padaksen ni Jehova, ken sulisogennaka met a mangtallikud ken Jehova. Agballiginto kadi?

16. Ania ti kabaelam nga aramiden a saan nga inaramid da Adan ken Eva?

¹⁶ Ipalpalubos ni Jehova a makipaset dagiti imperpekto a tattao iti pannakasantipikar ti naganna. Kabaelam ngarud nga aramiden ti saan nga inaramid da Adan ken Eva. Uray no addaka iti lubong a napno kadagiti mangpadpadakes ken mangtabtabbaaw iti nagan ni Jehova, adda gundawaymo a situtured a mangibaga iti kinapudno a nasantuan, nalinteg, naimbag, ken naayat ni Jehova. (Isa. 29:23) Kabaelam a suportaran ti turayna. Kabaelam nga ipakaammo a ti laeng turayna ti nalinteg ken makaipaay iti talna ken kinaragsak iti amin a parsua.—Sal. 37:9, 37; 146:5, 6, 10.

17. Kasano nga impakaammo ni Jesus ti nagan ni Amana?

¹⁷ No idepensatayo ti nagan ni Jehova, tultuladentayo ti ulidan ni Jesu-Kristo. (Juan 17:26) Impakaammo ni Jesus ti nagan ni Amana babaen ti panangusarna iti dayta ken panangidepensana iti reputasion ni Jehova. Kas pagarigan, kinontrana dagiti Fariseo ta iti nadumaduma a pamay-an, pinagparangda ni Jehova kas naulpit, istrikto unay, narigat nga as-asitgan, ken awanan asi. Tinulongan ni Jesus dagiti tattao tapno maawatanda a ti Amana ket nainkalintegan, naanus, nadungngo, ken manangpakawan. Tinulonganna met ida a mangam-ammo ken Jehova babaen ti naan-anay a panangtuladna kadagiti kualidad ni Amana iti inaldaw a panagbiagna.—Juan 14:9.

18. Ania ti aramidentayo tapno mapaneknekan a saan nga agpayso dagiti kinaulbod ken pammadakes maipapan ken Jehova?

¹⁸ Kas ken Jesus, mabalintay nga ibaga kadagiti tattao ti ammotayo maipapan ken Jehova, nga isurotayo kadakuada a naayat ken naimbag ti Diostayo. No aramidentayo dayta,  pampaneknekantayo a saan nga agpayso dagiti kinaulbod ken pammadakes maipapan ken Jehova. Masantipikartayo ti nagan ni Jehova, ta pagbalbalinentayo a nasantuan dayta iti isip ken puso dagiti tattao. Matuladtayo met ni Jehova. Posible dayta uray no saantayo a perpekto. (Efe. 5:1, 2) No ti panagsasao ken ar-aramidtayo ipakitada dagiti kualidad ni Jehova, makiramramantayo iti pannakasantipikar ti naganna. Al-alangonentayo dayta a nagan babaen ti panangtulongtayo kadagiti tattao a mangammo kadagiti kinapudno maipapan iti Dios. * Masantipikartayo met ti nagan ni Jehova no, kas imperpekto a tattao, agtalinaedtayo nga awan pagkuranganna.—Job 27:5.

19. Kasano a matulongannatayo ti Isaias 63:7 tapno maawatantayo ti kangrunaan a panggeptayo a mangisuro?

¹⁹ Adda pay sabali a maaramidantayo a mangsantipikar iti nagan ni Jehova. No isursurotayo dagiti kinapudno iti Biblia, masansan nga ipaganetgettayo ti kinasoberano ti Dios, nga adda kalintegan ni Jehova a mangituray iti uniberso, ket talaga nga umiso dayta. Nupay napateg ti panangisuro kadagiti linteg ti Dios, ti kangrunaan a kalattayo ket ti panangtulong kadagiti tattao a mangayat iti Amatayo a ni Jehova ken agbalin a napudno kenkuana. Masapul ngarud nga ipaganetgettayo dagiti makaay-ayo a kualidad ni Jehova, nga iyunay-unaytayo ti kinasiasinona. (Basaen ti Isaias 63:7.) No kasta ti panangisurotayo, matulongantayo ida a mangayat ken agtulnog ken Jehova gapu ta kayatda ti agbalin a napudno kenkuana.

20. Ania ti usigentayo iti sumaruno nga artikulo?

²⁰ Kasano a masiguradotayo a ti kababalin ken panangisurotayo ti mangtignay kadagiti tattao a mangraem iti nagan ni Jehova ken umadani kenkuana? Sungbatan dayta ti sumaruno nga artikulo.