1-2. Ania ti masapul nga itultuloytayo nga aramiden kalpasan a nabautisarantayon? Ilawlawag.

 KASANO kasansan ti panangdalusmo iti balaymo? Sigurado a dinalusam a naimbag dayta sakbay a nagyanka sadiay. Ngem ania ti mapasamak no saanmon a pulos a dinalusan? Siempre, natapok ken narugitto manen. Tapno kanayon a presentable ti balaymo, masapul a regular a dalusam dayta.

² Kasta met la ti kasapulan nga aramidentayo iti panagpampanunot ken personalidadtayo. Siempre, sakbay a nagpabautisartayo, nangaramidtayo kadagiti kasapulan a panagbalbaliw iti biagtayo tapno ‘madalusan ti bagitayo iti amin a mangrugit iti lasag ken espiritu.’ (2 Cor. 7:1) Ngem ita, masapul a surotentayo ti balakad ni apostol Pablo nga ‘itultuloytayo a pabaruen ti puersa a mangiturturong iti panunottayo.’ (Efe. 4:23) Apay a masapul nga itultuloytayo nga aramiden dayta? Ngamin, mabalin a nalaka laeng a marugitantayo kadagiti arig tapok ken rugit daytoy a lubong. Tapno maliklikantayo dayta ken kanayontayo a presentable ken Jehova, masapul a regular a sukimatentayo ti panagpampanunot, personalidad, ken dagiti tarigagaytayo.

3. Ania ti kaipapanan “ti panangbalbaliwyo iti panunotyo”? (Roma 12:2)

³ Ania ti masapul nga aramidentayo tapno mabalbaliwantayo ti panunottayo wenno ti panagpampanunottayo? (Basaen  ti Roma 12:2.) Ti Griego a termino a naipatarus a “panangbalbaliwyo iti panunotyo” ket mabalin met a maipatarus kas “panangretubar iti isipyo.” Saantayo laeng ngarud a mangaramid iti sumagmamano a nasayaat. Imbes ketdi, masapul a sukimatentayo ti kinataotayo ken mangaramidtayo kadagiti kasapulan a panagbalbaliw tapno agbiagtayo a maitunos kadagiti pagalagadan ni Jehova, agingga a posible. Saan la a mammaminsan no di ket itultuloytayo nga aramiden dayta.

4. Ania ti aramidentayo tapno ti isiptayo ket saan a maimpluensiaan daytoy a sistema ti bambanag?

⁴ Inton perpektotayon, kanayonen a maparagsaktayo ni Jehova iti amin nga aramidentayo. Bayat nga ur-urayentayo dayta, masapul nga itultuloytayo ti agregget tapno maragpattayo dayta a kalat. Iti Roma 12:2, imbaga ni Pablo a masapul a balbaliwantayo ti panagpampanunottayo tapno maammuantayo dagiti kayat ti Dios nga aramidentayo. Ditay itulok nga impluensiaannatayo lattan daytoy dakes a lubong. Masapul a sukimatentayo nga umuna ti bagitayo no talaga met laeng a ti panagpampanunot ti Dios—saan a ti lubong—ti mangim-impluensia kadagiti kalat ken desisiontayo.

5. Kasanotayo a masukimat ti bagitayo no talaga a pampanunotentayo nga asidegen ti aldaw ni Jehova? (Kitaen ti ladawan.)

⁵ Kitaentayo ti maysa a pagarigan. Kayat ni Jehova a ‘laglagipentayo ti kaadda ti aldawna.’ (2 Ped. 3:12) Isaludsodmo iti bagim: ‘Makita kadi iti kabibiagko a maawatak nga asidegen ti panungpalan daytoy sistema ti bambanag? Makita kadi kadagiti desisionko maipapan iti edukasion ken trabaho a ti panagserbi ken Jehova ti kapatgan iti biagko? Mamatiak kadi nga ipaay ni Jehova dagiti kasapulanmi a sangapamiliaan, wenno kanayon a madanaganak maipapan kadagiti material a banag?’ Sigurado a naragsak ni Jehova no  makitkitana nga ituntunostayo ti biagtayo iti pagayatanna.—Mat. 6:25-27, 33; Fil. 4:12, 13.

6. Ania ti masapul nga itultuloytayo nga aramiden?

⁶ Masapul a regular a sukimatentayo ti panagpampanunottayo ken aramidentayo dagiti kasapulan a panagbalbaliw. Imbaga ni Pablo kadagiti taga-Corinto: “Itultuloyyo a suboken no agbibiagkayo maitunos iti pammati; itultuloyyo a paneknekan no aniakayo.” (2 Cor. 13:5) Ti “panagbiag maitunos iti pammati” ket saan laeng a sagpaminsan a pannakigimong ken pannakiraman iti ministerio. Karaman met iti dayta ti panagpampanunot, tarigagay, ken motibotayo. Masapul ngarud nga itultuloytayo a balbaliwan ti panagpampanunottayo. Maaramidtayo dayta no basaentayo ti Sao ti Dios, sursuruentayo ti agpanunot a kas iti Dios, ken aramidentayo ti aniaman a kasapulan tapno maitunostayo ti biagtayo iti pagayatan ni Jehova.—1 Cor. 2:14-16.

7. Sigun iti Efeso 4:31, 32, ania pay ti masapul nga aramidentayo, ken apay a mabalin a narigat dayta?

⁷ Basaen ti Efeso 4:31, 32. Malaksid a balbaliwantayo ti panagpampanunottayo, masapul met nga ‘isuottayo ti baro a personalidad.’ (Efe. 4:24) Rumbeng nga ikagumaantayo nga aramiden dayta. Karaman kadagiti masapul nga ikagumaantayo nga ikkaten nga ugali ket ti sakit ti nakem, panagunget, ken panagpungtot. Apay a mabalin a narigat dayta? Ngamin, dadduma a naalas nga ugali ket narigat nga isardeng. Kas pagarigan, ibaga ti Biblia a ti dadduma a tattao ket “managpungpungtot” ken “nalaka nga agpungtot.” (Prov. 29:22) Ti maysa nga addaan kadagiti kasta a dakes nga ugali ket masapul nga agtultuloy nga agporsegi a mangisardeng kadagita uray no bautisadon, kas iti makitatayo iti sumaruno a kapadasan.

8-9. Kasano nga ipakita ti kapadasan ni Stephen a masapul nga itultuloytayo nga uksoben ti daan a personalidad?

⁸ Marigatan idi ti brother a ni Stephen a mangkontrol iti pungtotna. “Uray idi nabautisaranakon,” imbagana, “kasapulak latta a labanan ti kinaalistok nga agpungtot. Kas pagarigan, idi mangaskasabakami, adda nangtakaw iti radio iti kotsek. Kinamatko isuna. Idi dandanikon makamatan, inibbatanna ti radiok sa permi ti taraynan. Idi inyestoriak iti dadduma no kasanok a nabawi ti radiok, dinamag ti maysa a panglakayen, ‘Stephen, ania ngata ti inaramidmo no nakamatam isuna?’ Dayta ti namagpanunot kaniak ken nangpatibker iti determinasionko nga agbalin nga ad-adda a mannakikappia.” b

⁹ Kas ipakita ti kapadasan ni Stephen, mabalin a bigla lattan a rummuar ti naalas nga ugali uray no impagaruptayo a naikkattayon dayta. No mapasamak dayta kenka, dika maupay ken dimo ipagarup a napaaykan kas maysa a Kristiano. Inamin ni apostol Pablo: “No kayatko nga aramiden ti umiso, ti dakes ti adda kaniak.” (Roma 7:21-23) Imperpekto ti amin a Kristiano, isu nga adda dagiti naalas nga ugalida nga agkarasubli a kas iti tapok ken rugit a maurnong iti uneg ti balaytayo. Rumbeng ngarud nga ikagumaantayo ti agtalinaed a nadalus. Kasano?

10. Kasanotayo a malabanan dagiti naalas nga ugali? (1 Juan 5:14, 15)

¹⁰ Ikararagmo ken Jehova ti ugali a lablabanam ken agtalekka a denggen ken tulongannaka. (Basaen ti 1 Juan 5:14, 15.) Saan a simimilagro nga ikkaten ni Jehova dayta nga ugali, ngem patibkerennaka tapno saanka a sumuko. (1 Ped. 5:10) Kabayatanna, aramidem dagiti inkararagmo ken liklikam dagiti  banag a mangpasubli iti daan a personalidadmo. Kas pagarigan, dika agbuya iti pelikula, programa iti telebision, wenno agbasa kadagiti estoria a mangipakita nga awan pagdaksanna dagiti ugali nga ikagkagumaam nga ikkaten. Iwaksim met iti isipmo dagiti di umiso a tarigagay.—Fil. 4:8; Col. 3:2.

11. Ania dagiti aramidentayo tapno maitultuloytayo nga isuot ti baro a personalidad?

¹¹ Uray no nauksobmon ti daan a personalidad, masapul nga isuotmo ti baro a personalidad. Kasano? Pagbalinem a kalat a tuladen ni Jehova bayat a maam-ammuam dagiti kualidadna. (Efe. 5:1, 2) Kas pagarigan, no adda nabasam a salaysay ti Biblia a mangitampok iti panangpakawan ni Jehova, isaludsodmo iti bagim, ‘Pakpakawanek kadi ti sabsabali?’ No mabasam met ti asi ni Jehova kadagiti marigrigat, isaludsodmo iti bagim, ‘Maasianak met kadi kadagiti kapammatiak nga agkasapulan iti tulong, ken ipakpakitak dayta babaen ti aramid?’ Maitultuloymo a balbaliwan ti panagpampanunotmo no isuotmo ti baro a personalidad, ken an-anusam ti bagim bayat nga ar-aramidem dayta.

12. Kasano a ti kapadasan ni Stephen ti mangpaneknek nga adda pannakabalin ti Biblia a mangbalbaliw iti biag ti tao?

¹² Nakita ti nadakamat itay a ni Stephen nga in-inuten a maisusuotna ti baro a personalidad. Imbagana: “Sipud nabautisaranak, naipasangoak iti adu a situasion a mabalin a mangiduron koma kaniak nga agbalin a bayolente. Nasursurok ti pumanaw lattan no adda mangpadas a mamagpungtot kaniak, wenno ti mangpakalma iti situasion iti sabali a pamay-an. Adu ti mangap-apresiar kaniak, pati ni baketko, iti panangsangok kadagiti kasta a situasion. Uray siak a mismo, kasla diak mamati kadagita a panagbalbaliwko! Ngem ammok a no sisiak laeng, saanko koma a nabaelan dagita. Patiek nga ebidensia dagita nga adda pannakabalin ti Biblia a mangbalbaliw iti biag.”

13. Ania ti makatulong tapno mapatanortayo dagiti umiso a tarigagay? (Galacia 5:16)

¹³ Basaen ti Galacia 5:16. Tapno matulongannatayo ni Jehova a mangabak iti panangikagumaantayo a mangaramid iti umiso, sipaparabur nga ipapaayna ti nasantuan nga espirituna. No agadaltayo iti Sao ti Dios, ipalpalubostayo nga impluensiaannatayo dayta nga espiritu. Makaawattayo met iti nasantuan nga espiritu no makigimgimongtayo. Kadagita a Nakristianuan a panagtataripnong, makaduatayo dagiti kakabsat a padatayo a mangikagkagumaan a mangaramid iti umiso, ket makaparegta dayta. (Heb. 10:24, 25; 13:7) Ken no sipapasnek nga agkararagtayo ken Jehova ken ipakaasitayo a tulongannatayo a manglaban iti pagkapuyantayo, ipaayannatayo iti nasantuan nga espirituna tapno maitultuloytayo a malabanan dayta. Nupay dagiti naespirituan nga aktibidad saanda a maikkat dagiti di umiso a tarigagay, dagita ti makatulong tapno ditay maaramid dagita a tarigagay. Kas iti kuna ti Galacia 5:16, dagidiay magmagna babaen ti espiritu ‘dida pulos masurot dagiti tarigagay ti lasagda.’

14. Apay a napateg nga itultuloytayo a patanoren dagiti umiso a tarigagay?

¹⁴ No rinugiantayon dagiti aktibidad a makatulong kadatayo tapno sumingedtayo ken Jehova, napateg a kanayon nga aramidentayo dagita ken itultuloytayo a patanoren dagiti umiso a tarigagay. Apay? Kanayon ngamin nga umassi-assibay ti maysa kadagiti kalabantayo—ti pannakasulisog nga agaramid iti dakes. Uray bautisadotayon, baka  masulisogtayo a mangaramid manen kadagiti banag a masapul a liklikantayo kas iti panagsugal, sobra a panaginum iti arak, wenno pornograpia. (Efe. 5:3, 4) Inamin ti maysa nga agtutubo a brother: “Ti maysa a karirigatan a lablabanak ket ti panagkursonadak iti padak a lalaki. Impagarupko no mapukawto met laeng dagita a riknak, ngem adda pay met la gayam.” Ania ti makatulong kenka no nakapigpigsa ti di umiso a tarigagaymo?

15. Apay a makaparegta a maammuan a dagiti di umiso a tarigagay ket “gagangay kadagiti tattao”? (Kitaen ti ladawan.)

¹⁵ Bayat a lablabanam ti maysa a nagdakes a tarigagay, laglagipem a dika agmaymaysa. Kuna ti Biblia: “Awan ti sulisog a dimteng kadakayo malaksid iti gagangay kadagiti tattao.” (1 Cor. 10:13a) Naisurat dagita a sasao para kadagiti Kristiano a lallaki ken babbai idiay Corinto. Dadduma kadakuada ket dati a mannakikamalala, homoseksual, ken mammartek. (1 Cor. 6:9-11) Kalpasan ngata a nabautisaranda ket awanen dagiti di umiso a tarigagay a masapul a labananda? Adda latta. Ngamin, uray no aminda ket Kristiano a dinutokan ti espiritu, imperpektoda pay met laeng a tattao. Sigurado a pasaray masapul a labananda idi dagiti di umiso a tarigagay. Makaparegta dayta kadatayo. Apay? Ipakita ngamin dayta nga aniaman ti di umiso a tarigagay a lablabanam, nalabananen dayta ti dadduma. Wen, mapagtalinaedmo a ‘natibker ti pammatim, ta ammom a kasta met laeng ti sagsagabaen ti amin a kakabsatmo ditoy lubong.’—1 Ped. 5:9.

16. Ania a peggad ti masapul a liklikantayo, ken apay?

¹⁶ Liklikam daytoy a peggad: Dimo panunoten nga awan ti makaawat iti pagkapuyan a lablabanam. No ngamin kasta ti panunotem, mariknam nga awanen ti namnamam ken saanmo a kaya a labanan dagiti di umiso a tarigagay. Ngem saan a kasta ti ibagbaga ti Biblia. Kunana: “Matalek ti Dios, ket dina ipalubos a  masulisogkayo iti diyo kabaelan, no di ket mangisagana iti dalan a pagruaran tapno maibturanyo dayta a sulisog.” (1 Cor. 10:13b) Isu nga uray napigsa ti maysa a di umiso a tarigagay, kayatayo a labanan ken sibaballigi a maibturan dayta. Iti tulong ni Jehova, kayatayo a lapdan ti bagitayo a mangaramid iti dayta.

17. Nupay ditay maliklikan a marikna dagiti di umiso a tarigagay, ania ti makontroltayo?

¹⁷ Kanayon a laglagipem daytoy: Kas imperpekto a tao, adda latta ti tiempo a mariknam dagiti di umiso a tarigagay. Ngem no mariknam dagita, insigida a labanam, kas iti inaramid ni Jose a dagus a timmaray tapno maadaywanna ti asawa ni Potifar. (Gen. 39:12) Masapul a saanmo nga aramiden dagiti di umiso a tarigagaymo!

18-19. Ania dagiti isaludsodtayo iti bagitayo bayat nga ikagkagumaantayo a balbaliwan ti panagpampanunottayo?

¹⁸ Ti panangbalbaliw iti panunottayo ket agtultuloy a panagregget tapno maitunos ti panagpampanunot ken panagtigtignaytayo iti pagayatan ni Jehova. Rumbeng ngarud a regular a sukimatentayo ti bagitayo ken isaludsodtayo: ‘Makita kadi iti kabibiagko a mamatiak nga asidegen ti panungpalan? Rumangrang-ayak kadi iti panangisuotko iti baro a personalidad? Ipalpalubosko kadi a ti espiritu ni Jehova ti mangiturong iti biagko tapno malabanak ti sulisog a mangaramid kadagiti nainlasagan a tarigagay?’

¹⁹ Bayat a suksukimatem ti bagim, panunotem a saanka a perpekto isu a dagiti nagrang-ayam ti panunotem. No adda dagiti nakitam a masapul a parang-ayem, dika koma maupay. Surotem ketdi ti balakad ti Filipos 3:16: “Aniaman ti nagrang-ayantayon, itultuloytayo ti naurnos a panangsurot iti dayta iti isu met la a pamay-an.” No aramidem dayta, masiguradom a bendisionan ni Jehova dagiti panagreggetmo nga agtultuloy a mangbalbaliw iti panunotmo.