1-2. Asino ni Zadok? (1 Cronicas 12:​22, 26-28)

 IMADYINEM daytoy nga eksena. Adda nasurok a 340,000 a lallaki a naguummong tapno pagbalinenda ni David nga ari iti intero nga Israel. Mangngegmo ti naragsak a panagiinnestoria ken panagkakanta a mangidaydayaw ken Jehova, agraman dagiti napigsa a panagkakatawa a nagallangogan iti katurturodan nga asideg iti Hebron. (1 Cron. 12:39) Karaman kadagiti adda sadiay ti agtutubo a ni Zadok a mabalin a saan a nadnadlaw ti adu a tattao. Ngem sinigurado ni Jehova a maammuantayo nga adda sadiay ni Zadok. (Basaen ti 1 Cronicas 12:​22, 26-28.) Asino ni Zadok?

² Ni Zadok ket maysa idi a padi a nasinged a katrabahuan ti Nangato a Padi a ni Abiatar. Maysa met a pumaparmata ni Zadok. Inikkan isuna ti Dios iti sirib ken abilidad a mangammo iti pagayatanna. (2 Sam. 15:27) Mapan idi dagiti tattao kenkuana no kasapulanda ti nainsiriban a balakad. Natured met ni Zadok. Iti daytoy nga artikulo, ammuentayo no kasano nga impakita ni Zadok ti kinatured.

3. (a) Apay a kasapulan dagiti agdaydayaw ken Jehova ti kinatured? (b) Ania ti pagsasaritaantayo iti daytoy nga artikulo?

³ Bayat dagitoy maudi nga al-aldaw, ikagkagumaan ni Satanas a pakapuyen ti pammati dagiti adipen ti Dios. (1 Ped. 5:8) Masapul nga agbalintayo a natured bayat nga ur-urayentayo a dadaelen ni Jehova ni Satanas ken ti dakes a sistemana. (Sal. 31:24) Pagsasaritaantayo ti tallo a pamay-an a matuladtayo ti kinatured ni Zadok.

 SUPORTARAM TI PAGARIAN TI DIOS

4. Apay a kasapulan dagiti adipen ni Jehova ti kinatured tapno masuportaranda ti Pagarian ti Dios? (Kitaen met ti ladawan.)

⁴ Kas adipen ni Jehova, masansan a kasapulantayo ti tured tapno naimpusuan a masuportarantayo ti Pagarian ti Dios. (Mat. 6:33) Kas pagarigan, iti daytoy dakes a lubong, kasapulantayo ti tured tapno makapagbiagtayo maitunos kadagiti pagalagadan ni Jehova ken maikasabatayo ti naimbag a damag maipapan iti Pagarian. (1 Tes. 2:2) Kumarkaro ti di panagtutunos dagiti tattao gapu iti politika, isu a kasapulantayo ti tured tapno makapagtalinaedtayo a neutral. (Juan 18:36) Adu nga agserserbi ken Jehova ti agrigrigat gapu iti problema iti ekonomia. Adda met dagiti makabkabil wenno maibalbalud gapu ta dida kayat ti makiraman iti politika wenno agsoldado.

5. Apay a kasapulan ni Zadok ti tured tapno masuportaranna ni David?

⁵ Napan ni Zadok idiay Hebron saan laeng a tapno makipagragsak iti panagbalin ni David nga ari. Napan sadiay nga awitna dagiti armasna ken nakasagana a makigubat. (1 Cron. 12:38) Situtulok a simmurot ken David iti paggugubatan ken mangidepensa iti Israel kadagiti kabusorda. Mabalin a bassit pay laeng ti kapadasan ni Zadok iti pannakigubat kas soldado ngem nakaturtured.

6. Ania ti nagbalin nga epekto ken Zadok ti nasayaat nga ulidan ni David iti kinatured? (Salmo 138:3)

⁶ Kasano a nasursuro ti padi a kas ken Zadok ti kinatured? Adu a nabileg ken natured a lallaki ti am-ammona. Sigurado a nakasursuro iti ulidanda. Kas pagarigan, natured ni David a ‘mangidaulo iti Israel a mapan makigubat.’ Gapu iti dayta, naimpusuan a kayat ti amin nga umili ti Israel a suportaran isuna. (1 Cron. 11:​1, 2) Kanayon a nagpatulong ni David ken Jehova no maipasango kadagiti kabusorna. (Sal. 28:7; basaen ti Salmo 138:3.) Nakasursuro met ni Zadok iti kinatured ti dadduma pay a lallaki a kas  kada Jehoiada ken ti mannakigubat nga anakna a ni Benaias, agraman ti 22 a panguluen dagiti tribu a nangsuporta ken David. (1 Cron. 11:​22-25; 12:​26-28) Determinado amin dagita a lallaki a mangipatugaw ken David kas ari ken mangprotektar kenkuana.

7. (a) Siasino ita dagiti mabalintayo a tuladen ti kinaturedda? (b) Ania ti masursurotayo iti ulidan ni Brother Nsilu a naipabuya iti video?

⁷ Agbalintayo met a natured no panunotentayo dagidiay nangipakita iti kinatured tapno agtalinaedda a matalek ken Jehova ken iti Pagarianna. Idi adda ditoy daga ti Aritayo a ni Jesu-Kristo, dina pulos kayat ti agbalin a paset ti politika iti daytoy a lubong ni Satanas. (Mat. 4:​8-11; Juan 6:​14, 15) Kanayon a dimmawat iti bileg ken Jehova. Nagadu met ti mapagulidanan nga agtutubo ita a dida kayat ti agsoldado wenno makipaset kadagiti aktibidad ti politika. Padasem a kitaen dagiti kapadasanda iti jw.org. a

TULONGAM DAGITI KAKABSAT

8. Kaano a mabalin a kasapulan dagiti panglakayen ti tured tapno matulonganda dagiti kakabsat?

⁸ Kayat la unay dagiti Saksi ni Jehova ti agtitinnulong. (2 Cor. 8:4) Ngem no dadduma, kasapulanda ti tured tapno maaramidda dayta. Kas pagarigan, no adda gubat, ammo dagiti panglakayen a kasapulan dagiti kapammatianda ti pammaregta, suporta, ken uray ti naespirituan ken material a tulong. Isu a nupay agpeggad ti biagda, aramidenda ti amin a kabaelanda a tumulong ta ipatpategda ti arban. (Juan 15:​12, 13) No aramiden dayta dagiti panglakayen, tultuladenda ti kinatured ni Zadok.

9. Sigun iti 2 Samuel 15:​27-29, ania ti imbaga ni David nga aramiden ni Zadok? (Kitaen met ti ladawan.)

⁹ Agpegpeggad ti biag ni David. Determinado ti anakna a ni Absalom a mangpapatay kenkuana tapno isuna ti agbalin nga ari. (2 Sam. 15:​12, 13) Masapul a dagus a pumanaw ni David iti Jerusalem! Isu nga imbagana kadagiti  adipenna: “Agsaganakayo ta pumanawtayon, ta agpeggadtayo no ditay itarayan ni Absalom!” (2 Sam. 15:14) Bayat a pumampanaw dagiti adipenna, napanunot ni David a masapul nga adda agbati tapno maammuanda ti sumaruno a plano ni Absalom. Ni Zadok ken ti dadduma pay a papadi ket pinagsublina ngarud iti siudad tapno agserbi kas espia. (Basaen ti 2 Samuel 15:​27-29.) Masapul nga agan-annadda. Nakadeldelikado ti ipapaaramid ni David kadagita a papadi. Biagda ti nakataya! Naranggas ken managimbubukodan ni Absalom ta kayana pay a traidoren ti mismo nga amana. Imadyinem ti inaramid koma kadakuada ni Absalom no natakuatanna nga ages-espia ni Zadok ken ti dadduma a papadi tapno laeng maprotektaranda ni David!

10. Ania ti inaramid ni Zadok ken ti kakaduana tapno maprotektaranda ni David?

¹⁰ Nagpatulong ni David kada Zadok ken Husai, a sabali pay a matalek a gayyemna, tapno agballigi ti planona. (2 Sam. 15:​32-37) Sinurot ni Husai ti plano ni David. Nagpammarang ni Husai a supsuportaranna ni Absalom ken nangirekomenda iti estratehia no kasanoda a darupen ni David. Ngem saan nga ammo ni Absalom a makatulong dayta a balakad ken David tapno masaganaanna ti irarautda. Kalpasanna, impakaammo ni Husai kada Zadok ken Abiatar ti imbalakadna ken Absalom. (2 Sam. 17:​8-16) Siniguradoda a maipakaammo ken David dayta a plano. (2 Sam. 17:17) Iti tulong ni Jehova, nagdakkel ti naaramidan da Zadok ken dagiti padana a papadi tapno maprotektaran ni David.—2 Sam. 17:​21, 22.

11. Kasanotayo a matulad ti kinatured ni Zadok no tultulongantayo dagiti kakabsat?

¹¹ Kasanotayo nga agbalin a natured kas ken Zadok no makiddaw a tulongantayo dagiti kakabsat nga agpegpeggad ti biagda? (1) Suroten dagiti instruksion. Kadagiti napeggad a kasasaad, nagpateg nga agtalinaedtayo nga agkaykaysa. Agtulnogka kadagiti instruksion ti sanga nga opisina iti pagilianyo. (Heb. 13:17) Masapul  a regular a repasuen dagiti panglakayen dagiti instruksion maipapan iti panagsagana ken dagiti masapul nga aramiden no adda didigra iti lugarda. (1 Cor. 14:​33, 40) (2) Agbalin a natured ngem naannad. (Prov. 22:3) Agpanunotka sakbay nga agtignayka. Siguraduem a natalgedka agingga a posible. (3) Agpannuray ken Jehova. Laglagipem a sipapanunot ni Jehova iti pagsayaatam ken dagiti kapammatiam. Matulongannaka tapno natalgedka a tumulong kadakuada.

12-13. Ania ti masursurotayo iti kapadasan da Viktor ken Vitalii? (Kitaen met ti ladawan.)

¹² Kitaentayo ti kapadasan ti dua a kakabsat a da Viktor ken Vitalii a timmulong iti panagideliber iti makan ken danum kadagiti kapammatiantayo idiay Ukraine. “Nagsawarkami tapno makabirokkami iti makan,” kuna ni Viktor. “Masansan a mangngegmi dagiti agpipinnaltog iti asidegmi. Adda kabsat a nagdonar iti makan manipud iti bodegana. Gapu iti donasionna, adda nakan ti adu kakabsat iti adu nga aldaw. Bayat nga ikarkargami dagiti donasionna iti trakmi, adda natnag a bomba nga agarup 20 a metro (66 a pie) laeng manipud iti ayanmi. Agmalmalem nga impakpakaasik ken Jehova nga ikkannak iti tured a kasapulak tapno maitultuloyko a tulongan dagiti kakabsat.”

¹³ “Kasapulanmi ti adu a tured,” imbaga ni Vitalii. “Immabut iti 12 nga oras ti umuna a biahek. Nagkarkararagak ken Jehova iti intero a panagbiahek.” Nakaturtured ni Vitalii ngem nakaan-annad met. Intuloyna: “Kanayon nga impakaasik ken Jehova nga ikkannak iti sirib ken agbalinak a naemma. Dimmalanak laeng kadagiti kalsada nga impalubos dagiti autoridad. Nakitak a mismo ti pagsayaatan ti panagtitinnulong dagiti kakabsat. Inikkatda dagiti bangen iti dalan. Nagala ken nagikargada iti makan, bado, ken dadduma pay a napateg a bambanag iti trak. Siniguradoda met nga adda kanen ken paginanaanmi ken Victor bayat ti panagbiahemi.”

AGTALINAEDKA A MATALEK KEN JEHOVA

14. Ania ti mabalin nga epekto kadatayo no adda ipatpategtayo a saan a nagtultuloy a matalek ken Jehova?

¹⁴ Maysa kadagiti karirigatan a pakasuotan ket no ti maysa a kapamiliam wenno nadekket a gayyemmo panawanna ni Jehova. (Sal. 78:40; Prov. 24:10) No nadekdekket ti relasionmo iti dayta a tao, mabalin a mas marigatanka a mangakseptar ken mangibtur iti napasamak. No adda kasta a nasaem a kapadasam, mapabilegka la ketdi iti kinamatalek ni Zadok.

15. Apay a kasapulan ni Zadok ti tured tapno agtalinaed a matalek ken Jehova? (1 Ar-ari 1:​5-8)

¹⁵ Nagtalinaed a matalek ni Zadok ken Jehova uray no saan a nagmatalek ti nasinged a gayyemna a ni Abiatar. Napasamak dayta iti maudi a paset ti panagturay ni David. Idi lakay ken matmatayen ni David, pinadas ti anakna a ni Adonias nga agawen ti kinaari uray no ni Solomon ti kayat ni Jehova nga agbalin nga ari. (1 Cron. 22:​9, 10) Pinili ni Abiatar a suportaran ni Adonias. (Basaen ti 1 Ar-ari 1:​5-8.) Ipakita dayta nga inaramid ni Abiatar a saan a matalek ken David ken uray ken Jehova! Imadyinem ti kasta unay a kinaliday ken pannakaupay ni Zadok. Agasem, nasurok a 40 a tawen a nagkatrabahuanda ken Abiatar kas padi! (2 Sam. 8:17) Nagkaduada pay a nangisubli iti ‘Lakasa ti pudno a Dios idiay Jerusalem.’ (2 Sam. 15:29) Idi damo, agpadada met a nangsuporta iti panagari ni David ken adu pay ti nagkadkaduaanda.—2 Sam. 19:​11-14.

16. Ania ti mabalin a nakatulong ken Zadok nga agtalinaed a matalek?

¹⁶ Nagtalinaed a matalek ni Zadok ken Jehova uray no trinaidor ni Abiatar ni David. Saan a nagduaduaan ni David ti kinamatalek ni Zadok. Idi naammuan ni David ti dakes a plano ni Adonias, pinilina da Zadok, Natan, ken Benaias a  mangdutok ken Solomon kas ari. (1 Ar. 1:​32-34) Napabileg ken naparegta la ketdi ni Zadok gapu iti pannakikaduana kadagiti matalek nga agdaydayaw ken Jehova, kas ken Natan ken ti dadduma pay a nangsuporta ken David. (1 Ar. 1:​38, 39) Idi nagbalin nga ari ni Solomon, insaadna “ni Zadok a padi a kasukat ni Abiatar.”—1 Ar. 2:35.

17. Kasanom a matulad ni Zadok no adda nasinged kenka a saan nga agtultuloy a matalek ken Jehova?

¹⁷ Kasanom a matulad ni Zadok? No pilien ti maysa nga ipatpategmo a panawan ni Jehova, ipakitam ken Jehova a pilpiliem ti agtalinaed a matalek kenkuana. (Jos. 24:15) Ikkannaka ni Jehova iti bileg ken tured a kasapulam. Agtultuloyka nga agkararag kenkuana ken agtalinaedka a nasinged kadagiti matalek a kapammatiam. Ipatpateg ni Jehova ti kinamatalekmo, ken gunggonaannaka gapu iti dayta.—2 Sam. 22:26.

18. Ania ti masursurom iti kapadasan da Marco ken Sidse?

¹⁸ Kitaentayo ti kapadasan ni Marco ken ti baketna a ni Sidse. Pinanawan ti dua a babbalasangda ti kinapudno. Imbaga ni Marco: “Sipud pannakayanak dagiti annakmi, ay-ayatenmi unay idan. Inaramidmi ti amin a kabaelanmi a mangprotektar kadakuada. Isu nga idi pinilida a panawan ni Jehova, nakasaksakit dayta.” Intuloyna: “Saannakami a pinampanawan ni Jehova. Siniguradona a no nakapuyak, nabileg ni baketko; ket no isuna ti nakapuy, siak met ti nabileg.” Intuloy ni Sidse: “Saanmi koma a naibturan ti napasamak no saan nga impaay ni Jehova ti bileg a kasapulanmi. Pabpabasolek ti bagik iti napasamak isu a malidlidayanak unay. Imbagak met ken Jehova ti marikriknak. Sumagmamano nga aldaw kalpasanna, inasitgannak ti maysa a sister a nabayagen a diak nakitkita. Tinapikna ti abagak, kinitanak, sa imbagana: ‘Sidse, laglagipem, saanmo a basol ti napasamak!’ Iti tulong ni Jehova, nagtalinaedak a naragsak nga agserserbi kenkuana.”

19. Ania ti determinasionmo?

¹⁹ Kayat ni Jehova nga amin nga agdaydayaw kenkuana ket agbalin a natured kas ken Zadok. (2 Tim. 1:7) Ngem saanna a kayat nga agdependetayo iti bukodtayo a bileg. Kayatna nga agpannuraytayo kenkuana. Isu a no addaka iti situasion a kasapulam ti tured, agpatulongka ken Jehova. Masiguradom a tulongannaka nga agbalin a natured kas ken Zadok!—1 Ped. 5:10.