1. Ania ti ar-aramiden ti adu tapno mapalawada ti ministerioda?

 NAGADU ti trabahotayo bayat nga umad-adani ti panungpalan daytoy a sistema. (Mat. 24:14; Luc. 10:2; 1 Ped. 5:2) Kayattayo ti agserbi ken Jehova iti amin a kabaelantayo. Adu ti mangpalpalawa iti ministerioda. Kalat ti dadduma ti agserbi kas payunir, Bethelite, wenno boluntario iti panagibangon kadagiti pasilidad ti organisasiontayo. Ikagkagumaan met ti adu a kakabsat a lallaki ti makualipikar kas ministerial nga adipen wenno panglakayen. (1 Tim. 3:1, 8) Anian a ragsak ni Jehova a makita ti situtulok a panagsakripisio dagiti adipenna!​—Sal. 110:3; Isa. 6:8.

2. Ania ti mabalin a reaksiontayo no ditay maragpat dagiti naespirituan a kalattayo?

² Mabalin a malidayantayo no adun a tawen ti limmabas ngem ditay pay la naragpat ti dadduma a naespirituan a kalattayo. Wenno maupaytayo ta ditay maragpat ti dadduma a pribilehio gapu iti edad wenno kasasaadtayo. (Prov. 13:12) Kasta ti situasion ni Melissa. * Kayatna ti agserbi iti Bethel wenno ageskuela iti School for Kingdom Evangelizers, ngem kinunana: “Saanakon a kualipikado gapu iti edadko. Isu nga arapaap laengen dagita a pribilehio. Ket adda dagiti gundaway a maupayak.”

3. Ania ti mabalin nga aramiden ti dadduma tapno makualipikarda iti kanayonan a pribilehio?

³ Mabalin a kasapulan pay ti adu a nasalun-at nga agtutubo ti agmataengan ken mangpatanor iti dadduma a kualidad tapno makualipikarda iti kanayonan a pribilehio. Mabalin a nalaingda, alistoda nga agdesision, ken sisasaganada nga agtrabaho;  ngem baka masapul pay a sursuruenda ti agbalin a naanus, naannad iti trabaho, wenno nadayaw. No ikagumaam a parang-ayen dagiti nasayaat a kualidad, mabalin a maikkanka iti kanayonan a pribilehio iti tiempo a dimo namnamaen. Usigentayo ti kapadasan ni Nick. Idi 20 ti tawenna, naupay unay ta saan a naapointaran kas ministerial nga adipen. Kinunana, “Nariknak a masapul nga adda pay dagiti parang-ayek.” Ngem saan a simmuko ni Nick. Ginundawayanna dagiti pribilehio a nakalukat kenkuana. Agserserbi itan kas miembro ti Branch Committee.

4. Ania ti usigentayo iti daytoy nga artikulo?

⁴ Maup-upayka kadi ta saanmo pay a naragpat ti maysa a naespirituan a kalatmo? No wen, iyebkasmo ti pakaseknam ken Jehova. (Sal. 37:5-7) Damagem met ti suhestion dagiti nataengan a kakabsat no kasanom a pasayaaten ti panagserbim iti Dios, sa ikagumaam nga iyaplikar ti balakadda. No aramidem dayta, mabalin a maawatmo dayta a pribilehio wenno maragpatmo dayta a kalat. Ngem kas iti situasion ni Melissa, a nadakamat itay, mabalin a saanmo a maragpat iti agdama ti pribilehio a tartarigagayam. Ngem kasano a makapagtalinaedka a naragsak? Tapno masungbatan dayta a saludsod, ilawlawag daytoy nga artikulo (1) no ania ti makaipaay kenka iti ragsak, (2) no kasanom a manayonan ti ragsakmo, ken (3) no ania dagiti kalat a mabalinmo nga aramiden tapno naragragsakka.

5. Ania ti masapul a pagpokusantayo tapno naragsaktayo? (Eclesiastes 6:9)

⁵ Sigun iti Eclesiastes 6:9, naragsaktayo no umiso ti panangmatmattayo iti bambanag. (Basaen.) Ti tao a mangtagtagiragsak iti “makitkita ti mata” apresiarenna ti bambanag nga adda kenkuana, a pakairamanan ti agdama a situasionna. Ngem saan a mapmapnek ti tao a sangkapanunotna dagiti tarigagayna. Ania ngarud ti masursurotayo? Tapno naragsaktayo, masapul nga agpokustayo iti bambanag nga adda kadatayo ken iti bambanag a realistiko a magun-odantayo.

6. Ania nga ilustrasion ti usigentayo, ken ania ti masursurotayo iti dayta?

⁶ Posible kadi a mapnekka kadagiti addan kenka? Ngamin, iti panaglabas ti tiempo, natural laeng a kayattayo ti agsursuro iti baro a bambanag. Wen, posible dayta. Mabalintayo a tagiragsaken dagiti “makitkita ti mata[tayo].” Kasano? Tapno maammuantayo, usigentayo ti ilustrasion ni Jesus maipapan kadagiti talento, a nairekord iti Mateo 25:14-30. Agpokustayo iti masursurotayo no kasanotayo a masarakan ti ragsak ken manayonan ti ragsaktayo kadagiti bendision nga adda kadatayo ita.

7. Isumariom ti ilustrasion ni Jesus maipapan kadagiti talento.

⁷ Iti ilustrasion, adda lalaki a mapan iti sabali a pagilian. Sakbay a pimmanaw, inayabanna dagiti adipenna ket inikkanna ida kadagiti talento tapno inegosioda. * Ammo ti lalaki ti kabaelan ti tunggal adipenna, isu nga inikkanna iti lima a talento ti maysa nga adipen, dua a talento iti sabali, ken maysa a talento iti maikatlo nga adipen. Sigagaget nga intrabaho ti dua nga adipen ti kuarta ti apoda. Ngem awan ti inaramid ti maikatlo nga adipen iti kuarta a naited kenkuana, isu nga inikkat ti apona iti trabahona.

8. Apay a naragsak ti umuna nga adipen iti ilustrasion?

⁸ Nakaragragsak la ketdi ti immuna nga adipen idi intalek kenkuana ti apona ti lima a  talento. Nagdakkel dayta a gatad ti kuarta​—ebidensia a kasta unay ti panagtalek kenkuana ti apona! Ngem ti ngay maikadua nga adipen? Mabalin koma a naupay ta ti naawatna ket saan a kas iti kaadu ti talento nga inawat ti immuna. Ngem ania ti inaramidna?

9. Ania ti saan nga imbaga ni Jesus maipapan iti maikadua nga adipen? (Mateo 25:22, 23)

⁹ Basaen ti Mateo 25:22, 23. Saan nga imbaga ni Jesus a nasuron wenno nagsakit ti nakem ti maikadua nga adipen ta dua laeng a talento ti naawatna. Ken saanna met a dinakamat nga irekreklamo ti adipen: ‘Daytoy laeng ti naawatko? Nagagetak met a kas iti umuna nga adipen a nakaawat iti lima a talento! No dinak met la ap-apresiaren ti apok, ikalik lattan ti dua a talento ket agtrabahoak para iti bagik.’

10. Ania ti inaramid ti maikadua nga adipen kadagiti talento a naited kenkuana?

¹⁰ Kas iti umuna nga adipen, siseserioso nga inaramid ti maikadua nga adipen ti responsabilidad a naited kenkuana ken sigagaget a nagtrabaho para iti apona. Kas resultana, nadoble ti dua a talento nga intalek kenkuana ti apona. Nagunggonaan ti adipen iti kinagagetna. Saan la a naragsakan ti apona no di ket inikkanna pay iti ad-adu a responsabilidad!

11. Kasanotayo a manayonan ti ragsaktayo?

¹¹ Iti umasping a pamay-an, manayonan ti ragsaktayo no napasnektayo iti aniaman nga ipapaaramid kadatayo ni Jehova. ‘Ipamaysam’ nga ikasaba ti naimbag a damag, ken naan-anay a makiramanka kadagiti aktibidad ti kongregasion. (Ara. 18:5; Heb. 10:24, 25) Agsaganaka a naimbag para kadagiti  gimong tapno makaipaayka iti makapabileg a komento iti mapagadalan a material. Ipategmo ti aniaman a paset a maited kenka iti gimong iti tengnga ti lawas. No awisendaka a tumulong iti maysa a trabaho iti kongregasion, nasapaka koma ken mapagtalkanka. Dimo tagibassiten ti aniaman nga asaynment a maited kenka. Ikagumaam a parang-ayen dagiti abilidadmo. (Prov. 22:29) No nagaggagetka kadagiti naespirituan nga aktibidad ken asaynmentmo, naparpartak ti irarang-aymo ken naragragsakka. (Gal. 6:4) Nalaklaka met a makipagragsakka iti dadduma no maawatda ti pribilehio a tartarigagayam.​—Roma 12:15; Gal. 5:26.

12. Ania dagiti inaramid ti dua a kakabsat tapno naragragsakda?

¹² Malagipmo ni Melissa, ti nangibaga a kayatna ti agserbi iti Bethel wenno ageskuela iti School for Kingdom Evangelizers? Nupay saan a kualipikado kadagita a pribilehio, kinunana: “Inkagumaak ti naan-anay a makiraman iti ministerio kas payunir ken makiramramanak iti nadumaduma a pamay-an ti panangasaba isu a nakaragragsakak.” Ken kasano a napagballigian ni Nick ti pannakaupayna gapu ta saan a naapointaran kas ministerial nga adipen? “Nagpokusak idi kadagiti pribilehiok, kas iti panangasaba ken iti panangipaay iti makaparegta a komento kadagiti gimong. Nagaplayak met nga agserbi iti Bethel ket naawisak iti simmaruno a tawen.”

13. Ania ti resultana no napasnekka iti agdama nga asaynmentmo? (Eclesiastes 2:24)

¹³ No napasnekka iti agdama nga asaynmentmo, makaawatka kadi iti kanayonan a responsabilidad iti masanguanan? Mabalin a mapasamak dayta kas iti kapadasan ni Nick. Ngem no saan, a kas ken Melissa, agbalinka latta a naragragsak ken kontento iti panagserbim ken Jehova. (Basaen ti Eclesiastes 2:24.) Sigurado met a naragragsakka ta ammom a dagiti panagreggetmo ket makaparagsak iti Apotayo, ni Jesu-Kristo.

14. No maipapan kadagiti naespirituan a kalattayo, ania ti masapul a laglagipentayo?

¹⁴ Kayatna kadi a sawen a no agpokustayo kadagiti agdama nga asaynmenttayo ket saantayon a mangsapul kadagiti pamay-an a mapalawatayo ti panagserbitayo ken Jehova? Siempre, saan! Masapul a mangaramidtayo kadagiti naespirituan a kalat a makatulong tapno nalalaingtayo a mangasaba ken mangisuro ken ad-adda a matulongantayo dagiti kakabsat. Maragpattayo dagita no nainsiriban ken sieemma nga agpokustayo a tumulong iti sabsabali imbes nga iti bagitayo.​—Prov. 11:2; Ara. 20:35.

15. Ania ti dadduma a kalat a makatulong kenka nga agbalin a naragragsak?

¹⁵ Ania dagiti kalat a mabalinmo a ragpaten? Agpatulongka ken Jehova tapno maammuam. (Prov. 16:3; Sant. 1:5) Kabaelam kadi a ragpaten ti maysa kadagiti kalat a nadakamat iti  immuna a parapo iti daytoy nga artikulo​—ag-auxiliary wenno ag-regular pioneer, agserbi iti Bethel, wenno agboluntario iti panagibangon kadagiti pasilidad ti organisasion? Wenno baka kabaelam ti agsursuro iti baro a lengguahe tapno ad-adda a mairanudmo ti naimbag a damag wenno makapangasabaka iti sabali a lugar. Maammuam ti ad-adu pay maipapan kadagita a kalat no basaem ti kapitulo 10 ti libro nga Organisado a Mangaramid iti Pagayatan ni Jehova ken no makisaritaka kadagiti panglakayen iti kongregasionyo. * Bayat a ragragpatem dagiti kasta a kalat,  ad-adda a makita ti panagrang-aymo ket naragragsakka.

16. Ania ti mabalinmo nga aramiden no saanmo a maragpat ita ti maysa a kalat?

¹⁶ Ngem kasanon no saanmo pay a maragpat ita ti maysa kadagiti nadakamat itay a kalat? Mangpanunotka iti sabali a kalat a kabaelam a ragpaten. Usigentayo dagiti sumaruno a situasion.

17. Sigun iti 1 Timoteo 4:13, 15, ania ti ikagumaan nga aramiden ti maysa a kabsat a lalaki tapno agbalin a nalalaing a mannursuro?

¹⁷ Basaen ti 1 Timoteo 4:13, 15. No maysaka a bautisado a kabsat a lalaki, mabalin nga ikagumaam a parang-ayen ti abilidadmo nga agpalawag ken mangisuro. Apay? Gapu ta no “ipamaysam nga asikasuen” ti panagbasa, panagpalawag, ken panangisurom, agbalinka a bendision kadagiti dumdumngeg kenka. Ikagumaam nga adalen ken iyaplikar ti amin a punto a nailawlawag iti broshur nga Agbalin a Nalaing nga Agbasa ken Mangisuro. Saggaysaem nga adalen dagiti punto, praktisem a naimbag dagita iti balayyo, ken iyaplikarmo dagiti naadalmo iti palawagmo. Damagem ti suhestion ti katulongan a mamalbalakad wenno ti dadduma a panglakayen a “napinget iti panagsao ken panangisuro.” * (1 Tim. 5:17) Saanka laeng nga agpokus no kasanom nga iyaplikar dagiti leksion iti broshur, no di ket tulongam met dagiti agdengdengngeg a mangpabileg iti pammatida wenno mangyaplikar iti nasursuroda. No aramidem dayta, naragragsakka ken dagiti dumdumngeg kenka.

18. Ania ti makatulong kadatayo a mangragpat kadagiti kalattayo iti ministerio?

¹⁸ Naibilin kadatayo amin ti trabaho a panangasaba  ken panagaramid iti adalan. (Mat. 28:19, 20; Roma 10:14) Kayatmo kadi a pasayaaten dagiti abilidadmo iti daytoy nakapatpateg a trabaho? Mangaramidka kadagiti espesipiko a kalat bayat nga ad-adalem ken iyap-aplikarmo dagiti nasursurom iti broshur a Mangisuro. Adda dagiti kanayonan a praktikal a suhestion a masarakam iti Panagbiag ken Ministeriotayo kas Kristiano—Workbook iti Gimong ken kadagiti video a pagtuladan a presentasion a maipabuya iti gimong iti tengnga ti lawas. Padasem ti nadumaduma nga ideya tapno makitam ti epektibo iti teritoriayo. No iyaplikarmo dagitoy a suhestion, agbalinka a nalalaing a mannursuro ken sigurado a mariknam ti awan kaaspingna a ragsak.​—2 Tim. 4:5.

19. Kasanom a mapatanor dagiti Nakristianuan a kualidad?

¹⁹ Dimo liplipatan a ti maysa a kapatgan a kalat ket ti panangpatanormo kadagiti Nakristianuan a kualidad. (Gal. 5:22, 23; Col. 3:12; 2 Ped. 1:5-8) Kasanom a maaramidan dayta? Kas pagarigan, mabalin a kayatmo a pabilgen ti pammatim. Mabalin a mangbasaka kadagiti artikulo iti publikasiontayo a mangipaay kadagiti praktikal a suhestion tapno mapabileg ti pammatim. Sigurado a magunggonaanka no buyaem dagiti paset ti binulan a programa ti JW Broadcasting^® maipapan kadagiti kakabsat a nangipakita iti naisangsangayan a pammati bayat a mapaspasaranda ti nadumaduma a pakarigatan. Kalpasanna, usigem no kasanom a matulad ti pammatida.

20. Ania ti aramidentayo tapno naragragsaktayo ken maksayan ti pannakaupaytayo?

²⁰ Sigurado a kayattayo amin nga ad-adu ti maaramidantayo para ken Jehova ngem iti agdama a maaramidantayo. Iti baro a lubong ti Dios, naan-anayton a makapagserbitayo kenkuana. Kabayatanna, gundawayantayo ti amin nga oportunidad a silulukat kadatayo. Iti kasta, naragragsaktayo ken makissayan ti pannakaupaytayo. Kapatgan iti amin, maipadayag ken maidaydayawtayo ni Jehova, ti ‘naragsak a Diostayo.’ (1 Tim. 1:11) Naragsaktayo koma ngarud kadagiti pribilehio nga adda kadatayo!