1. Apay a ti Memorial ti kapatgan nga aldaw iti tawen? (Lucas 22:​19, 20)

 PARA iti ili ni Jehova, ti Memorial ti ipapatay ni Kristo ti kapatgan nga aldaw iti tawen. Dayta laeng ti okasion nga espesipiko nga imbilin ni Jesus a selebraran dagiti pasurotna. (Basaen ti Lucas 22:​19, 20.) Padpadaanantayo ti Memorial gapu iti adu a rason. Usigentayo ti dadduma kadagita.

2. Ania ti dadduma a rason a padpadaanantayo ti Memorial?

² Makatulong kadatayo ti Memorial tapno mautobtayo ti kinapateg ti subbot. Ipalagip dayta kadatayo dagiti pamay-an a maipakitatayo nga ap-apresiarentayo ti sakripisio ni Jesus. (2 Cor. 5:​14, 15) Mangted met dayta kadatayo iti gundaway a ‘makipinnaregta’ kadagiti kakabsat. (Roma 1:12) Kada tawen, adu dagiti di aktibo nga umatender. Dadduma pay ketdi ti matignay nga agsubli ken Jehova gapu iti nariknada a nabara a panangabrasa kadakuada dagiti kakabsat. Ken adu nga interesado a tattao ti matignay nga agadal iti Biblia gapu iti makita ken mangngegda. Dagita ti rason nga espesial unay kadatayo ti Memorial!

3. Kasano a ti Memorial pagkaykaysaennatayo nga agkakabsat iti intero a lubong? (Kitaen met ti ladawan.)

³ Panunotem met no kasano a ti Memorial pagkaykaysaennatayo nga agkakabsat iti intero a lubong. Kalpasan ti ilelennek ti init, agtataripnong dagiti Saksi ni Jehova iti agduduma a lugar iti intero a lubong. Amintayo ket makangngeg iti palawag a mangipaganetget iti kinapateg ti subbot. Mamindua nga agkantatayo iti pammadayaw ken Jehova, ipasatayo dagiti emblema, ken naimpusuan nga ibagatayo ti “amen” iti  mamimpat a panagkararagtayo. Iti uneg ti agarup 24 nga oras, dayta nga urnos ket naaramidton ti amin a kongregasion. Nakaragragsak la ketdi ni Jehova ken Jesus a makakita nga agkaykaysatayo nga agdaydayaw kadakuada iti kastoy a pamay-an?

4. Ania ti pagsasaritaantayo iti daytoy nga artikulo?

⁴ Iti daytoy nga artikulo, pagsasaritaantayo dagitoy a saludsod: Kasanotayo a maisagana ti pusotayo para iti Memorial? Kasanotayo a matulongan dagiti interesado a magunggonaan iti dayta? Ken kasanotayo a matulongan dagiti di aktibo? Ti sungbat dagita a saludsod ket makatulong kadatayo nga agsagana para iti daytoy a sagrado nga okasion.

KASANOTAYO A MAISAGANA TI PUSOTAYO PARA ITI MEMORIAL?

5. (a) Apay a masapul nga utobentayo ti kinapateg ti subbot? (Salmo 49:​7, 8) (b) Ania ti nasursurom iti video nga Apay a Natay ni Jesus?

⁵ Maysa kadagiti kapatgan a pamay-an a maisaganatayo ti pusotayo para iti Memorial ket ti panangutobtayo iti kinapateg ti subbot nga impaay ni Jesu-Kristo. Ditay pulos masubbot ti bagitayo iti basol ken ipapatay. (Basaen ti Salmo 49:​7, 8; kitaen met ti video nga Apay a Natay ni Jesus?) a Isu nga inyurnos ni Jehova nga ipaay ni Jesus ti biagna para kadatayo. Nagdakkel ti insakripisio ni Jehova ken ti ipatpategna nga Anak. (Roma 6:23) No kanayon a panunotentayo ti insakripisio da Jehova ken Jesus para kadatayo, ad-adda a maapresiartayo ti subbot. Pagsasaritaantayo ti dadduma kadagiti situtulok nga inaramid da Jehova ken Jesus a mangipaay iti subbot. Ngem sakbayna, ania ti subbot, ken apay nga impaay ni Jesus dayta?

6. Ania ti subbot, ken apay nga impaay ni Jesus dayta?

⁶ Ti subbot nga impaay ni Jesus ket ti gatad nga imbayad ni Jehova tapno masaka wenno maisubli ti napukaw ni Adan. Perpekto ti immuna a tao a ni Adan idi naparsua. Ngem idi nagbasol, napukawna ti namnamana ken dagiti annakna nga agbiag nga agnanayon. Tapno maisubli ti napukaw ni Adan, inted ni Jesus ti perpekto a biagna kas subbot. Bayat ti panagbiag ni Jesus ditoy daga, “saan a nagbasol, ken awan met ti imbagana a panangallilaw.” (1 Ped. 2:22) Idi natay ni Jesus, ti perpekto a biagna ti eksakto a katupag ti biag a napukaw ni Adan.—1 Cor. 15:45; 1 Tim. 2:6.

7. Ania ti sumagmamano a pannubok a nakaipasanguan ni Jesus idi adda ditoy daga?

⁷ Nagtalinaed a nakatultulnog ni Jesus iti nailangitan nga Amana iti laksid ti adu a pannubok a nakaipasanguanna idi adda ditoy daga. Idi ubing ni Jesus, masapul nga agpasakup kadagiti imperpekto a nagannakna uray nayanak a perpekto. (Luc. 2:51) Idi agtutubon, masapul a labananna ti aniaman a panangpilit ti dadduma a mangimpluensia kenkuana nga agsukir wenno agbalin a di matalek. Idi met adulton ni Jesus, masapul a labananna dagiti sulisog ken direkta a panangatakar ni Satanas a Diablo a mangdadael iti kinamatalekna iti Dios. (Mat. 4:​1-11) Determinado ni Satanas a mangaramid iti amin tapno agbasol ni Jesus ket saanna a maipaay ti subbot.

8. Ania pay dagiti pannubok nga inibturan ni Jesus?

⁸ Bayat ti ministerio ni Jesus ditoy daga, inibturanna ti dadduma pay a pannubok. Binusbusorda ken pinadasda a patayen. (Luc. 4:​28, 29; 13:31) Masapul met nga anusanna ti kinaimperpekto dagiti pasurotna. (Mar. 9:​33, 34) Idi nabista, pinarparigat ken inuy-uyawda. Kalpasanna, pinatayda iti nakaut-ut-ot  ken nakababain a pamay-an. (Heb. 12:​1-3) Dayta a nakaro a panagsagabana iti kayo a pagtutuokan ket masapul nga ibturanna a bukbukodna, nga awan ti proteksion ni Jehova. b—Mat. 27:46.

9. Ania ti epekto kadatayo ti sakripisio ni Jesus? (1 Pedro 1:8)

⁹ Talaga a nagdakkel ti insakripisio ni Jesus tapno maipaayna ti subbot. No panunotentayo ti amin a sakripisio a situtulok nga inaramid ni Jesus para kadatayo, lallalo nga umuneg ti panagayattayo kenkuana!—Basaen ti 1 Pedro 1:8.

10. Ania ti insakripisio ni Jehova tapno maipaay ni Jesus ti subbot?

¹⁰ Ni ngay met Jehova? Ania ti situtulok nga insakripisiona tapno maipaay ni Jesus ti subbot? Kadagiti amin nga agama, da Jehova ken Jesus ti kasingedan. (Prov. 8:30) Panunotem ngarud ti narikna ni Jehova idi makitkitana nga ib-ibturan ni Jesus ti nagadu a pannubok idi adda ditoy daga. Sigurado a nasaktan unay ni Jehova idi nakitana a namaltrato, nabaybay-an, ken nagsagaba ti Anakna.

11. Mangted iti pagarigan a mangipakita iti narikna ni Jehova idi pinatayda ni Jesus.

¹¹ Ammo la ketdi dagiti nagannak a natayan iti anak no kasano kasaem dayta. Nabileg ti pammatitayo iti panagungar, ngem nasakit latta no matayantayo iti ipatpategtayo iti biag. Makatulong daytoy tapno maawatantayo ti narikna ni Jehova idi makitkitana nga agsagsagaba ken natay ti ipatpategna nga Anak idi Nisan 14, 33 C.E. c—Mat. 3:17.

12. Ania dagiti mabalintayo nga aramiden bayat ti lawlawas sakbay ti Memorial?

¹² Manipud ita agingga iti Memorial, nasayaat no pagbalinenyo a proyekto iti personal a panagadal wenno iti Panagdaydayaw ti Pamiliayo ti maipapan iti subbot. Usarenyo ti Giya iti Panagsukimat Para Kadagiti Saksi ni Jehova wenno ti dadduma pay a katulongan iti panagadal iti Biblia tapno maammuanyo ti dadduma pay a detalye maipapan iti subbot. d Siguraduenyo met a suroten ti eskediul iti panagbasa iti Biblia iti Memorial a makita iti Panagbiag ken Ministeriotayo kas Kristiano—Workbook iti Gimong. Ket iti aldaw ti Memorial, diyo liplipatan a buyaen ti espesial a programa ti Panagdaydayaw iti Agsapa. No isaganatayo ti pusotayo  para iti Memorial, matulongantayo dagiti interesado a magunggonaan met iti dayta.—Esd. 7:10.

TULONGAM DAGITI INTERESADO A MAGUNGGONAAN ITI MEMORIAL

13. Ania ti umuna nga aramidentayo tapno matulongantayo ti dadduma a magunggonaan iti Memorial?

¹³ Kasanotayo a matulongan ti dadduma a magunggonaan iti Memorial? Siempre, ti umuna nga aramidentayo ket awisentayo ida. Malaksid kadagiti nakasaritatayon iti ministerio, mabalintayo nga ilista dagiti kayattayo nga awisen. Mabalin a karaman kadagita dagiti kabagian, katrabahuan, kaeskuelaan, ken dadduma pay. No kurang ti nayimprenta a kopia ti imbitasion, mabalintayo nga i-share ti link ti elektroniko a bersionna. Ditay ammo, baka adunto ti umay!—Ecl. 11:6.

14. Mangted iti pagarigan a mangipakita nga epektibo ti panangted iti personal nga imbitasion.

¹⁴ Ditay tagibassiten ti kinaepektibo ti panangted iti personal nga imbitasion. Maysa nga aldaw, nakigtot ti maysa a sister a saan a Saksi ti asawana ta planon ni lakayna ti maki-Memorial. Apay a nakigtot ti sister? Ngamin, namin-adun nga inawisna ni lakayna ngem saan met a pulos nga immatender. Apay a kayatnan ti umatender? Imbagana: “Adda naawatko nga imbitasion.” Inted kano dayta ti maysa a panglakayen iti lugarda nga am-ammona. Immatender ti asawa dayta a sister iti dayta a tawen ken iti simmaruno pay a tawtawen.

15. Ania ti laglagipentayo no iyaw-awistayo ti Memorial?

¹⁵ Laglagipentayo a mabalin nga adda dagiti saludsod dagiti awisentayo—lalo no saanda pay a pulos nga immatender kadagiti gimongtayo. Nasayaat no nasaksakbay a panunotentayo dagiti isaludsodda ken dagiti isungbattayo. (Col. 4:6) Kas pagarigan, mabalin a pampanunotenda: ‘Anianto ti mapasamak idiay?’ ‘Kasanonto kabayag?’ ‘Anianto ti pagbadok?’ ‘Adda kadi bayadak idiay?’ ‘Addanto kadi agkolekta iti kuarta?’ Isu a no iyaw-awistayo ti Memorial, mabalintayo a damagen, “Adda kadi saludsodmo?” sa sungbatantayo.  Mabalintayo met nga ipabuya dagiti video a Laglagipenyo ti Ipapatay ni Jesus ken Ania ti Maar-aramid iti Kingdom Hall? tapno maawatanna no kasano a maar-aramid dagiti gimongtayo. Mabalintayo met nga iranud dagiti nagsasayaat a punto ti leksion 28 ti libro nga Agbiagka a Naragsak iti Agnanayon!

16. Ania pay dagiti mabalin nga isaludsod dagiti umatender iti Memorial?

¹⁶ Kalpasan ti Memorial, mabalin nga adda pay latta isaludsod dagiti inawistayo. Mabalin a pampanunotenda no apay a bassit (wenno awan pay ketdi) ti nangan ken imminum iti emblema. Posible a pampanunotenda met no kasano kasansan ti panangselebrartayo iti Memorial. Baka kayatda pay a maammuan no ti amin a gimong dagiti Saksi ni Jehova ket kasta met laeng ti pannakaangayna. Uray no nailawlawagen ti adu kadagita iti palawag ti Memorial, mabalin a kasapulan latta dagiti inawistayo ti mas detalyado nga impormasion. Makatulong kadatayo ti artikulo nga “Apay a Naiduma iti Dadduma a Relihion ti Panangselebrar Dagiti Saksi ni Jehova iti Pangrabii ti Apo?” iti jw.org tapno masungbatantayo ti dadduma a saludsodda. Kayattayo nga aramiden ti amin a kabaelantayo—sakbay, bayat, ken kalpasan ti Memorial—a tumulong kadagiti “addaan iti umiso a kababalin” a magunggonaan iti daytoy nga okasion.—Ara. 13:48.

TULONGANYO DAGITI DI AKTIBO

17. Kasano a matulongan dagiti panglakayen dagiti di aktibo? (Ezekiel 34:​12, 16)

¹⁷ Bayat ti tiempo ti Memorial, dakayo a panglakayen, kasanoyo a matulongan dagiti di aktibo? Ipakitayo ti naayat a pannakaseknan kadakuada. (Basaen ti Ezekiel 34:​12, 16.) Sakbay ti Memorial, siguraduenyo nga adu ti makontakyo agingga a posible. Ipasiguradoyo nga ipatpategyo ida ken kayatyo ida a tulongan. Awisenyo ida a maki-Memorial. No umayda, sibabara nga abrasaenyo ida. Kalpasan ti Memorial, itultuloyyo a bisitaen wenno tawagan dagita a maipatpateg a kakabsat ken ipaayyo ti aniaman a  naespirituan a tulong a kasapulanda tapno makasublida ken Jehova.—1 Ped. 2:25.

18. Kasano a makatulongtayo amin kadagiti di aktibo? (Roma 12:10)

¹⁸ Amintayo iti kongregasion ket adda maitulongna kadagiti di aktibo a maki-Memorial. Kasano? Ipakitatayo kadakuada ti ayat, kinaimbag, ken respeto. (Basaen ti Roma 12:10.) Laglagipentayo a mabalin a saan kaskarina kadagitoy a maipatpateg a karnero ti makigimong manen. Baka madanaganda iti makuna dagiti kakabsat. e Isu a ditay koma agsaludsod iti mangpabain wenno mangibaga iti makasair iti riknada. (1 Tes. 5:11) Kakabsattayo ida ket maragsakantayo a makadua manen ida nga agdaydayaw ken Jehova!—Sal. 119:176; Ara. 20:35.

19. Ania dagiti magunggonatayo iti pananglaglagiptayo iti ipapatay ni Jesus?

¹⁹ Talaga nga agyamyamantayo ta imbaga ni Jesus a laglagipentayo ti ipapatayna iti kada tawen ken maawatantayo no apay a napateg dayta. No maki-Memorial-tayo, magunggonaantayo ken ti dadduma iti adu a pamay-an. (Isa. 48:​17, 18) Umuneg ti ayattayo ken ni Jehova ken ni Jesus. Maipakitatayo nga ap-apresiarentayo unay dagiti inaramidda para kadatayo. Lalo a suminged ti relasiontayo kadagiti kapammatiantayo. Ken mabalin a matulongantayo ti dadduma a mangammo met no kasano a magunggonaanda kadagiti bendision a nagbalin a posible gapu iti subbot. Isu nga ikagumaantayo koma amin ti agsagana para iti Memorial ita a tawen—ti kapatgan nga aldaw iti tawen!